1 Alagad totoo, na kadakol—sa aldaw na ako magpadagos sa paggibo kan makangalas na gibo sa saindang katiripunan, tanganing sakuyang marumdoman an tipan na sakuyang ginibo sa manga aki nin tawo, tanganing gibohon ko na iunat giraray an sakuyang kamot sa ika-duwang ulit tanganing bawion an sakuyang manga tawo, na iyo an nasa harong kan Israel.

2 Asin man, tanganing sakuyang marumdoman an manga pangako na sakuyang ginibo saimo, Nephi, asin man sa saimong ama, na sakuyang marumdoman an saimong bunga; asin idtong manga tataramon kan saimong bunga padagos na maghahali sa sakuyang nguso para sa saimong bunga; asin an sakuyang manga tataramon makakalakop sa kasagkuran kan kinaban, tanganing maging tanda sa sakuyang tawo, na nasa harong kan Israel.

3 Asin huli ta an sakuyang manga tataramon makakalakop—dakol sa manga Gentil an masabi: Sarong Biblia! Sarong Biblia! Igwa na kaming Biblia, asin dai nang ibang Biblia kaini.

4 Alagad ini an sinabi kan Kagurangnan na Dios: O manga kablas, sinda igwa na nin Biblia; asin ta maghahali ini sa manga Judio, an sakuyang manga katipan na manga tawo kaidto pa. Asin ano an pasasalamatan ninda sa manga Judio sa Biblia na saindang inako hali sa sainda? Iyo, ano an boot sabihon kan manga Gentil? Sainda daw na narurumdoman an manga pagtios, asin an manga kapagalan, asin an manga kasakitan kan manga Judio, asin an saindang pagkamaimbod sa sakuya, sa padagos na pagdara nin kaligtasan sa manga Gentil?

5 O kamong manga Gentil, saindo daw na narumdoman an manga Judio, an sakuyang manga katipan na manga tawo kaidto pa? Dai; alagad saindong isinumpa asin ikinaungis sinda, asin dai na minawot pang bawion sinda. Alagad totoo, sakuyang ibabaralik sa saindong sadiring manga payo an gabos na manga bagay na ini, huli ta ako an Kagurangnan na dai nakakalingaw sa sakuyang manga tawo.

6 Manga kablas kamo, na masabi: Sarong Biblia, igwa na kaming Biblia, asin dai na niamo kaipuhan pa nin Biblia. Magkaigwa daw kamo nin Biblia kun bako sa manga Judio?

7 Dai baga nindo naaaraman na igwa nin kadakol na manga nasion ki sa saro? Dai baga nindo naaaraman na ako an Kagurangnan nindong Dios, naglalang kan gabos na manga tawo, asin ta sakuyang narurumdoman idtong manga nasa manga puro-puro kan dagat; asin ako an nagboboot kan kalangitan sa itaas asin kan daga sa ibaba; asin dinadara ko an sakuyang tataramon sa manga aki nin tawo, iyo, sagkod sa gabos na nasion sa kinaban?

8 Ano ta nagngungururob-ngurob kamo, huli ta kamo maako pa nin sakuyang tataramon? Dai nindo aram na an patotoo nin duwang nasion iyo an tagapagpatotoo sa saindo na ako an Dios, na sakuyang narurumdoman an sarong nasion siring man sa iba? Kaya, ako nagtataram nin sarong tataramon sa sarong nasion siring man sa iba. Asin kun an duwang manga nasion magsasabay, an patotoo kan duwang nasion magsasabay man.

9 Asin ta ini sakuyang ginigibo tanganing sakuyang mapatotoohan sa kadaklan na ako siring kaidto, ngonian, asin sagkod pa man; asin sakuyang sinasabi an manga tataramon sunod sa sakuyang kabotan. Asin huli ta ako nakapagsabi na nin sarong tataramon, dai kamo maghuna na dai na ako mataram pa nin iba; huli ta an sakuyang gibo dai pa tapos; ni ini matatapos sagkod sa katapusan nin tawo, ni magpoon kaidto asin sagkod pa man.

10 Kaya, huli ta igwa na kamong Biblia dai kamo maghuna na itoon na sa laog an gabos kong manga tataramon; ni kamo maghuna na dai na ako nagpasurat nin dakol pa.

11 Huli ta sakuyang pinagbobotan an gabos na manga tawo, idtong nasa sirangan asin idtong nasa sulnopan, asin idtong nasa norte asin idtong nasa sur, asin sa manga puro-puro nin dagat, na saindang isururat an manga tataramon na sakuyang sasabihon sa sainda; huli ta hali sa manga librong idto na isusururat sakuyang hahatolan an mundo, an lambang tawo sunod sa saiyang manga gibo, sunod sa nakasurat.

12 Kaya magdarangog, ako magtataram sa manga Judio asin ta saindang isusururat ini; asin ako magtataram man sa manga Nephite asin ta saindang isusururat ini; asin ako magtataram man sa ibang manga tribo kan harong kan Israel, na sakuyang inaantabayan, asin ta saindang isusururat ini; asin ako magtataram man sa gabos na nasion kan kinaban asin ta saindang isusururat ini.

13 Asin ta maagi an panahon na an manga Judio magkakaigwa kan manga tataramon kan manga Nephite, asin an manga Nephite magkakaigwa kan manga tataramon kan manga Judio; asin an manga Nephite asin an manga Judio magkakaigwa kan manga tataramon kan nawawara na manga tribo kan Israel; asin an nawawara na manga tribo kan Israel magkakaigwa kan manga tataramon kan manga Nephite asin manga Judio.

14 Asin ta maagi an panahon na an sakuyang manga tawo, na iyo an nasa harong kan Israel, titiripunon pauli sa saindang manga daga na pagsadiri; asin an sakuyang tataramon pagtitiriponon bilang saro. Asin sakuyang ipapahiling sa sainda na nagtuturumang sa sakuyang tataramon asin nagtuturumang sa sakuyang manga tawo, na nasa harong kan Israel, na ako an Dios asin ta ako nakipagtipan ki Abraham na sakuyang rurumdomon an saiyang bunga sagkod pa man.