1 Asin ngonian ako, si Nephi, sakuyang tinapos na an sakuyang pagpropesia manunungod saindo, sakuyang manga padangat na katugangan. Asin ta dai akong maikasurat kundi diit sanang manga bagay, na aram ko na maagi nanggad; ni maisurat ko man kundi diit sana kan manga tataramon kan sakuyang tugang na si Jacob.

2 Kaya an manga bagay na sinurat ko tama sana sakuya, alagad igwa pang diit na manga tataramon na sasabihon ko manunungod sa doktrina ni Cristo; kaya, itataram kong malinaw saindo sunod sa kalinawan kan sakuyang pagpropesia.

3 Huli ta an sakuyang kalag naoogma sa kalinawan, huli ta sa siring na paagi an Kagurangnan na Dios minagibo sa katiripunan kan manga aki nin tawo. Huli ta an Kagurangnan na Dios nagtatao nin liwanag sa pakasabot, huli ta nagsabi siya sa manga tawo sunod sa saindang tataramon, para sa saindang pakasabot.

4 Kaya huli kaini, boot ko na saindong marumdoman an sakuyang sinabi saindo manunungod kan propeta na ipinahiling sakuya kan Kagurangnan, na mabunyag kan Kordero nin Dios, na mahali kan kasalan kan kinaban.

5 Asin ngonian, kun an Kordero nin Dios, na siya sarong banal, kaipuhan na mabunyagan sa tubig, tanganing mautob an gabos na katanusan, O saka, gurano pa kaorog na kaipuhan niato na bakong manga banal an magpabunyag, iyo maski na sa tubig!

6 Asin ngonian hahapoton ko kamo, manga padangat kong katugangan, paano nautob kan Kordero nin Dios an gabos na katanusan sa pagpabunyag sa tubig?

7 Dai nindo aram na siya banal? Alagad maski na ngani siya banal, ipinahiling niya sa manga aki nin manga tawo na, sunod sa laman siya nagpakumbaba sa sadiri niya sa atubangan kan saiyang Ama, asin nagpatotoo sa Ama na siya magsusunod sa saiya sa pag-ingat kan saiyang manga katugonan.

8 Kaya, pagkatapos na siya mabunyagan kan tubig an Espiritu Santo buminaba sa saiya sa kabaing nin salampati.

9 Asin sa giraray, ipinahiling kaidto sa manga aki nin tawo an kapiotan kan dalan asin an kahayakpitan kan pintoan, na saindang lalaogan, na siya an nagpaarog sa atubangan ninda.

10 Asin ta nagsabi siya sa manga aki nin tawo: Magsunod kamo sa sakuya. Huli kaini, manga padangat kong katugangan, masusunod ta daw si Jesus kun dai niato boot sunodon an manga katugonan kan Ama?

11 Asin an Ama nagsabi: Magsorolsol kamo, magsorolsol kamo, asin magpaburunyag sa pangaran kan sakuyang Padangat na Aki.

12 Asin man, an tingog kan Aki uminabot sakuya, an sabi: Siya na nagpabunyag sa pangaran ko, sa saiya itatao kan Ama an Espiritu Santo, siring sa sakuya; kaya magsunod sa sakuya, asin gibohon an manga bagay na nahiling nindong ginibo ko.

13 Kaya, sakuyang padangat na manga katugangan, aram ko na kun saindong sunodon an Aki, kaibahan an bilog na katuyohan nin puso, na daing pagsagin-sagin, asin daing pandaya sa atubangan kan Dios, alagad igwang tunay na katuyohan, nagsosorolsol kan saindong manga kasalan, nagpapatotoo sa Ama na maimbod na saindong aarakoon an pangaran ni Cristo, sa paagi nin pagbunyag—iyo, sa paagi nin saindong pagsurunod sa Kagurangnan asin saindong Paraligtas sa paglubog sa tubig, sunod sa saiyang tataramon, nanggad, saka nindo aarakoon an Espiritu Santo; iyo, saka maabot an pagbunyag nin kalayo asin kan Espiritu Santo; asin saka na kamo magtatararam kan manga tataramon nin manga anghel, asin magkukururahaw nin manga pag-omaw sa Banal kan Israel.

