1 Ac tukun ma inge in fal nuh ke ma sihmlac lasr, ac kuht etuh ma sihmlac lasr pwacye, tuh liye, mwet suwohs se pa tuh liyacacng ma sihmlac—tuh pwacyena lah el tuh oruh ma usrnguck pucspucs ke inen Jisus; ac wacngihn kuhtwena mwet suc kuh in oruh sie ma usrnguck ke inen Jisus sahyacn na el ahknwacsnwacsyeyucklac ke ma koluk nuhkwewa lal—

2 Ac na tukun ma inge, fin wacngihn ma tahfonglac oreklac sin mwet se inge ke pacl in srihkeyuck lasr uh, yac ahktolngoul ac tolu somlah;

3 Ac mwet uh muhtwacwacack in insacnweacng in suk upac mwe akucl ma tuh utuckuh sin mwet pahluh Samuel, sie mwet Laman, ahok, nuh ke pacl se ma ac enenuh in lohsrlah ke lusen lwen tolu fin acn uh.

4 Ac muhtwacwacack in oasr ahlohloh yohk ac fohs inmahsrlon mwet uh, finne puhslac mwe akucl utuckuh.

5 Ac tukun ma inge ke yac ahktolngoul ac ahkosr, ke mahlwem se emet, ke lwen ahkahkosr ke mahlwem sac, oasr sie pahkah na upac tuhyak, sie ma soenna etweyuck fin acn ah nohfohn.

6 Ac oacyacpac oasr sie eng upac na yohk ac koluk; ac oasr puhlahl upac, yohkna oruh osrokwack facluh nohfohn oacna in muh ac fuhluhngyucki.

7 Ac oasr sahrom kohsroh na upac, ma soenna etweyuck fin acn ah nohfohn.

8 Ac siti lal Zarahemla tuh fihrihryak.

9 Ac siti lal Moroni tuh tihli nuh ke acn loal in meoa uh, ac ke ma inge mwet muhta we ah walomlah.

10 Ac fohk uh tuh utuckyak nuh fin siti lal Moronihah, tuh in ahollah siti sac eklac soko finohl luhlahp.

11 Ac oasr sie kuhnausyuck na yohk ac koluk fin acn ke lacfahl epang.

12 Tuhsruhk liye, oasr sie kuhnausyuck yohk ac koluk liki na inge fin acn ke lacfahl nuh acir; tuh liye, acn nuhkwewa we eklac, ke srihpen eng upac ac eng for, ac puhlahl ac sahrom, ac kusrusr ma arulacna upac fin facluh nohfohn;

13 Ac inkacnek uh muhsahllah, ac inkacnek tuhpahsrpahsr uh koluklac, ac acn fwel pucspucs eklac sraksrak.

14 Ac siti luhlahp ac yohk srihpac pucspucs tihli, ac siti pucspucs fihrihryak, ac puhslac ma kusrusryak ne ke na lohm we ah ikori nuh infohk uh, ac mwet we ah acnwucki, ac acn uh pihsaclah.

15 Ac oasr kuhtuh siti luhlah; tuhsruhk kuhnausyucklac kac ah arulacna yohk, ac puhslac mwet we suc tuh acnwucki.

16 Ac oasr kuhtuh suc tuh utucklac ke eng for uh; ac yen elos som nuh we wacngihn mwet etuh, sahyacn na elos etuh lah elos utucklac.

17 Ac ohinge muhtuhn facluh nohfohn eklac sienalac, ke srihpen eng upac, ac puhlahl, ac sahrom, ac kusrusr luhn facluh.

18 Ac liye, yot uh ipwelihk nuh ke ip luo; yot uh muhsahlwelihk fin facluh nohfohn, yohkna oruh ma inge sukokyak ke acn ma ipwelihk, ac ke acn ma srasrwelihk, fin acn ah nohfohn.

19 Ac tukun ma inge ke puhlahl, ac sahrom, ac pahkah, ac eng upac, ac kusrusr luhn facluh tui—tuh liye, ma inge fahfahlacna ohinge ke lusen ao tolu; ac tuh fwack sin kuhtuh lah lusen pacl sac loes liki na; ne ohinge, ma upac ac koluk nuhkwewa inge oreklac sahflah ke lusen ao tolu—ac na liye, oasr sie lohsr sikyak fin acn ah.

20 Ac tukun ma inge oasr sie lohsr na mahtoltol fin acn ah nohfohn, yohkna oruh mwet we suc tiacna misac ah kuh in puhla usrwen lohsr uh;

21 Ac tiac kuh in oasr kahlwem, ke srihpen lohsr uh, wacngihn kacntuhl, wacngihn kahp fihrihr; wacngihn e kuh in fuhrreack sahk na wo ac arulacna paho lalos, oruh tiac kuh in oasr kuhtwena kahlwem;

22 Ac wacngihn kuhtwena kahlwem liyeyuck, wacngihn e, kuh ma sahromrom, wacngihn faht, kuh mahlwem, kuh itu, tuh arulacna yohk usrwen lohsr se ma oasr fin acn uh.

23 Ac tukun ma inge fahfahlacna ma inge ke lusen lwen tolu tuh wacngihn kahlwem liyeyuck; ac sie ahsor na upac ac wowoyak tuhng ac mwemwelihllac tuhng inmahsrlon mwet nuhkwewa pacl nuhkwewa; ahok, upac tuhng kweok luhn mwet ah, ke srihpen lohsr ac kuhnausyucklac yohk ma tuhkuh nuh faclos.

24 Ac ke sie acn elos lohngyuck in tuhng, fahk: O fuhnuh kuht auliyak met liki lwen na upac ac koluk se inge, ac na mwet wiyacsr luhkuhn loangweyucklac, ac elos luhkuhn tiac fihrihryak ke siti luhlahp Zarahemla.

25 Ac ke siepacna acn elos tuh lohngyuck in tuhng ac ahsor, fahk: O fuhnuh kuht auliyak met liki lwen na upac ac koluk se inge, ac tiac uniyac ac tuhngal mwet pahluh, ac luhsuhloslac; na ninac kiyacsr ac acn oaskuh nahtuhsr, ac tuhlihk nahtuhsr luhkuhn loangweyucklac, ac luhkuhn elos tiac fihrihryak ke siti luhlahp Moronihah. Ac ohinge wowoyak in tuhng luhn mwet ah yohk ac upac.