ບົດທີ 22
ເມືອງຊີໂອນ ແລະ ຫລັກຂອງມັນຈະຖືກສະຖາປະນາຂຶ້ນໃນຍຸກສຸດທ້າຍ, ແລະ ຊາວອິດສະຣາເອນຈະຖືກເຕົ້າໂຮມເຂົ້າກັນໃນຄວາມເມດຕາ ແລະ ຄວາມອ່ອນໂຍນ—ພວກເຂົາຈະໄຊຊະນະ—ປຽບທຽບກັບ ເອຊາຢາ 54. ປະມານ ຄ.ສ. 34.
1 ແລະ ເມື່ອນັ້ນສິ່ງທີ່ມີຂຽນໄວ້ຈະເກີດຂຶ້ນ: ຈົ່ງຮ້ອງລຳທຳເພງເຖີດ, ໂອ້ ເຈົ້າຜູ້ເປັນເໝືອນຍິງໝັນ; ຈົ່ງ ຮ້ອງລຳທຳເພງ ແລະ ມ່ວນຊື່ນເຖີດ, ເຈົ້າຜູ້ບໍ່ເຄີຍເຈັບທ້ອງອອກລູກເອີຍ; ເພາະວ່າເຈົ້າຈະມີລູກຫລາຍກວ່າຍິງທີ່ມີຜົວ, ພຣະຜູ້ເປັນເຈົ້າໄດ້ກ່າວ.
2 ຈົ່ງເຮັດຜ້າເຕັນຂອງເຈົ້າໃຫ້ກວ້າງຂວາງ, ແລະ ຕໍ່ເຊືອກຜ້າເຕັນຂອງເຈົ້າໃຫ້ຍາວ; ແລະ ສຽບ ຫລັກຂອງເຈົ້າໃຫ້ແໜ້ນ;
3 ເພາະເຈົ້າຈະຂະຫຍາຍເຂດອອກໄປທາງມືຂວາ ແລະ ຊ້າຍ, ແລະ ຜູ້ຄົນຂອງເຈົ້າໄດ້ ຄົນຕ່າງຊາດມາເປັນມໍລະດົກ ແລະ ເຮັດໃຫ້ເມືອງຮົກຮ້າງເປັນບ່ອນອາໄສ.
4 ຢ່າສູ່ຢ້ານ, ເຈົ້າຈະບໍ່ອາຍ; ທັງເຈົ້າຈະບໍ່ຈຳນົນ, ເພາະເຈົ້າຈະບໍ່ຖືກເຮັດໃຫ້ ອາຍ; ເຈົ້າຈະລືມຄວາມອາຍໃນໄວເຍົາຂອງເຈົ້າ, ແລະ ຈະບໍ່ຈື່ຈຳຄວາມຕຳນິໃນຄາວໄວເຍົາຂອງເຈົ້າ, ແລະ ຈະບໍ່ຈື່ຈຳຄວາມຕຳນິຂອງຄວາມເປັນໝ້າຍຂອງເຈົ້າອີກຕໍ່ໄປ.
5 ເພາະຜູ້ສ້າງຂອງເຈົ້າ, ສາມີຂອງເຈົ້າ, ຈອມໂຍທາຄືພຣະນາມຂອງພຣະອົງ; ແລະ ພຣະຜູ້ໄຖ່ຂອງເຈົ້າ, ແລະ ພຣະຜູ້ບໍລິສຸດຂອງອິດສະຣາເອນ—ພຣະອົງຈະຖືກເອີ້ນວ່າ ພຣະເຈົ້າຂອງທັງແຜ່ນດິນໂລກ.
6 ເພາະພຣະຜູ້ເປັນເຈົ້າໄດ້ເອີ້ນເຈົ້າເປັນເໝືອນເມຍສາວທີ່ຖືກຜົວປະຖິ້ມ ແລະ ມີວິນຍານໂສກເສົ້າ, ແລະ ເປັນເມຍສາວຄາວເຈົ້າເປັນໝ້າຍ, ພຣະຜູ້ເປັນເຈົ້າຂອງເຈົ້າກ່າວ.
7 ເຮົາໄດ້ປະຖິ້ມເຈົ້າພຽງແຕ່ໄລຍະຊົ່ວຄາວ, ແຕ່ເຮົາຈະເອົາເຈົ້າຄືນດ້ວຍຄວາມຮັກອັນສຸດຊຶ້ງ.
8 ໃນຄວາມໂມໂຫຮ້າຍເລັກໜ້ອຍ ເຮົາໄດ້ເຊື່ອງໜ້າເຮົາຈາກເຈົ້າຊົ່ວຄາວ, ແຕ່ດ້ວຍຄວາມກະລຸນາອັນເປັນນິດ ເຮົາຈະມີ ເມດຕາຕໍ່ເຈົ້າ, ພຣະຜູ້ເປັນເຈົ້າອົງເປັນພຣະຜູ້ໄຖ່ຂອງເຈົ້າໄດ້ກ່າວ.
