1 Ac tukun ma inge yac ahkyucnguhul ac limekohsr oacyacpac somlah, ac mwet uh muhtwacwacack in muhlkuhnlah akucl ac ma usrnguck ma elos tuh lohng, ac muhtwacwacack in srihkeni na srihkeni lut ke sie akucl ac sie ma usrnguck tuhkuh inkuhsrao me, yohkna oruh elos muhtwacwacack in kwekwe insiaclos, ac lohsrlah nuhnak lalos, ac muhtwacwacack in suhlahlahlfongi ma nuhkwewa ma elos tuh lohng ac liye—

2 Motkweack kuhtuh ma wacngihn srihpac ke insiaclos, tuh ma inge tuh oreklac sin mwet ac ke kuh luhn devil, in kohllah ac kiyacpwelah insiacn mwet uh; ac ohinge Setuhn el sifilpac sruokyac insiacn mwet uh, yohkna oruh el tuh ahklohsryelah muhtahlos ac kohlohloslac in luhlahlfongi lah mwe luti luhn Kraist uh sie ma lahlfon ac wacngihn srihpac.

3 Ac tukun ma inge mwet uh muhtwacwacack in upaclah ke ma koluk ac ma sruhngwacyuck; ac elos tiacna luhlahlfongi lah ac sifilpac oasr akucl ac ma usrnguck utuckuh; ac Setuhn el som, kohllah insiacn mwet uh, srihfaclos ac oruh tuh elos in oruh ma koluk yohk fin acn uh.

4 Ac ohinge sahflah yac ahkyucnguhul ac ohnkohsr; ac oacyacpac yac ahkyucnguhul ac itkohsr; ac oacyacpac yac ahkyucnguhul ac alkosr; ac oacyacpac yac ahkyucnguhul ac yuc;

5 Ac oacyacpac yac siofok somlah e ke na pacl lal Mosiah, suc pa tohkohsrah luhn mwet luhn mwet Nephi.

6 Ac yac onfoko ac yuc somlah e ke pacl se ma Lehi el som liki acn Jerusalem.

7 Ac yac yuc somlah e ke na pacl se ma akucl uh tuh utuckuh, ma tuh sramsramkihnyuck sin mwet pahluh, lah Kraist El ac tuhkuh nuh facluh.

8 Inge mwet Nephi elos muhtwacwacack in wek pacl lalos muhtwacwacack ke pacl se inge ke akucl uh tuh utuckuh, kuh muhtwacwacack ke tuhkuh luhn Kraist; ke ma inge, yac yuc tuh somlah.

9 Ac Nephi, suc pa pahpah tuhmwacl Nephi, suc tuh karuhnguhnwacng ma sihmlac, el tiacna fohlohk nuh fin acn lal Zarahemla, ac tiacna kuh in sukokyak ke kuhtwena acn fin acn ah nohfohn.

10 Ac tukun ma inge mwet ah tuh srwackna muhta ke ohiyac koluk, finne yohk luti ac pahluh ma tuh suhpweyucklac nuh inmahsrlolos; ac ohinge yac ahksingucul tuh oacyacpac sahflah; ac oacyacpac yac ahksingucul sie sahflah ke ohiyac koluk.

11 Ac tukun ma inge ke yac ahksingucul tolu muhtwacwacack in oasr mweun ac fohs fin acn nuhkwewa; tuh mwet pihsrapasr lal Gadianton tuh puhseni na upac, ac elos tuh uniyac mwet pucspucs, ac tuh kuhnahoslah siti pucspucs, ac tuh osrwaclihk misac ac ahkmas yohk fin acn ah nohfohn, oruh yohk srihpac tuh mwet nuhkwewa, kwewana mwet Nephi ac mwet Laman, in enenuh na in sruhkwack kuhfa in mweun nahtuhlos in laenuhlos.

12 Ke ma inge, mwet Laman nuhkwewa suc tuh eklac forlah nuh sin Leum elos tuh tuhkweni wi mwet wiyaclos, mwet Nephi, ac tuh enenweyuck, nuh ke karihngihnyuckyang luhn moul lalos ac muhtwacn lalos ac tuhlihk nahtuhlos, in sruhkwack kuhfa in mweun in lain un mwet pihsrapasr lal Gadianton, ahok, ac oacyacpac in sruokyac na suwohs lalos, ac ohiyac wo luhn alu lalos ac luhn kaksak in alu lalos, ac sukohsohk lalos ac moul sukohsohk lalos.

13 Ac tukun ma inge tuh met liki yac ahksingucul tolu sahflah mwet Nephi elos tuh ahksensenkihnyuck ke kuhnahoslah yohk ke srihpen mweun se inge, ma tuh arulacna upaclah.

14 Ac tukun ma inge mwet Laman suc tuh toeni wi mwet Nephi elos tuh oacwaclah inmahsrlon mwet Nephi.

15 Ac selngawi se lalos ah tuh itucklac luhkwelos, ac mahnolos eklac fasrfasrlah oacna mwet Nephi;

16 Ac mukul fuhsr nahtuhlos ac acn nahtuhlos eklac arulacna oaskuh, ac elos tuh oacwaclah inmahsrlon mwet Nephi, ac tuh pahpahng mwet Nephi. Ac ohinge sahflah yac ahksingucul tolu.

17 Ac tukun ma inge ke muhtwacwacackiyacn yac ahksingucul ahkosr, mweun se inmahsrlon un mwet pihsrapasr ac mwet lal Nephi tuh fahfahlac na ac tuh arulacna upaclah; ne ohinge, mwet lal Nephi tuh fokoko kuhtuh liki un mwet pihsrapasr, yohkna oruh elos tuh ukwaclosyak nuh tok liki acn selos nuh ke finohl uh ac nuh ke acn lukmac selos.

18 Ac ohinge sahflah yac ahksingucul ahkosr. Ac ke yac ahksingucul limekohsr elos tuh tuhkuh in lain mwet lal Nephi; ac ke srihpen koluk luhn mwet lal Nephi, ac fohs ac akuhkuhin pucspucs lalos, un mwet pihsrapasr lal Gadianton tuh eis kuh yohk faclos.

19 Ac ohinge sahflah yac ahksingucul limekohsr, ac ohinge mwet ah muhta ke ohiyacn kweok pucspucs; ac katlas luhn kuhnahoslah tuh ahtahtlah faclos, yohkna oruh elos tuh apkuhran na in acnwucklac kac, ac ohinge ke srihpen ma koluk lalos.