1 Asin ngonian, Jacob, nagtataram ako saimo: Ika an panganay kong ipinangaki sa aldaw kan sakuyang kasakitan sa kadlagan. Asin ta ika nanggad, magpoon sa saimong pagkaaki nagtios ka na nin labi-labing kasakitan asin manga kamundoan, huli sa pagka daing ugali kan saimong manga katugangan.

2 Maski siring, Jacob, aki kong panganay sa kadlagan, aram mo an kadakulaan kan Dios; asin ta gigibohon niyang banal an saimong manga pagtios para sa saimong pakinabang.

3 Kaya, an saimong kalag bebendisionan, asin ika mabubuhay na ligtas kaibahan kan saimong tugang, na si Nephi; asin ta an saimong manga aldaw idudulot mo sa paglingkod sa saimong Dios. Kaya, aram ko na ika tinubos na, huli sa katanusan kan saimong Paratubos; huli ta nasabutan mo na sa pag-abot kan kabilogan nin panahon siya madigdi tanganing magdara nin kaligtasan sa manga tawo.

4 Asin ta saimong nahiling kan ika aki pa an saiyang kamurawayan; kaya, ika paladan na siring man sainda na saiyang lilingkodan sa laman; huli ta an Espiritu iyo man kaidto, ngonian, asin sagkod pa man. Asin an dalan hinanda magpoon kan pagkahulog kan tawo sa kagadanan, asin an kaligtasan dai binabayadan.

5 Asin an manga tawo tinutukdoan nin sukat na mamidbidan an marahay sa maraot. Asin an susundon itinatao sa manga tawo. Asin sa susundon, daing laman na maliligtas; o, sa susundon, an manga tawo nasiblag. Iyo, sa temporal na susundon, sinda isiniblag; asin man, sa espiritual na susundon, sinda mapapara duman sa kun ano an marahay asin magiging makaherak sagkod pa man.

6 Kaya, an pagtubos maabot asin sa paagi kan Banal na Mesias; huli ta siya pano nin ugay asin katotoohan.

7 Totoo nanggad, na idinusay niya an saiyang buhay na atang para sa kasalan, tanganing masimbagan an hinahagad kan susundon, para duman sa gabos na manga igwang nararagrag na puso asin nagmumundo na espiritu; asin ta daing siisay man na iba na masisimbagan kan hinahagad kan susundon.

8 Kaya, dakulang gayo an halaga na gibohon an manga bagay na ini na maibalangibog sa manga nag-eerok sa kinaban, na maaraman ninda na daing laman na makakaerok sa atubangan kan Dios, kun bako sa karahayan asin pagkaherak, asin sa ugay kan Banal na Mesias, na itinao an saiyang buhay sunod sa laman, asin binawi ini giraray sa paagi kan kapangyarihan kan Espiritu, tanganing mangyari an pagkabuhay-liwat nin manga gadan, bilang an enot na mabangon.

9 Kaya, siya an enot na manga bunga sa Dios, nin huli ta siya an nakikimaherak para sa manga aki nin tawo; asin sinda na magtubod saiya makakaligtas.

10 Asin huli sa pakimaherak para sa gabos, an gabos na tawo madulok sa Dios; kaya, sinda matindog sa saiyang atubangan, tanganing saiyang hukoman sunod sa katotoohan asin kabanalan na nasa saiya. Kaya, an katuyohan kan susundon na itinao kan Sarong Banal, sa pagtao kan silot na nakatalaga, idtong silot na nakatalaga kabaliktadan kan kaogmahan na nakatalaga, tanganing magsimbag sa manga katuyohan kan pagtubos—

11 Alagad ta kaipuhan, na igwang kasalungat sa gabos na manga bagay. Kun dai, panganay ko sa kadlagan, an katanusan dai mangyayari, ni an kasumbikalan, ni an kabanalan, o an pagtios, ni an marahay o an maraot. Kaya, an gabos na manga bagay kaipuhan nanggad na magkabiriyo sa saro; kaya, kun an sarong bagay iyo nanggad sana, iyan siring man sana sa gadan, daing buhay ni daing kagadanan, o kalapaan ni daing kalapaan, kaogmahan ni kamundoan, ni pakamati o daing pakamati.

12 Huli kaini, garo man sana naglalang nin sarong bagay na daing kamugtakan; kaya dai kutanang katuyohan an paglalang kaini; kaya an bagay na ini iyo an marumpag kan kadunungan kan Dios asin an saiyang daing-kasagkuran na katuyohan, asin man an kapangyarihan, asin an pagkaherak, asin an pagkapantay kan Dios.

13 Asin kun saindong sasabihon na daing susundon, kamo masabi man na daing pagkakasala. Kun saindong sasabihon na daing pagkakasala, kamo masabi man na daing katanusan. Asin ta kun daing katanusan daing kaogmahan. Asin ta kun daing katanusan o kaogmahan daing padusa o pagtios. Asin ta kun dai ining manga bagay na ini daing Dios. Asin ta kun daing Dios dai kita, ni an kinaban; huli ta dai mangyayari an paglalang nin manga bagay, ni maggibo o gigibohan; kaya, gabos na bagay napara na kuta.

14 Asin ngonian, manga aki kong lalaki, nagtataram ako sa saindo kan manga bagay na ini para sa saindong pakinabang asin kaaraman; huli ta igwa nin Dios, asin ta linalang niya an gabos na manga bagay, an kalangitan asin an kinaban, asin an gabos na manga bagay na yaon duman, manga bagay na maggibo asin manga bagay na gigibohan.

