1 Asin ta uminagi an panahon na an tulong pulo may apat na taon an nakalipas na, asin man an ika-tulong pulo may limang taon, asin totoo na an manga disipulos ni Jesus nagmukna nin sarong simbahan ni Cristo sa gabos na daga sa palibot. Asin kun gurano kadakol kan nagduruman sa sainda, asin totoong nagsorolsol kan saindang manga kasalan, binurunyagan sa pangaran ni Jesus; asin sinda man nag-ako kan Espiritu Santo.

2 Asin ta uminagi an panahon na sa ika-tulong pulo may anom na taon, an manga tawo gabos nagturubod sa Kagurangnan, an gabos na nasa ibabaw kan daga, manga Nephite asin manga Lamanite, asin dai nagkaigwa nin manga pagpasuruhay-suhay asin nin dai pagkasinarabotan sa sainda, asin an lambang tawo pantay an pakipagkapwa sa lambang saro.

3 Asin an gabos na bagay sadiri kan gabos sa sainda; kaya daing mayaman o dukha, bihag asin talingkas, alagad sinda gabos ginibong talingkas, asin kahiras kan langitnon na balaog.

4 Asin ta uminagi an panahon na an ika-tulong pulo may pitong taon an uminagi man, asin padagos pa an katuninongan sa daga.

5 Asin igwang kadakol asin makangangalas na manga gibo na giniribo an manga disipulos ni Jesus, sagkod na sinda nagburulong kan manga naghihirilang, asin pinabarangon an manga gadan, asin giniribo na an pilay makaralakaw, asin an manga buta mag-ako kan saindang panghiling, asin an manga bungog makadarangog; asin gabos na paagi nin milagro an saindang giniribo sa manga aki nin tawo; asin ta dai sinda naggibo nin manga milagro na bako sa pangaran ni Jesus.

6 Asin sa siring uminagi an ika-tulong pulo may walong taon, asin man an ika-tulong pulo may siyam, asin an ika-apat na pulo may saro, asin an ika-apat na pulo may duwa, iyo, sagkod sa apat na pulo may siyam na manga taon an uminagi, asin man an ika-limang pulo may saro, asin an ika-limang pulo may duwa; iyo, asin sagkod sa ika-limang pulo may siyam na manga taon an uminagi.

7 Asin sinda pinauswag kan Kagurangnan nin labi-labi sa daga; iyo, sagkod na sinda makapatindog giraray nin manga siudad kun sain an manga enot na siudad nagkasurulo.

8 Iyo, sagkod idtong dakulang siudad na Zarahemla ginibo na maipatindog giraray.

9 Alagad igwang dakol na manga siudad na nagrulubog, asin manga tubig an nagralataw sa manga lugar kaidto; kaya an manga siudad na ini dai na mababago.

10 Asin ngonian totoo, uminagi an panahon na an manga tawo ni Nephi naging makukusog, asin nagdarakol nin labi-labi kadali, asin naging labi-labi kagagayon asin magaya-gayang manga tawo.

11 Asin sinda nag-aragom, asin pinaaragom, asin sinda benendisionan sunod sa kadakolan kan manga pangako na itinao kan Kagurangnan sa sainda.

12 Asin sinda dai na nagralakaw sa pinapasunod na manga gigibohon asin manga rito kan manga tugon ni Moises; alagad sinda nagralakaw sunod sa manga katugonan na inarako ninda hali sa saindang Kagurangnan asin saindang Dios, padagos sa pag-arayuno asin sa pagpamiribi, asin sa danay na pagtiripon sa pagpamiribi asin sa pagdangog kan tataramon kan Kagurangnan.

13 Asin ta uminagi an panahon na dai na nin pagpasuruhay sa katiripunan kan gabos na manga tawo, sa gabos na daga; kundi nagkaigwa nin kadakol na manga darakula na manga milagro na giniribo kan manga disipulos ni Jesus.

14 Asin ta uminagi an panahon na an ika-pitong pulo may saro na taon uminagi, asin man an ika-pitong pulo may duwang taon, iyo, asin sa madaling sabi, sagkod sa ika-pitong pulo may siyam na taon an uminagi; iyo, sagkod sa sarong gatos na taon an uminagi, asin an manga disipulos ni Jesus, na saiyang pinili, gabos na napaduman sa paraiso kan Dios, apuera sa tulo na matatada; asin igwa man ibang manga disipulos na inordenan na saindang kasalihid; asin man kadakol sa manga kapagarakian na idto an nagkagaradan na.

15 Asin ta uminagi an panahon na dai na nin pagpasuruhay sa daga, huli sa pagkamoot kan Dios na yaon sa manga puso kan manga tawo.

16 Asin dai nagkaigwa nin pag-ururihan, ni manga aranggotan, ni manga kariribokan, ni manga karaksotan, ni manga kaputikan, ni manga panggadan, ni ano man na pagkaraksot; asin totoo na dai na nin orog na maogma pang manga tawo sa gabos na tawo na linalang kan kamot kan Dios.

