1 Ac na tukun ma inge mwet luhn mwet lal Nephi elos nuhkwewa tuh fohlohklac nuh acn selos sifacna ke yac ahklongoul ac ohnkohsr, mukul nuhkwewa, wi sucu lal, un sip ac kosro nahtuhl, ohsr nahtuhl ac kaho nahtuhl, ac ma nuhkwewa lalos.

2 Ac tukun ma inge elos tiacna kanglah nohfohn mwe kahsruh nwaclos; ke ma inge elos tuh us weluhlos ma nuhkwewa ma elos tiacna kanglah, ke kain in grain nuhkwewa lalos, ac kol lalos, ac selfuh lalos, ac ma sacohk nuhkwewa lalos, ac elos tuh fohlohklac nuh acn selos sifacna ac ma lalos, kwewana nuh ke lacfahl acir ac lacfahl epang, kwewana nuh ke acn ma oan nuh acir ac ke acn ma oan nuh epang.

3 Ac elos sang nuh sin un mwet pihsrapasr suc ilyak nuh ke sie wuhlweacng in liyacacng na mislac luhn acn uh, suc tuh kena in srwackna mwet Laman, acn, in fal nuh ke pihsaclos, tuh elos in kuh in eis, wi orekma lalos, ma elos enenuh in moul kac; ac ohinge elos tuh oakiyac mislac fin acn nuhkwewa.

4 Ac elos muhtwacwacack in kapkapwack ac fokokoi; ac yac longoul ac ohnkohsr ac itkohsr somlah, ac oasr akwuck na wo fin acn uh; ac elos tuh oraclah masap lalos in fal nuh ke ohiyac wo ac suwohs.

5 Ac inge wacngihn ma fin acn nuhkwewa we in tulokihnyac mwet uh liki fahfahlac na in kapkapwack, sahyacn na elos fin puhtatyang nuh ke tahfonglac.

6 Ac inge Gidgiddoni, ac mwet nuhnuhnkuh, Lachoneus, ac elos suc tuh srihsrngiyucki mwet kol, suc tuh oakiyac mislac luhlahp se inge fin acn uh.

7 Ac tukun ma inge oasr siti sasuc pucspucs muhsahiyuckyak, ac oasr siti mah pucspucs ahkwoyeyucklac.

8 Ac oasr inkacneck pucspucs muhsahiyuck, ac inkacnek pucspucs oreklac, ma som nuh ke siti nuh ke siti, ac nuh ke acn nuh ke acn, ac nuh ke yen nuh ke yen.

9 Ac ohinge somlah yac ahklongoul ac alkosr, ac mwet uh fahfahlacna in muhta in mislac.

10 Tuhsruhk tukun ma inge ke yac ahklongoul ac yuc muhtwacwacack in oasr akuhkuhin inmahsrlon mwet uh; ac kuhtuh insefuhlwactwack ac kohnkihn ke srihpen kahsruhp yohk lalos, ahok, finne nuh ke ahkkweok yohk;

11 Tuh oasr mwet orek pisnis pucspucs fin acn uh, ac oacyacpac mwet pucspucs ma orekma ke loh, ac mwet pucspucs ma orekma ke ohfuhs.

12 Ac mwet uh muhtwacwacack in sriyucklac ke wal, in fal nuh ke kahsruhp lalos ac pacl wowo lalos in lutlut; ahok, kuhtuh lahlfon ke srihpen suhkahsruhp lalos, ac kuhtuh tuh eis lutlut yohk ke srihpen kahsruhp lalos.

13 Kuhtuh tuh insefuhlwactyak, ac mwet sahyac tuh arulacna inse puhsisacl; kuhtuh tuh fohlohkihn kahs kohu ke kahs kohu, a mwet sahyac eis kahs kohu ac kalyeiyuck ac kain in ohiyac kweok nuhkwewa, ac elos tiacna forlah ac sifilpac lain, tuhsruhk elos inse puhsisacl ac inse muhsahl ye muhtuhn God.

14 Ac ohinge oasr sie eklac yohk fin acn nuhkwewa, yohkna oruh alu uh muhtwacwacack in muhsahlwelihk; ahok, yohkna oruh ke yac ahktolngoul alu uh muhsahlwelihk fin acn nuhkwewa sahyacn na inmahsrlon mwet puh luhn mwet Laman suc tuh forlah nuh ke luhlahlfongi pwacye; ac elos tuh tiacna som liki ma inge, tuh elos fokoko, ac tu na kuh, ac tiac mukwi, ahkolah in insacnweacng nohfohn in liyacacng masap luhn Leum.

15 Inge srihpac luhn ma koluk se inge luhn mwet uh pa ma se inge—Yohk kuh lal Setuhn, in puhrakwack mwet uh in oruh kain in ma koluk nuhkwewa, ac in puhsrkwaclosyak ke inse fuhlwact, srihfelos in suk kuh, ac wal, ac kahsruhp, ac ma wacngihn srihpac luhn facluh.

16 Ac ohinge Setuhn el tuh kohllah insiacn mwet uh in oruh kain in ma koluk nuhkwewa; ke ma inge elos tuh engankihn mislac tuhsruhk ke yac na puh.

