1 Mo i bin hapen se Jisas i givim oda long ol disaepol blong hem se oli mas karem sam bred mo waen i kam long hem.

2 Mo taem we oli go blong karem bred mo waen, hem i givim oda long grup blong pipol ia se oli mas sidaon long graon.

3 Mo taem we ol disaepol oli kam wetem bred mo waen, hem i tekemaot bred mo i brekem mo blesem; mo hem i givim long ol disaepol mo i givim oda se oli mas kakae.

4 Mo afta we oli kakae mo oli fulap, hem i givim oda se oli mas givim long grup blong pipol ia.

5 Mo taem we grup blong pipol ia oli kakae mo oli fulap, hem i talem long ol disaepol: “Luk bae mi odenem wan long medel blong yufala, mo long hem, bae mi givim paoa blong bae hem i brekem bred mo blesem bred mo givim bred long ol pipol blong jos blong mi, long olgeta evriwan we bae i biliv mo kasem baptaes long nem blong mi.

6 Mo samting ia bae yufala i lukaot gud blong mekem oltaem, semmak olsem we mi bin mekem, semmak olsem we mi bin brekem bred mo blesem bred mo givim long yufala.

7 Mo samting ia bae yufala i mekem, blong tingbaot bodi blong mi, we mi bin soem long yufala. Mo samting ia, bae i wan testemoni long Papa se yufala i stap tingbaot mi oltaem. Mo sapos yufala i tingbaot mi oltaem, bae yufala i gat Spirit blong mi i stap wetem yufala.”

8 Mo i bin hapen se afta we hem i talem ol toktok ia, hem i givim oda long ol disaepol blong hem se oli mas tekem waen long kap mo dring long hem, mo se oli mas givim tu long grup blong pipol ia blong oli save dring long hem.

9 Mo i bin hapen se oli mekem olsem, mo oli dring long hem mo oli kam fulap; mo oli givim long grup blong pipol ia, mo oli dring, mo oli kam fulap.

10 Mo afta we ol disaepol oli bin mekem samting ia, Jisas i talem long olgeta: “Mi blesem yufala from samting ia we yufala i bin mekem, from samting ia i mekem ol komanmen blong mi i hapen, mo samting ia i stap witnes long Papa se yufala i glad blong mekem ol samting we mi bin talem long yufala.

11 Mo samting ia bae yufala i mekem oltaem long olgeta we i sakem sin mo kasem baptaes long nem blong mi, mo bae yufala i mekem samting ia blong tingbaot blad blong mi, we mi bin mekem i ron from yufala, blong mekem se yufala i save witnes long Papa se yufala i stap tingbaot mi oltaem. Mo sapos yufala i stap tingbaot mi oltaem, bae yufala i gat Spirit blong mi i stap wetem yufala.

12 Mo mi givim long yufala wan komanmen se yufala i mas mekem ol samting ia. Mo sapos yufala i mekem ol samting ia, oltaem bae mi blesem yufala, from yufala i bildim yufala long strong ston blong mi.

13 Be huia long yufala we bae i mekem kolosap lelebet o moa long samting ia, oli no bildimap olgeta long strong ston blong mi, be oli bildimap olgeta andap long wan fandesen blong sanbij; mo taem we ren i foldaon, mo ol wota oli kam antap, mo ol win oli blo, mo kilim olgeta, bae oli foldaon, mo ol get blong hel oli open rere blong tekem olgeta.

14 From hemia, bae yufala i kasem blesing sapos yufala i obei ol komanmen blong mi we Papa i bin givim oda long mi se mi mas givim long yufala.

15 I tru, i tru, mi talem long yufala, yufala i mas lukaot gud mo prea oltaem, nogud se devel i temtem yufala, mo hem i lidim yufala i gowe olsem prisena.

16 Mo olsem we mi bin prea long medel blong yufala, i semmak bae yufala i prea long jos blong mi, wetem ol pipol blong mi we oli sakem sin mo i kasem baptaes long nem blong mi. Luk mi mi laet; mi bin mekem wan eksampol blong yufala.”

17 Mo i bin hapen se taem we Jisas i talem ol toktok ia long ol disaepol blong hem, hem i tanem hem bakegen i go long grup blong pipol ia mo i talem long olgeta:

18 “Luk, i tru, i tru, mi talem long yufala, yufala i mas lukaotgud mo prea oltaem from nogud se yufala i stat blong foldaon long temtesen; from Setan i wantem blong holemtaet yufala, blong mekem se hem i save sevsevemaot klinim yufala olsem wit.

19 From hemia, nao, yufala i mas prea oltaem long Papa long nem blong mi;

20 Mo eni samting we bae yufala i askem long Papa long nem blong mi we i raet, mo bilivim se bae yufala i kasem, luk bae hem i givim long yufala.

