1 Ngonian uminagi an panahon na si Alma nagpoon magbalangibog kan tataramon kan Dios sa manga tawo, enot sa daga kan Zarahemla, asin paghali duman linakop an gabos na daga.

2 Asin ta iyo ini an manga tataramon na saiyang isinabi sa manga tawo sa simbahan na pinatindog sa siudad kan Zarahemla, sunod sa saiyang nakasurat na an sabi:

3 Ako, si Alma, idinulot kan sakuyang ama, na si Alma, na maging halangkaw na padi sa simbahan kan Dios, siya na igwang kapangyarihan asin kabagsikan hali sa Dios na maggibo kan manga bagay na ini, totoo, sakuyang sasabihon sa saindo na nagpoon siya na magpatindog nin simbahan sa daga na nasa manga padulunan kan Nephi; iyo, an daga inapod na Mormon; iyo, asin saiyang binurunyagan an saiyang manga katugangan sa tubig kan Mormon.

4 Asin totoo nanggad, sakuyang sasabihon sa saindo, nakariligtas sinda sa manga kamot kan manga tawo ni hading Noah, sa paagi kan pagkaherak asin kapangyarihan kan Dios.

5 Asin, totoo, na pagkatapos kaidto sinda dinarara sa pagkaoripon sa manga kamot kan manga Lamanite sa kadlagan; iyo, sakuyang sinasabi sa saindo, sinda nagkabirihag, asin giraray an Kagurangnan linigtas sinda sa pagkaoripon sa paagi kan kapangyarihan kan saiyang tataramon; asin ta kami dinara digdi sa dagang ini, asin digdi nagpoon kami na magpatindog kan simbahan kan Dios sa daga man na ini.

6 Asin ngonian totoo nanggad, sakuyang sasabihon sa saindo, sakuyang manga katugangan, kamo na nakasaro sa simbahan na ini, ano narimpos na daw nindo nin sukat sa pakarumdom an pagkabihag kan saindong manga kamagurangan? Iyo, asin ano igwa baga kamong maigot na pakarumdom kan saiyang pagkaherak asin an saiyang halawig na pagtios manunungod sainda? Asin saro pa ano narimpos daw nindo nin sukat sa pakarumdom na saiyang ilinigtas an saindang manga kalag hali sa impiyerno?

7 Totoo, saiyang binago an saindang manga puso; iyo, saiyang pinukaw sinda sa hararom na pagturog, asin sinda nagimata sa Dios. Totoo, sinda nasa tahaw nin kadikloman; alagad, an saindang manga kalag nasisinagan kan liwanag kan daing-kasagkuran na tataramon; iyo, sinda napapalibotan kan gapos nin kagadanan, asin kan kadena kan impiyerno, asin sarong daing-kasagkuran na pagkarumpag an naghalat sa sainda.

8 Asin ngonian ako mahapot saindo, sakuyang manga katugangan, narumpag daw sinda? Totoo, sakuyang sasabihon sa saindo, dai, sinda dai naano.

9 Asin giraray ako mahapot, ano nagkaparatod daw an gapos kan kagadanan, asin an manga kadena kan impiyerno na nakakapalibot sa sainda nahubad daw an manga idto? Sakuyang sasabihon sa saindo, Iyo, nagkahurubad an manga idto, asin an saindang manga kalag nagdarakula, asin sinda nagkaranta manunungod sa pagtubos na pagkamoot. Asin sakuyang sinasabi saindo na sinda nagkariligtas.

10 Asin ngonian ako mahapot saindo sa anong paagi sinda nakariligtas? Iyo, sa anong dahilan sinda nagralaom nin kaligtasan? Anong dahilan na sinda nagkahurubadan kan gapos kan kagadanan? Iyo, asin man an kadena kan impiyerno?

11 Totoo, sakuyang masasabi saindo—bako na an sakuyang ama na si Alma nagtubod sa manga tataramon na ipinagbalangibog sa paagi kan nguso ni Abinadi? Asin bako na siya banal na propeta? Bako na an saiyang pinagtataram manga tataramon kan Dios, asin an sakuyang ama na si Alma nagtubod sainda?

12 Asin sunod sa saiyang pagtubod nagkaigwa nin dakulang pagbago na nangyari sa saiyang puso. Nanggad, sakuyang sinasabi sa saindo na ini gabos totoo.

