An Libro ni Mosiah

1 Asin ta uminagi an panahon na pagkatapos na gibohon ni Mosiah an ipinagboot saiya kan saiyang ama, asin siya nakagibo na nin sarong pagbalangibog sa bilog na daga, an manga tawo nagtiripon sa bilog na daga, tanganing magturukad sinda pasiring sa templo tanganing magdangog kan manga tataramon na sasabihon ni hading Benjamin sa sainda.

2 Asin ta kadakol an bilang, na sa kadakolan dai na sinda mabilang; huli ta duminarakol sindang marahay asin nagi sindang manga makusog sa saindang manga daga.

3 Asin sinda nagdara man kan manga matuang ugbon kan saindang manga hayop, tanganing sinda makapagdurulot asin makapag-aratang nin manga sinulo, susog sa tugon ni Moises;

4 Asin man tanganing sinda makapagpasaralamat sa Kagurangnan nindang Dios, na nagdara sainda paluwas sa daga kan Jerusalem, asin nagligtas sa sainda sa manga kamot kan saindang manga kaiwal, asin nagpili nin masuripot na manga lalaki na magi nindang paratukdo, asin man sarong masuripot na lalaki na magi nindang hadi, na magpamugtak nin katuninongan sa daga kan Zarahemla, asin magtukdo sa sainda na sunodon an manga katugonan kan Dios, tanganing sinda mag-ogma asin mapano nin pagkamoot sa Dios asin sa gabos na manga tawo.

5 Asin ta uminagi an panahon na kan sinda mag-abot sa templo, pinatirindog ninda an saindang manga tolda sa palibot, lambang lalaki susog sa saiyang pamilia, kaiba an saiyang agom, asin an saiyang manga aking lalaki, asin an saiyang manga aking babae, asin an saindang manga aking lalaki, asin an saindang manga aking babae, magpoon sa pinakamatua sagkod sa pinakanguhod, na lambang pamilia nalalaen.

6 Asin ta pinatirindog ninda an saindang manga tolda sa palibot kan templo, lambang lalaki ginibo na an pintoan kan saiyang tolda nakahampang sa templo, tanganing maski siring na sinda nasa laog kan tolda, sinda makakadangog kan manga tataramon na sasabihon ni hading Benjamin sa sainda;

7 Huli ta an katiripunan kadakulang gayo na dai ni hading Benjamin masasayakpan na tukdoan sa laog kan templo, kaya saiyang pinagmarahay na magpatindog nin sarong tore, tanganing sa siring an saiyang manga tawo makadangog kan manga tataramon na saiyang sasabihon sa sainda.

8 Asin ta uminagi an panahon na siya nagpoon na magtaram sa saiyang manga tawo hali sa tore; asin dai sinda gabos nakadangog kan saiyang manga tataramon huli sa kadakulaan kan pagtiripon; kaya saiyang ginibo na an manga tataramon na saiyang sinabi maisurat asin maipadara duman sa manga dai nakadangog kan saiyang tingog, tanganing sinda man makakua kan saiyang tataramon.

9 Asin iyo ini an manga tataramon na saiyang sinabi na ginibo niyang maisurat, na an sabi: Manga katugangan ko, kamo gabos na nagtiripon digdi, kamo na nakakadangog kan sakuyang manga tataramon na sakuyang sasabihon saindo sa aldaw na ini; huli ta dai ko kamo pinagbotan na pumadigdi tanganing pagbasang-basangon an manga tataramon na sakuyang sasabihon, alagad tanganing kamo magdarangog asin magturubod sakuya, asin buruksan an saindang manga talinga tanganing kamo makadarangog, asin an saindong manga puso tanganing kamo makasarabot, asin an saindong manga isip tanganing an tagong hilom kan Dios mabuksan sa saindong panghiling.

10 Dai ko kamo pinagbotan na pumadigdi tanganing ako katakotan nindo, o tanganing saindong isipon na ako sa sadiri ko orog pa sa mortal na tawo.

