1 Mo nao, luk, mi talem long yufala, se yufala i mas stadi ol samting ia. Yes, wan komanmen mi givim long yufala se yufala i mas stadi ol samting ia wetem strong tingting; from ol toktok blong Aesea oli bigwan tumas.

2 From i tru we hem i bin tokbaot evri samting long saed blong ol pipol blong mi, we i blong laen blong Isrel; from hemia, i mas gat nid ia blong hem i mas toktok tu long Ol Jentael.

3 Mo evri samting we hem i talemaot oli bin hapen mo bae oli hapen folem ol toktok we hem i bin talemaot.

4 From hemia, mekem folem ol toktok blong mi; raetem ol samting we mi bin talem long yufala; mo folem taem mo tingting blong Papa bae ol toktok ia oli go kasem Ol Jentael.

5 Mo huia we bae i mekem folem ol toktok blong mi, mo i sakem sin, mo i kasem baptaes, hem ia bae mi sevem hem. Stadi long ol profet, from i gat plante we oli testifae long ol samting ia.

6 Mo nao i bin hapen se afta we Jisas i talemaot ol toktok ia, hem i talem long olgeta bakegen, afta we hem i eksplenem long olgeta evri skripja we oli bin kasem, hem i talem long olgeta: “Luk, ol narafala skripja, mi wantem se yufala i mas raetem, we yufala i no bin mekem.”

7 Mo i bin hapen se hem i talem long Nifae: “Karem i kam histri we yufala i bin kipim.”

8 Mo taem we Nifae i kam ol histri oli kam, mo i putum olgeta long fored blong hem, hem i sakem ol ae blong hem long olgeta mo i talem:

9 “I tru mi talem long yufala, mi bin givim oda long wokman blong mi, Samuel, Man blong Leman, se hem i mas testifae long ol pipol ia, se long dei ia we Papa bae i leftemap nem blong hem tru long mi, se i gat plante sent we bae oli girap long ded, mo bae oli kamkamaot long plante man, mo bae oli givhan long olgeta. Mo hem i talem long olgeta: ‘?I no bin hapen olsem?’”

10 Mo ol disaepol blong hem oli bin ansa long hem mo talem: “Yes, Lod, Samuel i bin profesae folem ol toktok blong yu, mo evri toktok ia i bin hapen.”

11 Mo Jisas i bin talem long olgeta: “?Hao nao i hapen se yufala i no bin raetem samting ia, se plante sent oli bin girap mo oli bin kamkamaot long plante mo oli bin givhan long olgeta?”

12 Mo i bin hapen se Nifae i bin tingbaot se oli no bin raetemdaon samting ia.

13 Mo i bin hapen se Jisas i givim oda se oli mas raetem samting ia; from hemia, oli raetem samting ia olsem we hem i bin givim oda from.

14 Mo nao i bin hapen se taem we Jisas i eksplenem evri skripja we oli bin raetem tugeta wan taem, nao hem i givim oda long olgeta se oli mas tijim ol samting we hem i bin eksplenem long olgeta.