13 Asin totoo nanggad, na siya naghulit kan manga tataramon sa saindang manga kamagurangan, asin igwang darakula man na pagbarago na nangyari sa saindang manga puso, asin sinda nagpakurumbaba kan saindang sadiri asin ibinugtak an saindang panarig sa totoo asin buhay na Dios. Asin totoo, sinda manga maimbod sa pagtubod sagkod sa katapusan; kaya sinda nakariligtas.

14 Asin ngonian totoo, ako mahapot saindo na sakuyang manga katugangan sa simbahan, ano iminurundag na daw kamo kan Dios sa espiritu? Ano saindo nang inarako an ladawan kan Dios sa saindong lalawgon? Namatean na daw nindo ining dakulang pagbabago sa saindong manga puso?

15 Ginagamit daw nindo an pagtubod sa pagtubos niya na siyang naglalang sa saindo? Natatanaw daw nindo an maabot, sa mata nin pagtubod asin naaaninag ining mortal na hawak na mabangon sa daing kagadanan, asin ining pagkalapa na mabangon sa daing pagkalapa tanganing magtindog sa atubangan kan Dios tanganing hukoman susog sa manga gibo na naginibo kan nasa mortal na hawak?

16 Sakuyang sinasabi sa saindo, napaghuna-huna daw nindo sa saindong sadiri na saindong nadadangog an tingog nin Kagurangnan, na nagsasabi sa saindo sa aldaw na idto: Madya kamo sa sakuya manga paladan, huli ta totoo na an manga ginibo nindo gibo nin katanusan sa ibabaw nin daga?

17 O saindo daw na hinuhuruna sa sadiri nindo na kamo makapagpupurutik sa Kagurangnan sa aldaw na idto, asin magsabi—Kagurangnan, an samuyang manga gibo manga matatanos na manga gibo sa ibabaw nin kinaban—asin ta siya ililigtas kamo?

18 O kun bako, saindo daw na hinuhuruna an saindong manga sadiri na dinarara sa atubangan kan hukoman kan Dios na an saindong manga kalag pano nin pagkakasala asin pagbasol, na igwa nin pakarumdom kan gabos nindong pagkarasala. Iyo bilog na pagkarumdom kan gabos nindong kasumbikalan, Iyo, pakarumdom, na kamo nagsarayumang magsurunod sa manga katugonan kan Dios?

19 Sakuyang sinasabi sa saindo, makatiringkalag daw kamo sa Dios sa aldaw na idto na igwa nin dalisay na puso asin malinig na kamot? Sakuyang sasabihon sa saindo, makatiringkalag daw kamo na an ladawan kan Dios nakaukit sa saindong manga lalawgon?

20 Sakuyang sinasabi sa saindo, inirisip daw nindo na kamo makakaligtas kun isinuruko nindo an sadiri nindo na maging parasunod sa demonio?

21 Sasabihon ko sa saindo, saindong maaaraman sa aldaw na idto na kamo dai makakariligtas; huli ta daing tawo na makakaligtas sagkod na an saiyang gubing mahugasan na maging maputi; iyo, an saiyang manga gubing kaipuhan maging dalisay sagkod na malinigan kan gabos na digta, sa paagi kan dugo niya na iyo an pinagsabi kan satuyang manga kamagurangan, na madigdi tanganing tuboson an saiyang manga tawo sa saindang manga kasalan.

22 Asin ngonian ako mahapot saindo, sakuyang manga katugangan, ano an mamamatian nindo kun matirindog kamo sa atubangan kan hukoman kan Dios na an manga gubing nindo pano nin digta nin dugo asin gabos na paagi nin pagkaati? Totoo nanggad, ano an pinapatotoohan kan manga bagay na ini tumang sa saindo?

23 Totoo nanggad, dai daw sinda magpapatorotoo sa manga ini na kamo manga manggagadan, iyo, asin man na kamo nagkarasala sa gabos na paagi nin kasumbikalan?

24 Totoo nanggad sakuyang manga katugangan, naghuhuna daw kamo na an saro na siring kaidto magkakaigwa nin lugar na matutukawan sa kahadean kan Dios, na kaiba si Abraham, asin si Isaac, patin si Jacob, asin man an gabos na banal na propeta, na an manga gubing malilinig asin daing digta, dalisay asin maputi?

25 Sakuyang sinasabi sa saindo, Dai, sagkod na saindong gibohon an saindong Kaglalang na sarong putikon magpoon pa sa kapinonan, o dai kamo maghuna na an siring kaini magkakaigwa nin lugar sa kahadean nin langit; alagad sinda iaarapon sa luwas huli ta sinda manga aki kan kahadean kan demonio.