17 Dai na nin manga mahabon, ni manga manggagadan, ni dai na nin manga Lamanite, ni ano pang klase na manga “-ite”; alagad sinda nagkasararo, na manga aki ni Cristo, asin manga manununod kan kahadean kan Dios.

18 Asin ta ano kapaladan ninda! Huli ta benendisionan sinda kan Kagurangnan sa saindang gabos na manga ginigibo; iyo, sagkod na sinda benendisionan asin pinauswag sagkod sa sarong gatos may sampulong taon an uminagi; asin an enot na kapagarakian magpoon ki Cristo nagkagaradan na, asin dai nin pagpasuruhay sa daga.

19 Asin ta uminagi an panahon na si Nephi, na siya an nagtatago kaining huring kasuratan, (asin isinurat kaini sa manga plake ni Nephi) nagadan na, asin an saiyang aki na si Amos an nagsurat kaini na saiyang kasalihid; asin saiyang isinurat man ini sa manga plake ni Nephi.

20 Asin ta saiyang sinurat ini sa laog nin walong pulo may apat na taon, asin igwa pa nin katuninongan sa daga, apuera a sarong sadit na kabtang kan manga tawo na naghali sa simbahan asin saindang dinara an pangaran na manga Lamanite; kaya nagpoon nang magkaigwa giraray nin manga Lamanite sa daga.

21 Asin ta uminagi an panahon na si Amos nagadan man, (asin idto sarong gatos siyam na pulo may apat na taon poon kan pag-abot ni Cristo) asin an saiyang aki na si Amos iyo an nagtago kan kasuratan na saiyang kasalihid; asin idto saiya man na isinurat sa manga plake ni Nephi; asin idto man nakasurat sa libro ni Nephi, na iyo an libro na ini.

22 Asin ta uminagi an panahon na duwang gatos na taon an uminagi; asin an ika-duwang kapagarakian gabos nagkagaradan apuera sa diit.

23 Asin ngonian ako, si Mormon, minamawot na saindong maaraman na an manga tawo nagdakol, sagkod na sinda nagkalat sa ibabaw kan daga, asin ta sinda nagrayaman nin labi-labi, huli sa saindang pag-uswag ki Cristo.

24 Asin ngonian, digdi sa ika-duwang gatos may saro na taon nagpoon magkaigwa sa katiripunan ninda idtong manga nadara sa pagkaharo-halangkawon, siring sa pagsulot nin mamahalon na manga gubing, asin gabos na klaseng mamahalon na manga perlas, asin mamahalon na manga bagay kan kinaban.

25 Asin magpoon sa panahon na idto an gabos na bagay bako nang sadiri kan gabos sa sainda.

26 Asin sinda nagpoon na magkabaranga sa manga kabtang; asin sinda nagpoon na magpatirindog nin manga simbahan sa saindang manga sadiri tanganing magkinabang, asin nagpoon na mag-inda kan totoong simbahan ni Cristo.

27 Asin ta uminagi an panahon na kan an duwang gatos may sampulong taon an uminagi igwa na nin dakol na manga simbahan sa daga; iyo, kadakol na manga simbahan na nagpahayag na midbid si Cristo, alagad pinag-iindahan an kadakolan na kabtang kan saiyang ebanghelio, sagkod na sinda nag-ako nin gabos na paagi nin kasumbikalan asin ipinaglingkod idtong banal sa saiya na kun kiisay idto ipinagbawal huli sa kasumbikalan.

28 Asin an simbahan na ini nagdakol nin labi-labi huli sa kasumbikalan, asin huli sa kapangyarihan ni Satanas na nakapugol kan saindang manga puso.

29 Asin sa giraray, igwa man nin saro pang simbahan na nag-inda ki Cristo; asin saindang inusig an totoong simbahan ni Cristo, huli kan saindang kapakumbabaan asin sa saindang pagtubod ki Cristo; asin saindang hinamak sinda huli sa dakol na manga milagro na ginibo sa katiripunan ninda.

30 Kaya ginamit ninda an saindang kapangyarihan asin kabagsikan sa manga disipulos ni Jesus na nawalat sa sainda, asin ta sinda rinalaog sa karsel; alagad sa paagi kan kapangyarihan kan tataramon kan Dios, na nasa sainda, an manga karsel nagkaralaglag na napagduwa, asin sinda nagruluwas asin naggibo nin makangangalas na manga milagro sa katiripunan ninda.

31 Alagad, asin sa ibong kan gabos na manga milagro na ini an manga tawo pinatagas pa an saindang manga puso, asin sinda hinanap pa tanganing garadanon, siring sa paghanap kan manga Judio sa Jerusalem na gadanon si Jesus, sunod sa saiyang tataramon.

32 Asin saindang inarapon sinda sa hurno nin kalayo, asin ta sinda nagruluwas na dai nagkaarano.

33 Asin sainda man na inarapon sinda sa lungib nin mababangis na manga hayop, asin ta sinda nakipagkarawat sa mababangis na manga hayop siring sa aki na nakikikawat sa sarong karnero; asin nagruluwas sinda sa saindang katiripunan na dai nagkaarano.

