1 Ma sa oo ina poloai atu o ia i le motu o tagata ma ona soo foi e ao ina o latou tuu le latou tatalo. Ma sa ia poloai atu ia te i latou ia latou le tuu le tatalo i o latou loto.

2 Ma sa ia poloaiina i latou ia latou tutulai ma tutu i luga i o latou vae. Ma sa latou tutulai ma tutu i luga i o latou vae.

3 Ma sa oo ina toe tofitofi e ia le areto ma faamanuia i ai, ma avatu i le au soo e aai ai.

4 Ma ina ua uma ona latou aai, sa ia poloaiina i latou ia latou tofitofi le areto, ma avatu i le motu o tagata.

5 Ma ina ua uma ona latou avatu i le motu o tagata sa ia avatu foi ia te i latou le uaina e feinu ai, ma poloaiina i latou e tatau ona latou avatu i le motu o tagata.

6 O lenei, sa leai se areto, po o se uaina, na aumai e le au soo, po o le motu o tagata;

7 Ae sa ia avatu moni lava ia te i latou le areto e aai ai, ma le uaina foi e feinu ai.

8 Ma sa ia fetalai atu ia te i latou: O ia o lē e ’ai i lenei areto ua’ai o ia i lo’u tino mo lona agaga; o ia o lē e inu i lenei uaina ua inu o ia i lo’u toto mo lona agaga; ma o le a le fia ’ai lava pe fia inu lona agaga, ae o le a faatumuina.

9 O lenei, ina ua uma ona aai ma feinu le motu uma o tagata, faauta, sa faatumulia i latou i le Agaga; ma sa latou alalaga faatasi i le leo e tasi, ma avatu le viiga ia Iesu, o lē na latou vaai ma faalogo i ai.

10 Ma sa oo ina ua uma ona avatu e i latou uma o le viiga ia Iesu, na ia fetalai mai ia te i latou: Faauta o lenei ua uma ona ou faia o le poloaiga lea na poloaiina ai a’u e le Tamā e faatatau i lenei nuu, o ē o se vaega o totoe o le aiga o Isaraelu.

11 Tou te manatua na ou tautala atu ia te outou, ma fai atu, pe a faataunuuina upu a Isaia—faauta ua tusia i latou, ua i ai i latou i o outou luma, o lea ia outou suesue i ai—

12 Ma e moni, e moni, ou te fai atu ia te outou, pe a faataunuuina i latou o le faataunuuina lava o le feagaiga lea na faia e le Tamā i lona nuu, o le aiga o Isaraelu.

13 Ma o le taimi lena o le a faapotopoto mai ai vaega o totoe, ia o le a faataapeapeina solo i luga o le fogaeleele, mai sasae ma mai sisifo, ma mai saute ma mai matu; ma o le a aumaia i latou i le malamalama o le Alii lo latou Atua, o lē ua togiolaina i latou.

14 Ma ua poloaiina a’u e le Tamā ia ou tuu atu ia te outou lenei laueleele, mo lo outou tofi.

15 Ma ou te fai atu ia te outou, afai e le salamo Nuuese pe a mavae le faamanuiaga lea o le a latou maua, pe a mavae ona latou faataapeapeina o ou tagata—

16 Ona o atu lea o outou, o ē o se vaega o totoe o le aiga o Iakopo, i totonu ia te i latou; ma o le a outou i ai i le totonugalemu o i latou o ē o le a toatele; ma o le a outou i ai i totonu ia te i latou e pei o se leona i totonu o manu o le vao, ma e pei o se leona taanoa i totonu o lafu o mamoe, o lē, afai e ui atu ai o ia o le a ia solia i lalo i latou ma saeia ninii, ma e leai se e mafai ona laveaiina.

17 O le a siitia a’e lo’u lima i luga o ou fili, ma o le a vavae ese ou fili uma.

18 Ma o le a ou faapotopoto faatasi o’u tagata e pei ona faapotopoto faatasi e se tagata ana fusi saito i luga o le fola.