26 Asin ngonian totoo nanggad, sakuyang sinasabi sa saindo; manga katugangan ko, kun nakamati kamo nin pagbabago sa saindong puso, asin kun namatean nindong magkaranta kan kanta kan nagtutubos na pagkamoot, mahapot ako, siring daw an namamatian nindo ngonian?

27 Nagralakaw daw kamo na maiingat sa sadiri na daing pagbarasol sa atubangan kan Dios? Masasabi daw nindo sa saindong sadiri kun kamo arapodon na magadan na ngonian na kamo totoong nagpakurumbaba? Na an saindong manga gubing nalinigan na asin ta maputi na sa paagi kan dugo ni Cristo, na madigdi sa pagtubos kan saiyang manga tawo sa saindang manga kasalan?

28 Totoo nanggad, hinuba na daw nindo an saindong kapaharo-halangkawon? Sakuyang sasabihon sa saindo, kun dai pa, dai pa kamo handa sa pag-atubang sa Dios. Magdarangog magharanda na kamo nin dali-dali; huli ta an kahadean nin Langit uya na, asin an siring sa saro na iyan daing buhay na daing-kasagkuran.

29 Totoo nanggad ako masabi, igwa daw nin saro sa saindo na dai pa naghuhuba kan saiyang pag-uri? Sasabihon ko saindo na an siring sa saro na iyan dai pa handa; asin boot ko na maghanda siya nin dali-dali, huli ta an panahon harani na asin ta dai niya aram kun nuarin an panahon maabot, huli ta an siring sa saro na iyan dai mahuhukoman na daing kasalan.

30 Asin giraray sakuyang sasabihon sa saindo, igwa daw nin saro sa saindo na nagtutuya-tuya sa saiyang tugang, o, nagtatambak saiya nin manga pag-uusig?

31 Herak man sa sarong iyan, huli ta bako pa siyang handa, asin an panahon uya na, na kaipuhan na siya magsolsol, o dai siya makakaligtas!

32 Iyo, sagkod herak man saindo na paragibong maraot; magsorolsol, magsorolsol, huli ta sinabi ini kan Kagurangnan na Dios!

33 Totoo nanggad, nangangagda siya sa manga tawo huli ta an manga takyag nin pagkaherak nakabukas sa sainda, asin an sabi niya magsorolsol asin ta aarakoon ko kamo.

34 Iyo, siya nagsabi: Madya kamo sako asin makisaro sa bunga kaining kahoy nin buhay; iyo magkarakan asin mag-irinom kamo kan tinapay asin tubig nin buhay na daing kaulangan.

35 Iyo, madya sakuya asin magdara nin manga gibo nin katanusan, asin ta dai kamo papaludon asin iaapon sa kalayo—

36 Huli baga, ta an panahon uya na, na an siisay man na magdara nin bakong marahay na bunga o an siisay man na dai naggigibo kan manga gibo nin katanusan siya man sana an igwa nin kadahilanan na magtangis asin magmundo.

37 O kamong paragibong maraot; kamo, na manga mapaharo-halangkawon sa manga daing kamugtakan na manga bagay kan kinaban, kamo na nagpapahayag na nakaaram na kan manga dalan nin katanusan alagad iyo pa an nalalagalag, na siring sa manga karnero na daing pastor, maski na an pastor nag-apod sa saindo asin ta padagos na nag-aapod sa saindo, alagad kamo dai nagdadarangog sa saiyang tingog!

38 Totoo nanggad sasabihon ko saindo, na an marahay na pastor nag-aapod sa saindo; iyo, sa saiyang sadiring pangaran nag-aapod saindo, na iyo an pangaran ni Cristo; asin ta kun dai kamo magdarangog sa tingog kan marahay na pastor, sa pangaran na kamo inaarapod, totoo, kamo bako karnero kan marahay na pastor.

39 Asin ngonian kun bako kamo karnero kan marahay na pastor, kiisay na pagtiripon kamo? Totoo nanggad, sasabihon ko sa saindo, na an demonio iyo an saindong pastor, asin ta kamo kairiba sa saiyang pagtiripon; asin ngonian, siisay an mag-iinda kaini? Totoo sasabihon ko sa saindo, an siisay man na mag-inda kaini sarong putikon asin sarong aki kan demonio.

40 Huli ta sakuyang sinasabi sa saindo na an ano man na marahay hali sa Dios, asin an ano man na maraot hali sa demonio.

41 Kaya, kun an sarong tawo nagdadara nin marahay na manga gibo, siya magdadangog sa tingog kan pastor, asin siya magsusunod sa saiya, alagad kun an siisay man an nagdadara nin manga maraot na manga gibo, siya siring man magiging aki nin demonio, huli ta siya nagdadangog sa saiyang tingog asin nagsusunod sa saiya.

