ບົດທີ 9
ຢູ່ໃນຄວາມມືດນັ້ນ, ສຸລະສຽງຂອງພຣະຄຣິດໄດ້ປະກາດການທຳລາຍຂອງຜູ້ຄົນຢ່າງຫລວງຫລາຍ ແລະ ຫລາຍຫົວເມືອງຍ້ອນວ່າຄວາມຊົ່ວຮ້າຍຂອງພວກເຂົາ—ພຣະອົງປ່າວປະກາດເຖິງການຖວາຍພຣະອົງເອງ, ປະກາດວ່າ ກົດຂອງໂມເຊສຳເລັດແລ້ວ, ແລະ ເຊື້ອເຊີນມະນຸດໃຫ້ມາຫາພຣະອົງ ແລະ ລອດ. ປະມານ ຄ.ສ. 34.
1 ແລະ ເຫດການໄດ້ບັງເກີດຂຶ້ນຄື ມັນໄດ້ມີ ສຽງທີ່ໄດ້ຍິນທົ່ວກັນໄປ ໃນບັນດາຄົນທັງໝົດຜູ້ອາໄສຢູ່ໃນແຜ່ນດິນໂລກ, ທົ່ວຜືນແຜ່ນດິນນີ້, ມີຄວາມວ່າ:
2 ວິບັດ, ວິບັດ, ວິບັດແກ່ຜູ້ຄົນພວກນີ້; ວິບັດແກ່ຜູ້ອາໄສຂອງທັງແຜ່ນດິນໂລກ ຖ້າຫາກພວກເຂົາບໍ່ກັບໃຈ; ເພາະວ່າມານໄດ້ ຫົວເຍາະເຍີ້ຍ, ແລະ ບໍລິວານຂອງມັນປິຕິຍິນດີ, ເພາະພວກລູກສາວ ແລະ ພວກລູກຊາຍຜູ້ທີ່ໜ້າຮັກຂອງຜູ້ຄົນຂອງພວກເຮົາຖືກຂ້າຕາຍ; ແລະ ເພາະຄວາມຊົ່ວຮ້າຍ ແລະ ຄວາມໜ້າກຽດຊັງຂອງພວກເຂົາເອງ ພວກເຂົາຈຶ່ງລົ້ມຕາຍໄປ.
3 ຈົ່ງເບິ່ງ, ເຮົາໄດ້ເຜົາເມືອງເຊຣາເຮັມລາເມືອງໃຫຍ່ນັ້ນ ແລະ ຜູ້ອາໄສຢູ່ໃນນັ້ນດ້ວຍໄຟ.
4 ແລະ ຈົ່ງເບິ່ງ, ເຮົາໄດ້ເຮັດໃຫ້ເມືອງໂມໂຣໄນເມືອງໃຫຍ່ນັ້ນ ຈົມລົງໄປໃນຄວາມເລິກຂອງທະເລ, ແລະ ຜູ້ອາໄສຢູ່ໃນນັ້ນກໍຈົມລົງໃນນ້ຳຄືກັນ.
5 ແລະ ຈົ່ງເບິ່ງ, ເຮົາໄດ້ຝັງເມືອງໂມໂຣໄນຮາເມືອງໃຫຍ່ນັ້ນ, ແລະ ຜູ້ອາໄສຢູ່ໃນນັ້ນດ້ວຍດິນ, ເພື່ອເຊື່ອງຄວາມຊົ່ວຮ້າຍ ແລະ ຄວາມໜ້າກຽດຊັງຂອງພວກເຂົາໃຫ້ພົ້ນຈາກໜ້າເຮົາ, ເພື່ອເລືອດຂອງສາດສະດາຜູ້ບໍລິສຸດ ແລະ ໄພ່ພົນຂອງເຮົາທັງຫລາຍຈະບໍ່ໄດ້ຂຶ້ນມາຫາເຮົາເພື່ອຟ້ອງພວກເຂົາອີກຕໍ່ໄປ.
