3 Nīfai

Ngaahi Folofolá

Tohi ʻa Molomoná

Ngaahi Fakahokohokó
Talateú mo e Kau Fakamoʻoní
1 Nīfai
2 Nīfai
Sēkope
ʻĪnosi
Seilomi
ʻAmenai
Ngaahi Lea ʻa Molomona
Mōsaia
ʻAlamā
Hilamani
3 Nīfai
4 Nīfai
Molomona
ʻEta
Molonai

3 Nīfai

Vahe 1
ʻOku ʻalu atu ʻa Nīfai, ko e foha ʻo Hilamaní, mei he fonuá, pea ʻoku tauhi ʻe hono foha ko Nīfaí ʻa e ngaahi lekōtí—Neongo hono lahi ʻo e ngaahi fakaʻilongá mo e ngaahi meʻa fakaofó, naʻe kei filioʻi pē ʻa e kau fai angahalá ke tāmateʻi ʻa e kau māʻoniʻoní—ʻOku hoko ʻa e pō ʻo e ʻaloʻi ʻo Kalaisí—ʻOku fakahā ʻa e fakaʻilongá, pea ʻoku hopo hake ha fetuʻu foʻou—ʻOku fakautuutu ʻa e loí mo e kākaá, pea ʻoku tāmateʻi ʻe he kau kaihaʻa Katianetoní ʻa e tokolahi. Taʻu T.S. 1–4 nai.
Vahe 2
ʻOku fakautuutu ʻa e fai angahalá mo e ngaahi anga-fakalieliá ʻi he kakaí—ʻOku kau fakataha ʻa e kau Nīfaí mo e kau Leimaná ke maluʻi ʻa kinautolu mei he kau kaihaʻa ʻa Katianetoní—ʻOku liliu ʻa e kau Leimana ne uluí ʻo hinehina pea ʻoku ui ʻa kinautolu ko e kau Nīfai. Taʻu T.S. 5–16 nai.
Vahe 3
ʻOku fekau ʻe Kitianehai, ko e taki ʻo e kau kaihaʻa Katianetoní, kia Leikoneose mo e kau Nīfaí ke nau tukulolo mo tukuange honau ngaahi fonuá—ʻOku fili ʻe Leikoneose ʻa Kitikitonai ko e ʻeikitau pule ʻo e ngaahi kau taú—ʻOku fakataha ʻa e kau Nīfaí ki Seilahemala mo Mahu ke maluʻi ʻa kinautolu. Taʻu T.S. 16–18 nai.
Vahe 4
ʻOku ikunaʻi ʻe he kau Nīfaí ʻa e kau kaihaʻa ʻa Katianetoní—ʻOku fakapoongi ʻa Kitianehai, pea ʻoku tautau hono fetongi, ko Semenilaihā—ʻOku fakafetaʻi ʻa e kau Nīfaí ki he ʻEikí koeʻuhi ko ʻenau ngaahi ikuná. Taʻu T.S. 19–22 nai.
Vahe 5
ʻOku fakatomala ʻa e kau Nīfaí mo liʻaki ʻenau ngaahi angahalá—ʻOku tohi ʻe Molomona ʻa e hisitōlia ʻo hono kakaí mo fakahā ʻa e folofola taʻengatá kiate kinautolu—ʻE tānaki mai ʻa ʻIsileli mei hono fakamovetevetea fuoloa iá. Taʻu T.S. 22–26 nai.
Vahe 6
ʻOku tuʻumālie ʻa e kau Nīfaí—ʻoku tupu hake ʻa e loto-hīkisiá, maʻu koloá, mo e ngaahi vahevahe ʻi he tuʻunga ʻo e kakaí—ʻOku maveuveu ʻa e siasí ʻi he ngaahi fefakakikihiʻaki—ʻOku taki ʻe Sētane ʻa e kakaí ke angatuʻu fakahāhā—ʻOku kalanga ha kau palōfita tokolahi ʻaki ʻa e fakatomalá pea ʻoku tāmateʻi ʻa kinautolu—ʻOku alealea fakafufū ʻa e kau fakapoó ke toʻo ʻa e puleʻangá. Taʻu T.S. 26–30 nai.
Vahe 7
ʻOku fakapoongi ʻa e fakamaau lahí, pea fakaʻauha ʻa e puleʻangá, pea vahevahe ʻa e kakaí ki ha ngaahi faʻahinga kakai—ʻOku hoko ʻa Sēkope, ko ha fili ʻo Kalaisi, ko e tuʻi ʻo ha kautaha fufū—ʻOku malanga ʻaki ʻe Nīfai ʻa e fakatomalá mo e tui kia Kalaisí—ʻOku tauhi mai ha kau ʻāngelo kiate ia ʻi he ʻaho taki taha, pea ʻokú ne fokotuʻu hake hono tokouá mei he maté—ʻOku fakatomala ha tokolahi pea nau papitaiso. Taʻu T.S. 30–33 nai.
