1 Ac tukun ma inge ke Jisus El sapkihn mwet tuhma lutlut Lal tuh elos in use kuhtuh puhret ac wine nuh Yohrohl.

2 Ac ke elos som in eis puhret ac wine, El sapkihn un mwet pucspucs sac tuh elos in muhta nuh ten fin fohk uh.

3 Ac ke mwet tuhma lutlut ah us tuhkuh puhret ac wine, El eis puhret uh ac kuhnswelihk ac ahkinsewowoye; ac El sang nuh sin mwet tuhma lutlut ac sapkihn tuh elos in ipeis.

4 Ac ke elos ipeis ac sesseslah, El sapkihn tuh elos in sang nuh sin un mwet pucspucs sac.

5 Ac ke un mwet pucspucs sac ipeis ac sesseslah, El fahk nuh sin mwet tuhma lutlut: Liye ac fah oasr sie akmuhsralah inmahsrlowos, ac Nga fah sang nuh sel kuh tuh elan fah kuhnswelihk puhret ac ahkinsewowoye ac sang nuh sin mwet ke alu Luhk, nuh selos nuhkwewa suc fah luhlahlfongi ac pacptaislac ke Inek.

6 Ac ma se inge kowos fah liyacacng in oruh pacl nuhkwewa, oacna ke Nga tuh oruh, finne oacna ke Nga kuhnswelihk puhret ac ahkinsewowoye ac usot nuh suwos.

7 Ac ma se inge kowos fah oruh in esam monuk, suc Nga tuh ahkkahlwemye nuh suwos. Ac ma se inge fah sie mwe luhlahlfongi nuh sin Pahpah lah kowos esamyuc pacl nuhkwewa. Ac kowos fin esamyuc pacl nuhkwewa kowos fah eis Nguhnihk in wi kowos.

8 Ac tukun ma inge ke El fahklah kahs inge, El sapkihn mwet tuhma lutlut Lal tuh elos in eis wine ke kuhp ac nihm kac, ac tuh elos in oacyacpac sang nuh sin un mwet pucspucs sac tuh elos in kuh in nihm kac.

9 Ac tukun ma inge elos oruh oacna, ac tuh nihm kac ac sesseslah; ac elos sang nuh sin un mwet pucspucs sac, ac elos tuh nihm, ac elos sesseslah.

10 Ac ke mwet tuhma lutlut elos oraclah ma se inge, Jisus El fahk nuh selos: Kowos insewowo tuh ma se inge suc kowos oraclah, tuh ma se inge ahkpwacyeiye masap Luhk, ac ma se inge ahklohye nuh sin Pahpah lah kowos insese in oruh ma suc Nga sapkihn nuh suwos.

11 Ac ma se inge kowos fah oruh pacl nuhkwewa nuh selos suc auliyak ac pacptaislac ke Inek; ac kowos fah oruh ma se inge in esam srah Luhk, ma kahklah Keik keiwos, tuh kowos in kuh in ahklohye nuh sin Pahpah lah kowos esamyuc pacl nuhkwewa. Ac kowos fin esamyuc pacl nuhkwewa kowos fah eis Nguhnihk in wi kowos.

12 Ac Nga usot nuh suwos sie masap tuh kowos in oruh ma inge. Ac kowos fin oruh ma inge pacl nuhkwewa kowos insewowo, tuh kowos muhsahiyuckyak fin yot Luhk.

13 Tuhsruhk kuhtwena mwet inmahsrlowos suc fah oruh yohk liki kuh srihk liki ma inge tiacna muhsahiyuckyak fin yot Luhk, tuhsruhk muhsahiyuckyak fin sie pwelucng puhkpuhk; ac ke af kahklac, ac sronot tuhkuh, ac eng uh uk, ac srihngihl faclos, elos fah puhtatlac, ac motonoac luhn hell ikacklah ahkolah in eisaclos.

14 Ke ma inge kowos insewowo kowos fin liyacacng masap Luhk, ma Pahpah El sapkihn nuh Sihk tuh Nga in usot nuh suwos.

15 Pwacyena, pwacyena, Nga fahk nuh suwos, kowos enenuh in karuhnguhnwacng ac pruhe pacl nuhkwewa, fin tiac kowos ac srihfeyuck sin devil, ac kowos kolyucklac srohoh sel.

16 Ac oacna ke Nga pruhe inmahsrlowos ohinge kowos fah pruhe ke alu Luhk, inmahsrlon mwet Luhk suc auliyak ac pacptaislac ke Inek. Liye Nga pa kahlwem; Nga oakiyac sie mwe srihkasrak nuh suwos.

17 Ac tukun ma inge ke Jisus El fahklah kahs inge nuh sin mwet tuhma lutlut Lal, El sifilpac forlah nuh sin un mwet pucspucs sac ac fahk nuh selos:

18 Liye, pwacyena, pwacyena, Nga fahk nuh suwos, kowos enenuh in karuhnguhnwacng ac pruhe pacl nuhkwewa kowos in muh tiac sun mwe sruhf; tuh Setuhn el kena in eis kowos, tuh elan kuh in srekowoslac oacna wheat uh.

19 Ke ma inge kowos enenuh in pruhe pacl nuhkwewa nuh sin Pahpah ke Inek;

20 Ac kuhtwena ma kowos fah siyuck sin Pahpah ke Inek, ma pwacye, luhlahlfongi lah kowos fah eis, liye ac fah utuckot nuh suwos.

