1 Ac tukun ma inge El sapkihn nuh sin un mwet pucspucs sac lah elos in tui ke pruhe, ac oacyacpac nuh sin mwet tuhma lutlut Lal. Ac El sapkihn nuh selos tuh elos in tiac tui ke pruhe ke insiaclos.

2 Ac El sapkihn nuh selos tuh elos in tuyak ac tu ke niyaclos. Ac elos tuyak ac tu ke niyaclos.

3 Ac tukun ma inge El sifilpac kuhnswelihk puhret ac ahkinsewowoye, ac sang nuh sin mwet tuhma lutlut in ipeis.

4 Ac ke elos ipeis tari El sapkihn nuh selos tuh elos in kuhnswelihk, ac sang nuh sin un mwet pucspucs sac.

5 Ac ke elos tuh sang nuh sin un mwet pucspucs sac El oacyacpac sang nuh selos wine in nihm, ac sapkihn nuh selos tuh elos in sang nuh sin un mwet pucspucs sac.

6 Inge, wacngihn puhret, kuh wine, ma utuck sin mwet tuhma lutlut ah, tiac pac sin un mwet pucspucs;

7 Tuhsruhk pwacyena El sang nuh selos puhret in ipeis, ac oacyacpac wine in nihm.

8 Ac El fahk nuh selos: El suc ipeis puhret se inge ipeis ke monuk nuh ke nguhnal; ac el suc nihm wine se inge nihm srah Luhk nuh ke nguhnal; ac nguhnal fah tiacna masrinsrwacl kuh maluh, tuhsruhk ac fah sesseslah.

9 Inge, ke un mwet pucspucs sac nuhkwewa ipeis ac nihm, liye, elos sesseslah ke Nguhn; ac elos tuhkweni wowoyak, ac kaksakihn Jisus, suc elos tuh liye ac lohng.

10 Ac tukun ma inge ke elos nuhkwewa tuh kaksakihn Jisus, El fahk nuh selos: Liye inge Nga ahksahfyelah masap ma Pahpah El tuh sapkihn nuh Sihk ke mwet inge, suc pa mwet luhlah luhn mwet Israel.

11 Kowos esam lah Nga sramsram nuh suwos, ac fahk lah ke kahs lal Isaiah ac ahkpwacyeiyucklac—liye ma inge sihmihsyucklac, oasr ma inge ye motowos, ke ma inge lutlutkihn—

12 Ac pwacyena, pwacyena, Nga fahk nuh suwos, tuh ke ma inge ac ahkpwacyeiyucklac na pa ingacn ahkpwacyeiyucklac luhn wuhlweacng se suc Pahpah El tuh oraclah nuh sin mwet Lal, O mwet Israel.

13 Ac na fah mwet luhlah, suc fah fahsrelihk nuh fin acn sahyac fin facluh, elos ac orekeni nuh sie liki lacfahl kuhtuhlacp ac liki lacfahl rohtoh, ac liki lacfahl epang ac liki lacfahl acir; ac elos fah utuckuh nuh ke etwacack ke Leum God lalos, suc molweloslac.

14 Ac Pahpah El sapkihn nuh Sihk tuh Nga in usot acn se inge, in mwe usru lowos.

15 Ac Nga fahk nuh suwos, tuh fin mwet Gentile elos tiac auliyak tukun mwe insewowo ma elos fah eis, tukun elos tuh oruh mwet Luhk in fahsrelihk—

16 Na kowos fah, suc mwet luhlah luhn mwet lal Jacob, som nuh inmahsrlolos; ac kowos fah muhta inmahsrlolos suc fah puhslacna; ac kowos fah muhta inmahsrlolos oacna ke soko lion ac muhta inmahsrlon kosro lwemnak innimac uh, ac oacna ke soko lion fuhsr inmahsrlon un sip, ma, el fin fahlac inmahsrlolos kwewa el ac longyac ac seyac nuh ke ip srihsrihk, ac wacngihn mwet kuh in molwellah.