34 Alagad, an manga tawo pinataragas an saindang manga puso, huli ta sinda nadara kan kadakol na manga padi asin bakong totoo na manga propeta na magpatirindog nin manga simbahan, asin tanganing makagibo nin palaen-laen na manga karaotan. Asin saindang kinurulogan an manga tawo ni Jesus; alagad an manga tawo ni Jesus dai nagbalos. Asin sa siring sinda diit-diit na nagrayo sa pagtubod asin naging masumbikal, sa taon-taon, sagkod sa duwang gatos tulong pulong taon an nakalipas.

35 Asin ta uminagi an panahon sa taon na ini, iyo, sa ika-duwang gatos tulong pulo may sarong taon, nagkaigwa nin sarong dakulang pagkabaranga an manga tawo.

36 Asin ta uminagi an panahon na sa taon na ini igwang naglataw na manga tawo na inapod na manga Nephite, asin sinda manga tunay na paratubod ki Cristo; asin sa sainda igwa man na inapod kan manga Lamanite—manga Jacobite, asin manga Josephite, asin manga Zoramite;

37 Kaya idtong manga tunay na paratubod ki Cristo, asin idtong manga tunay na nagsasaramba ki Cristo, (kaiba digdi idtong tulong manga disipulos ni Jesus na natatada) inapod na manga Nephite, asin manga Jacobite, asin manga Josephite, asin manga Zoramite.

38 Asin ta uminagi an panahon na sinda na nagsikwal kan ebanghelio inapod na manga Lamanite, asin manga Lemuelite, asin manga Ismaelite; asin sinda bakong diit-diit na nagrayo sa pagtubod, kundi tinuyo ninda na magtumang sa ebanghelio ni Cristo; asin sinda nagturukdo sa saindang manga aki na sinda dai magtubod, siring sa saindang manga magurang, magpoon sa kapinonan, tuminalikod na.

39 Asin idto huli sa kasumbikalan asin karumpotan kan saindang manga kamagurangan, siring pa sa kapinonan. Asin sinda tinukdoan na ikaungis an manga aki kan Dios, siring sa itunukdo sa manga Lamanite na ikaungis an manga aki kan manga Nephite magpoon pa sa kapinonan.

40 Asin ta uminagi an panahon na duwang gatos apat na pulo may apat na taon an nakalipas, asin siring an manga gibo-gibo kan manga tawo. Asin ta an kadakolan kan manga masusumbikal na tawo naging makukusog, asin orog na nagdakol, na dakol pa sa manga tawo kan Dios.

41 Asin sinda padagos na nagpatirindog nin manga simbahan para sa saindang manga sadiri, asin sinamno an manga idto nin palaen-laen na mahahalagang manga bagay. Asin sa siring an duwang gatos limang pulong taon an nakalipas, asin man duwang gatos anom na pulong taon.

42 Asin ta uminagi an panahon na an masusumbikal na kabtang kan manga tawo nagpoon giraray na magpatirindog kan manga hilom na pagsurumpaan asin pagkasararo kan Gadianton.

43 Asin man an manga tawo na inapod na manga tawo ni Nephi nagpoon na magpaharo-halangkawon sa saindang manga puso, huli kan saindang labi-labing kayamanan, asin nagi sindang makasadiri siring sa saindang manga katugangan, na manga Lamanite.

44 Asin magpoon kan panahon na idto an manga disipulos nagpoon na magmundo sa manga kasalan kan mundo.

45 Asin ta uminagi an panahon na kan tulong gatos na taon an nakalipas, an manga tawo ni Nephi asin an manga Lamanite naging masusumbikal siring sa lambang saro.

46 Asin ta uminagi an panahon na an manga mahabon kan Gadianton nakalakop na sa ibabaw kan daga; asin dai na sa sainda nin matatanos kundi idtong manga disipulos ni Jesus. Asin sinda nagtarago nin bulawan asin plata na labi kadakol, asin nagtirinda nin palaen-laen na paninda.

47 Asin ta uminagi an panahon na pakatapos na makalipas an tulong gatos asin limang taon, (asin an manga tawo nagdanay pa sa kasumbikalan) si Amos nagadan; asin an saiyang tugang na si Ammaron, iyo an nagsurat kan kasuratan na saiyang kasalihid.

48 Asin ta uminagi an panahon na kan makalipas an tulong gatos duwang pulong taon, si Ammaron, na nadara sa pasabong kan Espiritu Santo itinago an manga kasuratan na banal—iyo, sagkod an gabos na manga banal na kasuratan na pinanunod magpoon sa sarong kapagarakian sagkod sa minasurunod na kapagarakian, na manga banal—sagkod sa ika-tulong gatos duwang pulong taon poon kan pagdigdi ni Cristo.

49 Asin saiyang itinago an manga idto sa Kagurangnan, tanganing idto maibalik giraray sa manga natada kan harong ni Jacob, sunod sa manga propesia asin manga pangako kan Kagurangnan. Asin siring an katapusan kan kasuratan ni Ammaron.