21 Pruhe wi sucu lowos nuh sin Pahpah, pacl nuhkwewa ke Inek, tuh muhtwacn kiyowos ac tuhlihk nuhtuwos in kuh in ahkinsewowoyeyuck.

22 Ac liye, kowos fah toeni nuh sie pacl pucspucs; ac kowos fah tiac sruhnga kuhtwena mwet in tuhkuh nuh yuruwos ke kowos fah toeni nuh sie, tuhsruhk lwelah nuh selos tuh elos in kuh in tuhkuh nuh yuruwos ac nimet sruhngwaclos;

23 Tuhsruhk kowos fah pruhe kaclos, ac fah tiac luhsuhltahllah; ac elos fin tuhkuh nuh yuruwos pacl pucspucs kowos fah pruhe kaclos nuh sin Pahpah, ke Inek.

24 Ke ma inge, sralwack kahlwem lowos tuh in kuh in tohlwack facluh. Liye Nga pa kahlwem se ma kowos fah sralwack—ma kowos liye Nga oruh. Liye kowos intein lah Nga pruhe nuh sin Pahpah, ac kowos nuhkwewa liye.

25 Ac kowos liye lah Nga sapkihn tuh in wacngihn kuhtwena suwos in som, tuhsruhk Nga sapkihn tuh kowos in tuhkuh nuh Yuruk, tuh kowos in kuh in puhla ac liye; ohinge kowos fah oruh nuh sin mwet facluh; ac kuhtwena mwet suc kuhnahoslah masap se inge lwelah tuh elan kolyucklac nuh ke mwe sruhf.

26 Ac na tukun ma inge ke Jisus El fahklah kahs inge, El sifilpac furoklah muhtahl nuh yurun mwet tuhma lutlut suc El tuh sulaclah, ac fahk nuh selos:

27 Liye pwacyena, pwacyena, Nga fahk nuh suwos, Nga usot nuh suwos siepac masap, ac na Nga enenuh in som nuh yurun Pahpah tuhmuhk tuh Nga in kuh in ahkpwacyelah masap sahyac ma El acse nuh Sihk.

28 Ac inge liye, pa inge masap se ma Nga acsot nuh suwos, tuh kowos fah tiac lwelah kuhtwena mwet in ipeis ke monuk ac srah Luhk ke el etuh lah el tiacna nwacsnwacs, ke kowos oruh kuhfa luhn Leum;

29 Tuh kuhtwena mwet suc mongo ac nihm monuk ac srah Luhk a tiacna nwacsnwacs el ipeis ac nihm lihsyucklac luhn nguhnal; ke ma inge kowos fin etuh lah sie mwet el tiacna nwacsnwacs in mongo ac nihm ke monuk ac srah Luhk kowos fah tiac lwelah elan ipeis.

30 Ne ohinge, kowos fah tiacna luhsuhllah liki inmahsrlowos, tuhsruhk kowos fah sang kahsruh nuh sel ac fah pruhe kacl nuh sin Pahpah, ke Inek; ac el fin auliyak ac pacptaislac ke Inek, na fah kowos eisacl, ac fah sang nuh sel ke monuk ac srah Luhk.

31 Tuhsruhk el fin tiac auliyak el fah tiac oacwaclah inmahsrlon mwet Luhk, tuh elan tiac kuhnahoslah mwet Luhk, tuh liye Nga etuh sip nuhtihk, ac elos oacwaclah.

32 Ne ohinge, kowos fah tiac luhsuhllah liki iwen lohlngohk, kuh ke acn in alu lowos, tuh nuh sin kain mwet se inge kowos fah tahfwelah in luti; tuh kowos tiac etuh fin elos fah fohlohk ac auliyak, ac tuhkuh nuh Yuruk ke inse pwacye, ac Nga fah unweloslac; ac kowos fah inkacnek in acse molwelah nuh selos.

33 Ke ma inge, liyacacng mwe fahk inge suc Nga sapkihn nuh suwos tuh kowos in tiac tuhkuh nuh ye nuhnuhnkuh; tuh we nuh sel suc Pahpah El nuhnuhnkuh.

34 Ac Nga usot nuh suwos masap inge ke srihpen akuhkuhin ma oasr inmahsrlowos. Ac kowos insewowo fin wacngihn akuhkuhin inmahsrlowos.

35 Ac inge Nga som nuh yohrohl Pahpah, ke srihpen wo fal tuh Nga in som nuh yohrohl Pahpah ke srihpowos.

36 Ac tukun ma inge ke Jisus El ahksahfyelah mwe fahk inge, El kahl ke pahol mwet tuhma lutlut suc El tuh sulaclah, kais sie sin sie, ne ke na El kahluhltahluh nohfohn, ac sramsram nuh selos ke El kahluhlos.

37 Ac un mwet pucspucs sac tiacna lohng kahs ma El fahk ah, ke ma inge elos tiacna fahkwack; tuhsruhk mwet tuhma lutlut ah fahkwack kac lah El sang nuh selos kuh in sang Nguhn Muhtahl. Ac Nga fah ahkkahlwemye nuh suwos inge fahlac lah ma sihmlac se inge pwacye.

38 Ac tukun ma inge ke Jisus El kahluhltahluh nohfohn, oasr sie puhkuhnyeng tuhkuh ac sunyac un mwet pucspucs sac oruh elos tiac kuh in liyacl Jisus.

39 Ac ke elos tuh sunyucki El som luhkwelos, ac sowack nuh inkuhsrao. Ac mwet tuhma lutlut elos liye ac tuh fahkwack kac lah El sifilpac sowack nuh inkuhsrao.