17 Pouwos fah sruhkyuckyak in lain mwet lain kowos, ac mwet lokoalok lowos nuhkwewa fah lihsyucklac.

18 Ac Nga fah oracni mwet Luhk nuh sie oacna ke sie mwet el yolseni grain nuh infohk uh.

19 Tuh Nga fah oruh mwet Luhk suc Pahpah El wuhlweacng nuh se, ahok, Nga fah oraclah koac lowos in osra, ac Nga fah oraclah falkowos in prahs. Ac kowos fah uni mwet pucspucs; ac Nga fah kihsackuhnlah grain lalos nuh sin Leum, ac ma lalos nuh sin Leum luhn facluh nohfohn. Ac liye, Nga pa El suc oruh ma inge.

20 Ac ma inge fah sikyak, Pahpah El fahk, tuh katlas luhn nuhnuhnkuh suwohs Luhk ac fah ahtlah faclos ke lwen sac; ac elos fin tiac auliyak ac fah puhtatyang nuh faclos, Pahpah El fahk, ahok, finne nuh fin muhtuhnfacl nuhkwewa luhn mwet Gentile.

21 Ac ma inge fah sikyak tuh Nga fah oakiyac mwet Luhk, O mwet Israel.

22 Ac liye, Nga fah oakiyac mwet inge fin acn se inge, nuh ke ahkpwacyeiyucklac luhn wuhlweacng ma Nga tuh oraclah nuh sin pahpah tomowos Jacob; ac fah sie Jerusalem Sasuc. Ac kuh luhn inkuhsrao ac fah oasr inmahsrlon mwet inge; ahok, finne Nga fah oasr inmahsrlowos.

23 Liye, Nga pa El suc Moses el sramsramkihn, fahk: Sie mwet pahluh Leum God lowos ac fah tuhfahlah nuh suwos sin mwet wiyowos, oacna nuh sihk; kowos fah lohngohl ke ma nuhkwewa ma El fah fahk nuh suwos. Ac ma inge fah sikyak tuh mwet nuhkwewa suc fah tiac lohng mwet pahluh se ingacn ac fah lihsyucklac liki inmahsrlon mwet uh.

24 Pwacyena Nga fahk nuh suwos, ahok, ac mwet pahluh nuhkwewa muhtwacwacack sel Samuel ac elos suc tuhkuh tohkohl, elos nuhkwewa suc tuh sramsram, fahkwack Keik.

25 Ac liye, kowos tuhlihk nuhtin mwet pahluh; ac kowos mwet Israel; ac kowos ma ke wuhlweacng se suc Pahpah El tuh oraclah nuh sin pahpah tomowos, fahk nuh sel Abraham: Ac ke fihtac lom kain in mwet nuhkwewa fin facluh ac fah ahkinsewowoyeyuck.

26 Pahpah El tuhfweyuclac nuh suwos emet, ac suhpweyucme in ahkinsewowoye kowos kais sie nuhkwewa in forlah liki ma koluk lowos; ac ma se inge ke srihpen kowos pa tuhlihk ke wuhlweacng—

27 Ac tukun kowos ahkinsewowoyeyuck na Pahpah El fah ahkpwacyeiye wuhlweacng se ma El tuh oraclah nuh sel Abraham, fahk: Ke fihtac lom kain in mwet nuhkwewa fin facluh ac ahkinsewowoyeyuck—nuh ke ukwiyucklac luhn Nguhn Muhtahl Keik nuh fin mwet Gentile, tuh mwe ahkinsewowo nuh fin mwet Gentile ac fah oruh elos in fokoko liki nuhkwewa, nuh ke lihsyucklac luhn mwet Luhk, O mwet Israel.

28 Ac elos fah sie un mwet fuhnmweti mwet fin acn se inge. Finne ohinge, ke pacl se elos ac eis fohnlah luhn wosasuc, na elos fin ahkkwekweye insiaclos in lainyuc Nga fah fohlohkohnwacng ma koluk lalos nuh fin sifaclos sifacna, Pahpah El fahk.

29 Ac Nga fah esam wuhlweacng ma Nga tuh oraclah nuh sin mwet Luhk; ac Nga tuh olweacng nuh selos lah Nga ac oracloseni nuh sie ke pacl pakpucki Luhk sifacna, tuh Nga ac sifilpac sang nuh selos acn luhn pahpah tuhmwaclos nuh ke usru lalos, suc pa acn Jerusalem, suc pa acn wihlwihl nuh selos ne tok ma pahtpaht, Pahpah El fahk.