11 Alagad siring man ako sa saindo, sakob nin gabos na manga kahilangan nin hawak asin isip; alagad ako pinili kaining manga tawo, asin itinalaga kan sakuyang ama, asin tinugotan kan kamot kan Kagurangnan na ako an maging pamayo asin hadi sa manga tawong ini; asin iningatan asin inataman kan saiyang daing kapantay na kapangyarihan, tanganing kamo paglingkodan nin bilog na bagsik, isip asin kusog na itinao kan Kagurangnan sa sakuya.

12 Sinasabi ko sa saindo siring na ako tinugotan na iubos ko saindo an sakuyang manga aldaw sa paglingkod sa saindo, sagkod sa panahon na ini, asin dai naghanap nin bulawan o plata o anong palaen-laen na manga kayamanan sa saindo;

13 Ni dai ko kamo pinabayaan na makulong sa manga bartolina, o kamo magpaoro-oripon sa lambang saro sa saindo, o kamo manggadan, o manalakat, o manghabon, o magsambay, ni dai ko kamo pinabayaan na makagibo nin ano man na kasumbikalan, asin kamo tinukdoan na saindong sunodon an katugonan kan Kagurangnan, sa gabos na bagay na saiyang pinagboot sa saindo—

14 Asin maski ako, an sakuyang sadiri, nagpagal sa sadiri kong manga kamot tanganing sakuyang mapaglingkodan kamo, asin tanganing dai kamo magabatan kan manga buwis, asin tanganing daing mangyari sa saindo nin ano pa man na masakit pasanon—asin sa gabos na manga bagay na sakuyang sinabi, kamo, sa sadiri nindo, an manga tagapatotoo sa aldaw na ini.

15 Alagad, sakuyang manga katugangan, dai ko ginibo an manga bagay na ini tanganing ako magpaabaw, ni dai ko sinasabi an manga bagay na ini tanganing kamo pagsautan ko; alagad sinasabi ko ini saindo tanganing saindong maaraman na ako makapanimbag sa atubangan kan Dios sa aldaw na ini na malinig an sakuyang pag-isip.

16 Totoo nanggad, sakuyang sinasabi sa saindo nin huli ta sinabi ko na sakuyang inubos na an sakuyang manga aldaw sa paglingkod sa saindo, ako dai nagmamawot na magpa-abaw-abaw, huli ta ako nasa paglingkod man sana sa Dios.

17 Asin nanggad, sakuyang sinasabi sa saindo an manga bagay na ini tanganing kamo makanuod nin kadunungan; tanganing kamo makanuod na kun kamo nasa paglingkod sa saindong kapwa kamo nasa paglingkod man sana sa saindong Dios.

18 Totoo, ako inapod nindo na saindong hadi; asin kun ako, na saindong inapod na hadi nindo, nagpagal sa paglingkod sa saindo, bakong kaipuhan na magpagal man kamo na magparurilingkod sa lambang saro?

19 Asin ta totoo man, na kun ako na saindong inaapod na hadi nindo, na inubos an saiyang manga aldaw sa paglingkod sa saindo, asin nasa paglingkod man sana sa Dios, pinasasalamatan nindo, O gurano pa na kaipuhan na pasalamatan nindo an saindong langitnon na Hadi!

20 Sinasabi ko sa saindo, sakuyang manga katugangan, na kun itatao nindo an gabos na pasalamat asin pag-omaw na nasa kapangyarihan kan saindong bilog na kalag, sa Dios na naglalang saindo, asin nag-ingat asin nag-ataman saindo, asin ginibo na kamo mag-ogma, asin itinao na kamo mabuhay sa katuninongan sa lambang saro—

21 Sakuyang sinasabi sa saindo na kun kamo magrilingkod sa saiya na naglalang sa saindo sa kapinonan, asin iniingatan kamo sa aroaldaw, sa pagpasubli saindo nin hinangos, tanganing kamo magkaburuhay asin makahiriro asin makagibo sunod sa sadiri nindong kagustohan, asin tinatabangan pa kamo sa oras-oras—sinasabi ko, kun paglilingkodan nindo siya kan saindong bilog na manga kalag dai pa kamo magiging mapapakinabangan na manga surogoon.

