1 Asin ngonian ako, si Nephi, dai makakasurat kan gabos na manga bagay na sakuyang itinukdo sa manga tawo; ni ako bako matibay sa pagsurat, siring sa pagtaram; huli ta kun an tawo nagtataram sa kapangyarihan kan Espiritu Santo, an kapangyarihan kan Espiritu Santo dinadara ini sa manga puso kan manga aki nin tawo.

2 Alagad totoo, na kadakol na nagpataragas kan saindang manga puso tumang sa Banal na Espiritu, na dai na nin lugar ini sainda; kaya, pinabayaan an manga bagay na nakasurat asin saindang hinuna na daing kamugtakan.

3 Alagad ako, si Nephi, nagsurat kan naisurat ko na asin hinuna ko idto na dakula an halaga asin orog na para sa sakuyang manga tawo. Huli ta ako padagos na nagpapamibi para sa sainda sa aldaw, asin an sakuyang manga mata nadudumog an sakuyang ulunan sa luha, sa pagkabanggi, huli sa sainda; asin ako nagkukurahaw sa sakuyang Dios sa pagtubod, asin aram ko na saiyang dadangogon an sakuyang pagkurahaw.

4 Asin aram ko na an Kagurangnan na Dios papakabanalon an pamibi ko para sa karahayan kan sakuyang manga tawo. Asin an manga tataramon na sakuyang isinurat sa kaluyahan papakusogon sa sainda; huli ta ini nagpapadagka sainda na gumibo nin marahay; ta saindang naaraman na an saindang manga ginikanan; asin idto nagsasambit ki Jesus, asin pinapadagka sinda na magturubod saiya, asin magtaragal sagkod sa katapusan, na iyo an buhay na daing-kasagkuran.

5 Asin idto nagtataram nin mabagsik laban sa kasalan, sunod sa pagkayano kan katotoohan; kaya, dai maaanggot an siisay man na tawo sa manga tataramon na sakuyang isinurat sagkod na siya nasa espiritu kan demonio.

6 Ako nagmumuraway sa pagkayano; Ako nagmumuraway sa katotoohan; Ako nagmumuraway sa sakuyang Jesus, huli ta saiyang tinubos an sakuyang kalag sa impiyerno.

7 Ako igwang pagkamoot sa sakuyang manga tawo, asin dakulang pagtubod ki Cristo na ako makakasabat nin dakol na manga kalag na daing digta sa tukawan kan hukoman.

8 Ako igwang pagkamoot sa manga Judio—sinabi kong Judio, huli ta an boot kong sabihon hali sinda sa hinalian ko.

9 Ako igwang pagkaherak sa manga Gentil. Alagad totoo, na dai ko sinda malalaoman sagkod na makipag-ulian sinda ki Cristo, asin lumaog sa pintoan na hayakpit, asin maglakaw sa piot na dalan pasiring sa buhay, asin magpadagos sa dalan sagkod sa katapusan kan aldaw nin pagbalo.

10 Asin ngonian, sakuyang padangat na manga katugangan, asin man manga Judio, asin kamo gabos na manga nasa kasagkuran kan kinaban, magdarangog kamo sa manga tataramon na ini asin magturubod ki Cristo; asin kun kamo dai magturubod sa manga tataramon na ini, magturubod ki Cristo. Asin kun kamo magtuturubod ki Cristo kamo maturubod man sa manga tataramon na ini, huli ta manga tataramon ini ni Cristo, asin ta saiyang itinao an manga ini sa sakuya; asin ta nagtutukdo an manga ini sa gabos na manga tawo na maggiribo nin marahay.

11 Asin ta kun an manga ini bakong tataramon ni Cristo, saindong hurukoman—huli ta ipapahiling sa saindo ni Cristo, kaibahan an kapangyarihan asin dakulang kamurawayan, na idto saiyang manga tataramon, sa huring aldaw; asin ta kamo asin ako magtitirindog na magkahampang sa atubangan kan saiyang hukoman; asin saindong maaaraman na ako saiyang sinugo na isurat ining manga bagay na ini, sa sakuyang kaluyahan.

12 Asin ako nagpapamibi sa Ama sa pangaran ni Cristo na an kadakolan satuya, kun bako man gabos, makaligtas para sa saiyang kahadean sa dakula asin huring aldaw.

13 Asin ngonian, sakuyang padangat na manga katugangan, gabos idtong kairiba sa harong kan Israel, asin kamo gabos na manga nasa kasagkuran kan kinaban, ako nagtataram sa saindo siring sa tingog na nangangapodan hali sa kabokabo: Paaram sagkod sa pag-abot kan dakulang aldaw na iyan.

14 Asin kamo na dai makikihiras sa karahayan kan Dios, asin dai maggalang kan manga tataramon kan manga Judio, asin man an sakuyang manga tataramon, asin an manga tataramon na maruluwas sa nguso kan Kordero nin Dios, magdarangog, ako nagpapaaram sa saindo nin sarong daing katapusan na pagpaaram, huli ta an manga tataramon na ini magpapadusa sa saindo sa huring aldaw.

15 Huli ta kun ano an tinandaan ko sa kinaban, dadarahon laban sa saindo sa hukoman; huli ta siring an pinagboot sakuya kan Kagurangnan, asin kaipuhan kong sunodon. Amen.