19 Ona o le a ou faia o’u tagata o ē na osifeagaiga ai le Tamā, ioe, o le a ou faia ou seu ma uamea, ma o le a ou faia ou atigivae ma apamemea. Ma o le a e tuimomomoina tagata e toatele; ma o le a ou faapaiaina a latou vete mo le Alii, ma a latou mea mo le Alii o le lalolagi atoa. Faauta foi, o a’u lava o lē e faia ia mea.

20 Ma o le a oo mai, ua fetalai mai ai le Tamā, o le a tautau ifo i luga o i latou le pelu o lo’u faamasinotonu i lena aso; ma e vagana ai ua latou salamo o le a pa’ū ifo i luga o i latou, ua fetalai mai ai le Tamā, ioe, i luga lava o atunuu uma o Nuuese.

21 Ma o le a oo ina o le a ou faatumauina o’u tagata, o le aiga o Isaraelu.

22 Faauta foi, o le a ou faatumauina lenei nuu i lenei laueleele, e faataunuu ai le feagaiga na ou faia ma lo outou tamā o Iakopo; ma o le a avea ma se Ierusalema Fou. Ma o le a i ai i totonu o lenei nuu mana o le lagi; ioe, o le a Ou i ai i le lotolotoi o outou.

23 Faauta, o a’u o lē na fetalai i ai Mose, ua faapea mai: O le a faatulai a’e e le Alii le Atua se perofeta ia te outou mai o outou uso, e pei o a’u; ia outou faalogo ia te ia i soo se mea na te fai atu ai ia te outou. Ma o le a oo foi ina vavae ese mai totonu o le nuu soo se tasi o le a le faalogo i lena perofeta.

24 E moni ou te fai atu ia te outou, ioe, ma o perofeta uma mai ia Samuelu ma i latou o e na mulimuli mai, o le toatele o e na fetalai, na molimau uma ia te au.

25 Faauta foi, o outou o fanau a perofeta; ma o outou o lo le aiga o Isaraelu; ma o outou o lo le feagaiga lea na faia e le Tama ma o outou tamā, na fetalai atu ai ia Aperaamo: Ma o lau fanau o le a manuia ai aiga uma o le lalolagi.

26 Ua faatuina a’e a’u e le Tamā e muamua ia te outou, ma auina mai a’u e faamanuia ia te outou i le liliu ese o outou taitoatasi mai i ana amioletonu; ma o le pogai ona o outou o fanau o le feagaiga—

27 Ma pe a uma ona faamanuiaina o outou ona faataunuu ai lea e le Tamā le feagaiga lea na ia faia ma Aperaamo, fai mai: O lau fanau o le a manuia ai aiga uma o le lalolagi—i le liligi mai o le Agaga Paia e ala mai ia te a’u i luga o Nuuese, o se faamanuiaga lea i luga o Nuuese o le a faia ai i latou ia sili atu ona latou malolosi i luga o tagata uma, e oo i le faataapeapeina o lo’u nuu, o le aiga o Isaraelu.

28 Ma o le a avea i latou o se sasa i tagata o lenei laueleele. Ae ui i lea, pe a uma ona latou maua o le atoatoaga o la’u talalelei, ma afai latou te faamaaa o latou loto faasaga mai ia te a’u o le a ou faafoi atu a latou amioletonu i luga o o latou lava ulu, ua fetalai mai ai le Tamā.

29 Ma o le a ou manatua le feagaiga lea na ou faia ma lo’u nuu; ma sa ou osifeagaiga ma i latou o le a ou faapotopotoina faatasi i latou i lo’u lava taimi, ma o le a ou toe tuu atu ia te i latou le laueleele o o latou tamā mo lo latou tofi, o le laueleele lea o Ierusalema, o le laueleele lea na folafola atu mo i latou e faavavau, ua fetalai mai ai le Tama.