30 Ac ma inge fah sikyak tuh pacl uh tuhkuh, ke fohnlah luhn wosasuc Luhk ac fah lutiyuck nuh selos;

31 Ac elos fah luhlahlfongiyuc, tuh Nga pa Jisus Kraist, Wen nuhtin God, ac fah pruhe nuh sin Pahpah ke Inek.

32 Na fah mwet topang lalos wowoyak, ac ke puhsra sefanna elos fah on; tuh elos fah liye ke muhtahlos sifacna.

33 Na fah Pahpah El sifilpac oracloseni nuh sie, ac sang nuh selos acn Jerusalem nuh ke acn in usru lalos.

34 Na elos fah wowoyak ke engan—Tuhkweni on, kowos acn pihsaclah fin acn Jerusalem; tuh Pahpah El ahkwoye mwet Lal, El molwelah Jerusalem.

35 Pahpah El ahkkahlwemye paho muhtahl Lal nuh ye muhtuhn muhtuhnfacl nuhkwewa; ac acn nuhkwewa fin facluh fah liye molwelah luhn Pahpah; ac Nga ac Pahpah ma sefanna.

36 Ac na fah ahkpwacyeiyucklac ma sihmlac: Tuhkahkwek, sifilpac tuhkahkwek, ac nokomwacng fokoko lowos, O Zion; nokomwacng nuknuk kahto lowos, O Jerusalem, siti muhtahl, tuh inge fahlac ac fah wacngihn kuhtwena mwet fohkfohk ac sifil ilyak nuh yuruwos.

37 Osroklah liki kom kutkut uh; tuhkahkwek, muhta nuh ten, O Jerusalem; tuhlwekomlac liki mwe kapihr ke inkwacwom an, O acn srohoh nuhtin Zion.

38 Tuh ohinge Leum El fahk: Kowos kuhkwackihn kowosyang ke wacngihn molo, ac kowos fah moliyucklac ke wacngihn molo.

39 Pwacyena, pwacyena, Nga fahk nuh suwos, tuh mwet Luhk fah etuh Inek; ahok, ke lwen sac elos fah etuh tuh Nga pa El suc sramsram.

40 Ac na elos fah fahk: Fuhkah kahtolacna fin finohl uh ke niyacl suc use pweng wowo nuh selos, suc sulkackihn mislac; suc use pweng wowo nuh selos ke suwohswohs, suc sulkackihn molwelah; suc fahk nuh sin Zion: God lowos El kol!

41 Ac na fah sie pweng som nuh ingoh: Kowos som, kowos som, kowos som liki acn se ingacn, nimet kahl ma fohkfohk; kowos som liki inmahsrlol; kowos in nwacsnwacs suc us kuhfa luhn Leum.

42 Tuh kowos fah tiac silahklahk mukwiyak kuh kahing; tuh Leum El fah fahsr met liki kowos, ac God luhn Israel El fah fahsr tukuwos.

43 Liye, mwet kuhlwacnsap Luhk el fah mukwikwi ke lahlmwetmwet; el fah ahkfuhlwactyeyuck ac kaksakihnyuck ac arulacna pihsrlac.

44 Mwet pucspucs elos lut sel—ngwetngwetwacl arulacna koluklac, yohk liki na kuhtwena mwet, ac luhmahl koluklac liki na wen nuhtin mwet—

45 Ohinge el ac fah ahknwacsnwacsyelah muhtuhnfacl pucspucs; tohkohsrah uh ac fah kaliyac oacluhlos nuh sel, tuh ma suc soenna fahkyuck nuh selos elos fah liye; ac ma suc elos soenna lohng uh elos fah nuhnkuh.

46 Pwacyena, pwacyena, Nga fahk nuh suwos, ma nuhkwewa inge pwacyena ac fah tuhkuh, oacna ke Pahpah El sapkihn nuh Sihk. Na fah wuhlweacng se inge suc Pahpah El tuh olweacng nuh sin mwet Lal fah ahkpwacyeiyucklac; ac na fah acn Jerusalem ac sifilpac nwacnwaclah ke mwet Luhk, ac fah acn in usru lalos.