42 Asin an siisay man na naggigibo kaini kaipuhan akoon niya an saiyang kabayadan; kaya, sa saiyang kabayadan maako siya nin kagadanan, manunungod sa manga bagay sa katanusan, bilang gadan sa gabos na marahay na manga gibo.

43 Asin ngonian, sakuyang manga katugangan, boot ko na kamo magdarangog sa sakuya, huli ta ako nagtataram sa kusog kan sakuyang kalag; huli totoo nanggad, na ako nagtaram saindo nin yano tanganing dai kamo masala, o nagtaram ako susog sa manga katugonan kan Dios.

44 Huli ta ako inapod na magtaram sa siring kaini, sunod sa banal na orden kan Dios na nasa ki Cristo Jesus; iyo, ako pinagbotan na magtindog asin magpatotoo sa manga tawong ini sa manga bagay na pinagtaram kan satuyang manga kamagurangan manunungod sa manga bagay na maabot.

45 Asin bako pa ini an gabos. Dai daw nindo pinaghuhuna na sakuyang aram an manga bagay na ini sa sakuyang sadiri? Totoo nanggad, ako nagpapatotoo saindo na sakuyang aram na an manga bagay na ini na sakuyang sinabi na totoo. Asin paano sa paghuna nindo na naaraman ko an katunayan kan manga ini?

46 Totoo, sasabihon ko saindo na ipinaaram an manga ini sakuya kan Banal na Espiritu kan Dios. Totoo nanggad, na ako nag-ayuno asin nagpamibi sa laog nin dakol na manga aldaw tanganing sakuyang maaraman sa sadiri ko an manga bagay na ini. Asin ngonian sakuyang aram sa sadiri ko na an manga ini totoo; huli ta an Kagurangnan na Dios pinaaram ini sakuya sa paagi kan Banal na Espiritu; asin ta iyo ini an espiritu kan kapahayagan na nasa sakuya.

47 Asin igwa pa, sasabihon ko saindo na ini ipinahayag sa sakuya, na an manga tataramon na sinabi kan satuyang manga kamagurangan manga totoo, maski na susog sa espiritu nin pagpropesia na nasa sakuya, na sa paagi man kan pagpahiling kan Espiritu kan Dios.

48 Sakuyang sasabihon sa saindo, na ako nakakaaram sa sadiri ko na ano man an sakuyang itataram saindo manunungod kan maabot, idto totoo; asin sakuyang sinasabi sa saindo, na ako nakakaaram na si Jesu-Cristo maabot, iyo, an Aki, an Bugtong na Aki kan Ama, pano nin ugay asin pagkaherak, asin katotoohan. Asin totoo nanggad, iyo siya an madigdi na mapara kan manga kasalan kan kinaban, iyo, an manga kasalan kan lambang tawo na maimbod na nagtutubod sa saiyang pangaran.

49 Asin ngonian sakuyang sinasabi sa saindo na ini an orden na inapodan sa sakuya, iyo, magbalangibog sa sakuyang manga padangat na katugangan, iyo, asin sa lambang saro na nag-eerok sa daga; iyo, magbalangibog sa gabos, maging gurang na o aki pa, maging oripon o tiwasay; iyo, sakuyang sinasabi sa saindo manga maedad na, asin man sa manga nasa tahaw pa sana an edad, asin sa manga masirang pa sanang kapagarakian; iyo, magkurahaw sa sainda na sinda magsorolsol asin magkamurundag giraray.

50 Iyo, siring an sabi kan Espiritu: Magsorolsol, gabos kamo sa manga kasagkuran kan kinaban, huli ta an kahadean nin kalangitan harani na; iyo, an Aki kan Dios maabot sa saiyang kamurawayan, sa saiyang kabagsikan, kabantogan, kapangyarihan, asin kahadean. Iyo, sakuyang manga padangat na katugangan sakuyang sinasabi sa saindo an sinabi kan Espiritu: Maghiriling sa kamurawayan kan Hadi kan gabos na kinaban; asin an Hadi kan langit madali nang magsinag sa manga aki nin manga tawo.

51 Asin man an Espiritu nagsabi sakuya, iyo, nagkurahaw sakuya sa mabagsik na tingog, na an sabi: Magduman asin sabihon ini sa manga tawo—Magsorolsol, huli sagkod na kamo dai magsorolsol kamo dai nanggad magkakaramit kan kahadean nin langit.

