1 Im ālikin men kein ke rikaļoor ro an Jisōs raar ito-itak im kar kwaļo̧k naan kōn men ko raar jim̧or ron̄ im lo, im kar peptaij ilo etan Jisōs, ālikin men kein rikaļoor ro raar koba ippān doon im kar koba ilo jar im jitlo̧k ekajoor.

2 Im Jisōs eaar bar kwaļo̧k E n̄an er, ke raar jar n̄an Jemān ilo Etan; im Jisōs eaar itok im jutak ioļapļapier, im ba n̄an er: Ta kom̧ kōņaan bwe In lewōj n̄an kom̧?

3 Im raar ba n̄an E: Irooj kōm kōņaan bwe Kwōn ba n̄an kōm ta āt eo kōm naaj kūr kabun̄ in; bwe ewōr akwāālel ko ilubwiljin armej rein kōn menin.

4 Im Irooj eaar ba n̄an er: Em̧ool, em̧ool, Ij ba n̄an kom̧, etke armej rej aikuj aln̄ūrn̄ūr im akwāāl kōn men in?

5 Raar jab kōnono ke jān jeje ko rekwōjarjar, ko rej ba kom̧ij aikuj bōk ioomi etan Kraist, eo ej Eta? Bwe jān āt in naaj kūr kom̧ ilo raan eo āliktata;

6 Im jabdewōt eo ej bōk ioon Eta, im niknik n̄an jem̧ļo̧kin, ejja in wōt naaj mour ilo raan eo āliktata.

7 Kōn menin, jabdewōt men kom̧ naaj kōm̧m̧an, kom̧ naaj kōm̧m̧an ilo Eta; kōn menin kom̧ naaj ņa etan kabun̄ eo ilo Eta; im kom̧ naaj kajjitōk ippān Jemād ilo Eta bwe E en naaj kōjeraam̧m̧an kabun̄ eo kōn Eō.

8 Im enaaj ekōjkan kabun̄ eo Aō ijello̧kun wōt n̄e ej etņake Eta? Bwe eļan̄n̄e juon kabun̄ ņa etan ilo etan Moses innām ej an Moses kabun̄; ak eļan̄n̄e enaaj etņake etan armej innām ej kabun̄ eo an armej; ak eļan̄n̄e e ej etņake Eta innām e ej kabun̄ eo Aō, eļan̄n̄e raar ekkal ioon gospel eo Aō.

9 Em̧ool Ij ba n̄an kom̧, bwe kom̧ij ekkal ioon gospel eo Aō; kōn menin kom̧ naaj kūr jabdewōt men ko kom̧ij likūt etan, ilo Eta; kōn menin eļan̄n̄e kom̧ij kūr Jema, kōn kabun̄ eo, eļan̄n̄e enaaj ilo Eta Jema enaaj ron̄jake kom̧;

10 Im eļan̄n̄e kabun̄ eo ej ekkal ioon gospel eo Aō innām Jema enaaj kwaļo̧k jerbal ko An make ilowaan.

11 A eļan̄n̄e e jab ekkal ioon gospel eo Aō, im ej ekkal ioon jerbal ko an armej, ak ioon jerbal ko an devil, em̧ool Ij ba n̄an kom̧ ewōr aer lan̄lōn̄ ilo jerbal ko iaar ilo jidik iien, im ej jab etto jem̧ļo̧k eo ej itok, im rej juokļo̧k er im joļo̧k ilo kijeek, jān ijo ejjeļo̧k ro̧o̧l.

12 Bwe jerbal ko aer rej ļoor er, bwe ej kōn jerbal ko aer naaj juokļo̧k er; kōn menin keememej men ko Iaar ba n̄an kom̧.

13 Lo Iaar lewōj n̄an kom̧ gospel eo Aō, im en̄in ej gospel eo Iaar lewōj n̄an kom̧—bwe Iaar itok n̄an laļ in n̄an kōm̧m̧an ankilaan Jema, kōnke Jema eaar jilkintok Eō.

14 Im Jema eaar jilkintok Eō bwe In maron̄ toto ioon debwāāl; im ālikin kar kotak Eō ioon debwāāl, bwe In maron̄ kan̄ōltok armej otemjej n̄an Eō, bwe āinwōt kar kotak Eō jān armej em̧ool āindein Jema enaaj kotak armej, n̄an jutak im̧aō, n̄an ekajet kōn jerbal ko aer, eļan̄n̄e rem̧m̧an ak eļan̄n̄e renana—

15 Im kōn un in kar kotak Eō; kōn menin, ekkar n̄an kajoor eo an Jema Inaaj kan̄ōltok armej otemjej n̄an Eō, bwe ren maron̄ ekajet ekkar n̄an jerbal ko aer.

16 Im enaaj waļo̧k, bwe eo ej ukeļo̧k im ej peptaij ilo Eta enaaj obrak; im eļan̄n̄e e ej niknik n̄an jem̧ļo̧kin, lo, Enaaj ejjeļo̧k ruōn im̧aan Jema ilo raan eo n̄e Inaaj jutak n̄an ekajet laļ.

17 Im e eo ej jab niknik n̄an jem̧ļo̧kin, ejja wōt eo in ej barāinwōt jokak im joļo̧k ilo kijeek, jān ijo rejjab maron̄ bar ro̧o̧l, kōn jim̧we eo an Jema.

