1 Asin ngonian, sakuyang padangat na manga katugangan, binasa ko an manga ini tanganing maaraman nindo an manunungod sa tipan kan Kagurangnan na saiyang pinakitipan sa gabos na harong kan Israel—

2 Na siya nagtaram sa manga Judio, sa paagi kan nguso kan saiyang manga banal na propeta, magpoon pa sa kapinonan, poon sa kapagarakian sagkod sa masurunod na kapagarakian, sagkod umabot an panahon na sinda maibalik giraray sa totoong simbahan asin sa katiripunan kan Dios; sagkod na sinda titiripunon na sa pagpuli sa saindang dagang panunod, asin sinda mamumugtak sa saindang manga dagang ipinangako.

3 Totoo, sakuyang padangat na manga katugangan, tinataram ko ini sa saindo tanganing mag-orogma kamo, asin iiritaas an saindong manga payo sagkod pa man, huli sa manga balaog na itatao kan Kagurangnan na Dios sa saindong manga aki.

4 Huli ta sakuyang aram na naghanap kamo nin labi-labi, dakol saindo, tanganing maaraman an manga bagay na maabot; kaya sakuyang aram na aram nindo na an satuyang laman maggugururang asin magkakagaradan; alagad, sa satuyang manga hawak mahihiling niato an Dios.

5 Iyo, sakuyang aram na aram nindo na sa hawak siya magpapahiling sa manga nasa Jerusalem, na hinalian niato; huli ta kaipuhan nanggad na siya makiiba sainda; huli ta itinalaga na kan dakulang Kaglalang na siya magtios na masakopan nin tawo sa laman, asin magadan para sa gabos na manga tawo, tanganing an gabos na manga tawo saiyang masakopan.

6 Huli ta an kagadanan nag-agi sa gabos na manga tawo, tanganing mautob an maherakon na kaisipan kan dakulang Kaglalang, kaipuhan magkaigwa nin kapangyarihan nin pagkabuhay-liwat, asin an pagkabuhay-liwat kaipuhan na umabot sa manga tawo huli kan pagkasala; asin an pagkasala uminabot huli sa pagsuhay; asin huli ta an tawo nagkasala, sinda hinarali sa atubangan kan Kagurangnan.

7 Kaya, kaipuhan na idto daing-katapusan na pagtubos—kun bako idtong daing-katapusan na pagtubos an pagkalapa na ini dai maabot sa daing pagkalapa. Kaya an enot na paghukom na nag-abot sa tawo kaipuhan kutana na daing katapusan. Asin kun totoo idto, an hawak na ini ilinubong kutana tanganing malapa asin makasalak na sana sa inang daga, asin dai na mabangon liwat.

8 O an kadunungan kan Dios, an saiyang pagkaherak asin ugay! Huli totoo, na kun an hawak na ini dai na magbangon liwat an satuyang manga espiritu masasakopan na kaidtong anghel na nahulog hali sa atubangan kan Daing-Kasagkuran na Dios, asin naging demonio, na dai na makabangon nanggad.

9 Asin an satuyang manga espiritu magiging siring man saiya, asin ta kita magiging manga demonio, manga anghel nin demonio, tanganing mawara sa atubangan kan Dios, asin mag-erok na kaibahan an ama nin kaputikan, sa kasakitan, siring sa saiya; iyo duman sa sarong nabubuhay na nagsugot sa enot niatong manga magurang, na nagsagin-sagin na sarong anghel nin liwanag, asin sinugotan an manga aki nin tawo sa manga gibong hilom na panggadan asin gabos na manga gibong hilom nin kadikloman.

10 O anong kadakulang karahayan kan satuyang Dios, na naghanda nin dalan tanganing kita makadulag sa pagkakapot kan makangurungirhat na halimaw; iyo, idtong halimaw, idtong kagadanan asin idtong impiyerno, na sakuyang inaapod na kagadanan kan hawak, asin man an kagadanan kan espiritu.

11 Asin huli sa paagi kan pagligtas kan satuyang Dios, an Banal kan Israel, ining kagadanan, na sakuyang sinabi, na idtong temporal; paluluwason an manga gadan; na an kagadanan na idto iyo an lulubngan.

12 Asin ining kagadanan na sakuyang sinasabi, na an pagkagadan na espiritual, paluluwason an gadan, na an pagkagadan na espiritual iyo an impiyerno; kaya, an kagadanan asin an impiyerno paluluwason an saindang gadan, asin an impiyerno paluluwason an bihag na manga espiritu, asin an lulubngan paluluwason an saindang bihag na manga hawak, asin an manga hawak asin manga espiritu kan manga tawo maisusulit sa lambang saro; asin ini huli sa kapangyarihan kan pagkabuhay-liwat kan Banal kan Israel.

