1 Pea naʻe hoko ʻo pehē naʻe ʻosi pehē atu mo hono hivangofulu mā nima ʻo e taʻú foki, pea naʻe kamata ke ngalo ʻi he kakaí ʻa e ngaahi fakaʻilongá mo e ngaahi meʻa fakaofo ʻa ia kuo nau fanongo ki aí, pea naʻe fakaʻau ke siʻisiʻi ʻenau ofo ʻi ha fakaʻilonga pe ha meʻa fakaofo mei he langí, ʻo tupu ai ʻa e kamata ke fefeka ʻa honau lotó, pea fakakuihi ʻa honau ʻatamaí, pea naʻa nau kamata ke taʻetui ki he meʻa kotoa pē kuo nau fanongo mo mamata ki aí—

2 ʻO nau fakakaukau ki ha ngaahi meʻa laulaunoa ʻi honau lotó, ʻo pehē kuo fai ia ʻe he kau tangata pea ʻi he mālohi ʻo e tēvoló, ke tohoakiʻi atu mo kākaaʻi ʻa e loto ʻo e kakaí; pea naʻe pehē ʻa e toe maʻu ʻe Sētane ʻa e loto ʻo e kakaí, ʻo ne fakakuihi ai honau matá mo ne kākaaʻi ʻa kinautolu ke nau tui ko e meʻa launoa mo taʻeʻaonga ʻa e tokāteline ʻo Kalaisí.

3 Pea naʻe hoko ʻo pehē naʻe fakaʻau ʻo mālohi ʻa e kakaí ʻi he fai angahalá mo e ngaahi anga-fakalieliá; pea naʻe ʻikai te nau tui ʻe toe ʻi ai ha ngaahi fakaʻilonga pe ngaahi meʻa fakaofo ʻe fakahā mai; pea naʻe ʻalu fano ʻa Sētane, ʻo kākaaʻi ʻa e loto ʻo e kakaí, ʻo ʻahiʻahiʻi ʻa kinautolu mo fakatupu ʻenau fai ʻa e fuʻu fai angahala lahi ʻi he fonuá.

4 Pea naʻe ʻosi pehē atu hono hivangofulu mā ono ʻo e taʻú; pea pehē foki mo hono hivangofulu mā fitu ʻo e taʻú; pea mo hono hivangofulu mā valu ʻo e taʻú foki; pea mo hono hivangofulu mā hiva ʻo e taʻú foki.

5 Pea kuo ʻosi atu foki ʻa e taʻu ʻe teau mei he ngaahi ʻaho ʻo Mōsaiá, ʻa ia naʻá ne tuʻi ki he kakai ʻo e kau Nīfaí.

6 Pea kuo ʻosi ʻa e taʻu ʻe onongeau mā hiva talu mei he ʻalu atu ʻa Līhai mei Selusalemá.

7 Pea kuo ʻosi ʻa e taʻu ʻe hiva talu mei he taimi ʻa ia naʻe fakahā mai ai ʻa e fakaʻilonga, ʻa ia naʻe lea ʻaki ʻe he kau palōfitá, ʻe hāʻele mai ai ʻa Kalaisi ki he māmaní.

8 Ko ʻeni naʻe kamata ʻe he kau Nīfaí ke lau honau taimí mei he kuonga ʻa ia naʻe fakahā mai ai ʻa e fakaʻilongá, pe mei he hāʻele mai ʻa Kalaisí; ko ia, kuo ʻosi atu ʻa e taʻu ʻe hiva.

9 Pea ko Nīfai, ʻa ia ko e tamai ʻa Nīfai, ʻa ia naʻá ne tauhi ʻa e ngaahi lekōtí, naʻe ʻikai ke toe foki mai ki he fonua ko Seilahemalá, pea naʻe ʻikai faʻa ʻiloʻi ia ʻi ha potu ʻi hono kotoa ʻo e fonuá.

10 Pea naʻe hoko ʻo pehē naʻe kei nofo ai pē ʻa e kakaí ʻi he fai angahalá, neongo hono lahi ʻo e malanga mo e kikite naʻe fekau ke fai ʻiate kinautolú; pea naʻe ʻosi pehē foki mo hono hongofulu ʻo e taʻú; pea naʻe pehē mo e ʻosi atu foki ʻa hono hongofulu mā taha ʻo e taʻú ʻi he fai angahala.