30 Ma o le a oo foi ina oo mai le taimi o le a tala’i atu ai le atoatoaga o la’u talalelei ia te i latou;

31 Ma o le a latou talitonu ia te a’u, o a’u o Iesu Keriso, o le Atalii o le Atua, ma o le a latou tatalo atu i le Tamā i lo’u igoa.

32 Ona siisii ae lea i luga e o latou tagata-leoleo o o latou leo, ma o le a latou pepese faatasi; ona o le a latou fevaaia’i i latou lava.

33 Ona toe faapotopoto ai lea o i latou e le Tamā, ma tuu atu ia te i latou Ierusalema mo le laueleele o lo latou tofi.

34 Ona latou alalaga lea i le olioli—Ia pepese faatasi, outou nofoaga tuufua o Ierusalema; ona ua faamafanafanaina e le Tamā ona tagata, ua ia togiolaina Ierusalema.

35 Ua afe e le Tamā lona aao paia i luma o mata o atunuu uma; ma o le a vaai tuluiga uma o le lalolagi i le faaolataga a le Tamā; ma o le Tamā ma a’u ua tasi.

36 Ma ona faataunuu ai lea o lena mea ua tusia: Ala mai ia, ina toe ala mai ia; ma ofu lou malosi, Siona e; ia ofu ou ofu matagofie, Ierusalema e, le aai paia, ona o le a amata atu nei ma le agai i luma ona le toe sau ia te oe se ua le peritomeina ma ua le mamā.

37 Lūlū oe lava mai le efuefu; tulai, alaala i lalo, Ierusalema e; tatala oe lava mai noataga o lou ua, le afafine e faatagataotaua o Siona.

38 Ona ua faapea ona fetalai mai o le Alii: Ua outou faatau atu outou lava mo le meanoa; ma o le a togiolaina outou e aunoa ma ni tupe.

39 E moni, e moni, ou te fai atu ia te outou, o le a iloa e o’u tagata lo’u igoa; ioe, o le a latou iloa i lena aso o a’u lava o ia o lē o loo tautala atu.

40 Ma ona latou fai mai ai ai lea: Ua maeu lava le matagofie i luga o mauga o vae o lē na te aumaia tala e lelei ia te i latou, o lē na te tala’i le filemu; o lē na te aumaia tala e lelei ia te i latou e lelei, o le na te tala’i le faaolataga; o lē e fai atu ia Siona: Ua nofotupu lou Atua!

41 Ma ona alu atu ai lea o se alaga: Ia outou o ese ia, o ese ia outou, ia outou o atu i fafo mai lena mea, aua le pa’i atu i mea ua le mamā; ia outou o ese atu mai totonu o ia; ia mamā outou o e tauaveina ipu a le Alii.

42 Ona o le a outou le o ese atu i fafo ma le faanatinati pe i le faasulusulu; ona o le a muaau le Alii ia te outou, ma o le a muliau le Atua o Isaraelu ia te outou.

43 Faauta, o le a alo ma le poto lau auauna; o le a faaeaina ma faamaualugaina o ia ma o le a matua maualuga lava.

44 E pei ona toatele sa ofo ia te oe—o ona fofoga sa faaleagaina, e sili atu i soo se tagata, ma lona tino e sili atu i lo atalii o tagata—

45 O le a faapea lava ona ia sausauina atunuu e tele; o le a tapunia e tupu o latou gutu ia te ia, ona o le a latou vaai i mea sa lei ta’uina atu ia te i latou; ma o le a latou manatunatu i mea sa latou lei faalogo i ai.

46 E moni, e moni, ou te fai atu ia te outou, o nei mea uma o le a mautinoa ona oo mai, e pei lava ona poloaiina ai a’u e le Tamā. Ona faataunuu ai lea o le feagaiga lea na osiafeagaiga ai le Tamā ma ona tagata; ma ona toe ’ainā ai lea o Ierusalema i o’u tagata, ma o le a avea ma laueleele o lo latou tofi.