1 Ac pwacyena, pwacyena, Nga fahk nuh suwos lah oasr sip sahyac nuhtihk, ma tiac muhta fin acn se inge, tiac pac ma fin acn Jerusalem, tiac pac ma ke kuhtwena ipin acn ma raunweack acn ma Nga tuh luti we.

2 Tuh elos suc Nga sramsramkihn uh pa elos suc soenna lohng puhsrwek; Nga tiac pac ke kuhtwena pacl ahkkahlwemyeyuc sifacna nuh selos.

3 Tuhsruhk Nga eis sie masap sin Pahpah tuh Nga in som nuh yohrohlos, ac tuh elos fah lohng puhsrwek, ac fah oacwaclah inmahsrlon sip nuhtihk, tuh in kuh in oasr u sefanna ac mwet shepherd sefanna; ke ma inge Nga som in ahkkahlwemyeyuc sifacna nuh selos.

4 Ac Nga sapkihn kowos tuh kowos fah suhmuhslah kahs inge tukun Nga som, tuh fin mwet Luhk fin acn Jerusalem, elos suc tuh liyeyuc ac tuh wiyuc ke orekma Luhk, tiacna siyuck sin Pahpah ke Inek, tuh elos in kuh in eis sie etwacack keiwos ke Nguhn Muhtahl, ac oacyacpac ke sruf sahyac suc elos tiac etuh kac, tuh mwe fahk inge ma kowos fah suhmuhslah ac fah karihngihnyuckyang ac fah ahkkahlwemyeyuck nuh sin mwet Gentile, tuh ke fohnlah luhn mwet Gentile, mwet luhlah luhn fihtac lalos, suc fah fahsrelihk nuh fin facluh ke srihpen suhlahlahlfongi lalos, elos in kuh in utuckuh, kuh in kuh in utuckuh nuh ke sie etwacack Keik, Mwet in Molwelah lalos.

5 Ac na Nga fah oracloseni liki lacfahl ahkosr fin facluh; ac na Nga fah ahkpwacyei wuhlweacng se ma Pahpah El tuh oraclah nuh sin mwet nuhkwewa luhn mwet Israel.

6 Ac insewowo mwet Gentile, ke srihpen luhlahlfongi lalos Keik, ac ke Nguhn Muhtahl, suc fahkwack nuh selos Keik ac ke Pahpah.

7 Liye, ke srihpen luhlahlfongi lalos Keik, Pahpah El fahk, ac ke srihpen suhlahlahlfongi lowos, O mwet Israel, ke lwen sahflah ma pwacye uh fah tuhkuh nuh yurun mwet Gentile, tuh fohnlah luhn ma inge ac fah ahkkahlwemyeyuck nuh selos.

8 Tuhsruhk we, Pahpah El fahk, nuh selos suc suhlahlahlfongi sin mwet Gentile—finne elos tuhkuh nuh fin acn se inge, ac ukwacack mwet Luhk suc pa mwet Israel; ac mwet Luhk suc pa mwet Israel tuh lihsyucklac luhkwelos, ac tuh longyucki ye niyaclos;

9 Ac ke srihpen pahkotwen luhn Pahpah nuh sin mwet Gentile, ac oacyacpac nuhnuhnkuh luhn Pahpah nuh fin mwet Luhk suc pa mwet Israel, pwacyena, pwacyena, Nga fahk nuh suwos, lah tukun ma inge nuhkwewa, ac Nga tuh oruh mwet Luhk suc pa mwet Israel in srihngihlyuck, ac in ahkkweokyeyuck, ac in acnwucki, ac in lihsyucklac luhkwelos, ac in eklac sruhngwacyuck selos, ac in eklac mwe isruhnyuck ac ahksruhksruhkyeyuck inmahsrlolos—

10 Ac ohinge Pahpah El sapkihn tuh Nga in fahk nuh suwos: Ke lwen se ma mwet Gentile elos fah oruh ma koluk lain wosasuc Luhk, ac fah sruhnga fohnlah luhn wosasuc Luhk, ac fah pihsryak nuh lucng ke insefuhlwact yohk liki na muhtuhnfacl nuhkwewa, ac yohk liki na mwet nuhkwewa fin facluh nohfohn, ac fah sesseslah ke kain in kikiacp nuhkwewa, ac ke kuhtasrihk, ac ke lokoalok, ac kain in ohiyac wosounkacs nuhkwewa, ac ahkmas, ac orekma kuhtasrihk luhn mwet kol alu, ac orek kosro, ac ma sruhngwacyuck lukmac; ac elos fin oruh ma ingacn nuhkwewa, ac fah sruhnga fohnlah luhn wosasuc Luhk, liye, Pahpah El fahk, Nga fah eislah fohnlah luhn wosasuc Luhk liki inmahsrlolos.

11 Ac na Nga fah esam wuhlweacng Luhk ma Nga tuh oraclah nuh sin mwet Luhk, O mwet Israel, ac Nga fah acse wosasuc Luhk nuh yohrohlos.

12 Ac Nga fah ahkkahlwemye nuh suwos, O mwet Israel, lah ac fah wacngihn kuh luhn mwet Gentile fowos; tuhsruhk Nga fah esam wuhlweacng Luhk nuh suwos, O mwet Israel, ac kowos fah tuhkuh nuh ke etwacack ke fohnlah luhn wosasuc Luhk.

13 Tuhsruhk mwet Gentile elos fin auliyak ac fohlohkoh nuh Yuruk, Pahpah El fahk, liye elos fah oacwaclah inmahsrlon mwet Luhk, O mwet Israel.

14 Ac Nga fah tiac lwelah mwet Luhk, suc pa mwet Israel, in som nuh inmahsrlolos, ac longuhlosi nuh ten, Pahpah El fahk.

15 Tuhsruhk elos fin tiac forma nuh Yuruk, ac porongo puhsrwek, Nga fah lwelah elos, ahok, Nga fah lwelah mwet Luhk, O mwet Israel, tuh elos in som nuh inmahsrlolos, ac fah longuhlosi nuh ten, ac elos fah oacna sohl ma wacngihnlac emah, ac ke pacl sac fahlac wacngihnlac srihpac tuhsruhk in sisilac, ac in longyucki ye nien mwet Luhk, O mwet Israel.

16 Pwacyena, pwacyena, Nga fahk nuh suwos, ohinge Pahpah El sapkihn nuh Sihk—tuh Nga in sang nuh sin mwet inge acn se inge in mwe usru lalos.

17 Ac na kahs lal mwet pahluh Isaiah ac fah ahkpwacyeiyucklac, ma fahk:

18 Mwet san ac fah sasa; tuhkweni sasa elos fah on, tuh elos fah liye ke muhtahlos sifacna ke Leum El fah sifilpac use Zion.

19 Ngihsyak ke engan, tuhkweni on, kowos acn muhsahllah fin acn Jerusalem; tuh Leum El ahkwoye mwet Lal, El molwelah acn Jerusalem.

20 Leum El ahkkahlwemye paho muhtahl Lal ye muhtuhn muhtuhnfacl nuhkwewa; ac acn nuhkwewa fin facluh ac fah liye molwelah luhn God.