Vahe 8
ʻOku hoko ʻa e ngaahi afaá, ngaahi mofuiké, ngaahi afí, ngaahi ʻahiohió, mo e ngaahi fakatuʻutāmaki ʻo natulá ko e ngaahi fakaʻilonga ki hono kalusefai ʻo Kalaisi ki he ʻakaú—ʻOku mate ha kakai tokolahi—ʻoku ʻufiʻufi ʻe he fakapoʻulí ʻa e funga ʻo e fonuá ʻi ha ʻaho ʻe tolu—ʻOku mamahi lahi ʻa kinautolu ne toé koeʻuhi ko e ngaahi fakamamahi kuo hoko kiate kinautolú. Taʻu T.S. 33–34 nai.
Vahe 9
ʻOku fakahā ʻe he leʻo ʻo Kalaisí mei he fakapoʻulí, hono fakaʻauha ʻo e kakai tokolahi mo e ngaahi kolo lalahi koeʻuhi ko ʻenau ngaahi fai angahalá—ʻOkú Ne toe fakahā foki ko e ʻEikí Ia, peá ne fakahā mo hono fakahoko ʻo e fono ʻa Mōsesé, pea fakaafeʻi ʻa e kakaí ke nau haʻu kiate Ia ʻo moʻui. Taʻu T.S. 34 nai.
Vahe 10
ʻOku fakalongolongo ʻa e fonuá ʻi ha ngaahi houa lahi—ʻOku ongo mai ʻa e leʻo ʻo Kalaisí ʻo talaʻofa ʻe tānaki Hono kakaí ʻo hangē ko e tānaki fakataha ʻe he motuʻa moá ʻa hono ʻuhikí ʻi hono lalo kapakaú—Ko e konga ʻo e kakaí ne māʻoniʻoni angé kuo fakahaofi ʻa kinautolu. Taʻu T.S. 34–35 nai.
Vahe 11
ʻOku fakamoʻoniʻi ʻe he Tamaí ki Hono ʻAlo ʻOfaʻangá—ʻOku hā mai ʻa Kalaisi mo fakahā kuó Ne fai ʻa e Fakalelei—ʻOku ala ʻa e kakaí ki he ngaahi mata kafo ʻi Hono ongo nimá, vaʻé mo Hono vakavaká—ʻOku nau kalanga Hōsana—ʻOkú ne folofola ki he anga mo e ngaahi founga ʻo e papitaisó—ʻOku tupu ʻa e laumālie ʻo e fakakikihí mei he tēvoló—Ko e tokāteline ʻa Kalaisí ke tui ʻa e tangatá pea papitaiso mo maʻu ʻa e Laumālie Māʻoniʻoní. Taʻu T.S. 34 nai.
Vahe 12
ʻOku ui ʻe Sīsū mo fakamafaiʻi ʻa e kau ākonga ʻe toko hongofulu mā uá—ʻOkú Ne fai ki he kau Nīfaí ha malanga ʻoku tatau mo e Malanga ʻi he Moʻungá—ʻOkú Ne folofola ʻo kau ki he Ngaahi Tāpuaki tatau pē mo ia ʻi he malanga ʻi he moʻungá—ʻOku māʻolunga pea mahuʻinga ange ʻEne ngaahi akonakí ʻi he fono ʻa Mōsesé—ʻOku fekau ki he tangatá ke ne haohaoa ʻo hangē ko ʻEne haohaoa mo ʻEne Tamaí—Fakafehoanaki mo e Mātiu vahe 5. Taʻu T.S. 34 nai.
Vahe 13
ʻOku akoʻi ʻe Sīsū ki he kau Nīfaí e Lotu ʻa e ʻEikí—ʻOku fekau ke nau tokonaki ʻa e ngaahi koloa ʻi he langí—ʻOku fekau ki he kau ākonga ʻe toko hongofulu mā uá ʻi heʻenau ngāué ke ʻoua naʻa nau fakakaukau ki heʻenau ngaahi fie maʻu fakatuʻasinó—Fakafehoanaki mo e Mātiu vahe 6. Taʻu T.S. 34 nai.
Vahe 14
ʻOku folofola ʻa Sīsū ʻo fekau: ʻOua ʻe fakamaau; kole ki he ʻOtuá; tokanga telia ʻa e kau palōfita kākaá—ʻOkú ne talaʻofa ʻa e fakamoʻuí kiate kinautolu ʻoku fai ʻa e finangalo ʻo e Tamaí—Fakafehoanaki mo e Mātiu vahe 7. Taʻu T.S. 34 nai.
