1 Asin ngonian, uminagi an panahon na si Alma, na nakadulag sa manga surogoon ni hading Noah, nagsolsol kan saiyang manga kasalan asin kasumbikalan, asin naglibot nin patago sa manga tawo, asin nagpoon na magtukdo kan manga tataramon ni Abinadi—

2 Iyo, manunungod kan manga maabot, asin man manunungod kan pagkabuhay-liwat kan manga gadan, asin an pagtubos kan manga tawo, na mangyayari sa paagi kan kapangyarihan asin manga pagtios, asin pagkagadan ni Cristo, asin an saiyang pagkabuhay-liwat asin pagsakat sa langit.

3 Asin ta kun gurano kadakol kan naghinanyog sa saiyang tataramon iyo man idto an tinutukdoan niya. Asin saiyang tinutukdoan nin patago, tanganing dai ini maaraman kan hadi. Asin ta dakol an nagturubod kan saiyang manga tataramon.

4 Asin ta uminagi an panahon na kun gurano kadakol an nagturubod saiya iyo man an nagduruman sa sarong rona na an apod Mormon, na an pangaran na itinao kan hadi, na nasa gilid kan daga na pinag-erokan, paminsan-minsan o sa kapanahonan nin mababangis na manga hayop.

5 Ngonian, sa Mormon igwang sarong burabod nin malinig na tubig, asin si Alma nagduman, huli ta sa harani kaidto igwang marambong na saradit na manga kahoy, kun sain siya nagtatago kun aldaw sa manga pagpahanap saiya kan hadi.

6 Asin ta uminagi an panahon na kun gurano kadakol an nagturubod saiya iyo man an nagduruman na magdarangog kan saiyang tataramon.

7 Asin ta uminagi an panahon na pagkatapos nin dakol na manga aldaw igwang kadakol na nagtiripon sa rona kan Mormon, na maghinaniyog sa manga tataramon ni Alma. Iyo, gabos na nagtuturubod sa saiyang tataramon nagtiripon tanganing maghirinanyog saiya. Asin saiyang tinukdoan sinda, asin naghulit sa sainda nin pagsolsol asin pagtubos, asin pagtubod sa Kagurangnan.

8 Asin ta uminagi an panahon na siya nagsabi sa sainda; Masdan, ini an manga tubig kan Mormon (huli ta siring an apod kan manga ini) asin ngonian, huli ta kamo nagmamarawot na pumadigdi sa katiripunan kan Dios, asin apodon na saiyang manga tawo, asin nakahanda na magpapuruparasan kan manga pasan nin lambang saro, tanganing gumian an manga ini;

9 Iyo, asin nakahanda na makidamay sa manga nagmumurundo, iyo, asin rangahon sinda na nangangaraipo nin ranga, asin tanganing tumirindog bilang manga tagapagpatotoo kan Dios sa gabos na panahon asin sa gabos na manga bagay, asin sa gabos na manga lugar na kun sain man kamo, maski sagkod sa pagkagadan, tanganing kamo matubos kan Dios, asin mabilang na kasabay sa enot na pagkabuhay-liwat tanganing magkaigwa nin buhay na daing-kasagkuran—

10 Ngonian sinasabi ko sa saindo, kun iyo ini an minamarawot kan saindong manga puso, ano pa an dahilan ta habo kamo magpaburunyag sa pangaran kan Kagurangnan, bilang sarong tagapagpatotoo sa atubangan niya na kamo luminaog na sa sarong pakipagtipan saiya, na kamo magririlingkod saiya asin susurunodon an saiyang manga katugonan, tanganing ipabulos niya an saiyang Espiritu nin labi-labi sa saindo.

11 Asin ngonian kan madangog kan manga tawo an manga tataramon na ini, nagparakpak sinda kan saindang manga kamot sa kaogmahan, asin nagkururahaw: Iyo ini an minamawot kan samuyang manga puso.

12 Asin ngonian uminagi an panahon na kinua ni Alma si Helam, siya bilang saro sa manga naenot, asin nagduman asin nagtindog sa tubig, asin nagkurahaw na an sabi: O Kagurangnan, pabuloson mo an saimong Espiritu sa saimong surogoon, tanganing magibo niya an gibong ini na igwa nin kabanalan nin puso.

13 Asin pakataram niya kan manga tataramon na ini, an Espiritu kan Kagurangnan napasaiya, asin nagsabi siya: Helam, binubunyagan ko ika, ako, bilang igwang kapangyarihan na hali sa Makakamhan na Dios, bilang patotoo na ika naglaog sa sarong pakipagtipan na maglingkod saiya sagkod na ika magadan sa hawak na laman; asin an Espiritu kan Kagurangnan ipabulos man lugod sa saimo; asin itao man lugod saimo an buhay na daing-kasagkuran, sa paagi kan pagtubos ni Cristo, na iyo an saiyang inandam poon kan pagpoon kan kinaban.

14 Asin pagkatapos na itaram ni Alma an manga tataramon na ini, an duwa, si Alma asin si Helam luminubog sa tubig; asin sinda nagbangon asin huminawas sa tubig nag-oogma, na pano kan Espiritu.

15 Asin giraray, nagkua si Alma nin saro pa, asin nagduman sa tubig sa ika-duwang ulit, asin binunyagan siya siring kan naenot, alagad dai na niya ilinubog an sadiri niya sa tubig.

