1 Pea ko ʻeni naʻe hoko ʻo pehē naʻe foki ʻa e kakai ʻo e kau Nīfaí kotoa pē ki honau ngaahi fonua ʻonautolú ʻi hono uofulu mā ono ʻo e taʻú, ko e tangata taki taha, mo hono fāmili, mo ʻene ngaahi takanga monumanu īkí mo e ngaahi takanga monumanu lalahí, ʻa ʻene fanga hōsí mo ʻene fanga pulú, pea mo e ngaahi meʻa kotoa pē naʻe ʻaʻaná.

2 Pea naʻe hoko ʻo pehē kuo ʻikai te nau kai ʻo ʻosi kotoa ʻenau ngaahi meʻakai; ko ia naʻa nau ʻave mo kinautolu ʻa e meʻa kotoa pē ʻa ia kuo ʻikai te nau kaí, ʻa ʻenau ngaahi tengaʻi ʻakau ʻo e faʻahinga kotoa pē, mo ʻenau koulá, mo ʻenau silivá, mo ʻenau ngaahi meʻa mahuʻinga kotoa pē, pea nau foki ki honau ngaahi fonua ʻonautolú mo honau ngaahi tofiʻa, ʻi he tokelaú pea mo e tongá fakatouʻosi, ʻi he fonua ʻi he fakatokelaú pea mo e fonua ʻi he fakatongá fakatouʻosi.

3 Pea naʻa nau tuku ʻa e ngaahi konga fonua ki he kau kaihaʻa ko ia kuo nau fai ha fuakava ke tauhi ʻa e melino ʻi he fonuá, ʻa ia naʻa nau fie hoko atu ko e kau Leimaná, ʻo fakatatau mo honau tokolahí, koeʻuhi ke nau maʻu, ʻi heʻenau ngaahi ngāué, ha meʻa ke moʻui ʻaki; pea ko ia naʻa nau fokotuʻu ai ʻa e melinó ʻi he fonuá hono kotoa.

4 Pea naʻa nau toe kamata ke tuʻumālie pea tupulaki ʻo mālohi; pea naʻe ʻosi atu hono uofulu mā ono mo hono uofulu mā fitu ʻo e taʻú, pea naʻe ʻi ai ʻa e fuʻu maau lahi ʻi he fonuá; pea kuo nau fokotuʻu ʻenau ngaahi lao ʻo fakatatau ki he taʻe-filifilimānakó mo e faitotonú.

5 Pea ko ʻeni naʻe ʻikai ha meʻa ʻi hono kotoa ʻo e fonuá ke taʻofi ʻa e kakaí mei heʻenau tuʻumālie maʻu ai pē, tuku kehe pē haʻanau tō ki he maumau-fonó.

6 Pea ko ʻeni ko Kitikitonai, mo e fakamaau, ko Leikoneosé, pea mo e faʻahinga kuo fakanofo ko honau kau takí, naʻa nau fokotuʻu ʻa e fuʻu melino lahi ko ʻeni ʻi he fonuá.

7 Pea naʻe hoko ʻo pehē naʻe lahi ʻa e ngaahi kolo ʻa ia naʻe langa foʻou, pea naʻe lahi ʻa e ngaahi kolo motuʻa ʻa ia naʻe toe fakaleleiʻi.

8 Pea naʻe lahi ʻa e ngaahi hala lalahi naʻe tanu, pea lahi mo e ngaahi hala ʻa ia naʻe ngaohi, ʻa ia naʻe ʻalu mei he kolo ki he kolo, pea mei he fonua ki he fonua, pea mei he feituʻu ki he feituʻu.

9 Pea naʻe ʻosi pehē atu hono uofulu mā valu ʻo e taʻú, pea naʻe maʻu ʻe he kakaí ʻa e melino maʻu ai pē.

10 Ka naʻe hoko ʻo pehē ʻi hono uofulu mā hiva ʻo e taʻú naʻe kamata ke tupu ha ngaahi fakakikihi ʻe niʻihi ʻi he kakaí; pea naʻe ʻi ai ʻa e niʻihi naʻe fielahi ʻi he loto-hīkisia lahi mo e ngaahi pōlepole koeʻuhi ko ʻenau fuʻu maʻu koloa lahi ʻaupitó, ʻio, ʻo aʻu ki he ngaahi fuʻu fakatanga lahi;

11 He naʻe ʻi ai ʻa e kau fefakatauʻaki koloa tokolahi ʻi he fonuá, kae ʻumaʻā foki mo e kau taukapo tokolahi, mo e kau ʻōfisa tokolahi.

