1 Na ɔbaa dɛ dɛmara so na afe a ɔtɔ do eduokron enum so dze twaa mu kɔree, na dɔm no hyɛɛ ase dɛ hɔn werɛ rifir dɛm nsɛnkyerɛdze nye anwanwadze no a wohunii no, na nkakrankakra sor asɛnkyerɛdze nye anwanwadze hyɛɛ ase dɛ origyaa hɔn ahobow yɛ araa ma wɔhyɛɛ ase dɛ woripirim hɔn akoma, na hɔn adwen rufura, na wɔhyɛɛ ase dɛ wɔregye kyim wɔ dza wɔtsee na wohunii nyinara ho—

2 Wosusuu ndzɛmba hun bi wɔ hɔn akoma mu, dɛ nyimpa na wɔdze abɔnsam no tum yɛe dze daadaa dɔm no ama wɔaatwe hɔn akɔ; na dɛm na Satan kɔr do yɛe dze nyaa dɔm no hɔn akoma bio, ɔyɛe araa dze furaa hɔn enyiwa ma wɔgyee dzii dɛ Christ ne nkyerɛkyerɛ no yɛ nkwaseasɛm na adzehun.

3 Na ɔbaa dɛ dɔm no hyɛɛ ase dɛ worimia hɔn ho ayɛ emumuyɛdze na wɔrobɔ mbusu; na wɔanngye enndzi dɛ wobeyi nsɛnkyerɛdze nye anwanwadze bi so bio akyerɛ; na Satan kɔr do twee dɔm no akoma, daadaa hɔn ama wɔaayɛ emumuyɛdze akɛse wɔ asaase no do.

4 Na dɛm na afe a ɔtɔ do eduokron esia dze twaa mu kɔree; na afe a ɔtɔ do eduokron esuon no so dɛmara; na afe a ɔtɔ do eduokron awɔtwe so dɛmara; nye afe a ɔtɔ do eduokron akron no so;

5 Na mfe ɔha so botwaa mu kɔree fi Mosiah n’aber do, nyia nna odzi hen wɔ Nephifo do no.

6 Na mfe ahaesia nye akron na ebotwa mu kɔ fi ber a Lehi dze fii Jerusalem.

7 Na mfe akron na ebotwa mu kɔ fitsi aber a woyii asɛnkyerɛdze no kyerɛe, dza nna nkɔnhyɛfo no akã dɛ Christ bɛba wiadze yi mu no.

8 Afei, Nephifo no hyɛɛ ase dɛ wɔrekan hɔn da fi ber a woyii asɛnkyerɛdze no kyerɛe no, anaadɛ fitsi ber a Christ dze bae no; dɛm ntsi nna mfe akron ebotwa mu kɔ.

9 Na Nephi a ɔyɛ Nephi n’egya no, nyia nna kyerɛwsɛm no wɔ no hɔ no annsan n’ekyir ammba Zarahemla asaase no do bio, na woennhu no wɔ asaase nyina do.

10 Na ɔbaa dɛ dɔm no daa ho tsenaa hɔn emumuyɛdze mu, ammfa hɔn ho koraa dɛ wɔkãa nsɛmpa na wɔhyɛɛ nkɔm pii wɔ hɔn mu; na dɛm na afe a ɔtɔ do du no so twaa mu kɔree; na afe a ɔtɔ do dubiako no so twaa mu kɔree wɔ emumuyɛ mu.

11 Na ɔbaa dɛ afe a ɔtɔ do duebiasa no mu no, akõkoekõ na wentwiwentwi hyɛɛ ase wɔ asaase no nyina do; osiandɛ nna Gadianton edwotwafo no adɔɔ sõ na wokum dɔm no hɔn mu pii, na wɔmaa nkurow pii mu tɔɔ pan, na wɔmaa ewuwuiwu nye enyinyandze pii sii wɔ asaase no do, ma okehiaa dɛ nyimpa nyinara, Nephifo nye Lamanfo nyinara, bɔmu fa akodze kõ tsia hɔn.

12 Dɛm ntsi, Lamanfo a woenu hɔnho, asakyer wɔ Ewuradze mu no dze hɔnho kɔbɔɔ hɔn nuanom Nephifo no ho, na osian hɔn nkwa nye hɔn mbaa nye hɔn mba so ntsi okehiaa dɛ wɔfa akodze na wɔkõ tsia Gadianton edwotwafo no; nyew, okehiaa dɛ wɔkõ hwehwɛ hɔn kyɛfa nye hɔn asɔr ne ndzinoa, hɔn fahodzi na ahotɔ.

13 Na ɔbaa dɛ ansaana dɛm afe a ɔtɔ do duebiasa yi rutwa mu akɔ no nna Nephifo no hɔn ɔsɛɛ abɛn koraa ɔnam ɔko no ntsi, nna wɔayɛ dzendzenndzen.

14 Na ɔbaa dɛ wɔkaan Lamanfo no a wɔakɔdɔm Nephifo no foraa Nephifo no.

15 Na woyii hɔn ndom no fii hɔn do, na hɔn wer bɛyɛɛ fitaa dɛ Nephifo ara pɛr.

16 Na hɔn mbabanyin nye hɔn mbabaa no ho bɛyɛɛ fɛw mbordo, na wɔkaan hɔn foraa Nephifo na wɔfrɛɛ hɔn Nephifo. Na dɛm na afe a ɔtɔ do duebiasa dze baa ewiei.

17 Na ɔbaa dɛ afe a ɔtɔ do duanan n’ahyɛse no, nna ɔkõ a ɔda edwotwafo no nye Nephi no nkorɔfo no ntamu no yɛɛ dzen mbordo; naaso Nephi no nkorɔfo no nsa daa edwotwafo no do ma wɔpaam hɔn fii hɔn nsaase no do ma wokoguu mbepɔw nye bea a wosuma hɔn ho wɔ no.

18 Na dɛm na afe a ɔtɔ do duanan no dze baa ewiei. Na mfe duenum no mu no, wotuu Nephi no nkorɔfo no do sa; na osian Nephi no nkorɔfo no hɔn emumuyɛdze na wentwiwentwi na etuatsew ntsi, Gadianton edwotwafo no nsa daa hɔn do.

19 Na dɛm na afe a ɔtɔ do duenum no dze baa ewiei; na dɛm na ɔmaa dɔm no kɔr amandzehu mu, na osian hɔn emumuyɛ ntsi ɔsɛɛ afõwa bɛsensɛɛn hɔn do araa ma nkyɛ orutwitwa hɔn egu famu.