1 Ac tukun ma inge yac tolngoul ac ahkosr somlah, ac oacyacpac tolngoul ac limekohsr, ac liye mwet tuhma lutlut luhn Jisus elos tuh oraclah sie alu luhn Kraist fin acn nuhkwewa raunyak. Ac elos suc tuh tuhkuh nuh yohrohlos, ac tuh auliyak na pwacye ke ma koluk lalos, tuh pacptaislac ke inen Jisus; ac elos tuh oacyacpac eis Nguhn Muhtahl.

2 Ac tukun ma inge ke yac ahktolngoul ac ohnkohsr, mwet nuhkwewa forlah nuh sin Leum, fin acn ah nohfohn, kwewana mwet Nephi ac mwet Laman, ac wacngihn fohs ac akuhkuhin inmahsrlolos, ac mwet nuhkwewa tuh orekma suwohs nuh sin sie sin siepac.

3 Ac ma nuhkwewa oacna sie inmahsrlolos; ke ma inge wacngihn mwet kahsruhp ac suhkahsruhp, mwet srohoh ac mwet sukohsohk, tuhsruhk elos nuhkwewa sukohsohk, ac mwet ipeis ke mwe sang inkuhsrao.

4 Ac tukun ma inge yac ahktolngoul ac itkohsr oacyacpac somlah, ac srwackna fahfahlac na in oasr mislac fin acn uh.

5 Ac oasr orekma yohk ac wolacna orek sin mwet tuhma lutlut luhn Jisus, yohkna oruh elos tuh unwelah mwet mas, ac ahkmoulyeack mwet misac, ac oruh mwet ul in fahsr, ac mwet kun in kuh in liye, ac mwet sohlohngkahs in lohng; ac kain in ma usrnguck nuhkwewa elos tuh oruh inmahsrlon tuhlihk nuhtin mwet; ac wacngihn ma usrnguck elos oruh sahyacn na ke inen Jisus.

6 Ac ohinge yac ahktolngoul ac alkosr somlah, ac oacyacpac ahktolngoul ac yuc, ac ahkangaul ac sie, ac ahkangaul ac luo, ahok, finne ne ke yac ahkangaul ac yuc somlah, ac oacyacpac ahklamngaul ac sie, ac ahklamngaul ac luo; ahok, ac finne ne ke yac ahklamngaul ac yuc tuh somlah.

7 Ac Leum El tuh arulacna ahkkapyelos fin acn uh; ahok, yohkna oruh elos tuh sifilpac muhsaheack siti ke acn ma siti uh tuh fihrihryak we.

8 Ahok, finne siti luhlahp Zarahemla elos tuh oruh in sifilpac muhsahiyuckyak.

9 Tuhsruhk oasr siti pucspucs ma tuh tihli, ac kof uh afuhnlah acn ah; ke ma inge siti inge tiac kuh in ahksasucyeyucklac.

10 Ac inge, liye, tukun ma inge mwet lal Nephi elos tuh fokokoi, ac tuh arulacna sa in puhseni, ac eklac sie mwet arulacna oaskuh ac kahto.

11 Ac elos tuh pahyuckyak, ac ituckyang ke pahyuck, ac tuh ahkinsewowoyeyuck in fal nuh ke wuhlweacng pucspucs ma Leum El tuh oraclah nuh selos.

12 Ac elos tuh tiac sifil fahsr tukun ohiyac ac akwuck luhn masap lal Moses; tuhsruhk elos tuh fahsr tukun masap ma elos tuh eis sin Leum lalos ac God lalos, fahfahlac na in lalo ac pruhe, ac in toeni nuh sie pacl pucspucs kwewana in pruhe ac in lohng kahs luhn Leum.

13 Ac tukun ma inge wacngihn fohs inmahsrlon mwet nuhkwewa, fin acn ah nohfohn; tuhsruhk oasr ma usrnguck wolacna ma orek inmahsrlon mwet tuhma lutlut luhn Jisus.