21 Prea long ol famli blong yufala long Papa, evri taem long nem blong mi, blong mekem se ol waef mo ol pikinini blong yufala oli save kasem blesing.

22 Mo luk, yufala i mas kam tugeta plante; mo yufala i no mas blokem eni man blong kam long yufala, taem we yufala i kam tugeta, be letem olgeta blong oli save kam long yufala mo no blokem olgeta;

23 Be yufala i mas prea from olgeta, mo no mas sakem olgeta aot; mo sapos i olsem se oli kam long yufala plante, yufala i mas prea from olgeta long Papa long nem blong mi.

24 From hemia, leftemap laet blong yufala blong mekem se i save saen long wol. Luk mi mi laet we yufala i mas leftemap—ol samting we yufala i bin luk mi mi mekem. Luk yufala i luk se mi bin prea long Papa, mo yufala evriwan i bin witnes.

25 Mo yufala i luk se mi bin givim oda se i no gat wan long yufala i mas gowe, be mi bin givim oda se yufala i mas kam long mi, blong mekem se yufala i save filim mo luk; we bae yufala i mekem semmak olsem long wol; mo eni man we i brekem komanmen ia i letem hemwan blong Setan i lidim hem i go long temtesen.”

26 Mo nao i bin hapen se taem we Jisas i talem ol toktok ia, hem i tanem ol ae blong hem bakegen i go long ol disaepol we hem i bin jusum, mo i talem long olgeta:

27 “Luk i tru, i tru, mi talem long yufala, mi givim long yufala wan narafala komanmen, mo afta, mi mas go long Papa blong mi blong mi save mekem ol narafala komanmen we hem i bin givim long mi oli hapen.

28 Mo nao luk, hemia i komanmen we mi givim long yufala, se yufala i no mas letem eniwan we yufala i save se hem i no klin inaf, blong hem i tekem mo kakae mo dring mit mo blad blong mi taem we bae yufala i blesem mo pasem;

29 From eniwan we i kakae mit mo i dring blad blong mi taem hem i no klin inaf, hemwan, i stap kakae mo dring fasin blong devel i kontrolem sol blong hem; from hemia, sapos yufala i save se wan man i no klin inaf blong kakae mit mo dring blad blong mi, yufala i mas stopem hem.

30 Be, bae yufala i no mas sakem hem aot long medel blong yufala, be yufala i mas givhan long hem mo yufala i mas prea from hem long Papa, long nem blong mi; mo sapos i hapen se hem i sakem sin mo i kasem baptaes long nem blong mi, afta, bae yufala i tekem hem mo blesem mo pasem mit mo blad blong mi long hem.

31 Be sapos hem i no sakem sin, bae yufala i no mas kaontem hem wetem ol pipol blong mi, blong hem i no save prapa spolem gud ol pipol blong mi, from luk, mi save ol sipsip blong mi, mo mi kaontem olgeta.

32 Be, yufala i no mas sakem hem aot long ol haos blong prea blong yufala, o long ol ples blong wosip blong yufala, from olgeta olsem ia, bae yufala i gohed blong givhan long olgeta; from yufala i no save sapos bae oli kambak mo sakem sin, mo kam long mi wetem evri tingting blong hat mo bae mi mekem olgeta i kam oraet; mo bae yufala i stap olsem ol rod blong karem fasin blong sevem man i go long olgeta.

33 From hemia, obei ol komanmen ia we mi bin talem long yufala, blong mekem se yufala i no kasem panis; from sore tumas long hem we Papa i panisim.

34 Mo mi givim yufala ol komanmen ia from ol rao we oli bin stap long medel blong yufala. Mo bae yufala i kasem blesing sapos yufala i no gat ol rao long medel blong yufala.

35 Mo naoia mi go long Papa, from i gat nid se mi mas go long Papa from yufala.”

36 Mo i bin hapen se taem we Jisas i mekem wan en blong ol toktok ia, hem i tajem wetem han blong hem ol disaepol we hem i bin jusum, wan afta narawan, kasem taem we hem i tajem olgeta evriwan, mo hem i toktok long olgeta long taem we hem i stap tajem olgeta.

37 Mo grup blong ol pipol ia i no harem ol toktok we hem i talem, from hemia oli no bin testifae; be ol disaepol oli bin testifae se hem i bin givim long olgeta paoa blong givim Tabu Spirit. Mo bae mi soem long yufala afta long taem ia, se histri ia i tru.

38 Mo i bin hapen se, taem we Jisas i tajem olgeta evriwan, wan klaod i kam mo i kavremap grup blong pipol ia, blong mekem se oli no save luk Jisas.

39 Mo long taem we klaod i kavremap olgeta, hem i aot long olgeta mo i go antap long heven. Mo ol disaepol oli bin luk mo oli bin witnesem we hem i go antap bakegen long heven.