1 Ac na fah ma suc sihmlac ac sikyak: On, O muhtwacn ma koflah orek tuhlihk, kowos suc tiacna orek tuhlihk; sasa on, ac wowoyak, kowos suc tiacna kweokkihn ngal luhn isus uh; tuh puhslac tuhlihk nuhtin muhtwacn ma koflah orek tuhlihk liki na tuhlihk nuhtin muhtwacn pahyuck, Leum El fahk.

2 Ahkyohkye acn ke lohm nuknuk sum an, ac lwelah elos in laknwelihk sisken lohm nuknuk ke acn in muhta lom; nimet kihnsrihk, ahkloesye sucl lom ac ahkfokokoye kasihk lom;

3 Tuh kom fah salac ke lacfahl lacyot ac lacsac, ac fihtac lom fah usrui mwet Gentile ac oruh acn pihsaclah uh in oasri mwet muhta we.

4 Nimet sahngweng, tuh kowos fah tiac mwekihn; kowos ac tiac pac kuhnausyucklac, tuh kowos ac tiac ahkmwekihnyeyuck; tuh kowos ac fah muhlkuhnlah mwekihn ke pacl fuhsr lowos, ac fah tiac esam mwekihnlac ke pacl fuhsr lowos, ac fah tiac sifilpac esam mwekihnlac ke kowos katinmas.

5 Tuh mwet oraclah lom, mukul tomom, Leum luhn Un Mwet Mweun pa inel; ac Mwet in Molwelah lom, El suc Muhtahl luhn Israel—ac fah pahngpahng El God luhn facluh nohfohn.

6 Tuh Leum El pahngon kom oacna sie muhtwacn fihliyucklac ac ahsor ke nguhn, ac sie muhtwacn pahyuck fuhsr, ke kom tuh sruhngwacyuck, God lom El fahk.

7 Tuh ke kihtin pacl Nga fahsr liki kowos, tuhsruhk ke pahkotwen yohk Nga fah orekowoseni.

8 Ke kasrkuhsrak srihsrihk Nga okanlah muhtuhk liki kowos ke kihtin pacl, tuhsruhk ke luhngkuhlwacng ma pahtpaht ac fah oasr pahkotwen Luhk nuh suwos, Leum Mwet in Molwelah lom El fahk.

9 Ke ma se inge, kof lal Noah nuh Sihk, tuh Nga tuh fuhlahk lah kof lal Noah ac fah tiac sifilpac afuhnlah facluh, ohinge Nga fuhlahk lah Nga ac tiac kasrkuhsrak suwos.

10 Tuh finohl uh fah som ac inging uh fah mukwilac, tuhsruhk luhngkuhlwacng Luhk fah tiac som liki kowos, wuhlweacng luhn mislac Luhk fah tiac pac mokleyucklac, Leum suc pahkotwen nuh suwos El fahk.

11 O kowos suc kweok, kihpackwot kihpackme ke noatuh, ac tiac puhlakihn ma wo! Liye, Nga fah oakiyac yot lowos ke tuhn oaskuh, ac oakiyac pwelucng lowos ke yot sapphire.

12 Ac Nga fah oruh winto lowos in oreklac ke yot agate, ac muhtuhnpot lowos ke carbuncle, ac pot nuhkwewa lowos ke yot wo.

13 Ac tuhlihk nuhtuwos nuhkwewa ac fah lutiyuck sin Leum; ac fah yohk mislac luhn tuhlihk nuhtuwos.

14 Ke suwohswohs kowos fah akwucki; kowos fah loes liki ohiyac kweok tuh kowos fah tiac sahngweng, ac loes liki sahngweng tuh ac fah tiac apkuhran nuh yuruwos.

15 Liye, pwacyena elos fah orekeni nuh sie in lain kowos, tiac ma Sihk me; kuhtwena mwet suc fah toeni nuh sie in lain kowos fah puhtatlac keiwos.

16 Liye, Nga oraclah mwet orekma ke osra suc pahli fucnyuc ke e uh, ac ma oraclah sie kuhfa nuh ke orekma lal; ac Nga oraclah mwet kuhnaostwen uh in kuhnahoslah.

17 Wacngihn kuhfa ma oreklac in lain kowos ac fah kuhtanglah; ac kowos fah tuhkahkuhnwack loh nuhkwewa ma fah akuhkuhin lain kowos ke nuhnuhnkuh. Pa inge mwe usru luhn mwet kuhlwacnsap luhn Leum, ac suwohswohs lalos ma Sihk, Leum El fahk.