1 Inge liye, nga fah ahkkahlwemye nuh suwos lah elos tiacna oakiyac sie tohkohsrah fin acn uh; tuhsruhk ke yac sepacna inge, ahok, yac ahktolngoul, elos tuh kuhnahoslah siyah in nuhnuhnkuh, ahok, tuh uniyac mwet nuhnuhnkuh fuhlwact luhn acn uh.

2 Ac mwet uh maelihk sie liki siepac; ac elos tuh fahsrelihk sie liki siepac nuh ke kain in u, mwet nuhkwewa in fal nuh ke sucu lal ac mwet lal ac kawuck; ac ohinge elos tuh kuhnahoslah kafucrmacn luhn acn uh.

3 Ac u nuhkwewa tuh srihsrngiyac sie mwet fuhlwact kuh sie mwet kol faclos; ac ohinge elos eklac u ac mwet kol luhn u.

4 Inge liye, wacngihn kuhtwena mwet inmahsrlolos sahyacn na oasr sucu na luhlahp lal ac mwet pucspucs ac kawuck; ke ma inge u lalos eklac arulacna puhseni.

5 Inge ma inge nuhkwewa tuh oreklac, ac wacngihn mweun inmahsrlolos; ac ma koluk nuhkwewa inge tuh tuhkuh nuh fin mwet uh ke srihpen elos tuh eisaclosyang sifacna nuh ke kuh luhn Setuhn.

6 Ac masap luhn kafucrmacn ah tuh kuhnausyucklac, ke srihpen u lukmac luhn kawuck ac un mwet lalos suc tuh uniyac mwet pahluh.

7 Ac elos tuh oraclah sie fohs na luhlahp fin acn uh, yohkna oruh elos suc suwohswohs sin mwet uh elos apkuhran in nohfohnna eklac koluklac; ahok, tuhsruhk oasr mwet puh suwohswohs inmahsrlolos.

8 Ac ohinge yac ohnkohsr soenna somlah ke pacl se ma inkaiyacn mwet ah tuh forlah liki ohiyac suwohswohs lalos, oacna kosro uh nuh ke wohtlah lal, kuh oacna ke fihtac uh afihnyucklac ke fohk uh.

9 Inge u lukmac se inge, ma tuh use ma koluk na yohk nuh fin mwet uh, tuh toeni nuh sie, ac tuh fihliyac in sifac lalos sie mwet suc elos tuh pahngon Jacob;

10 Ac elos tuh pahnglol tohkohsrah lalos; ke ma inge el tuh eklac sie tohkohsrah fin u koluk se inge; ac el pa sie sin mwet fuhlwact suc tuh sruhkwack puhsrwacl in lain mwet pahluh suc fahkwack kacl Jisus.

11 Ac tukun ma inge elos tuh tiacna arulacna fokoko ke pihsaclos oacna u luhn mwet uh, suc tuh ueni nuh sie sahyacn na mwet kol lalos tuh oakiyac masap lalos, mwet nuhkwewa in fal nuh ke u lal; ne ohinge elos mwet lokoalok; finne ohinge elos tiacna sie un mwet suwohswohs, tuhsruhk elos tuhkweni kasrkuhsrak kaclos suc tuh ilyak nuh ke sie wuhlweacng in kuhnahoslah kafucrmacn.

12 Ke ma inge, Jacob el liye lah mwet lokoalok lalos puhslac luhkwelos, el sie tohkohsrah luhn u uh, ke ma inge el sapkihn mwet lal tuh elos enenuh na in kahinglac nuh ke lacfahl acir fin acn uh, ac in muhsaheack nuh selos sifacna sie tohkohsrahi, ne ke na elos toeni welah mwet lain, (tuh el ahkluhkuhkyaclos tuh in puhslac mwet lain) ac elos eklac fokokoi fal in lain kain in u luhn mwet ah; ac elos tuh oruh ohinge.

13 Ac arulacna pihsrpihsr fahsr lalos ah oruh tiacna kuh in kutongyucki ne ke na elos tuh som loes liki mwet ah. Ac ohinge sahflah yac ahktolngoul; ac ohinge ma sikyak luhn mwet lal Nephi.