6 ແລະ ຈົ່ງເບິ່ງ, ເຮົາໄດ້ເຮັດໃຫ້ເມືອງກິນການຈົມລົງໄປ ແລະ ຜູ້ອາໄສຢູ່ໃນນັ້ນກໍໄດ້ຖືກຝັງຢູ່ກັບຄວາມເລິກຂອງແຜ່ນດິນໂລກ;
7 ແລະ ເມືອງໂອໄນຮາ ແລະ ຜູ້ອາໄສຢູ່ໃນນັ້ນ, ແລະ ເມືອງໂມຄຳ ແລະ ຜູ້ອາໄສຢູ່ໃນນັ້ນ ແລະ ເມືອງເຢຣູຊາເລັມ ແລະ ຜູ້ອາໄສຢູ່ໃນນັ້ນ, ຊຶ່ງເຮົາໄດ້ເຮັດໃຫ້ ນ້ຳມາຖ້ວມເມືອງທັງໝົດນີ້ ເພື່ອເຊື່ອງຄວາມຊົ່ວຮ້າຍ ແລະ ຄວາມໜ້າກຽດຊັງຂອງພວກເຂົາໃຫ້ພົ້ນຈາກໜ້າເຮົາ, ເພື່ອເລືອດຂອງສາດສະດາຜູ້ບໍລິສຸດ ແລະ ໄພ່ພົນຂອງເຮົາທັງຫລາຍຈະບໍ່ໄດ້ຂຶ້ນມາຫາເຮົາເພື່ອຟ້ອງພວກເຂົາອີກຕໍ່ໄປ.
8 ແລະ ຈົ່ງເບິ່ງ, ເມືອງແກດີອານໄດ, ແລະ ເມືອງແກດີອອມນາ, ແລະ ເມືອງຢາໂຄບ, ແລະ ເມືອງກິມກິມໂນ, ຊຶ່ງເຮົາໄດ້ເຮັດໃຫ້ເມືອງເຫລົ່ານີ້ຈົມລົງໄປ; ແລະ ເຮົາໄດ້ເຮັດໃຫ້ມີ ເນີນພູເກີດຂຶ້ນ ແລະ ເຮັດໃຫ້ຮ່ອມພູຂຶ້ນມາແທນບ່ອນ, ແລະ ເຮົາໄດ້ຝັງຜູ້ອາໄສຢູ່ໃນນັ້ນໄວ້ໃນຄວາມເລິກຂອງແຜ່ນດິນໂລກ, ເພື່ອເຊື່ອງຄວາມຊົ່ວຮ້າຍ ແລະ ຄວາມໜ້າກຽດຊັງຂອງພວກເຂົາໃຫ້ພົ້ນຈາກໜ້າເຮົາ, ເພື່ອເລືອດຂອງສາດສະດາ ແລະ ໄພ່ພົນຂອງເຮົາທັງຫລາຍຈະບໍ່ໄດ້ຂຶ້ນມາຫາເຮົາເພື່ອຟ້ອງພວກເຂົາອີກຕໍ່ໄປ.
9 ແລະ ຈົ່ງເບິ່ງ, ເຮົາໄດ້ເຮັດໃຫ້ໄຟມາໄໝ້ຢາໂຄບບູກາດເມືອງໃຫຍ່ນັ້ນ ຊຶ່ງເປັນທີ່ຢູ່ອາໄສຂອງຜູ້ຄົນຂອງກະສັດຢາໂຄບ, ຍ້ອນວ່າບາບ ແລະ ຄວາມຊົ່ວຮ້າຍຂອງພວກເຂົາ ຊຶ່ງມັນຊົ່ວຮ້າຍເກີນກວ່າຄວາມຊົ່ວຮ້າຍທັງປວງໃນທົ່ວແຜ່ນດິນໂລກ ຍ້ອນວ່າການຄາດຕະກຳ ແລະ ການມົ້ວສຸມ ລັບຂອງພວກເຂົາ; ເພາະວ່າພວກເຂົາໄດ້ທຳລາຍສັນຕິສຸກຂອງຜູ້ຄົນຂອງເຮົາ ແລະ ທຳລາຍການປົກຄອງຂອງແຜ່ນດິນ; ສະນັ້ນ ເຮົາຈຶ່ງເຮັດໃຫ້ພວກເຂົາຖືກເຜົາໄໝ້ໄປ ເພື່ອຈະໄດ້ ທຳລາຍພວກເຂົາໃຫ້ພົ້ນຈາກໜ້າເຮົາ, ເພື່ອເລືອດຂອງສາດສະດາ ແລະ ໄພ່ພົນຂອງເຮົາທັງຫລາຍຈະບໍ່ໄດ້ຂຶ້ນມາຫາເຮົາເພື່ອຟ້ອງພວກເຂົາອີກຕໍ່ໄປ.
10 ແລະ ຈົ່ງເບິ່ງ, ເຮົາໄດ້ເຮັດໃຫ້ໄຟມາໄໝ້ເມືອງເລມັນ, ແລະ ເມືອງຈອດ, ແລະ ເມືອງກາດ, ແລະ ເມືອງຄິດຄຸເມັນ, ແລະ ຜູ້ອາໄສຢູ່ໃນນັ້ນ ເພາະຄວາມຊົ່ວຮ້າຍຂອງພວກເຂົາ ທີ່ພວກເຂົາໄດ້ຂັບໄລ່ສາດສະດາ ແລະ ໄດ້ແກວ່ງກ້ອນຫີນໃສ່ຜູ້ທີ່ເຮົາສົ່ງໄປເພື່ອປະກາດແກ່ພວກເຂົາກ່ຽວກັບຄວາມຊົ່ວຮ້າຍ ແລະ ຄວາມໜ້າກຽດຊັງຂອງພວກເຂົານັ້ນ.
