1 Na tukun ma inge yac ahkyucnguhul ac sie somlah ac yac ahkonfoko liki pacl se ma Lehi el som liki acn Jerusalem; ac ke yac se inge Lachoneus el pa mwet nuhnuhnkuh fuhlwact ac kafuhnah fin acn uh.

2 Ac Nephi, wen nahtuhl Helaman, el som liki acn lal Zarahemla, el sang nuh sin wen nahtuhl suc pa Nephi, suc pa wen mahtuh se emet nahtuhl, in karihngihn plwet prahs, ac ma sihmlac nuhkwewa ma tuh karihngihnyuckyang, ac ma nuhkwewa ma karihngihnyuckyang in muhtahl e ke na tuyak lal Lehi liki acn Jerusalem.

3 Na el som liki acn uh, ac acn ma el som nuh we, wacngihn mwet etuh; ac wen nahtuhl suc pa Nephi el tuh aholuhl in karuhnguhnwacng ma sihmlac, ahok, ma sihmlac luhn mwet inge.

4 Ac tukun ma inge ke muhtwacwacackiyacn yac ahkyucnguhul ac luo, liye, kahs in pahluh luhn mwet pahluh muhtwacwacack in ahkpwacyeiyuck liki met ah; tuh muhtwacwacack in oasr akucl wolacna ac ma usrnguck wolacna orek inmahsrlon mwet uh.

5 Tuhsruhk oasr mwet suc muhtwacwacack in fahk lah pacl uh somlah tari nuh ke kahs uh in ahkpwacyeiyuck, ma tuh sruhmuhnyuck sel Samuel, suc mwet Laman.

6 Ac elos muhtwacwacack in engan ke mwet wiyaclos, fahk: Liye pacl uh somlah, ac kahs lal Samuel tiacna ahkpwacyeiyucklac; ke ma inge, engan lowos ac luhlahlfongi lowos ke ma se inge wacngihn srihpac.

7 Ac tukun ma inge elos tuh oraclah sie fohs luhlahp fin acn ah nohfohn; ac mwet suc luhlahlfongi elos muhtwacwacack in arulacna ahsor, tuh fin ke kuhtwena ohiyac ma suc tuh sruhmuhnyuck ah sahp ac tiac sikyak.

8 Tuhsruhk liye, elos tuh insacnweacng in tuhpan nuh ke lwen se ac fong se ac lwen se ma ac fah oacna sie lwen ma oacna in muh ac wacngihn fong, tuh elos in kuh in etuh lah luhlahlfongi lalos tiacna wacngihn srihpac.

9 Na tukun ma inge oasr sie lwen ma tuh srisrilac sin mwet suhlahlahlfongi, tuh elos nuhkwewa suc luhlahlfongi ke facsin ingacn enenuh in acnwucki fin akucl uh tiacna sikyak, ma tuh utuckuh sel mwet pahluh Samuel.

10 Na tukun ma inge ke Nephi, wen nahtuhl Nephi, el liye ma koluk se inge luhn mwet lal, insiacl arulacna ahsor.

11 Ac tukun ma inge el som ac epahsrlah nuh infohk uh, ac pruhe upac nuh sin God lal ke mwet lal, ahok, elos suc ac kuhnausyucklac ke srihpen luhlahlfongi lalos ke facsin luhn pahpah tuhmwaclos.

12 Ac tukun ma inge el pruhe upac nuh sin Leum ke lwen na fohn sac; ac liye, puhsrwen Leum tuhkuh nuh yohrohl, fahk:

13 Sruhkwack sifom ac enganwack; tuh liye, pacl uh apkuhran me, ac ke fong se inge akucl uh ac fah utuckuh, ac litu Nga tuhkuh nuh fin facluh, in ahkkahlwemye nuh sin mwet nuhkwewa lah Nga fah ahkpwacyeiye ma nuhkwewa ma Nga oruh in sruhmuhnyuck ke oalin mwet pahluh muhtahl Luhk.

14 Liye, Nga tuhkuh nuh yurun mwet Luhk, in ahkpwacyeiye ma nuhkwewa ma Nga tuh ahkkahlwemye nuh sin tuhlihk nuhtin mwet e ke na pwelucng luhn facluh, ac in oruh kena, kwewana luhn Pahpah ac luhn Wen—luhn Pahpah ke srihpuck, ac luhn Wen ke srihpen monuk. Ac liye, pacl uh apkuhran me, ac fong se inge akucl uh ac fah utuckuh.

15 Ac tukun ma inge kahs ma tuhkuh nuh yohrohl Nephi ah ahkpwacyeiyucklac, in fal oacna ke ma inge tuh sruhmuhnyuck ah; tuh liye, ke tihli luhn faht ah wacngihn lohsr; ac mwet uh muhtwacwacack in lut ke srihpen wacngihn lohsr ke fong uh tuhkuh.

16 Ac oasr mwet pucspucs, suc tuh tiacna luhlahlfongi kahs luhn mwet pahluh, suc puhtatlac nuh infohk uh ac oacna in muh elos misac, tuh elos etuh lah plwacn yohk ke kuhnausyucklac ma elos tuh oraclah nuh selos suc luhlahlfongi ke kahs luhn mwet pahluh ac tiac fahlac; tuh akucl ma tuh utuckuh ah sikyak tari.