12 Pea naʻe kamata ʻa e kakaí ke vahevahe fakatuʻunga, ʻo fakatatau ki heʻenau ngaahi koloá mo honau ngaahi faingamālie ke akó; ʻio, naʻe ʻi ai ʻa e niʻihi naʻe taʻeʻilo, koeʻuhi ko ʻenau masivá, pea naʻe maʻu ʻe he niʻihi ʻa e fuʻu poto lahi koeʻuhi ko ʻenau ngaahi koloá.

13 Naʻe fielahi ʻa e niʻihi ʻi he loto-hīkisiá, pea naʻe fuʻu loto-fakatōkilalo ʻaupito ʻa e niʻihi; naʻe fetongi ʻe he niʻihi ʻa e lauʻikoví ʻaki ʻa e lauʻikovi, kae tali ʻe he niʻihi ʻa e lauʻikoví mo e fakatangá pea mo e ngaahi faʻahinga fakamamahi kotoa pē, pea ʻikai ke nau tafoki ʻo toe lea kovi ange, ka naʻa nau loto-fakatōkilalo mo loto-fakatomala ʻi he ʻao ʻo e ʻOtuá.

14 Pea ko ia naʻe tupu ʻa e fuʻu tuʻunga kehekehe lahi ʻi he fonuá hono kotoa, ko ia naʻe kamata ke movetevete ʻa e siasí; ʻio, ko ia naʻe aʻu ki hono tolungofulu ʻo e taʻú kuo movetevete ʻa e siasí ʻi hono kotoa ʻo e fonuá, tuku kehe pē ʻi he niʻihi tokosiʻi ʻo e kau Leimaná ʻa ia kuo ului ki he tui moʻoní; pea naʻe ʻikai te nau fie tafoki mei ai, he naʻa nau fai mālohi, mo tuʻu maʻu, mo tuʻu ʻaliʻaliaki, ʻo loto-fiemālie ke faivelenga kakato ke tauhi ʻa e ngaahi fekau ʻa e ʻEikí.

15 Ko ʻeni ko e tupuʻanga ʻeni ʻo e angahalá ni ʻi he kakaí—kuo maʻu ʻe Sētane ʻa e fuʻu mālohi lahi ke ueʻi hake ʻa e kakaí ke nau fai ʻa e faʻahinga angahala kotoa pē, pea mo hono fakafonu ʻa kinautolu ʻaki ʻa e loto-hīkisiá, ʻo ʻahiʻahiʻi ʻa kinautolu ke kumi ki he mālohi, mo e mafai, mo e ngaahi koloa, pea mo e ngaahi meʻa taʻeʻaonga ʻo e māmaní.

16 Pea naʻe pehē hono tohoakiʻi atu ʻe Sētane ʻa e loto ʻo e kakaí ke nau fai ʻa e faʻahinga angahala kotoa pē; ko ia naʻa nau fiefia ʻi he melinó ʻi ha ngaahi taʻu siʻi pē.

17 Pea ko ia, ʻi he kamataʻanga hono tolungofulu ʻo e taʻú—kuo liʻaki ʻa e kakaí ʻi ha taimi fuoloa ke felīliaki holo ʻe he ngaahi ʻahiʻahi ʻa e tēvoló ki ha feituʻu pē naʻá ne fie ʻave ʻa kinautolu ki aí, pea ke fai ʻa e faʻahinga angahala kotoa pē ʻokú ne loto ke nau faí—ko ia ʻi he kamata ʻo e taʻu ní, ʻa ia ko hono tolungofulu ʻo e taʻú, kuo nau ʻi ha tuʻunga fakamamahi ʻo e fai angahalá.

18 Ko ʻeni naʻe ʻikai te nau fai angahala taʻeʻilo, he naʻa nau ʻiloʻi ʻa e finangalo ʻo e ʻOtuá ʻo kau kiate kinautolú, he kuo akoʻi ia kiate kinautolu; ko ia naʻa nau angatuʻu taʻe-fakakounaʻi ai ki he ʻOtuá.

19 Pea ko ʻeni naʻe hoko ʻeni ʻi he ngaahi ʻaho ʻo Leikoneose, ko e foha ʻo Leikoneosé, he naʻe maʻu ʻe Leikoneose ʻa e lakanga ʻo ʻene tamaí ʻo ne puleʻi ʻa e kakaí ʻi he taʻu pē ko iá.

20 Pea naʻe kamata ke ʻi ai ʻa e kau tangata kuo ueʻi fakalaumālie mei langi mo fekauʻi atu, ʻo nau tuʻu ʻi he lotolotonga ʻo e kakaí ʻi hono kotoa ʻo e fonuá, ʻo malanga mo fakamoʻoni taʻe-manavahē ki he ngaahi angahala mo e ngaahi hia ʻa e kakaí, pea nau fakamoʻoni kiate kinautolu ki he huhuʻi ʻe fai ʻe he ʻEikí maʻa hono kakaí, pe ko hono ʻai ʻe tahá, ko e toetuʻu ʻa Kalaisí; pea naʻa nau fakamoʻoni taʻe-manavahē ki heʻene pekiá mo e ngaahi mamahí.