18 Im en̄in ej naan eo Jema eaar leļo̧k n̄an ro nejin armej. Im kōn un in Ej kakūrm̧ool naan ko Eaar liļo̧k, im Ej jab riab, ak kakūrm̧ool aolep naan ko An.

19 Im ejjeļo̧k men ejjab erreo emaron̄ deļo̧n̄ ilo aelōn̄ eo An; kōn menin ejjeļo̧k ej deļo̧n̄ ilo An kakkije ijello̧kun wōt ro raar kwaļ ballier ilo bōtōktōkū, kōn tōmak eo aer, im ukeļo̧k jān aolep aer jero̧wiwi, im aer tiljek n̄an jem̧ļo̧kin.

20 Kiiō en̄in ej kien eo: Kom̧in ukeļo̧k, kom̧ aolep jeban ko an laļ, im itok n̄an Eō im peptaij ilo Eta, bwe kom̧in maron̄ kokwōjarjar jān bōke Jetōb Kwōjarjar, bwe kom̧in maron̄ jutak ilo ejjeļo̧k libbijinjin im̧aō ilo raan eo āliktata.

21 Em̧ool, em̧ool, Ij ba n̄an kom̧, en̄in ej gospel eo Aō; im kom̧ jeļā men ko kom̧ij aikuj kōm̧m̧an ilo kabun̄ eo Aō; bwe jerbal ko kom̧ ar lo Aō kōm̧m̧an i kom̧ naaj barāinwōt kōm̧m̧an i; bwe men ko kom̧ ar lo Iaar kōm̧m̧an em̧ool men kein kom̧ naaj kōm̧m̧an;

22 Kōn menin, eļan̄n̄e kom̧ij kōm̧m̧an i men kein jeraam̧m̧an n̄an kom̧, bwe naaj kotak kom̧ ilo raan eo āliktata.

23 Kom̧in jeje men ko kom̧ ar lo im ron̄, ijello̧kun wōt men ko kar kōmo̧iki.

24 Kom̧in jeje jerbal ko an armej rein, ko renaaj waļo̧k, em̧ool āinwōt kar jeje, kōn men ko raar waļo̧k.

25 Bwe lo, jān bok ko kar jeje, im ko renaaj jeje, naaj ekajet armej rein, bwe jān er jerbal ko aer naaj kwaļo̧k n̄an armej.

26 Im lo, men otemjej kar jeje jān Jema, kōn menin jān bok ko renaaj jeje naaj ekajete laļ.

27 Im kom̧in jeļā bwe kom̧ naaj riekajet ro an armej rein, ekkar n̄an ekajet eo inaaj lewōj n̄an kom̧, eo enaaj jim̧we. Kōn menin, armej rot kom̧ij aikuj in āinwōt? Em̧ool ij ba n̄an kom̧, em̧ool āinwōt N̄aij.

28 Im kiiō Ij ilo̧k n̄an Jema. Im em̧ool Ij ba n̄an kom̧, jabdewōt men ko kom̧ naaj kajjitōk ippān Jema ilo Eta naaj lewōj n̄an kom̧.

29 Kōn menin, kajjitōk, im kom̧ naaj bōk; kaļļaļļaļ, im enaaj peļļo̧k n̄an kom̧; bwe eo ej kajjitōk, ej bōk; im n̄an eo ej kaļļaļļaļ, enaaj peļļo̧k.

30 Im kiiō, lo, aō m̧ōņōņō eļap, em̧ool n̄an dipiio, kōn kom̧, im barāinwōt epepen in; aaet, im em̧ool Jema ej m̧ōņōņō, im barāinwōt aolep enjeļ ro rekwōjarjar, kōn kom̧ im epepen in; bwe ejjeļo̧k iaer ej jebwābwe.

31 Lo, I kōņaan bwe kom̧in jeļā; bwe meļeļe in Aō er ro rej kiiō mour ilo epepen in; im ejjeļo̧k iaer ejebwābwe; im ilo er ewōr Aō lan̄lōn̄ edipiio.

32 A lo, e kabūrom̧ōj Eō kōn epepen eo kein kāāmen jān epepen in, bwe kar tōlļo̧k er n̄an kōm̧akoko jān e eo em̧ool āinwōt kar nejin ko̧kkure; bwe renaaj wiakake Eō kōn silver im gold, im kōn men eo dile ej ko̧kkure im eo riko̧o̧t remaron̄ rupe im ko̧o̧te. Im ilo raan en Inaaj loļo̧k er, em̧ool ilo ukōt jerbal ko aer ioon bōraer make.

33 Im ālikin men kein ke Jisōs eaar kōjjem̧ļo̧k ennaan kein Eaar ba n̄an ro rikaļooran: Kom̧in deļo̧n̄ ilo kōjām erānin̄; bwe erānin̄ kōjām eo, im eaidik iaļ eo ej tōlļo̧k n̄an mour, im jet wōt renaaj lo e; a edepakpak kōjām eo, im eļap iaļ eo ej tōlļo̧k n̄an mej, im elōn̄ renaaj ito-itak ie, m̧ae bon̄ ej itok, ijo ejjeļo̧k armej emaron̄ jerbal.