17 Ac ohinge, ke muhtwacwacackiyacn yac ahktolngoul—mwet uh kolyucklac ke sie lusen pacl loeloes in kolyuck ke mwe sruhf luhn devil ke kuhtwena ma suc el kena in kohlohlos nuh kac, ac in oruh oacna sie ma koluk ma el kena elos in oruh—ac ohinge ke muhtwacwacackiyacn ma inge, ke yac ahktolngoul, elos tuh oasr ke ohiyac na koluk.

18 Inge elos tiacna nihkihn ke elos oruh ma koluk, tuh elos etuh kena luhn God nuh selos, tuh ma inge tuh lutiyuck nuh selos; ke ma inge elos tuh insese in forlah lain God.

19 Ac na ma inge orek ke pacl lal Lachoneus, wen nahtuhl Lachoneus, tuh Lachoneus el tuh fohnohslah siyah luhn pahpah tuhmwacl ac tuh kol mwet uh ke yac sac.

20 Ac muhtwacwacack in oasr mwet suc mokleyuckyak inkuhsrao me ac suhpweyucklac, in tulac inmahsrlon mwet uh ke acn nuhkwewa, in luti ac fahkwack ke puhlaik ke orekma koluk ac ma koluk luhn mwet uh, ac in fahkwack nuh selos ke molwelah se suc Leum El ac oraclah nuh sin mwet Lal, kuh ke kahs sahyac, sifilpac moulyak luhn Kraist; ac elos tuh fahkwack ke puhlaik ke misac ac kweok Lal.

21 Inge oasr mwet pucspucs suc tuh arulacna kasrkuhsrak ke srihpaclos suc fahkwack ke ma inge; ac elos suc kasrkuhsrak ah inkaiyac ah pa mwet nuhnuhnkuh fuhlwact, ac elos suc tuh pa mwet tol fuhlwact ac mwet orekma ke loh; ahok, elos nuhkwewa suc orekma ke loh elos tuh kasrkuhsrak selos suc fahkwack ke ma inge.

22 Inge wacngihn mwet orekma ke loh kuh mwet nuhnuhnkuh kuh mwet tol fuhlwact suc oasr kuh la in nuhnuhnkweyac oacna sie nuh ke misac sahyacn na nuhnuhnkuh lalos tuh sainiyucki sin kafuhnah luhn acn uh.

23 Inge oasr mwet pucspucs selos suc fahkwack ke ma luhn Kraist suc fahkwack ke puhlaik, suc tuh utucklac ac acnwucki ke lukmac sin mwet nuhnuhnkuh, tuh etweyuckyak luhn misac lalos tiacna tuhkuh nuh yohrohl kafuhnah luhn acn uh ne ke na tukun misac lalos.

24 Inge liye, ma inge lain masap luhn acn uh, tuh kuhtwena mwet in acnwucki sahyacn na elos eis kuh sin kafuhnah luhn acn uh—

25 Ke ma inge sie puhsra in lain tuhkuh nuh fin acn lal Zarahemla, nuh yurun kafuhnah luhn acn uh, in lain mwet nuhnuhnkuh inge suc tuh nuhnuhnkweyac mwet pahluh luhn Leum in acnwucki, tiac fal nuh ke masap uh.

26 Na tukun ma inge elos tuh sruokyucki ac utucklac nuh ye muhtuhn mwet nuhnuhnkuh, in nuhnuhnkweyuck ke orekma koluk ma elos tuh oraclah, in fal nuh ke masap ma tuh ituckyang sin mwet ah.

27 Na tukun ma inge mwet nuhnuhnkuh ingacn oasr kawuck ac sucu pucspucs lalos; ac mwet luhlah, ahok, finne apkuhran in nohfohn mwet orekma ke loh ac mwet tol fuhlwact, elos tuh toeni nuh sie, ac toeni wi sucu luhn mwet nuhnuhnkuh ingacn suc ac srihkeyuck in fal nuh ke masap.

28 Ac elos tuh ilyak nuh ke sie wuhlweacng nuh sin sie sin sie, ahok, finne nuh ke wuhlweacng se ma tuh ituckyang selos ke pacl mahtuh, suc wuhlweacng uh tuh ituckyang ac kolyuck sin devil, in ueni lain ma suwohswohs nuhkwewa.

29 Ke ma inge elos tuh ueni lain mwet luhn Leum, ac ilyak nuh ke sie wuhlweacng in kuhnausuhloslac, ac in molweloslac suc oasr mwacta koluk la ke ahkmas liki poun nuhnuhnkuh suwohs, ma apkuhran in karihngihnyuck fal nuh ke masap.

30 Ac elos tuh foracng lain masap ac kuh luhn acn selos; ac elos tuh olweacng nuh sin sie sin sie in kuhnausuhllah kafuhnah, ac in oakiyac sie tohkohsrah fin acn uh, tuh acn uh in tiacna sifilpac sukohsohk tuhsruhk enenuh na in muhta ye kuh luhn tohkohsrah.