16 Asin sa siring na paagi saiyang binunyagan an lambang saro na nagduman sa rona na Mormon; asin sinda nabilangan na maabot sa duwang gatos asin apat na kalag; iyo, asin binurunyagan sinda sa tubig kan Mormon, asin napano sinda kan ugay kan Dios.

17 Asin sinda inapod na simbahan kan Dios o an simbahan ni Cristo, magpoon kan panahon na idto. Asin uminagi an panahon na an siisay man na binunyagan sa paagi kan kapangyarihan asin kabotan kan Dios idinagdag sa saiyang simbahan.

18 Asin ta uminagi an panahon si Alma, na igwang kapangyarihan hali sa Dios, nag-orden nin manga padi, sagkod na sarong padi sa lambang limang pulo sa sainda an saiyang inordenan na maghulit sa sainda, asin tukdoan sinda manunungod sa manga bagay na manunungod sa kahadean kan Dios.

19 Asin siya nagboot sa sainda na an saindang itukdo daing iba kundi an manga bagay na saiyang itinukdo sainda, asin idtong manga sinabi kan nguso kan banal na manga propeta.

20 Iyo, siya nagboot man sainda na maghulit sinda nin daing iba kundi an pagsolsol asin an pagtubod sa Kagurangnan, na nagtubos kan saiyang manga tawo.

21 Asin pinagbotan niya sinda na dai nin manga iriwal sa lambang saro, alagad sinda maghiriling sana sa manga maabot na igwa nin sarong pagtubod asin sarong pagbunyag, na an saindang manga puso nagkakasararo asin igwang pagkamoot sa lambang saro.

22 Asin sa siring siya nagboot sainda na maghurulit. Asin sa siring man sinda naging manga aki kan Dios.

23 Asin siya nagboot sainda na pagrilihian an aldaw nin sabat, asin gibohon idtong banal, asin man magpasaralamat sa Kagurangnan nindang Dios sa aroaldaw.

24 Asin siya nagboot man sainda na an manga padi na saiyang inordenan magtrarabaho sa paagi kan saindang manga kamot para sa saindang ikabuburuhay.

25 Asin igwang sarong aldaw sa lambang semana na itinagama tanganing sinda magtiripon tanganing tukdoan an manga tawo, asin tanganing magsamba sa Kagurangnan nindang Dios, asin man, sagkod na nasa sainda an kapangyarihan, sinda danay na magtiripon.

26 Asin an manga kapadian dai ipagsasarig sa manga tawo an saindang pagkabuhay; huli ta sa saindang pagpagal makakakua sinda nin ugay sa Dios, tanganing sinda maging makusog sa Espiritu na igwang kaaraman manunungod sa Dios, tanganing sinda magturukdo na igwa nin kapangyarihan asin kabagsikan na hali sa Dios.

27 Asin giraray si Alma nagboot na an manga tawo kan simbahan magwaras kan saindang pagkabuhay, lambang saro susog sa kun ano an igwa niya, kun igwa siyang dakol magtao man siya nin dakol, asin idtong igwa alagad dikit, dikit man an hahagadon saiya, asin siya na dai, siya an tatawan.

28 Asin sa siring sinda magwawaras kan saindang kabuhayan susog sa saindang sadiring kabotan asin marahay na pagmawot sa Dios, asin sa manga kapadian na nangangaipo, iyo, asin sa lambang nangangaipo, na huba na kalag.

29 Asin ta iyo ini an saiyang sinabi sa sainda huli ta pinagbotan kan Dios, asin ta naglakaw sindang tanos sa atubangan kan Dios, nagwawaras sa lambang saro sa manga temporal asin sa manga espiritual susog sa saindang manga pangangaipo asin manga nagugustohan.

30 Asin ngonian ta uminagi an panahon na an gabos na ini nangyari sa Mormon, iyo, harani sa tubig kan Mormon sa kadlagan na harani sa tubig kan Mormon; iyo, an rona kan Mormon, an tubig kan Mormon, an kadlagan kan Mormon, anong gayon kaidto sa manga mata na duman nagkaigwa nin kaaraman kan saindang Paratubos; iyo, asin gurano kapaladan ninda huli ta magkakaranta sinda kan saiyang pag-omaw sagkod pa man.

31 Asin an manga bagay na ini nangyari sa gilid kan daga, tanganing dai idto umabot sa kaaraman kan hadi.

32 Alagad nangyari, na uminagi an panahon na an hadi nakamangno nin hiro-hiro sa manga tawo, nagpadara kan saiyang manga surogoon na magbarantay sa sainda: Kaya kan aldaw na sinda nagtitiripon tanganing magdarangog kan tataramon kan Kagurangnan sinda isinurumbong sa hadi.

33 Asin ngonian an hadi nagsabi na si Alma pinaparibok an manga tawo na makilaban saiya; kaya pinadara niya an saiyang hukbo tanganing garadanon sinda.

34 Asin ta uminagi an panahon na si Alma asin an manga tawo kan Kagurangnan nataraman na igwang maabot na hukbo kan hadi; kaya dinarara ninda an saindang manga tolda, asin an saindang manga pamilia asin nagpaduman sa kadlagan.

35 Asin ta sinda gabos igwang bilang na apat na gatos asin limang pulong kalag.