13 O anong kadakulang kaisipan kan satuyang Dios! Huli ta sa ibong kaini, an paraiso kan Dios paluluwason an manga espiritu kan manga matatanos, asin an lulubngan paluluwason an manga hawak kan matatanos; asin an espiritu asin an hawak maisusulit sinda liwat, asin an gabos na manga tawo dai malalapa, asin magiging imortal, asin sinda buhay na manga kalag, igwa nin bilog na pagkaaram siring satuya na nasa laman, an kaibahan sana ta an satuyang kaaraman sangkap na.

14 Huli kaini, kita magkakaigwa nin bilog na kaaraman kan satuyang gabos na pagkakasala, asin an satuyang pagkaati, asin an satuyang kasusupgan; asin an matatanos magkakaigwa nin bilog na kaaraman kan saindang kaogmahan, asin an saindang katanusan, na nagugubingan nin kabinian, iyo, sagkod gubing nin katanusan.

15 Asin ta maagi an panahon na kun an gabos na manga tawo umagi na sa enot na pagkagadan sagkod na mabuhay, huli ta sinda naging imortal, sinda kaipuhan na humampang sa hukoman kan Banal kan Israel; asin maabot an paghukom, asin sinda huhukoman sunod sa banal na paghukom kan Dios.

16 Asin totoo, na sagkod na an Kagurangnan nabubuhay, huli ta sinabi idto kan Kagurangnan na Dios, asin idto an saiyang daing-kasagkuran na tataramon, na dai mapapara, na an matatanos danay na matatanos giraray, asin sinda na manga makasalan danay na makasalan giraray; kaya sindang makasalan iyo an demonio asin an saiyang manga anghel; asin ta duman sinda sa daing-kasagkuran na kalayo, na hinanda sainda; asin an saindang kasakitan siring sa danaw nin kalayo asin naglalaad na asupre; na an laad nag-iitaas sagkod pa man asin dai nin katapusan.

17 O an kadakulaan asin an kahusayan kan satuyang Dios! Huli ta saiyang ginigibo an gabos niyang manga tinaram, asin an manga tataramon hali sa saiyang nguso, asin an saiyang katugonan mauutob nanggad.

18 Alagad, magdangog, an matatanos, an manga santo kan Banal kan Israel, sinda na manga nagtubod sa Banal kan Israel, sinda na nagtios kan manga pasakit nin mundo, asin tinalikodan an kasusupgan kaidto, sainda ipapanunod an kahadean kan Dios, na hinanda sa sainda magpoon pa kan imukna an mundo, asin an saindang kaogmahan lubos sagkod pa man.

19 O an kadakulaan kan pagkaherak kan satuyang Dios, an Banal kan Israel! Huli ta saiyang ilinigtas an saiyang manga santo sa kabangisan kan halimaw na demonio, asin sa kagadanan, asin sa impiyerno, asin sa danaw nin kalayo asin asupre, na daing katapusan na kasakitan.

20 O anong kadakulaan kan kabanalan kan satuyang Dios! Huli ta saiyang aram an gabos na manga bagay, asin ta dai siyang bagay na dai naaaraman.

21 Asin ta siya nagpadigdi sa mundo tanganing saiyang iligtas an gabos na tawo kun sinda magdarangog sa saiyang tingog; huli ta totoo na saiyang tinios an kulog kan gabos na linalang, maging manga lalaki, manga babae, asin manga aki, na gikan ki Adan.

22 Asin saiyang tinios ini tanganing an pagkabuhay-liwat umagi sa gabos na tawo, tanganing an gabos makaatubang saiya sa dakula asin aldaw nin paghatol.

23 Asin saiyang pinagbotan an gabos na manga tawo na sinda magsorolsol, asin magpaburunyag sa saiyang pangaran, magkaigwa nin bilog na pagtubod sa Banal kan Israel, o kaya dai sinda maililigtas para sa kahadean kan Dios.

24 Asin kun sinda dai magsorolsol asin magturubod sa saiyang pangaran, asin magpabunyag sa saiyang pangaran, asin magtagal sagkod sa katapusan, sinda masasalaan; huli ta an Kagurangnan na Dios an Banal kan Israel, sinabi ini.

25 Kaya, siya nagtao nin susundon; asin kun sain daing susundon na itinao dai man nin padusa; asin kun sain na daing padusa dai man nin hatol; asin kun sain na daing hatol an pagkaherak kan Banal kan Israel an makua sainda, huli sa pagtubos; huli ta sinda ilinigtas kan saiyang kapangyarihan.