14 Ac tukun ma inge yac ahkitngucul ac sie somlah, ac oacyacpac yac ahkitngucul ac luo, ahok, ac in ahkkahlwemye, ne ke na yac ahkitngucul ac yuc somlah; ahok, finne yac ahksiofok tuh somlah, ac mwet tuhma lutlut luhn Jisus, suc El tuh sulaclah, elos nuhkwewa tuh som nuh ke pacruhtais luhn God, sahyacn na mwet tolu suc fah muhta na; ac oasr mwet tuhma lutlut sahyac ma akmuhsralah in aholuhlos; ac oacyacpac puhslac mwet ke fihl sac tuh misac.

15 Ac tukun ma inge wacngihn fohs fin acn uh, ke srihpen luhngse luhn God ma oasr ke insiacn mwet uh.

16 Ac wacngihn sok, kuh akuhkuhin, kuh fohs, kuh orek kosro, kuh kikiacp, kuh ahkmas, kuh kuhtwena ohiyac fohkfohk; ac pwacyena lah tiac kuh in oasr sie un mwet engan yohk liki inge inmahsrlon mwet nuhkwewa suc tuh oreklac ke poun God.

17 Wacngihn mwet pihsrapasr, kuh mwet ahkmas, tiac pac mwet Laman, kuh kuhtwena kain in un mwet; tuhsruhk elos ma sefanna, tuhlihk nuhtin Kraist, ac mwet in usrui tohkohsrahi luhn God.

18 Ac fuhkah insewowoyaclos! Tuh Leum El tuh ahkinsewowoyaclos ke ma nuhkwewa elos oruh; ahok, finne elos ahkinsewowoyeyuck ac kapkapwack ne ke na yac ahksiofok ac singucul tuh somlah; ac fihl se emet tukun Kraist El tuh misac, ac wacngihn fohs fin acn ah nohfohn.

19 Ac tukun ma inge tuh Nephi, el suc karuhnguhnwacng ma suhmuhslah sahflah se inge, (ac el likiyac fin plwet lal Nephi) el misac, ac Amos suc wen nahtuh el aholuhl karuhnguhnwacng; ac el oacyacpac likiyac fin plwet lal Nephi.

20 Ac el karuhnguhnwacng ke lusen yac alngucul ac ahkosr, ac srwackna oasr mislac fin acn uh, sahyacn na oasr sie u srisrihk sin mwet uh suc tuh forlah liki alu uh ac eis nuh faclos inen mwet Laman; ke ma inge muhtwacwacack in sifilpac oasr mwet Laman fin acn uh.

21 Ac tukun ma inge Amos el tuh oacyacpac misac, (ac yac ahksiofok ac yucnguhul ac ahkosr tukun tuhkuh luhn Kraist) ac Amos suc wen nahtuhl el aholuhl karuhnguhnwacng ma sihmlac; ac el oacyacpac likiyac fin plwet lal Nephi; ac tuh oacyacpac sihmihsyucklac ke puk lal Nephi, suc pa puk se inge.

22 Ac tukun ma se inge yac ahklofko tuh somlah; ac fihl ahkluo nuhkwewa elos tuh misac sahyacn na mwet puh.

23 Ac inge nga, Mormon, kena tuh kowos in etuh lah mwet uh puhseni, yohkna oruh elos tuh osrwaclihk fin acn ah nohfohn, ac elos tuh eklac arulacna kahsruhp, ke srihpen kapkapwack lalos ke Kraist.

24 Ac inge, ke yac ahklofko ac sie muhtwacwacack in oasr inmahsrlolos elos suc insefuhlwactwack, ma oacna nukumyen nuknuk yohk molo, ac kain in pearl sacohk nuhkwewa, ac ke ma wo luhn facluh.

25 Ac ke pacl sac fahlac ma wo lalos ma oasr yohrohlos ac mwe kahsruh lalos tilac oacna sie inmahsrlolos.

26 Ac elos muhtwacwacack in fahsrelihk nuh ke kain in u; ac elos muhtwacwacack in muhsaheack alu nuh selos sifacna in eis kapkapwack, ac muhtwacwacack in lahfwekihn alu pwacye luhn Kraist.

