1 Totoo, na uminagi an panahon na ako, si Nephi, nagkurahaw nin labi-labi sa Kagurangnan na sakuyang Dios, huli sa kaanggotan kan sakuyang manga tugang.

2 Alagad totoo, an saindang kaanggotan sa sakuya ominorog pa, sagkod na boot nindang ako halian nin buhay.

3 Iyo, nagngungururob-ngurob sinda laban sa sakuya an sabi: An satuyang nguhod na tugang nag-iisip na sakopon kita; asin ta nagkaigwa kitang kadakol na kariribokan huli sa saiya; kaya, ngonian satuyang gadanon siya, tanganing dai na kita masakitan pa huli sa saiyang manga tataramon. Huli ta totoo, na kita habo na siya an maging satuyang pamayo; huli ta manunungod idto satuya, na manga matuang tugang, na magsakop sa manga tawong ini.

4 Ngonian ako dai masurat sa manga plakeng ini kan gabos na tataramon na nginururob-ngurob ninda laban sakuya. Alagad tama na sabihon ko na boot ninda na halian ako nin buhay.

5 Asin ta uminagi an panahon na nagpatanid sakuya an Kagurangnan, na ako, si Nephi, maghali sa sainda asin magdulag sa kadlagan, asin an gabos na boot mag-iba sakuya.

6 Kaya, uminagi an panahon na ako, si Nephi, dinara an sakuyang pamilia, asin man si Zoram asin an saiyang pamilia, asin si Sam, an matua kong tugang asin an saiyang pamilia, asin si Jacob asin si Jose, an sakuyang manga nguhod na tugang, asin man an sakuyang manga tugang na babae, asin sinda gabos na boot mag-iba sakuya. Asin an gabos na nag-iba sakuya iyo idtong nagtutubod sa manga patanid asin manga kapahayagan kan Dios; kaya, sinda nagdarangog sa sakuyang manga tataramon.

7 Asin samuyang dinara an samuyang manga tolda asin kun ano pang manga bagay na mabibitbit niamo, asin ta nagralakaw kami sa kadlagan sa laog nin dakol na manga aldaw. Asin pagkatapos kan samuyang paglakaw sa laog nin dakol na manga aldaw nagpatindog kami kan samuyang manga tolda.

8 Asin an sakuyang manga tawo binoot na pangaranan an lugar na Nephi; kaya samuyang inapod idto na Nephi.

9 Asin an gabos na kairiba ko inarako ninda na apodon an sadiri ninda na manga tawo ni Nephi.

10 Asin samuyang sinunod an manga kahatolan, asin an manga susundon, asin manga katugonan kan Kagurangnan sa gabos na manga bagay, susog sa katugonan ni Moises.

11 Asin ta an Kagurangnan napasamuya; asin kami nag-uruswag nin labi-labi; huli ta kami nagtanom nin manga pisog, asin ta kami nag-ani nin labi-labi. Asin kami nagpoon na magpatubo nin manga karnero, asin manga kanding asin manga hayop na palaen-laen.

12 Asin ako, si Nephi, dinara man an manga kasuratan na nakaukit sa manga plakeng tanso; asin man an bola, o an kompas, na hinanda para sa sakuyang ama kan kamot kan Kagurangnan, susog sa nakasurat.

13 Asin ta uminagi an panahon na kami nagpoon na mag-uruswag nin labi-labi, asin ta nagdarakol na sa daga.

14 Asin ako, si Nephi, kinua ko an espada ni Laban, asin ta naggibo ako nin dakol na manga espada na siring kaidto, ta tibaad sa anong paagi an manga tawong inapod na manga Lamanite magdigdi asin garadanon kami; huli ta aram ko an kaanggotan ninda sa sakuya asin sa manga aki ko asin idtong manga inapod na sakuyang manga tawo.

15 Asin sakuyang tinurukdoan an sakuyang manga tawo na maggibo nin manga harong, asin manlaen-laen na gibo sa kahoy; asin sa lansang, asin sa tingga, asin sa tanso, asin sa asero, asin sa bulawan, asin sa plata, asin sa manlaen-laen na mahalagang manga metal, na kadakol na gayo.

16 Asin ako, si Nephi, nagpatugdok nin templo; asin ta sakuyang ginibo idto na siring kan templo ni Solomon lamang dai gibo sa kadakol na manlaen-laen na mahalagang manga bagay; huli ta dai makukua an manga idto sa daga, kaya, dai nanggad magigibo na siring kan templo ni Solomon. Alagad an paagi kan pagkagibo siring kan templo ni Solomon; asin an pagkagibo malinig na gayo.

17 Asin ta uminagi an panahon na ako, si Nephi, sakuyang pinasunod an manga tawo na maging mahigos asin maggibo na gamit an saindang manga kamot.

18 Asin ta uminagi an panahon na binoot ninda na ako an maging saindang hadi. Alagad ako, si Nephi, naghulaw na dai sinda magkaigwa nin hadi; alagad, ginigibo ko para sa sainda susog kaidtong nasa sakuyang kapangyarihan.

19 Asin ta nanggad, nautob an manga tataramon kan Kagurangnan sa manga tugang ko, idtong manga tataramon manunungod sa sainda, na ako an magiging pamayo asin paratukdo sainda. Kaya, ako an naging saindang pamayo asin paratukdo, sunod sa manga katugonan kan Kagurangnan, sagkod kan panahon na boot ako nindang halian nin buhay.

20 Kaya, an tataramon kan Kagurangnan na itinaram sakuya, nautob na an sabi: Sagkod na dai sinda nagdadarangog sa saimong manga tataramon, sinda mahahali sa atubangan kan Kagurangnan. Asin ta totoo, na nagkaharali sinda sa saiyang atubangan.