14 Alagad, magdarangog, sakuyang padangat na manga katugangan, sa siring uminabot an tingog kan Aki sa sakuya, an sabi: Pagkatapos na kamo magsorolsol kan saindong manga kasalan, asin magpatorotoo sa Ama na kamo sa boot na susurunudon an sakuyang manga tugon, sa paagi kan pagpaburunyag sa tubig, asin sa pag-arako kan pagbunyag sa kalayo asin sa Espiritu Santo, asin nakapagtararam sa bagong manga tataramon, iyo, sagkod sa manga tataramon kan manga anghel, asin pagkatapos iirindahan ako, marahay pa na dai ako nindo nagkamiridbidan.

15 Asin ako nakadangog nin tingog hali sa Ama, an sabi: Iyo, an tataramon kan sakuyang Padangat manga totoo asin mapapanarigan. An siisay man na makatagal sagkod sa katapusan ini an makakaligtas.

16 Asin ngonian, sakuyang padangat na manga katugangan, aram ko na sa paagi kaini na sagkod an sarong tawo makatagal sagkod sa katapusan, sa pagsunod sa halimbawa kan Aki kan buhay na Dios, siya dai makakaligtas.

17 Kaya, gibohon an manga bagay na sakuyang itinaram saindo na sakuyang nahiling na gigibohon kan saindong Kagurangnan asin saindong Paratubos; huli, ta sa siring na katuyohan an manga idto pinahiling sakuya, tanganing maaraman an pintoan na saindong lalaogan. Huli ta an pintoan na saindong lalaogan iyo an pagsolsol asin pagbunyag sa tubig; asin maabot na an kapatawaran kan saindong manga kasalan sa paagi nin kalayo asin kan Espiritu Santo.

18 Asin dangan na kamo makakadigdi sa piot asin hayakpit na dalan pasiring sa buhay na daing-kasagkuran; iyo, kamo nakaralaog na sa pintoan; nagkagiribo na nindo sunod sa katugonan kan Ama asin kan Aki, asin naako na nindo an Espiritu Santo, na nagpapatotoo kan Ama asin kan Aki, sa pag-utob kan pangako na saiyang ginibo, na kun kamo nagralaog sa dalan na maninigo nindong akoon.

19 Asin ngonian, sakuyang padangat na manga katugangan, pagkatapos na mamugtak kamo sa piot asin hayakpit na dalan, sakuyang ihahapot kun iyo sana ini an gigibohon? Totoo, sakuyang sasabihon saindo, bako; huli ta kamo dai pa makakaabot sagkod digdi kun bako sa tataramon ni Cristo na igwa nin pagtubod saiya na dai mayuyugyog, na nanarig nin bilog sa manga karahayan niya na mabagsik sa pagligtas.

20 Huli kaini, magpadaragos kamo sa maimbod na panarig ki Cristo, na igwa nin tunay na liwanag nin paglaom, asin pagkamoot sa Dios asin sa gabos na manga tawo. Kaya, kun kamo magpadagos sa pagpabarasog sa tataramon ni Cristo, asin makatagal sagkod sa katapusan, totoo nanggad, an sabi kan Ama: Magkakaigwa kamo nin buhay na daing-kasagkuran.

21 Asin ngonian, magdangog, sakuyang padangat na manga katugangan, iyo ini an dalan; asin ta daing ibang dalan o pangaran na itinao sa tangod kan langit na maliligtas an tawo para sa kahadean kan Dios. Asin ngonian, magdangog, iyo, ini an doktrina ni Cristo, asin an iyo sana asin totoo na doktrina kan Ama, asin kan Aki, asin kan Espiritu Santo, na sarong Dios, na daing katapusan. Amen.