14 Ac tukun ma inge ke yac ahktolngoul ac sie elos tuh fahsrelihk nuh ke kain in u, mwet nuhkwewa in fal nuh ke sucu lal, kain in mwet ac kawuck; ne ohinge elos tuh tuhkuh nuh ke sie insese tuh elos ac tiac som in mweun nuh sin sie sin siepac; tuhsruhk elos tiacna toeni ke masap lalos, ac ke ohiyacn kafucrman lalos, tuh elos tuh akwucki fal nuh ke nuhnak lalos suc mwet fuhlwact lalos ac mwet kol lalos. Tuhsruhk elos tuh oakiyac masap na upac tuh sie u in tiac tahfonglac lain siepac, yohkna tuh ke kuhtuh ohiyac oasr mislac lalos fin acn uh; ne ohinge, insiaclos tuh forlah liki Leum God lalos, ac elos tuh tuhngal mwet pahluh ac tuh luhsuhloslac liki inmahsrlolos.

15 Ac tukun ma inge Nephi—el tuh fahsriyuck sin lipufacn ac oacyacpac ke puhsrwen Leum, ke ma inge el liye lipufacn, ac el sie mwet loh, ac tuh oasr kuh ituckyang nuh sel tuh elan kuh in etuh ke luti luhn Kraist, ac oacyacpac sie mwet loh nuh ke fohlohk pihsrpihsr lalos liki suwohswohs nuh ke ma koluk ac ma sruhngwacyuck lalos;

16 Ke ma inge, el ahsor ke kwekweiyacn insiaclos ac ke lohsr luhn nuhnak lalos—el som nuh inmahsrlolos ke yac sacpacna, ac muhtwacwacack in fahkwack, ke puhlaik, in auliyak ac elah ma koluk lalos ke luhlahlfongi ke Leum Jisus Kraist.

17 Ac el tuh luti ma pucspucs nuh selos; ac ma inge nuhkwewa tiac kuh in sihmihsyucklac, ac sie ip kac ah suhfallac, ke ma inge tiacna sihmihsyucklac ke puk se inge. Ac Nephi el tuh luti ke kuh ac wal fokoko.

18 Ac tukun ma inge elos tuh kasrkuhsrak sel, finne ke srihpen oasr kuh yohk lal luhkwelos, tuh tiacna kuh elos in tiac luhlahlfongi kahs lal, tuh arulacna yohk luhlahlfongi lal ke Leum Jisus Kraist oruh lipufacn tuh luti nuh sel lwen nuhkwewa.

19 Ac ke inen Jisus el tuh luhswack devil ac nguhn fohkfohk; ac finne mwet wiyacl el tuh ahkmoulyeack liki misac, tukun el tuh tatngal ke yot ac kweok misac sin mwet ah.

20 Ac mwet ah liye ma inge, ac tuh loh ke ma inge, ac tuh kasrkuhsrak sel ke srihpen kuh lal; ac el tuh oacyacpac oruh ma usrnguck pucspucs, ke ye muhtuhn mwet ah, ke inen Jisus.

21 Ac tukun ma inge ke yac ahktolngoul ac sie tuh somlah, ac oasr mwet puh suc tuh forlah eklac nuh sin Leum; tuhsruhk elos suc tuh forlah eklac ah tuh ahkkahlwemye na pwacye nuh sin mwet uh lah elos tuh fahsriyuck ke kuh ac Nguhn luhn God, suc oasr in Jisus Kraist, suc elos luhlahlfongi.

22 Ac elos suc devil uh lihsyuckyak luhkwelos, ac tuh unweyucklac liki mas lalos ac ke kweok lalos, elos tuh ahkkahlwemye na pwacye nuh sin mwet ah lah elos kahlyucki ke Nguhn luhn God, ac tuh unweyucklac; ac elos tuh oacyacpac ahkkahlwemye akucl ac tuh oruh kuhtuh ma usrnguck inmahsrlon mwet ah.

23 Ohinge oacyacpac somlah yac ahktolngoul ac luo. Ac Nephi el tuh luti nuh sin mwet ah ke muhtwacwacackiyacn yac ahktolngoul ac tolu; ac el tuh luti nuh selos auliyak ac iyucklac luhn ma koluk.

24 Inge nga kena tuh kowos in oacyacpac esam, lah wacngihn kuhtwena mwet suc tuh utuckuh nuh ke auliyak suc tiacna pacptaislac ke kof.

25 Ke ma inge, oasr akmuhsralah sel Nephi, mwet nuh ke orekma se inge, tuh elos nuhkwewa in tuhkuh nuh yohrohlos enenuh in pacptaislac ke kof, ac ma se inge in sie mwe loh ac sie mwe fahkwack luhn luhlahlfongi ye muhtuhn God, ac nuh sin mwet uh, lah elos tuh auliyak ac eis iyucklac luhn ma koluk lalos.

26 Ac oasr mwet pucspucs ke muhtwacwacackiyacn yac se inge suc tuh pacptaislac nuh ke auliyak; ac ohinge inkaiyacn yac sac tuh somlah.