52 Asin sa giraray sakuyang sinasabi sa saindo, an Espiritu nagsasabi: Totoo nanggad, an patok nakabugtak sa kataning kan gamot kan kahoy, kaya lambang kahoy na dai magbunga nin marahay papaludon asin isusugba sa kalayo, iyo, sarong kalayo na dai nauubos, iyo, sarong kalayo na dai nasisibo. Hilinga, asin rumdomon, an Sarong Banal an nagsabi kaini.

53 Asin ngonian sakuyang manga padangat na katugangan, sakuyang sinasabi sa saindo, magkatataragalan daw nindo an manga tataramon na ini; iyo, mapagpariliman-limanan daw nindo an manga bagay na ini, asin matuturungtongan daw nindo an Sarong Banal sa irarom kan saindong manga bitis; iyo, magdakula daw kamo sa kapaharo-halangkawon kan saindong manga puso; iyo, magpipirit pa daw kamo na magsurulot nin manga mamahalon na manga gubing asin ibuburugtak pa daw nindo an saindong manga puso sa manga daing kamugtakan na manga bagay kan kinaban, sa saindong manga kayamanan?

54 Iyo, magpapadaragos pa daw kamo sa paghuna na kamo marahay pa ki sa iba, iyo, magpapadaragos pa daw kamo sa pag-urusig kan saindong manga katugangan, na nagpapakurumbaba sa saindang sadiri asin nagraralakaw sunod sa banal na orden kan Dios, na iyo an nagdarara sainda sa simbahan na ini, pagkatapos na pinabanal kan Banal na Espiritu, asin sinda nagdadara nin manga gibo na susog sa pagsolsol.

55 Iyo, asin magpapadaragos pa daw kamo sa pagtalikod sa manga dukha asin sa manga nangangaipo, asin sa pag-imot kan saindong pagkabuhay sa sainda?

56 Asin sa katapusan, kamo gabos na nagpapadaragos sa saindong kasumbikalan, sakuyang sinasabi sa saindo na iyo ini an manga paparalodon asin isusurugba sa kalayo kun dai ini tulos-tulos magsorolsol.

57 Asin ngonian sakuyang sinasabi sa saindo, kamo gabos na nagmamarawot na magsunod sa tingog kan marahay na pastor, madya kamo humarali kamo sa masusumbikal, asin sumiriblag kamo, asin dai kamo magdurotdot kan saindang maaati na manga bagay; asin ta mangyayari, na an saindang manga pangaran pupurunason, na an manga pangaran kan manga masusumbikal dai mabibilang sa manga pangaran kan matatanos, tanganing an tataramon kan Dios mautob, na nagsasabi: An manga pangaran kan manga masusumbikal dai nanggad makakasalak sa manga pangaran kan sakuyang manga tawo.

58 Huli ta an manga pangaran kan manga matatanos maisusurat sa libro nin buhay, asin sa sainda sakuyang itatao an sarong panundon sa too kong kamot. Asin ngonian, manga katugangan, ano an saindong masasabi laban kaini? Sakuyang sinasabi sa saindo, kun kamo magtatararam laban kaini, daing ano man, huli ta an tataramon kan Dios kaipuhan na mautob.

59 Huli ta anong pastor an nasa tahaw nindo na igwang kadakol na karnero na dai an manga idto pinagbabantayan, na an manga lobo dai makalaog na dai kakanon an saiyang manga karnero? Asin totoo, na kun an lobo makasalak sa saiyang manga karnero bakong saiya daw na bubugawon paluwas? Iyo asin sa huri, kun magigibo niya idto, saiyang gagadanon siya.

60 Asin ngonian sakuyang sinasabi sa saindo na an marahay na pastor nag-aapod sa saindo; asin kun kamo magdarangog sa saiyang tingog kamo dadarahon sa saiyang katiripunan, asin kamo saiyang karnero; asin saiya niya kamong tutugonon na dai kamo magtugot na laogon nin gutom na lobo, tanganing dai kamo magkaparara.

61 Asin ngonian ako, si Alma, sakuyang pinagbobotan kamo sa tataramon niya na nagboot sakuya, na saindong surunodon an manga tataramon na sinabi ko sa saindo.

62 Nagtataram ako bilang pagboot sa saindo na manga kabali sa simbahan; asin sa saindo na bako kabali sa simbahan nagtataram ako bilang pag-agda, na nagsasabi: Madya kamo asin magpaburunyag sa pagsolsol tanganing kamo man maging kahiras kan bunga kan kahoy nin buhay.