11 ແລະ ຍ້ອນວ່າພວກເຂົາໄດ້ຂັບໄລ່ພວກເພິ່ນອອກໄປ, ມັນຈຶ່ງບໍ່ມີຜູ້ໃດເປັນຄົນຊອບທຳເລີຍໃນບັນດາພວກເຂົາ, ເຮົາຈຶ່ງໄດ້ສົ່ງ ໄຟລົງມາທຳລາຍພວກເຂົາ, ເພື່ອເຊື່ອງຄວາມຊົ່ວຮ້າຍ ແລະ ຄວາມໜ້າກຽດຊັງຂອງພວກເຂົາໃຫ້ພົ້ນຈາກໜ້າເຮົາ, ເພື່ອເລືອດຂອງສາດສະດາ ແລະ ໄພ່ພົນຂອງເຮົາທັງຫລາຍທີ່ເຮົາໄດ້ສົ່ງໄປໃນບັນດາພວກເຂົາ ຈະບໍ່ໄດ້ຂຶ້ນມາຫາເຮົາ ຈາກພື້ນດິນເພື່ອຟ້ອງພວກເຂົາອີກຕໍ່ໄປ.
12 ແລະ ເຮົາໄດ້ໃຫ້ການທຳລາຍອັນໃຫຍ່ຫລວງ ຫລາຍຢ່າງເກີດຂຶ້ນກັບແຜ່ນດິນນີ້, ແລະ ກັບຜູ້ຄົນພວກນີ້, ເພາະຄວາມຊົ່ວຮ້າຍ ແລະ ຄວາມໜ້າກຽດຊັງຂອງພວກເຂົາ.
13 ໂອ້ ພວກເຈົ້າທຸກຄົນໄດ້ຮັບການ ໄວ້ຊີວິດກໍຍ້ອນວ່າ ພວກເຈົ້າເປັນຄົນຊອບທຳຫລາຍກວ່າພວກເຂົາ, ບັດນີ້ພວກເຈົ້າຍັງຈະບໍ່ຫັນກັບມາຫາເຮົາບໍ, ແລະ ກັບໃຈຈາກບາບຂອງພວກເຈົ້າ ແລະ ປ່ຽນໃຈເຫລື້ອມໃສ, ເພື່ອເຮົາຈະໄດ້ ປິ່ນປົວພວກເຈົ້າ?
14 ແທ້ຈິງແລ້ວ, ຕາມຄວາມຈິງເຮົາກ່າວກັບພວກເຈົ້າວ່າ, ຖ້າຫາກພວກເຈົ້າເຂົ້າ ມາຫາເຮົາ ພວກເຈົ້າຈະມີ ຊີວິດນິລັນດອນ. ຈົ່ງເບິ່ງ, ແຂນແຫ່ງຄວາມເມດຕາສົງສານຂອງເຮົາໄດ້ເດ່ອອກມາຫາພວກເຈົ້າແລ້ວ, ແລະ ຜູ້ໃດກໍຕາມທີ່ຈະເຂົ້າມາຫາເຮົາ, ເຮົາຈະຮັບເອົາໄວ້; ແລະ ຄົນທີ່ມາຫາເຮົາຈະເປັນສຸກ.
15 ຈົ່ງເບິ່ງ, ເຮົາຄືພຣະເຢຊູຄຣິດ ພຣະບຸດຂອງພຣະເຈົ້າ. ເຮົາໄດ້ ສ້າງຟ້າສະຫວັນ ແລະ ແຜ່ນດິນໂລກ, ລວມທັງທຸກສິ່ງທຸກຢ່າງທີ່ຢູ່ໃນນັ້ນ. ເຮົາໄດ້ຢູ່ກັບພຣະບິດາຕັ້ງແຕ່ຕົ້ນ. ເຮົາຢູ່ໃນພຣະບິດາ ແລະ ພຣະບິດາຢູ່ໃນເຮົາ, ແລະ ໃນເຮົາພຣະບິດາແຜ່ບາລະມີພຣະນາມຂອງພຣະອົງ.