Vahe 15
ʻOku fakahā ʻe Sīsū ʻoku fakahoko ʻiate Ia ʻa e fono ʻa Mōsesé—Ko e kau Nīfaí ʻa e fanga sipi kehe naʻá Ne folofola ʻo kau ki ai ʻi Selusalemá—Ko e meʻa ʻi he fai angahalá, ne ʻikai ʻiloʻi ai ʻe he kakai ʻo e ʻEikí ʻi Selusalemá ki he fanga sipi ʻo ʻIsileli ne fakamoveteveteʻi ʻo ʻIsilelí. Taʻu T.S. 34 nai.
Vahe 16
ʻE hāʻele ʻa Sīsū ki he niʻihi kehe ʻoku nau ʻo e fanga sipi hē ʻo ʻIsilelí—ʻI he ngaahi ʻaho fakaʻosí ʻe ʻuluaki ʻave ʻa e ongoongoleleí ki he kau Senitailé pea toki hoko ki he fale ʻo ʻIsilelí—ʻE mamata tonu ʻaki ʻe he kakai ʻo e ʻEikí ʻa honau matá ki Heʻene toe fakafoki mai ʻa Saioné. Taʻu T.S. 34 nai.
Vahe 17
ʻOku folofola ʻa Sīsū ki he kakaí ke nau fakalaulauloto ki Heʻene ngaahi leá pea lotu ke nau maʻu ha ʻilo—ʻOkú Ne fakamoʻui ʻa honau kau mahakí—ʻOkú Ne lotua ʻa e kakaí, ʻo ne lea ʻaki ʻa e ngaahi lea ʻoku ʻikai faʻa lava ʻo tohi—ʻOku tauhi mai ʻa e kau ʻāngeló pea takatakai ʻe he afi ʻa ʻenau fānau īkí. Taʻu T.S. 34 nai.
Vahe 18
ʻOku kamata ʻe Sīsū hono fai ʻo e sākalamēnití ʻi he kau Nīfaí—ʻOku fekau ke nau lotu maʻu pē ʻi Hono huafá—Ko kinautolu ʻoku nau kai Hono sinó mo inu Hono taʻataʻá ʻi he taʻefeʻungá ʻoku nau malaʻia—ʻOku foaki ki he kau ākongá ʻa e mālohi ke foaki ʻa e Laumālie Māʻoniʻoní. Taʻu T.S. 34 nai.
Vahe 19
ʻOku tauhi ʻa e kau ākonga ʻe toko hongofulu mā uá ki he kakaí mo nau lotu ke nau maʻu ʻa e Laumālie Māʻoniʻoní—ʻOku papitaiso ʻa e kau ākongá pea nau maʻu ʻa e Laumālie Māʻoniʻoní mo e tauhi mai ʻa e kau ʻāngeló—ʻOku lotu ʻa Sīsū ʻo folofola ʻaki ʻa e ngaahi folofola ʻoku ʻikai faʻa lava ʻo tohi—ʻOkú ne fakamoʻoni ki he fuʻu tui lahi ʻa e kau Nīfai ko ʻení. Taʻu T.S. 34 nai.
Vahe 20
ʻOku foaki ʻe Sīsū ʻa e mā mo e uaine ʻi ha mana peá ne tāpuakiʻi mo tufaki ʻa e sākalamēnití ki he kakaí—ʻE maʻu ʻe he toenga ʻo e hako ʻo Sēkopé ʻa e ʻilo ki he ʻEiki ko honau ʻOtuá pea te nau maʻu ʻa e ngaahi fonua ʻo ʻAmeliká—Ko Sīsū ʻa e palōfita ko ia ʻoku hangē ko Mōsesé, pea ko e kau Nīfaí ko e fānau ʻa kinautolu ʻa e kau palōfitá—Ko e niʻihi kehe ʻo e kakai ʻo e ʻEikí ʻe tānaki mai ʻa kinautolu ki Selusalema. Taʻu T.S. 34 nai.
Vahe 21
ʻE tānaki fakataha ʻa ʻIsileli ʻi he taimi ʻe ʻomi ai ʻa e Tohi ʻa Molomoná—ʻE fokotuʻu ʻa e kau Senitailé ʻo hoko ko ha kakai tauʻatāina ʻi ʻAmelika—ʻE fakamoʻui ʻa kinautolu ʻo kapau te nau tui mo talangofua; ka ʻikai, ʻe motuhi atu ʻa kinautolu mo fakaʻauha—ʻE langa hake ʻe ʻIsileli ʻa e Selusalema Foʻoú, pea ko e ngaahi faʻahinga naʻe pulí te nau foki mai. Taʻu T.S. 34 nai.
