1 Asin ngonian, magdangog, sakuyang padangat na manga katugangan, naghuna ako na kamo naghohororop-horop sa saindong manga puso manunungod kan saindong manga gigibohon pagkatapos na kamo makalaog sa dalan. Alagad, totoo, ngata kamo naghohororop-horop kaini sa saindong manga puso?

2 Dai daw nindo narumdoman na sakuyang sinabi sa saindo na pagkatapos na saindong akoon an Espiritu Santo kamo makapagtatararam na kan manga tataramon nin manga anghel? Asin ngonian, paano kamo makapagtatararam kan manga tataramon nin manga anghel kun bako sa paagi kan Espiritu Santo?

3 An manga anghel nakapagtatararam sa paagi kan kapangyarihan kan Espiritu Santo; kaya, an saindang ipinagtatararam manga tataramon ni Cristo. Huli kaini, sakuyang sinasabi sa saindo, magpabarasog kamo sa manga tataramon ni Cristo; huli ta totoo, na an manga tataramon ni Cristo magsasabi saindo kan gabos na saindong manga gigiribohon.

4 Huli kaini, ngonian pagkatapos na sakuyang sabihon saindo an manga tataramon na ini, kun dai nindo nagkakasarabotan an manga ini huli ta dai man kamo naghaharagad, o, kaya nagtuturoktok; huli kaini, kamo dai magkakadarara sa liwanag, alagad magkakadarara sa kadikloman.

5 Huli ta totoo nanggad, sakuyang sasabihon giraray sa saindo na kun kamo magralaog sa dalan, asin mag-arako kan Espiritu Santo, ipapahiriling saindo an gabos na manga bagay na saindong gigiribohon.

6 Totoo nanggad, na ini an doktrina ni Cristo, asin ta dai nang iba pang doktrina na itatao sagkod sa pagkatapos na siya magpahiling sa saindo sa laman. Asin sa saiyang pagpahiling sa sadiri niya sa saindo sa laman, an manga bagay na saiyang itataram saindo saindong gigiribohon.

7 Asin ngonian ako, si Nephi, dai na mataram pa; pinundo na kan Espiritu an sakuyang pagtaram, asin ako nabayaan sa pagmundo huli sa daing pagtubod, asin sa kasumbikalan, asin sa kamangmangan, asin sa kasutilan nin manga tawo; huli ta dai sinda naghaharanap nin kaaraman o kaya pagkasabot sa dakulang kaaraman, kun ini itinao sainda na yano siring sa anong pagkayano an maitatao sa tataramon.

8 Asin ngonian, sakuyang padangat na manga katugangan, nahihiling ko na kamo naghohororop-horop pa sa saindong manga puso; asin sakuyang ikinamumundo na ako kaipuhan na magparataram manunungod kan bagay na ini. Huli ta kun kamo magdadarangog sa Espiritu na nagtutukdo sa tawo na magpamibi maaraman nindo na kamo magpamiribi; huli ta an maraot na espiritu dai magtutukdo sa tawo na magpamibi alagad siya tutukdoan na dai magpamibi.

9 Alagad, sakuyang sasabihon sa saindo na kamo kaipuhan na danay nanggad na magpamiribi, asin dai magruluya; na kamo dai nanggad na maggiribo nin ano man na bagay sa Kagurangnan sagkod na bako nasa enot an pagpamibi sa Ama sa pangaran ni Cristo, na saiyang pabanalon an gabos mong paggibo saimo, na an saimong paggibo para sa karahayan kan saimong kalag.