16 ເຮົາໄດ້ມາຫາຄົນຂອງເຮົາເອງ, ແລະ ຄົນຂອງເຮົາ ບໍ່ໄດ້ຕ້ອນຮັບເຮົາ. ແລະ ຂໍ້ຄວາມພຣະຄຳພີກ່ຽວກັບການສະເດັດມາຂອງເຮົາໄດ້ສຳເລັດແລ້ວ.
17 ແລະ ຫລາຍຕໍ່ຫລາຍຄົນທີ່ຕ້ອນຮັບເຮົາ, ເຮົາຈະ ໃຫ້ພວກເຂົາກາຍເປັນບຸດຂອງພຣະເຈົ້າ; ແລະ ແມ່ນແຕ່ເຊັ່ນນັ້ນເຮົາຈະໃຫ້ແກ່ຫລາຍຕໍ່ຫລາຍຄົນທີ່ຈະເຊື່ອໃນນາມຂອງເຮົາ, ເພາະຈົ່ງເບິ່ງ, ການໄຖ່ມາເຖິງໂດຍທາງເຮົາ, ແລະ ໃນເຮົາ ກົດຂອງໂມເຊຈຶ່ງສົມບູນ.
18 ເຮົາເປັນ ຄວາມສະຫວ່າງ ແລະ ຊີວິດຂອງໂລກ. ເຮົາຄື ອາລະຟາ ແລະ ໂອເມຄາ, ເປັນຕົ້ນ ແລະ ທີ່ສຸດ.
19 ແລະ ພວກເຈົ້າຢ່າໄດ້ຖວາຍເຄື່ອງບູຊາດ້ວຍການຫລັ່ງເລືອດແກ່ເຮົາ ອີກຕໍ່ໄປ; ແທ້ຈິງແລ້ວ, ເຄື່ອງບູຊາ ແລະ ເຄື່ອງເຜົາຂອງພວກເຈົ້າໝົດສິ້ນໄປແລ້ວ, ເພາະເຮົາບໍ່ຮັບເອົາເຄື່ອງບູຊາ ແລະ ເຄື່ອງເຜົາຂອງພວກເຈົ້າອີກແລ້ວ.
20 ແລະ ໃຫ້ພວກເຈົ້າ ຖວາຍໃຈທີ່ຊອກຊ້ຳ ແລະ ວິນຍານທີ່ສຳນຶກຜິດຂອງພວກເຈົ້າແກ່ເຮົາເປັນເຄື່ອງບູຊາ, ແລະ ຜູ້ໃດກໍຕາມທີ່ມາຫາເຮົາດ້ວຍໃຈທີ່ຊອກຊ້ຳ ແລະ ວິນຍານທີ່ສຳນຶກຜິດ, ເຮົາຈະໃຫ້ ບັບຕິສະມາແກ່ຜູ້ນັ້ນດ້ວຍໄຟ, ແລະ ດ້ວຍພຣະວິນຍານບໍລິສຸດ ເຖິງແມ່ນຈະເປັນຊາວເລມັນກໍຕາມ, ເພາະສັດທາຂອງພວກເຂົາທີ່ມີຕໍ່ເຮົາໃນເວລາທີ່ພວກເຂົາປ່ຽນໃຈເຫລື້ອມໃສ, ໄດ້ຮັບບັບຕິສະມາດ້ວຍໄຟ ແລະ ດ້ວຍພຣະວິນຍານບໍລິສຸດ, ແລະ ພວກເຂົາບໍ່ຮູ້ຈັກມັນ.
21 ຈົ່ງເບິ່ງ, ເຮົາໄດ້ມາສູ່ໂລກເພື່ອນຳເອົາການໄຖ່ມາສູ່ໂລກ, ເພື່ອຊ່ວຍໂລກໃຫ້ລອດຈາກບາບ.
22 ສະນັ້ນ, ຜູ້ໃດກໍຕາມທີ່ ກັບໃຈ ແລະ ມາຫາເຮົາຄືກັນກັບ ເດັກນ້ອຍ, ເຮົາຈະຮັບຜູ້ນັ້ນໄວ້ ເພາະອານາຈັກຂອງພຣະເຈົ້າປະກອບດ້ວຍຄົນເຊັ່ນນັ້ນ. ຈົ່ງເບິ່ງ, ເພາະຄົນເຊັ່ນນັ້ນທີ່ເຮົາໄດ້ ສະລະຊີວິດຂອງເຮົາແທນ, ແລະ ຮັບເອົາຊີວິດນັ້ນຄືນອີກ; ສະນັ້ນ ຈົ່ງກັບໃຈ, ແລະ ມາຫາເຮົາ ເຈົ້າທັງຫລາຍທີ່ສຸດຂອງແຜ່ນດິນໂລກ, ແລະ ລອດ.