26 Huli ta an pagtubos an nakabayad kan hinahagad kan katanusan sa gabos na dai natawan kan susundon, sinda ililigtas sa makangurungirhat na halimaw, na kagadanan asin impiyerno, asin demonio, asin an danaw nin kalayo asin naglalaad na asupre, na daing katapusan na kasakitan; asin ibabalik sinda sa Dios na nagtao sainda nin hinangos, na iyo an Banal kan Israel.

27 Alagad makaherak kaidtong natawan kan susundon, iyo, na igwa kan gabos na susundon kan Dios, siring satuya, asin sinda na nagsuhay kaidto, asin idtong nagsayang kan manga aldaw na sinda nasa pagbalo, huli ta katakot-takot an saindang kamugtakan.

28 O idtong pandayang kaisipan kan sarong tampalasan! O an kapahalangkawan, asin an kaluyahan, asin an kamangmangan kan manga tawo! Kun sinda igwa na nin nanuodan huna ninda madudunong na sinda, asin ta sinda dai na nagdadarangog sa manga pasunod kan Dios, huli ta saindang iginigilid ini, naghuhuna sinda na saindang aram an saindang sadiri, kaya an saindang kadunungan magiging kamangmangan asin daing pakinabang. Asin sinda mapapara.

29 Alagad an pakanuod marahay kun sinda nagdadangog kan manga pasunod kan Dios.

30 Alagad makaheherak idtong mayaman, idtong mayaman sa kinabanon na manga bagay. Huli ta mayaman sinda ikinaungis ninda an daing sukat, asin inuusig an mabuboot, asin an saindang puso yaon sa saindang kayamanan, kaya, an saindang kayamanan iyo an saindang dios. Asin totoo, an saindang kayamanan mapapara na kaibahan sinda.

31 Asin makaheherak idtong bungog na habo magdangog; huli ta sinda mapapara.

32 Makaheherak idtong buta na dai nakakahiling; huli ta sinda mapapara man.

33 Makaheherak idtong matagas an puso, huli ta an pakaaram kan saindang manga karaotan iyo an maghahampak sainda sa huring aldaw.

34 Makaheherak idtong putikon, huli ta siya ihuhulog sa impiyerno.

35 Makaheherak idtong paragadan na tinutuyo an panggadan, huli ta siya magagadan.

36 Makaheherak idtong manga parapasambay, huli ta sinda ihuhurulog sa impiyerno.

37 Iyo, makaheherak idtong manga nagsasamba sa manga dios-diosan, huli ta an diablo kan gabos na manga diablo naoogma sa sainda.

38 Asin, sa katapusan, makaheherak idtong manga magkakagaradan sa kasalan; huli ta sinda mabalik sa Dios, asin mahihiling an saiyang lalawgon, asin ta magdadanay sinda sa saindang manga kasalan.

39 O sakuyang padangat na manga katugangan, rumdomon an kasakitan kan paglapas tumang sa Banal na Dios, asin man an kasakitan sa pagsuko sa manga tukso kan sarong madaya. Rumdomon, na an pagkaigwa nin pag-isip na makalaman iyo an kagadanan, asin an pagkaigwa nin pag-isip na espiritual iyo an buhay na daing-kasagkuran.

40 O, sakuyang padangat na manga katugangan, magdarangog sa sakuyang manga tataramon. Rumdomon an kadakulaan kan Banal kan Israel. Dai kamo magsabi na ako nagtataram nin magagabat na manga bagay tumang saindo; huli ta kun saindong gigiribohon, tuturuya-tuyaon nindo an katotoohan, huli ta an sinabi ko manga tataramon kan saindong Kaggibo. Aram ko na an manga tataramon na totoo magabat tumang sa gabos na maati; alagad an matatanos dai natatakot kan manga ini, huli ta namomootan ninda an katotoohan asin dai sinda nahahadit.

41 O ano pa, sakuyang manga padangat na katugangan madya sa Kagurangnan, an Sarong Banal. Rumdomon na an saiyang manga dalan matanos. Totoo, na an dalan para sa tawo piot, alagad idto nasa sarong tanos na aagihan pasiring sa atubangan niya, asin an nagbabantay kan pintoan iyo an Sarong Banal kan Israel; asin ta siya dai nagkuang surogoon duman; asin ta daing ibang dalan kundi diyan sa pintoan; huli ta siya dai madadaya, huli ta Kagurangnan na Dios an saiyang pangaran.

