An Libro ni Enos

1 Totoo nanggad, uminagi an panahon na ako, si Enos, aram na an sakuyang ama na siya masuripot na lalaki—huli ta saiyang tinukdoan ako sa saiyang tataramon, asin man sa pangataman asin pasunod kan Kagurangnan—asin pag-omawon an pangaran kan sakuyang Dios huli kaidto—

2 Asin sakuyang sasabihon sa saindo an ginibo kong paghinguha sa atubangan kan Dios, bago ako nakakua kan kapatawaran kan sakuyang manga kasalan.

3 Totoo nanggad, ako nagduman sa kadlagan tanganing maghanap nin manga hayop; asin ta an manga tataramon na danay kong nadadangog na sinasabi kan sakuyang ama manunungod sa buhay na daing-kasagkuran, asin an kaogmahan kan manga santo, narimpos nin hararom sa sakuyang puso.

4 Asin an sakuyang kalag nagutom; asin ako nagluhod sa atubangan kan sakuyang Kaggibo, asin ako nagkurahaw sa saiya sa makusog na pamibi asin pakimaherak para sa sakuyang kalag; asin sa bilog na aldaw ako sa saiya nag-agrangay; iyo, asin pag-abot kan banggi pinakusog ko pa an sakuyang tingog sa kaitaasan sagkod na ini nakaabot sa manga kalangitan.

5 Asin igwang sarong tingog na uminabot sa sakuya, na nagsasabi: Enos, an saimong manga kasalan pinatatawad na, asin ika magiging paladan.

6 Asin ako, si Enos, aram na an Dios dai makapagpuputik; kaya an sakuyang pagkakasala napara na.

7 Asin ako nagsabi: Kagurangnan, paano idto nagibo?

8 Asin siya nagsabi sakuya: Huli sa saimong pagtubod ki Cristo, na dai mo pa lamang nadangog ni nahiling kaidto. Asin kadakol pang manga taon an maagi bago siya magpahiling kan sadiri niya sa laman; kaya, lakaw na, an saimong pagtubod iyo an nagpaomay saimo.

9 Ngonian, uminagi an panahon na kan sakuyang madangog an manga tataramon na idto, ako nagpoon na makamati nin pagmawot sa karahayan kan sakuyang manga katugangan, an manga Nephite; kaya bulaos na pinabulos ko an sakuyang kalag sa Dios para sa sainda.

10 Asin mantang ako naghohorop-horop sa espiritu, totoo, an tingog kan Kagurangnan uminabot sa sakuyang isip giraray na an sabi: Dadalawon ko an saimong manga katugangan susog sa saindang pagkamaigot sa pagsunod sa sakuyang manga katugonan. Itinao ko sainda an daga na ini, asin ini sarong banal na daga; asin dai ko ini isusumpa iyo sana kun ini huli sa kasumbikalan; kaya, dadalawon ko an saimong manga katugangan susog sa sakuyang sinabi na; asin an saindang manga paglapas sakuyang dadarahon na igwang kamundoan sa saindang manga payo.

11 Asin pagkatapos na ako, si Enos, nadangog an manga tataramon na ini, an sakuyang pagtubod naging makusog sa Kagurangnan; asin ako nagpamibi saiya na igwang dakol asin halawig na paghorop-horop para sa sakuyang manga katugangan, na manga Lamanite.

12 Asin ta uminagi an panahon na pagkatapos na ako magpamibi asin magpagal nin maigot, an Kagurangnan nagsabi sa sakuya: Tatawan ko ika sunod sa saimong minamawot, huli sa saimong pagtubod.

13 Asin ngonian, iyo ini nanggad an pagmawot na minawot ko saiya—na kun idto mangyari na an sakuyang manga tawo, an manga Nephite, mahulog sa paglapas, asin sa ano man na paagi sinda mapara, asin an manga Lamanite dai mapara, na an Kagurangnan na Dios mag-ingat nin kasuratan kan sakuyang manga tawo, an manga Nephite; maging ini man sa paagi kan kapangyarihan kan saiyang banal na kamot, tanganing ini madara sa manga Lamanite sa manga maabot na aldaw, tanganing tibaad pa sinda madara sa kaligtasan—

14 Huli ta sa ngonian an samuyang pagpagal na sinda maibalik sa totoong pagtubod daing kamugtakan. Asin sinda nagsurumpa sa saindang kaanggotan, na kun mangyayari, saindang papararaon an samuyang manga kasuratan asin kami, asin man an gabos na manga kaugalian kan samuyang kamagurangan.

15 Kaya, ta sakuyang naaaraman na an Kagurangnan na Dios makakapag-ingat kan samuyang manga kasuratan, ako padagos na nag-agrangay saiya, huli ta saiyang sinabi sa sakuya: An ano man na bagay na saimong hahagadon na igwang pagtubod, na naniniwala ka na saimong makukua sa pangaran ni Cristo, iyan saimong makukua.