9 ເພາະ ການນີ້, ເໝືອນ ຜືນນ້ຳແຫ່ງໂນອາຕໍ່ເຮົາ, ເພາະເຮົາໄດ້ສັນຍາວ່າ ຜືນນ້ຳແຫ່ງໂນອາ ຈະບໍ່ໄຫລຖ້ວມແຜ່ນດິນໂລກອີກຕໍ່ໄປສັນໃດ, ເຮົາຈຶ່ງສັນຍາວ່າ ເຮົາຈະບໍ່ໂມໂຫຮ້າຍເຈົ້າສັນນັ້ນ.
10 ພູໃຫຍ່ ແລະ ພູນ້ອຍອາດພັງທະລາຍລົງ, ແຕ່ຄວາມຮັກຂອງເຮົາ ໝັ້ນຄົງບໍ່ສິ້ນສຸດໄດ້, ທັງເຮົາຈະຮັກສາສັນຍາແຫ່ງສັນຕິພາບໄວ້ສືບໄປ, ພຣະຜູ້ເປັນເຈົ້າທີ່ມີຄວາມເມດຕາຕໍ່ເຈົ້າໄດ້ກ່າວ.
11 ໂອ້ ເຈົ້າຜູ້ເປັນທຸກ, ຜູ້ຖືກໂຍນໄປດ້ວຍພະຍຸຝົນຟ້າຄະນອງ, ແລະ ບໍ່ໄດ້ຮັບການປອບໂຍນ! ຈົ່ງເບິ່ງ, ເຮົາຈະວາງ ຫີນຂອງເຈົ້າດ້ວຍສີສວຍງາມ, ແລະ ຈະວາງຮາກຖານຂອງເຈົ້າດ້ວຍຫີນປະເສີດ.
12 ແລະ ເຮົາຈະສ້າງປ່ອງຢ້ຽມຂອງເຈົ້າດ້ວຍທັບທິມ, ແລະ ປະຕູຂອງເຈົ້າດ້ວຍແກ້ວເຈຍລະໄນ, ແລະ ກຳແພງເມືອງທັງໝົດຂອງເຈົ້າດ້ວຍເພັດນິນຈິນດາ.
13 ແລະ ລູກຫລານ ທັງໝົດຂອງເຈົ້າຈະໄດ້ຮັບການສິດສອນເລື່ອງພຣະຜູ້ເປັນເຈົ້າ; ແລະ ສັນຕິສຸກຂອງລູກຫລານຂອງເຈົ້າຈະຍິ່ງໃຫຍ່.
14 ເຈົ້າຈະຖືກສະຖາປະນາຂຶ້ນໃນ ຄວາມຊອບທຳ; ເຈົ້າຈະຫ່າງຈາກການກົດຂີ່ ເພາະເຈົ້າຈະບໍ່ຢ້ານ, ແລະ ຫ່າງຈາກຄວາມຫວາດກົວ ເພາະມັນຈະບໍ່ມາໃກ້ເຈົ້າ.
15 ຈົ່ງເບິ່ງ, ພວກເຂົາຈະຮ່ວມກັນຕໍ່ສູ້ເຈົ້າຢ່າງແນ່ນອນ, ແຕ່ບໍ່ແມ່ນໂດຍເຮົາ; ຜູ້ໃດກໍຕາມທີ່ຈະຮ່ວມກັນຕໍ່ຕ້ານເຈົ້າ ກໍຈະລົ້ມລົງ.
16 ຈົ່ງເບິ່ງ, ເຮົາໄດ້ສ້າງຊ່າງຕີເຫລັກເປົ່າຖ່ານໃນໄຟ, ແລະ ນຳເຄື່ອງມືທີ່ເຂົາສ້າງອອກມາ; ແລະ ເຮົາໄດ້ສ້າງຜູ້ມ້າງເພເພື່ອທຳລາຍ.
17 ບໍ່ມີອາວຸດໃດໆທີ່ຖືກເຮັດຂຶ້ນເພື່ອໃຊ້ກັບເຈົ້າຈະໄດ້ຜົນ; ແລະ ເຈົ້າຈະລົງໂທດລີ້ນທຸກລີ້ນທີ່ຈະລຸກຂຶ້ນໝິ່ນປະໝາດເຈົ້າໃນການພິພາກສາ. ນີ້ຄືມໍລະດົກຂອງຜູ້ຮັບໃຊ້ຂອງພຣະຜູ້ເປັນເຈົ້າ, ແລະ ຄວາມຊອບທຳຂອງພວກເຂົາມາຈາກເຮົາ, ພຣະຜູ້ເປັນເຈົ້າໄດ້ກ່າວ.