11 Pea naʻe hoko ʻo pehē ʻi hono hongofulu mā tolu ʻo e taʻú naʻe kamata ʻa e ngaahi tau mo e ngaahi fakakikihi ʻi hono kotoa ʻo e fonuá; he kuo fakaʻau ke tokolahi ʻaupito ʻa e kau kaihaʻa Katianetoní, pea nau tāmateʻi ʻa e tokolahi ʻo e kakaí, pea nau fakaʻauha ʻa e ngaahi kolo lahi, pea fakamafola lahi ʻa e maté mo e fakaʻauhá ʻi he fonuá kotoa, ko ia naʻe ʻaonga ai ke toʻo mahafu ʻa e kakai kotoa pē, ʻa e kau Nīfaí mo e kau Leimaná fakatouʻosi, ʻo tauʻi ʻa kinautolu.

12 Ko ia, ko e kau Leimana kotoa pē ʻa ia kuo nau ului ki he ʻEikí, naʻa nau fakataha mo honau kāinga, ko e kau Nīfaí, pea naʻe fakamālohiʻi ʻa kinautolu, koeʻuhi ke maluʻi ʻenau moʻuí mo honau kakai fefiné mo ʻenau fānaú, ko ia naʻa nau toʻo mahafu ke tauʻi ʻa e kau kaihaʻa Katianetoní, ʻio, pea tauhi maʻu foki ʻa ʻenau ngaahi totonú mo e ngaahi faingamālie ʻo honau siasí mo ʻenau lotú, mo ʻenau tauʻatāiná mo ʻenau nofo taʻehaʻisiá.

13 Pea naʻe hoko ʻo pehē ʻi he teʻeki ai ʻosi atu ʻa e taʻu hono hongofulu mā tolu ko iá kuo tuʻunuku mai ki he kau Nīfaí ha fakaʻauha fakaʻaufuli koeʻuhi ko e tau ko ʻení, ʻa ia kuo fakaʻau ʻo fuʻu fakamanavahē ʻaupito.

14 Pea naʻe hoko ʻo pehē ko e kau Leimana ko ia naʻe fakataha mo e kau Nīfaí naʻe lau kinautolu mo e kau Nīfaí;

15 Pea naʻe toʻo meiate kinautolu ʻa honau malaʻiá, pea naʻe liliu ʻo hinehina honau kilí ʻo hangē ko e kau Nīfaí;

16 Pea naʻe hoko ʻo fuʻu fakaʻofoʻofa ʻa ʻenau kau talavoú mo honau ngaahi ʻofefiné, pea naʻe lau fakataha ʻa kinautolu mo e kau Nīfaí, pea naʻe ui ʻa kinautolu ko e kau Nīfai. Pea naʻe ʻosi pehē hono hongofulu mā tolu ʻo e taʻú.

17 Pea naʻe hoko ʻo pehē ʻi he kamataʻanga ʻo hono hongofulu mā fā ʻo e taʻú, naʻe hoko atu ʻa e tau ʻi he vahaʻa ʻo e kau kaihaʻá mo e kau Nīfaí pea naʻe fakaʻau ʻo fuʻu fakamanavahē ʻaupito; ka neongo iá, naʻe fakaʻau ʻo kiʻi mālohi ange ʻa e kau Nīfaí ʻi he kau kaihaʻá, ʻo aʻu ki heʻenau tekeʻi ʻa kinautolu mei honau ngaahi fonuá ki he ngaahi moʻungá pea ki honau ngaahi toitoiʻangá.

18 Pea naʻe ʻosi pehē hono hongofulu mā fā ʻo e taʻú. Pea ʻi hono hongofulu mā nima ʻo e taʻú naʻa nau haʻu ai ke tauʻi ʻa e kakai ʻo Nīfaí; pea koeʻuhi ko e fai angahala ʻa e kakai ʻo Nīfaí, pea mo ʻenau ngaahi fakakikihí mo e ngaahi fekeʻikeʻi lahí, ko ia naʻe maʻu ʻe he kau kaihaʻa Katianetoní ha ngaahi faingamālie lahi kiate kinautolu.

19 Pea naʻe ʻosi pehē hono hongofulu mā nima ʻo e taʻú, pea ko ia naʻe moʻua ʻa e kakaí ʻi he ngaahi faingataʻa lahi; pea naʻe tuʻunuku mai kiate kinautolu ʻa e heletā ʻo e fakaʻauhá, pea naʻe ofi ai ke tā hifo ʻaki ʻa kinautolu koeʻuhi ko ʻenau angahalá.