Vahe 22
ʻI he ngaahi ʻaho fakaʻosí, ʻe fokotuʻu ʻa Saione mo hono ngaahi siteikí, pea ʻe tānaki mai ʻa ʻIsileli ʻi he ʻaloʻofa mo e manavaʻofa—Te nau ikuna—Fakafehoanaki mo e ʻĪsaia vahe 54. Taʻu T.S. 34 nai.
Vahe 23
ʻOku hōifua ʻa Sīsū ki he ngaahi lea ʻa ʻĪsaiá—ʻOkú ne fekau ki he kakaí ke nau fakatotolo faivelenga ʻi he ngaahi tohi ʻa e kau palōfitá—ʻOku tānaki mai ʻa e ngaahi lea ʻa Samuela ko e Tangata Leimaná ʻo kau ki he Toetuʻú ki heʻenau ngaahi lekōtí. Taʻu T.S. 34 nai.
Vahe 24
ʻE teuteu ʻe he talafekau ʻa e ʻEikí ʻa e hala ki he Hāʻele ʻAngaua maí—ʻE fakamāuʻi ʻe Sīsū ʻa e kakai kotoa pē—ʻOku fekau ki ʻIsileli ke nau totongi ʻa e ngaahi vahehongofulú mo e ngaahi foakí—ʻOku tauhi ha tohi ʻo e manatú—Fakafehoanaki mo e Malakai vahe 3. Taʻu T.S. 34 nai.
Vahe 25
ʻE tutu ʻi he Hāʻele ʻAnga Uá, ʻa e kau pōlepolé mo e kau fai angahalá ʻo hangē ko e veve—ʻE haʻu ʻa ʻIlaisiā ʻoku teʻeki hoko ʻa e fuʻu ʻaho lahi mo fakamanavaheé—Fakafehoanaki mo e Malakai vahe 4. Taʻu T.S. 34 nai.
Vahe 26
ʻOku fakamatalaʻi ʻe Sīsū ʻa e meʻa kotoa pē mei he kamataʻangá ki he ngataʻangá—ʻOku lea ʻaki ʻe he kau valevalé mo e fānau īkí ʻa e ngaahi meʻa fakaofo—Ko kinautolu ʻi he siasi ʻo Kalaisí ʻoku nau meʻa taha pē. Taʻu T.S. 34 nai.
Vahe 27
ʻOku fekau ʻe Sīsū ke ui ʻa e Siasí ʻi Hono huafá—ʻOku hoko ʻEne ngāué mo ʻEne feilaulau huhuʻí ko ʻEne ongoongoleleí—ʻOku fekau ki he tangatá ke fakatomala mo papitaiso koeʻuhi ke fakamāʻoniʻoni ʻa kinautolu ʻe he Laumālie Māʻoniʻoní—ʻOku totonu ke nau hangē pē ko Sīsuú. Taʻu T.S. 34–35 nai.
Vahe 28
ʻOku fakaʻamu pea ʻoku talaʻofa ki he toko hiva ʻo e kau ākonga ʻe toko hongofulu mā uá te nau maʻu ha tofiʻa ʻi he puleʻanga ʻo e ʻOtuá ʻi he taimi te nau mate aí—Naʻe fakaʻamu ʻa e Kau Nīfai ʻe Toko Tolú, pea naʻe foaki kiate kinautolu ʻa e mālohi ki he maté, koeʻuhí ke nau nofo ʻi he māmaní ʻo aʻu ki he toe hāʻele mai ʻa Sīsuú—Naʻe liliu ʻa kinautolu pea nau mamata ki he ngaahi meʻa ʻoku ʻikai ngofua ke leaʻaki, pea ʻoku nau lolotonga ngāué ni ʻi he lotolotonga ʻo e kakaí. Taʻu T.S. 34–35 nai.
Vahe 29
ʻOku hoko hono ʻomi ʻo e Tohi ʻa Molomoná ko ha fakaʻilonga kuo kamata ʻe he ʻEikí ʻene tānaki ʻa ʻIsileli mo fakahoko ʻEne ngaahi fuakavá—ʻE malaʻia ʻa kinautolu ʻoku nau fakaʻikaiʻi ʻa ʻEne ngaahi fakahaá mo e ngaahi meʻafoakí ʻi he ngaahi ʻaho fakaʻosí. Taʻu T.S. 34–35 nai.
Vahe 30
ʻOku fekau ki he kau Senitaile ʻi he ngaahi ʻaho fakaʻosí ke nau fakatomala, pea haʻu kia Kalaisi, pea lau fakataha mo e fale ʻo ʻIsilelí. Taʻu T.S. 34–35 nai.