17 Ac elos muhtwacwacack in etuh lah Wen nuhtin God El enenuh in sikme ke kihtin pacl; ahok, in ahkkahlwemye, mwet nuhkwewa fin facluh nohfohn ke lacfahl rohtoh nuh kuhtuhlacp, kwewana ke acn nuh acir ac ke acn nuh epang, elos arulacna lut oruh elos puhtatlac nuh infohk uh.

18 Tuh elos etuh lah mwet pahluh elos tuh fahkwack ke ma inge ke lusen yac pucspucs, ac lah akucl ma tuh utuckuh ah sikyak tari; ac elos muhtwacwacack in sahngweng ke srihpen ma koluk lalos ac suhlahlahlfongi lalos.

19 Ac tukun ma inge wacngihn lohsr ke fong fohn sac, tuhsruhk kahlwem oacna in muh infulwen lwen. Ac tukun ma inge faht ah sifilpac takwack ke litutacng, in fal nuh ke akwuck wo la; ac elos etuh lah pa inge lwen se ma Leum Elac isuslac, ke srihpen akucl ma tuh utuckuh ah.

20 Ac ma inge tuh ahkpwacyeiyucklac, ahok, ma nuhkwewa, ma srihsrihk nuhkwewa, in fal nuh ke kahs luhn mwet pahluh.

21 Ac tukun ma inge oacyacpac sie itu sasuc tuh sikyak, in fal nuh ke kahs uh.

22 Ac tukun ma inge ke pacl se inge fahlac muhtwacwacack in oasr kahs kikiacp ma osrwaclihk inmahsrlon mwet uh, sin Setuhn, in ahkkwekweye insiaclos, in oruh elos in tiac luhlahlfongi ke akucl ac ma usrnguck ma elos tuh liye; tuhsruhk finne ke kikiacp ac kuhtasrihk inge inkaiyacn mwet uh tuh luhlahlfongi, ac elos eklac forlah nuh sin Leum.

23 Ac tukun ma inge ke Nephi el som nuh inmahsrlon mwet uh, ac oacyacpac mwet pucspucs sahyac, pacptais nuh ke auliyak, ke ma inge oasr sie iyucklac yohk luhn ma koluk. Ac ohinge mwet uh muhtwacwacack in sifilpac mislac fin acn uh.

24 Ac wacngihn fohs, sahyacn na mwet puh suc muhtwacwacack in luti, srihke in ahkpwacyeiye ke ma suhmuhslah lah tilac yohk srihpac in liyacacng masap lal Moses. Na ke ma se inge elos tuh tahfonglac, tuh elos tiacna kahlwem ke ma suhmuhslah.

25 Tuhsruhk tukun ma inge tiac paht tohkoh elos eklac wolac, ac etwacack ke tahfonglac ma elos tuh oasr kac, tuh ma inge ahkkahlwemyeyuck nuh selos lah masap uh soenna ahkpwacyeiyucklac, ac lah ma inge enenuh in ahkpwacyeiyucklac ke ohiyac nuhkwewa; ahok, kahs uh tuhkuh nuh faclos lah ma inge enenuh na in ahkpwacyeiyucklac; ahok, tuh sie sihm kuh sifac ac tiac sikyak ne ke na ma inge ahkpwacyeiyucklac; ke ma inge ke yac sepacna inge elos tuh utuckuh nuh ke sie etwacack ke tahfonglac lalos ac elos tuh fahkwack tahfonglac lalos.

26 Ac ohinge ke yac ahkyucnguhul ac luo sahflah, use pweng wo nuh sin mwet uh ke srihpen akucl ma tuh sikyak, in fal nuh ke kahs in pahluh luhn mwet pahluh muhtahl nuhkwewa.

27 Ac tukun ma inge yac ahkyucnguhul ac tolu tuh oacyacpac somlah ke mislac, sahyacn na mwet pihsrapasr lal Gadianton, suc muhta finohl ah, suc tuh puhseni na fin acn ah; tuh arulacna fokoko acn in monglac ac acn lukmac lalos tuh mwet uh koflah in kuhtanguhloslac; ke ma inge elos tuh oraclah ahkmas pucspucs, ac tuh oruh acnwuck yohk inmahsrlon mwet ah.

28 Ac tukun ma inge ke yac ahkyucnguhul ac ahkosr elos muhtwacwacack in puhseni na upac, ke srihpen oasr mwet lain pucspucs luhn mwet Nephi suc tuh kahinglac nuh yohrohlos, ma tuh oraclah ahsor yohk nuh sin mwet Nephi suc tuh muhta na fin acn ah.

29 Ac oacyacpac oasr sie srihpac in ahsor yohk inmahsrlon mwet Laman; tuh liye, oasr tuhlihk pucspucs nahtuhlos suc tuh kapkapwack ac fokokoi ke matwac, tuh elos kuh in sifacna lac, ac elos tuh kolyucklac sin kuhtuh mwet Zoram, ke kikiacp lalos ac kahs in ahkluhng lalos, in welah mwet pihsrapasr lal Gadianton ingoh.

30 Ac ohinge mwet Laman elos oacyacpac ahkkweokyeyuck, ac muhtwacwacack in muhnahslah ke luhlahlfongi ac suwohswohs lalos, ke srihpen ma koluk luhn fihlin mwet mahtuhyak.