27 Ac tukun ma inge ke yac ahklofko ac singucul tuh somlah oasr alu pucspucs fin acn uh; ahok, oasr alu pucspucs ma sulkackihn lah elos etuh Kraist, ac tuhsruhk elos tuh lahfwekihn ip yohk ke wosasuc Lal, yohkna oruh elos tuh lwelah kain in ohiyac koluk nuhkwewa, ac tuh oruh ma suc muhtahl nuh Sel nuh sel suc tuh tiac lwelah in oruh ke srihpen tiac nwacsnwacs.

28 Ac alu se inge tuh arulacna yohkwelihk ke srihpen ma koluk, ac ke srihpen kuh luhn Setuhn suc tuh sruokyac insiaclos.

29 Ac sifilpac, oasr siepac alu ma lahfwekihn Kraist; ac elos tuh ahkkohsye alu pwacye luhn Kraist, ke srihpen insepuhsisacl lalos ac luhlahlfongi lalos ke Kraist; ac elos tuh koaselos ke srihpen ma usrnguck pucspucs ma elos oruh inmahsrlolos.

30 Ke ma inge elos tuh oruh kuh ac wal lalos nuh fin mwet tuhma lutlut luhn Jisus suc tuh weluhlos muhta, ac elos tuh tohlohlosyang nuh ke nien srohoh; tuhsruhk ke kuh luhn kahs luhn God, ma oasr yohrohlos, nien srohoh ipwelihk nuh ke ip luo, ac elos som oruh ma usrnguck yohk inmahsrlolos.

31 Ne ohinge, ac finne ma usrnguck nuhkwewa inge, mwet ah tuh ahkkwekweye insiaclos, ac tuh suk in uniltahluh uh, finne oacna ke mwet Jew fin acn Jerusalem elos suk in unilyac Jisus, in fal nuh ke kahs Lal.

32 Ac elos tuh tohlohlosyang nuh ke fuhnyuh fihrihr, ac elos tuhkuh liki tiac eis ongaiyac.

33 Ac elos oacyacpac tohlohlosyang nuh ke kalkal in kosro lwemnak, ac elos tuh sritacl nuh sin kosro lwemnak finne ke oacna sie tuhlihk sritacl nuh sin sie sip fuhsr; ac elos tuh tuhkuh liki inmahsrlolos, tiac eis ongaiyac.

34 Ne ohinge, mwet uh tuh ahkkwekweye insiaclos, tuh elos kolyuck sin mwet tol pucspucs ac mwet pahluh suhtuhuh in muhsaheack alu pucspucs, ac in oruh kain in ma koluk nuhkwewa. Ac elos tuh srihngihl mwet luhn Jisus; tuhsruhk mwet luhn Jisus tiac srihngihl fohlohkihn. Ac ohinge elos tuh kais kuhtuh na muhnahslah ke suhlahlahlfongi ac ma koluk, ke yac nuh ke yac, finne ke yac ahklofko ac tolngoul tuh somlah.

35 Ac na tukun ma inge ke yac se inge, ahok, ke yac ahklofko ac tolngoul ac sie, oasr sie fahsrelihk na yohk inmahsrlon mwet uh.

36 Ac tukun ma inge ke yac se inge oasr sie un mwet ma oreklac suc tuh pahngpahng mwet Nephi, ac elos mwet luhlahlfongi pwacye ke Kraist; ac inmahsrlolos oasr selos suc tuh pahngpahng sin mwet Laman—mwet Jacob, ac mwet Joseph, ac mwet Zoram;

37 Ke ma inge mwet luhlahlfongi pwacye ke Kraist, ac mwet alu pwacye luhn Kraist, (inmahsrlolos pa mwet tuhma lutlut tolu luhn Jisus suc ac muhta na) elos tuh pahngpahng mwet Nephi, ac mwet Jacob, ac mwet Joseph, ac mwet Zoram.