21 Ko ʻeni naʻe ʻi ai foki ʻa e tokolahi ʻo e kakaí naʻe fuʻu ʻita lahi koeʻuhi ko kinautolu ʻa ia naʻe fakamoʻoni ki he ngaahi meʻa ní; pea ko kinautolu ʻa ia naʻe ʻitá naʻe lahi ki he kau tuʻi fakamaau lahí, mo kinautolu naʻa nau hoko ko e kau taulaʻeiki lahí mo e kau taukapó; ʻio, ko kinautolu kotoa pē ko e kau taukapó naʻa nau ʻita kiate kinautolu ʻa ia naʻe fakamoʻoni ki he ngaahi meʻa ní.

22 Ko ʻeni naʻe ʻikai ha taukapo pe ha fakamaau pe ha taulaʻeiki lahi ʻa ia naʻe maʻu ʻa e mālohi ke tuʻutuʻuni ha taha ke tāmateʻi kae ngata pē ʻi he fakamoʻoni ki he tuʻutuʻuni ki honau tāmateʻí ʻa e kōvana ʻo e fonuá.

23 Ko ʻeni naʻe ʻi ai ha tokolahi ʻo kinautolu ʻa ia naʻe fakamoʻoni ki he ngaahi meʻa ʻa ia ʻoku kau kia Kalaisí, naʻa nau fakamoʻoni taʻe-manavahē, pea naʻe puke mo tāmateʻi fakafufū ʻe he kau fakamāú, pea naʻe ʻikai ʻilo ki heʻenau maté ʻa e kōvana ʻo e fonuá kae ʻoua kuo hili ʻenau maté.

24 Ko ʻeni vakai, naʻe ʻikai hoa ʻeni mo e ngaahi lao ʻo e fonuá, ke ʻi ai ha tangata ʻe tāmateʻi tuku kehe pē ʻi heʻenau maʻu ʻa e mafai mei he kōvana ʻo e fonuá—

25 Ko ia naʻe ʻomi ha lāunga ki he fonua ko Seilahemalá ki he kōvana ʻo e fonuá, ʻo talatalaakiʻi ʻa e kau fakamaau ko ia ʻa ia kuo nau tuʻutuʻuni ke tāmateʻi ʻa e kau palōfita ʻa e ʻEikí, kae ʻikai fakatatau ki he laó.

26 Ko ʻeni naʻe hoko ʻo pehē naʻe puke ʻa kinautolu ʻo ʻomi ki he ʻao ʻo e fakamāú, ke fakamāuʻi ʻa kinautolu ki he hia kuo nau faí, ʻo fakatatau ki he lao kuo fokotuʻu ʻe he kakaí.

27 Ko ʻeni naʻe hoko ʻo pehē naʻe ʻi ai ʻa e ngaahi kaumeʻa mo e kāinga tokolahi ʻo e kau fakamaau ko iá; pea ko honau toé, ʻio, ʻa e meimei kotoa ʻo e kau taukapo mo e kau taulaʻeiki lahí, naʻa nau fakataha ʻa kinautolu ʻo nau kau mo e kāinga ʻo e kau fakamaau ʻe fakamāuʻi ʻo fakatatau ki he laó.

28 Pea naʻa nau fai ha fefuakavaʻaki ʻiate kinautolu, ʻio, ʻa e fuakava ko ia naʻe fai ʻe kinautolu ʻo e kuonga muʻá, ʻa ia ko e fuakava naʻe fokotuʻu mo fakahoko ʻe he tēvoló, ke kau fakataha ʻi he tauʻi ʻo e māʻoniʻoni kotoa pē.

29 Ko ia naʻa nau kau fakataha ke tauʻi ʻa e kakai ʻo e ʻEikí, pea nau fai ha fuakava ke fakaʻauha ʻa kinautolu, pea fakaʻatā ʻa e faʻahinga kuo halaia ʻi he fakapoó mei he mālohi ʻo e fakamaau totonú, ʻa ia naʻe teuteu ke fai ʻo fakatatau ki he laó.

30 Pea naʻa nau fakafili ki he laó mo e ngaahi totonu ʻa honau fonuá; pea naʻa nau fefuakavaʻaki ʻiate kinautolu ke nau fakaʻauha ʻa e kōvaná, pea fokotuʻu ha tuʻi ki he fonuá, koeʻuhi ke ʻoua ʻe toe tauʻatāina ʻa e fonuá kae fakaongo pē ki he ngaahi tuʻí.