15 Asin tanganing mautob an saiyang daing-kasagkuran na katuyohan sa aabotan nin tawo, pagkatapos na saiyang linalang an enot niatong manga magurang, asin an manga hayop sa kapatagan asin an manga bayong sa kaitaasan, asin sa marahay, gabos na bagay na linalang, kaipuhan nanggad na igwang kasalungat; maski na an ipinangalad na bunga na kasalungat kan kahoy nin buhay; an saro mahamis asin an saro mapait.

16 Kaya, itinao kan Kagurangnan na Dios sa tawo na siya magboot sa saiyang sadiri. Kaya, an tawo dai makakapagboot sa saiyang sadiri kun dai siya mapadagka kan saro o kan iba.

17 Asin ako, si Lehi, sunod sa manga bagay na sakuyang nabasa, nanggad na naghuna na igwa nin sarong anghel kan Dios, sunod sa nakasurat, na nahulog hali sa langit; kaya, an nangyari nagi siya nin demonio, pagkatapos na hanapon idtong maraot sa atubangan kan Dios.

18 Asin huli ta nahulog siya hali sa kalangitan, asin naging bakong maogma sagkod pa man, minawot man niya na pasakitan an gabos na katawohan. Kaya, saiyang sinabi ki Eva, iyo, maski idtong gurang na halas, na iyo an demonio, na ama kan gabos na kaputikan, kaya saiyang sinabi: Kakana an ipinangangalad na bunga, asin ta dai ka magagadan, alagad ika makakaarog sa Dios, nakakaaram kan marahay asin maraot.

19 Asin pagkatapos na kumakan si Adan asin si Eva kan ipinangangalad na bunga isinubol sinda paluwas sa hardin kan Eden, tanganing magbungkal kan daga.

20 Asin nagkaigwa sindang manga aki; iyo, sagkod kan pamilia kan bilog na kinaban.

21 Asin an manga aldaw kan manga aki nin tawo naging halawig, sunod sa kabotan kan Dios, tanganing sinda makapagsorolsol mantang nasa laman pa; huli kaidto, an saindang kamugtakan namugtak na sa pagbalo, asin an saindang panahon pinahalawig, sunod sa katugonan na itinao kan Kagurangnan na Dios sa manga aki nin tawo. Huli ta nagtao siya nin katugonan na an gabos na tawo magsorolsol; huli ta ipinahiling niya sa gabos na tawo na sinda nariwara, huli sa paglapas kan saindang manga magurang.

22 Asin ngonian, totoo, na kun si Adan dai naglapas dai kutana siya nagkasala, alagad kutana itoon sana siya sa hardin kan Eden. Asin an gabos na manga bagay na linalang nasa siring na kamugtakan poon kan paglalanga sainda; asin ta nasa siring na kamugtakan sinda sagkod pa man, asin daing katapusan.

23 Asin dai sinda kutana magkakaigwa nin manga aki; kaya sinda kutana nasa kamugtakan na daing pakaaram, daing kaogmahan, huli ta dai ninda mamamatian an pagtios; dai makakagibo nin marahay ta dai ninda aram an pagkasala.

24 Alagad totoo, na an gabos nangyari sunod sa kadunungan niya na nakakaaram kan gabos na manga bagay.

25 Naglapas si Adan tanganing an tawo magin; asin an tawo iyo na, tanganing magkaigwa nin kaogmahan.

26 Asin an Mesias maabot sa tamang panahon, tanganing saiyang matubos an manga aki nin tawo sa pagkakasala. Asin huli ta sinda tinubos sa pagkakasala nagi na sindang talingkas sagkod pa man, namimidbidan an marahay sa maraot; makapagboboot sa sadiri asin ta dai pagbobotan, iyo sana kun ini maging padusa kan susundon sa dakula asin huring aldaw, sunod sa manga katugonan na itinao kan Dios.

27 Kaya, an manga tawo tiwasay sunod sa laman; asin an gabos na manga bagay itinatao sa sainda sa pakinabang nin tawo, Asin ta sinda tiwasay sa pagpili sa katalingkasan asin sa buhay na daing-kasagkuran, sa paagi kan dakulang Parasurog kan gabos na tawo, o sa pagpili sa pagkabihag asin pagkagadan, sunod sa pagkabihag asin kapangyarihan kan demonio; huli ta hinahanap niya na an gabos na tawo magdusa na siring sa saiya.

28 Asin ngonian, manga aki kong lalaki, minamawot ko na kamo manarig sa dakulang Parasurog, asin magsunod sa saiyang manga dakulang katugonan: asin maging maimbod sa saiyang manga tataramon, asin pilion an buhay na daing-kasagkuran, susog sa kabotan kan Banal na Espiritu;

29 Asin dai pilion an daing-kasagkuran na kagadanan, sunod sa boot kan laman asin an mararaot na yaon duman, na nagtatao nin kapangyarihan sa espiritu kan demonio tanganing makabihag, asin madara kamo sa impiyerno, tanganing siya an mamahala saindo sa sadiri niyang kahadean.

30 Sinabi ko ining diit na tataramon sa saindo gabos, na sakuyang manga aking lalaki, sa manga huring aldaw kan sakuyang pagbatid; asin ta pinili ko an marahay na kabtang, sunod sa manga tataramon kan manga propeta. Asin dai akong ibang katuyohan kundi an daing-kasagkuran na pag-iingat sa pakinabang kan saindong manga kalag. Amen.