38 Ac tukun ma inge ke elos suc sruhnga wosasuc uh elos pahngpahng mwet Laman, ac mwet Lemuel, ac mwet Ishmael; ac elos tuh tiacna kais kuhtuh na muhnahslah ke suhlahlahlfongi, tuhsruhk elos tuh sulaclah in forlah lain wosasuc luhn Kraist; ac elos tuh luti tuhlihk nahtuhlos tuh elos in tiac luhlahlfongi, finne in oacna ke pahpah tuhmwaclos, e ke na muhtwacwacackiyac ah tuh kais kuhtuh na muhnahslah.

39 Ac ma ke srihpen ma koluk ac sruhngwacyuck luhn pahpah tuhmwaclos, finne oacna ke muhtwacwacackiyac ah. Ac elos tuh lutiyuck in kasrkuhsrak sin tuhlihk nuhtin God, finne oacna ke mwet Laman elos tuh lutiyuck in kasrkuhsrak sin tuhlihk nuhtin Nephi e ke na muhtwacwacackiyac ah.

40 Ac tukun ma inge yac ahklofko ac angngaul ac ahkosr tuh somlah, ac ohinge mukwikwi luhn mwet uh. Ac un mwet ma koluk liki na elos tuh fokokoi, ac eklac arulacna puhsweni liki na mwet luhn God.

41 Ac elos tuh fahfahlac na in muhsaheack lohm alu nuh selos sifacna, ac nahwelah ke kain in ma sacohk nuhkwewa. Ac ohinge yac ahklofko ac lamngaul tuh somlah, ac oacyacpac yac ahklofko ac onngoul.

42 Ac tukun ma inge un mwet koluk liki na elos muhtwacwacack in muhsaheack olweacng ac u lukmac lal Gadianton.

43 Ac oacyacpac mwet suc tuh pahngpahng mwet lal Nephi elos muhtwacwacack in insefuhlwactyak, ke srihpen kahsruhp na yohk lalos, ac eklac tuhngahk oacna mwet wiyaclos, mwet Laman.

44 Ac ke pacl se inge mwet tuhma lutlut elos muhtwacwacack in ahsor ke ma koluk luhn facluh.

45 Ac tukun ma inge ke yac ahktolfoko tuh somlah, kwewana mwet Nephi ac mwet Laman elos eklac arulacna koluk sie oacna nuh sin siepac.

46 Ac tukun ma inge un mwet pihsrapasr lal Gadianton tuh osrwaclihk fin acn ah nohfohn; ac wacngihn selos suc suwohswohs sahyacn na mwet tuhma lutlut luhn Jisus. Ac kol ac selfuh pucspucs elos sruhkwack, ac tuh moul ac kuhka ke kain in ohiyacn moul ac kuhka nuhkwewa.

47 Ac tukun ma inge tukun yac ahktolfoko ac limekohsr tuh somlah, (ac mwet uh tuh srwackna muhta ke ohiyac koluk) Amos el misac; ac tamuhlwel lal, Ammaron, el tuh aholuhl in karuhnguhnwacng ma sihmlac.

48 Ac tukun ma inge yac ahktolfoko ac longoul tuh somlah, Ammaron, el mokleyuck ke Nguhn Muhtahl, tuh okanlah ma sihmlac suc muhtahl—ahok, finne ma sihmlac muhtahl nuhkwewa ma tuh tuhtahflah nuh ten ke fihl nuh ke fihl, suc muhtahl—finne ne ke na yac ahktolfoko ac longoul tukun tuhkuh luhn Kraist.

49 Ac el tuh okanlah ma inge nuh sin Leum, tuh ma inge in kuh in sifilpac tuhkuh nuh sin mwet luhlah luhn mwet lal Jacob, in fal nuh ke kahs in pahluh ac wuhlweacng luhn Leum. Ac ohinge sahflah ma sihmlac lal Ammaron.