22 Asin ta totoo, an saiyang hinahagad man lamang sa saindo iyo na sunodon an saiyang manga katugonan asin kamo pinangakoan niya na kun susundon nindo an saiyang manga katugonan kamo mauswag sa daga; asin dai nanggad siya nagliliwat kan saiyang sinabi; kaya, kun kamo magsusunod sa saiyang manga katugonan siya mabendision saindo asin mapauswag saindo.

23 Asin ngonian, sa enot pa, saiyang linalang kamo, asin tinawan kamo kan saindong manga buhay, na iyo an saindong pagkakautang sa saiya.

24 Asin sa ika-duwa, saiyang hinahagad na kamo gumibo siring sa saiyang pinagboot saindo; huli ta kun saindong gigiribohon, gigibohon niya tulos an saiyang pagbendision sa saindo; asin kaya nabayadan na niya kamo. Asin ta kamo igwa pa nin pagkakautang sa saiya, asin iyo ngonian, asin sa maabot pa, sagkod nuarin pa man; kaya ano pa man an saindong ipagpapauruabaw-abaw?

25 Asin ngonian ako mahapot, igwa daw kamo nin masasabi sa saindong sadiri? Sisimbagon ko kamo, Dai. Dai nindo masasabi na kamo siring ngani sa kabokabo kan daga; alagad kamo linalang sa kabokabo kan daga; alagad totoo na ini sadiri niya na naglalang saindo.

26 Asin ako, ako nanggad, na saindong inaapod na hadi nindo, bako man ako orog pa sa saindong sadiri; huli ta ako man kabokabo. Asin ta saindong namasdan na ako gurang na, asin ta madali ko nang isuko ining mortal na hawak sa saiyang inang daga.

27 Kaya siring sa sakuyang sinabi sa saindo na ako naglingkod sa saindo, na naglalakaw na malinig an kaisipan sa atubangan kan Dios, siring man sa panahon na ini pinagkanigo ko na kamo magtiripon-tipon, tanganing dai ako mabasol, asin an saindong dugo dai makua sa sakuya, kun ako magtindog na tanganing hukoman kan Dios kan manga bagay na saiyang pinagboot sakuya manunungod sa saindo.

28 Sinasabi ko sa saindo na pinagkanigo ko na kamo magtiripon-tipon tanganing sakuyang malinigan an sakuyang gubing kan saindong dugo, sa panahon na ini kun nuarin na ako mababa na sa sakuyang lulubngan, tanganing ako magbaba na matuninong, asin an sakuyang imortal na espiritu makaiba sa manga koro sa kaitaasan sa pagkanta nin pag-omaw sa masuripot na Dios.

29 Asin man, sinasabi ko sa saindo na pinagkanigo ko na kamo magtiripon-tipon, tanganing sakuyang ipaaram saindo na bako na ako an saindong paratukdo, ni an saindong hadi.

30 Huli ta sa panahon na ini, an sakuyang bilog na hawak nagtatakig nin labi-labi mantang ako nagpopoon na magtaram sa saindo, alagad an Kagurangnan na Dios tinatabangan ako, asin tinutugotan akong magtaram sa saindo, asin ako pinagbotan na sakuyang ipaaram saindo sa aldaw na ini, na an sakuyang aki na si Mosiah sarong hadi asin sarong mamayo sa saindo.

31 Asin ngonian, sakuyang manga katugangan, minamawot ko na kamo maggiribo siring sa ginigiribo na nindo. Siring sa saindong pagsurunod kan sakuyang manga katugonan, asin man an manga katugonan kan sakuyang ama, asin nag-uswag, asin irinayo sa pagkahulog sa manga kamot kan saindong manga kaiwal, siring man kun kamo magsurunod sa manga katugonan kan sakuyang aki, o sa manga katugonan kan Dios na saiyang itatao sa saindo, mag-uuruswag kamo sa daga, asin daing kapangyarihan saindo an saindong manga kaiwal.

32 Alagad, o sakuyang manga tawo, mag-ingat kamo ta tibaad magkaigwa kamong dai pagkasinarabotan sa saindong katiripunan, asin saindong pilion an sumunod sa maraot na espiritu, na tinaram kan sakuyang ama na si Mosiah.