42 Asin an siisay man na magtuktok sa saiya, saiyang bubuksan, asin an madudunong, asin idtong manga igwang pakanuod, asin idtong manga mayayaman, na nagpaharo-halangkaw huli sa saindang manga nanodan asin kadunungan, asin an saindang manga kayamanan—iyo, sinda an saiyang ikinakaungis; asin sagkod na dai ninda isirikwal an manga bagay na ini, asin ibilang ninda na sinda mangmang sa atubangan kan Dios, asin magpakurumbaba, dai niya sinda buburuksan.

43 Alagad an manga bagay kan madunong asin kan naglilikay matatago sa sainda sagkod pa man—iyo, idtong kaogmahan na inandam sa manga santo.

44 O, sakuyang padangat na manga katugangan, rumdomon an sakuyang manga tataramon. Magdangog, sakuyang hinuba an sakuyang gubing asin sakuyang iwinawagwag idto sa saindong atubangan; sakuyang ipinapamibi sa Dios kan sakuyang kaligtasan na ako saiyang hilingon kan saiyang mata na nakakahiling kan gabos; kaya saindong maaaraman sa huring aldaw, kun an gabos na manga tawo huhukoman na kan saindang manga gibo, na an Dios kan Israel nasaksihan na sakuyang iwinagwag an saindong karaotan sa sakuyang kalag, asin ta ako matindog na maliwanag sa saiyang atubangan, asin ako ligtas na sa saindong dugo.

45 O, sakuyang padangat na manga katugangan, taralikodan nindo an saindong manga kasalan; iwaragwag an kadena na nakagapos nin higot sa saindo; madya sa Dios na iyo an gapo kan saindong kaligtasan.

46 Ihanda an saindong manga kalag para sa mamuraway na aldaw na igagawad an katanusan sa manga matatanos, sagkod sa aldaw nin paghukom, tanganing kamo dai tumaralikod kaibahan an makangurungirhat na takot; tanganing dai na nindo marumdoman an saindong makangurungirhat na kasalan, asin mapiritan na magkurahaw: Banal, banal an saimong manga paghatol, O Kagurangnan na Dios na Makakamhan—alagad sakuyang aram an sakuyang kasalan; ako naglapas sa saimong katugonan, asin an sakuyang manga kalapasan uya sakuya, asin an demonio nabihag ako, na ako sarong saklot sa saiyang makangurungirhat na pagtios.

47 Alagad magdarangog, manga katugangan ko, kaipuhan pa baga na kamo pukawon sa manga makangurungirhat na katotoohan kan manga bagay na ini? Riribokon ko pa daw an saindong manga kalag kun an manga kaisipan nindo dalisay? Magiging yano baga ako saindo siring kan pagkayano kan katotoohan kun kamo ligtas sa kasalan?

48 Nanggad, kun kamo manga banal an sakuyang itataram saindo manga kabanalan; alagad huli ta bako man kamo banal, asin an paghiling nindo sakuya sarong paratukdo, kaipuhan na tukdoan ko kamo kan kabalosan kan kasalan.

49 Totoo, an sakuyang kalag naaanggot sa kasalan, asin an sakuyang puso naoogma sa katanusan; asin oomawon ko an banal na pangaran kan sakuyang Dios.

50 Madya, kamo sakuyang manga katugangan lambang saro na napapaha, madya kamo sa manga tubig, asin siya na daing kuwarta, madya magbakal asin magkaon; iyo, madya magbakal nin arak asin gatas na dai nin kuwarta asin dai nin halaga.

51 Kaya, dai magsayang nin kuwarta sa daing kamugtakan, o an saindong kapagalan sa manga dai nakakaogma. Magdarangog nanggad sa sakuya, asin rumdomon an manga tataramon na sakuyang sinabi; asin madya sa Banal kan Israel, asin magpakabasog sa manga bagay na dai mapapara, o kaya dai malalapa, asin paogmaha an saindong kalag sa manga mahahamis.

52 Magdangog, sakuyang padangat na manga katugangan, rumdomon an manga tataramon kan saindong Dios; padagos kamo sa pagpamiribi saiya sa aldaw, asin magtao nin pasalamat sa saiyang banal na pangaran sa banggi. Paogmaha an saindong manga puso.

53 Asin totoo, dakulang gayo an manga tipan kan Kagurangnan, asin dakulang gayo an saiyang pagkaherak sa manga aki nin tawo; asin huli sa saiyang kadakulaan, asin sa saiyang ugay asin pagkaherak, saiyang ipinangako satuya na an satuyang manga bunga dai nanggad marurumpag, sunod sa laman, kundi ta sinda iingatan; asin sa maabot na kapagarakian sinda an matatanos na sanga sa harong kan Israel.

54 Asin ngonian, sakuyang manga katugangan, boot ko pang magtaram sa saindo; alagad sa aga ipapahayag ko saindo an natatada kan sakuyang manga tataramon. Amen.