16 Asin ako igwang pagtubod, asin ako nag-agrangay sa Dios tanganing saiyang ingatan an manga kasuratan; asin siya nakipagtipan sakuya na saiyang dadarahon an manga ini sa manga Lamanite sa saiyang sadiring takdang panahon.

17 Asin ako, si Enos, nakakaaram na ini sunod sa tipan na saiyang ginibo; kaya an sakuyang kalag nagpahingalo na.

18 Asin an Kagurangnan nagsabi sa sakuya: An saimong manga kamagurangan hinagad man an bagay na ini sakuya; asin ini mangyayari sainda sunod sa saindang pagtubod; huli ta an saindang pagtubod siring man kan saimo.

19 Asin ngonian uminagi an panahon na ako, si Enos, naglibot sa manga tawo ni Nephi, nagpopropesia kan manga bagay na maabot, asin nagpapatotoo kan manga bagay na sakuyang nadangog asin nahiling.

20 Asin ako nagpapatotoo na an manga tawo ni Nephi naghinguha na maibalik an manga Lamanite sa totoong pagtubod sa Dios. Alagad an samuyang manga kapagalan nabasang sana; an saindang pagkaanggot nakadukot asin sinda nadara kan saindang pagkamaraot kaya nagi sindang lumalaw, asin mababangis, asin manga tawong paha sa dugo, pano nin pagsamba sa manga dios-diosan asin manga kaatian; nabubusog sa manga hayop na maniniba; nag-eerok sa manga tolda, asin nagraralagalag sa kadlagan na igwang halipot na tapi na anit sa saindang habayan asin an saindang manga payo upaw; asin an saindang tibay nasa pana, asin sa espada, asin sa patok. Asin an kadakolan sainda daing ibang kinakakan kundi hilaw na karne; asin padagos sindang naghaharanap tanganing garadanon kami.

21 Asin ta uminagi an panahon na an manga tawo ni Nephi nagburungkal kan daga, asin nagpatubo nin palaen-laen na manga tipasi asin bunga nin kahoy, asin manga grupo nin manga hayop asin manga grupo nin manga palaen-laen na manga baka asin manga kanding asin manga usa, asin kadakol na manga kabayo.

22 Asin ta igwa nin kadakol na manga propeta sa samuya. Asin an manga tawo manga sutil na manga tawo, masakit makasabot.

23 Asin dai nang ibang bagay kundi labi-labing manga kakurihan, paghulit asin pagpropesia manunungod sa manga gera, asin sa manga iriwal, asin pagkawasak, asin padagos na pagparumdom sainda kan kagadanan, asin an kahalawigan kan daing-kasagkuran, asin an paghukom asin an kapangyarihan kan Dios, asin an gabos na manga bagay na ini—padagos na nagbuburukag sa sainda tanganing sinda magkaigwa nin pagkatakot sa Kagurangnan. Sinasabi ko, daing ibang bagay kaini, asin malinaw na gayo na manga tataramon, na sa sainda magpupurugol sa matulin na pagkahulog sa pagkarumpag. Asin sa siring na paagi sakuyang isinusurat an manunungod sa sainda.

24 Asin sakuyang nahiling an manga gera kan manga Nephite asin manga Lamanite sa pag-agi kan sakuyang manga aldaw.

25 Asin ta uminagi an panahon na ako nagpoon na maggurang, asin ta sarong gatos asin pitong pulo asin siyam na taon an nakaagi magpoon kan panahon na an samuyang ama na si Lehi maghali sa Jerusalem.

26 Asin sakuyang nahiling na madali na ako na magbaba sa sakuyang lulubngan, na pagkatapos ginibo kan kapangyarihan kan Dios na ako magbalangibog asin magpropesia sa manga tawong ini, asin magpahayag kan manga tataramon sunod sa katotoohan na nasa ki Cristo. Asin ta sakuyang pinahayag ini sa gabos kong manga aldaw, asin sakuyang ikinaogma ini orog pa sa ano man sa kinaban.

27 Asin ta madali na akong magduman sa sakuyang kapahingaloan, na kaibahan kan sakuyang Paratubos; huli ta aram ko na sa saiya ako magpapahingalo. Asin mag-oogma ako sa aldaw na an sakuyang pagkamortal magigi nang imortal, asin matindog sa saiyang atubangan; dangan mahihiling ko an saiyang lalawgon na igwang kaogmahan, asin saiyang sasabihon sa sakuya: Madya sa sakuya, ika na paladan, igwang mamumugtakan na inandam para sa saimo sa manga harong kan sakuyang Ama. Amen.