33 Huli ta totoo, igwang padusa na igagawad saiya na nagpili na magsunod sa espiritu na idto; huli kun saiyang pinili na magsunod saiya, asin magdanay asin magadan sa saiyang manga kasalan, siya nag-inom nin kagadanan sa saiyang kalag; huli ta siya maako kan saiyang kabayadan na daing-kasagkuran na padusa, sa paglapas sa manga katugonan kan Dios na laban sa saiyang naaaraman.

34 Sinasabi ko sa saindo, na dai ni saro sa saindo, kundi idtong saindong saradit na manga aki, na dai pa natutukdoan kaining manga bagay na ini, alagad mayo nin dai na nakakaaram na igwa sindang daing-kasagkuran na pagkakautang sa saindong Langitnon na Ama, tanganing ikabalik saiya an gabos na nasa saimo asin saimong sadiri; asin idto man na natukdoan manunungod kan manga kasuratan na nagpapalaman kan manga propesia na sinabi kan manga banal na propeta, magpoon pa kan panahon kan satuyang magurang, na si Lehi, maghali sa Jerusalem;

35 Asin siring man, an gabos na sinabi kan satuyang manga kamagurangan sagkod ngonian. Asin totoo man, na sinda nagtaram sunod sa pinagboot sainda kan Kagurangnan; kaya, sinda masuripot asin totoo.

36 Asin ngonian, sinasabi ko sa saindo, sakuyang manga katugangan, na pagkatapos na saindong maararaman asin kamo magkaturukdoan kan gabos na manga bagay na ini, kun kamo magralapas asin magsuruway sa manga sinabi na, tanganing mapaharayo an saindong sadiri sa Espiritu kan Kagurangnan, na mahalian nin lugar sa saindo tanganing magpasunod saindo sa dalan nin kadunungan tanganing kamo maging paladan, mauswag, asin maingatan—

37 Sinasabi ko sa saindo, na an tawo na naggigibo kaini, iyo man an minaluwas sa hayagan na pagtumang sa Dios; kaya saiyang pinili na magsunod sa tampalasan na espiritu, asin nagi siyang kaiwal nin gabos na katanusan; kaya an Kagurangnan dai nin lugar sa saiya, huli ta dai siya nag-eerok sa bakong banal na manga templo.

38 Kaya kun an tawong idto dai magsosolsol, asin magdanay asin magadan na kaiwal kan Dios, an manga kahagadan kan banal na paghukom iyo an magpupukaw sa saiyang imortal na kalag sa buhay na pakaaram kan saiyang kasalan, na iyo an dahilan na siya magkuyopos sa atubangan kan Kagurangnan, asin magpapano kan saiyang daghan nin kasalan, asin kulog, asin inagrangay, na siring sa dai masisibong kalayo, na an laad nag-iitaas sagkod nuarin pa man.

39 Asin ngonian sinasabi ko sa saindo, na an pagkaherak dai maako sa tawong idto; kaya an saiyang pinakahuring hatol iyo an magtagal nin daing katapusan na pagdusa.

40 O, kamo gabos na gurang na manga lalaki asin man kamong aki pang manga lalaki, asin kamong saradit pang manga aki na nakakasabot kan sakuyang manga tataramon, huli ta malinaw na sinabi ko sa saindo tanganing magkasarabotan nindo, ako namimibi na magmarata kamo sa pakarumdom sa makangurungirhat na kamugtakan kaidtong manga nahulog sa pagkakasala.

41 Asin pa, sakuyang boot na saindong hororop-horopon an pagkapaladan asin an maogmang kamugtakan kan manga nagsusurunod sa manga katugonan kan Dios. Huli ta sinda paladan sa gabos na bagay maging temporal asin espiritual; asin kun sinda danay na maimbod sagkod sa katapusan, sinda aarakoon sa langit, tanganing makisumaro sa Dios sa daing katapusan na kaogmahan. O rumdomon, rumdomon na an manga bagay na ini totoo; huli ta an Kagurangnan na Dios sinabi ini.