Sapta 29
Tuhkuh luhn Puk luhn Mormon pa sie mwe akucl lah Leum El muhtwacwacack in oracni Israel ac ahkpwacyeiye wuhlweacng Lal—Elos suc sruhnga fwackyuck ac mwe sang Lal ke lwen sahflah ac fah selngawiiyucki. Sahp ke yac 34–35 Tukun Kraist.
1 Ac inge liye, nga fahk nuh suwos lah ke Leum El fah liye muh fal, ke lahlmwetmwet Lal, lah kahs inge ac tuhkuh nuh yurun mwet Gentile, in fal nuh ke kahs Lal, na kowos kuh in etuh lah wuhlweacng ma Pahpah El tuh oraclah nuh sin tuhlihk nuhtin Israel, ke fohlohk lalos nuh ke acn in usru lalos, muhtwacwacack tari in ahkpwacyeiyuck.
2 Ac kowos kuh in etuh lah kahs luhn Leum, ma tuh sruhmuhnyuck sin mwet pahluh muhtahl, ac fah ahkpwayeiyuck; ac kowos tiac enenuh in fahk lah Leum El kohtwaclah tuhkuh Lal nuh yurun tuhlihk nuhtin Israel.
3 Ac kowos tiac enenuh in nuhnkuh ke insiowos lah kahs ma tuh sruhmuhnyuck ah wacngihn srihpac, tuh liye, Leum El fah esam wuhlweacng Lal ma El tuh oraclah nuh sin mwet Lal ke mwet Israel.
4 Ac ke kowos fah liye ke kahs inge tuhkuh nuh inmahsrlowos, na kowos tiac enenuh in fahfahlacna in sruhnga orekma luhn Leum, tuh katlas in nuhnuhnkuh suwohs Lal oasr ke lacpo lacyot Lal; ac liye, ke lwen sac, kowos fin sruhnga orekma Lal El fah oruh tuh ma inge in sa na sruokowosi.
5 We nuh sel suc sruhnga orekma luhn Leum; ahok, we nuh sel suc fah lahfwekihn Kraist ac orekma Lal!
6 Aohk, we nuh sel suc fah lahfwekihn fwackyuck luhn Leum, ac tuh fah fahk lah Leum El tiac sifilpac orekma ke fwackyuck, kuh ke kahs in pahluh, kuh ke mwe sang, ke kahskahs, kuh ke unwelah, kuh ke kuh luhn Nguhn Muhtahl!
7 Ahok, ac we nuh selos suc fah fahk ke lwen sac, in eis kapwack, lah tiac kuh in oasr ma usrnguck orek sin Jisus Kraist; tuh el suc oruh ma se inge fah eklac oacna wen nuhtin kweok, nuh sel suc wacngihn pahkotwen, in fal nuh ke kahs luhn Kraist!
8 Ahok, ac kowos tiac enenuh in sifilpac ahksruhksruhkye, kuh sruhnga, kuh sritacluh mwet Jew, kuh kuhtwena sin mwet luhlah luhn mwet Israel; tuh liye, Leum El esam wuhlweacng Lal nuh selos, ac El fah oruh nuh selos in fal nuh ke ma El tuh olwelah.
9 Ke ma inge kowos tiac enenuh in nuhnkuh muh kowos kuh in furohkohnlah lacpo lacyot luhn Leum nuh lacsac, tuh Elan tiac oruh nuhnuhnkuh uh nuh ke ahkpwacyeiyucklac luhn wuhlweacng ma El tuh oraclah nuh sin mwet Israel.