An Libro ni Alma
Na Aki ni Alma

1 Ngonian idto nasa katugonan ni Mosiah na an lambang tawo na hukom kan susundon o idtong manga itinalaga na maging manga hukom, kaipuhan bayadan susog sa oras na saindang pinagpagalan sa paghatol sa sainda na dinadara sa saindang atubangan tanganing hatolan.

2 Ngonian kun an sarong tawo nagkautang sa iba, asin dai niya binabayadan idtong saiyang inutang, siya isinumbong sa hukom; asin an hukom naggibo sa saiyang kabagsikan, asin nagpadara nin manga namamayo tanganing an tawong idto darahon sa atubangan niya; asin saiyang hinatolan an tawong idto susog sa susundon asin sa manga katibayan na dinara laban saiya, asin ta an tawong idto napiritan na magbayad kan saiyang inutang, o kukuahon an saiyang pagsadiri, o palalayason siya sa katiripunan nin manga tawo siring sa sarong maikap asin mahabon.

3 Asin an hukom nakakua kan saiyang bayad susog sa saiyang oras—sarong senine na bulawan para sa sarong aldaw, o sarong senum na plata, na katimbang nin sarong senine na bulawan; asin idto susog sa susundon na itinao.

4 Ngonian iyo ini an manga pangaran kan manlaen-laen na pedaso kan saindang bulawan, asin kan saindang plata, susog sa saindang halaga. Asin an manga pangaran itinao kan manga Nephite, huli ta dai sinda nagkuwenta sunod sa paagi kan manga Judio na nasa Jerusalem; ni sinda nagsukol sunod sa paagi kan manga Judio; alagad linaen ninda an saindang pagkuwenta asin an saindang sukol sunod sa manga kaisipan asin kamugtakan kan manga tawo, sa lambang kapagarakian, sagkod sa paghahadi kan manga hukom, na an manga idto ibinugtak na ni hading Mosiah.

5 Ngonian an manga pagkuwenta siring—sarong senine na bulawan, sarong seon na bulawan, sarong shum na bulawan, asin sarong limnah na bulawan.

6 Sarong senum na plata, sarong amnor na plata, sarong ezrom na plata, asin sarong onti na plata.

7 An sarong senum na plata arog sa sarong senine na bulawan, asin siring man sa sarong sukol nin sebada asin man sarong sukol kan arin man sa manga tipasi.

8 Ngonian an bilang kan sarong seon na bulawan siring sa duwang halaga kan senine.

9 Asin an sarong shum na bulawan doble sa halaga kan sarong seon.

10 Asin an sarong limnah na bulawan iyo an halaga kan gabos na ini.

11 Asin an sarong amnor na plata siring kadakol sa duwang senum.

12 Asin an sarong ezrom na plata siring kadakol sa apat na senum.

13 Asin an sarong onti siring man kadakol sa gabos na ini.

14 Ngonian iyo ini an halaga kan saradit nindang pagbilang.

15 An sarong shiblon siring sa kabanga kan senum, kaya, an sarong shiblon kabanga kan sarong sukol kan sebada.

16 Asin an sarong shiblum kabanga kan sarong shiblon.

17 Asin an sarong leah kabanga kan shiblum.

18 Ngonian iyo ini an bilang ninda sa saindang pagkukuwenta.

19 Ngonian an sarong antion na bulawan siring sa tulong shiblon.

20 Ngonian, idto para sa sarong katuyohan na makinabang, huli ta nakukua ninda an saindang kabayadan susog sa saindang trabaho, kaya binurukag ninda an manga tawo na magriribok asin gabos na paagi nin paribok asin kasumbikalan, tanganing magkaigwa sinda nin dakol pang trabaho, tanganing makakua sinda nin kuwarta susog sa manga sumbong na dinadara sa sainda; kaya binurukag ninda an manga tawo laban ki Alma asin ki Amulek.

21 Asin ini si Zeezrom nagpoon na maghapot ki Amulek, na an sabi: Masisimbag mo daw ako kan diit na manga hapot na ihahapot ko saimo? Ngonian si Zeezrom sarong lalaki na matibay sa manga paagi kan demonio, tanganing saiyang marumpag an marahay; kaya siya nagsabi ki Amulek: Masisimbag mo daw an manga hapot na ihahapot ko saimo?

22 Asin si Amulek nagsabi saiya: Iyo, kun iyan sunod sa Espiritu kan Kagurangnan, na nasa sakuya; huli ta ako dai magtataram nin laban sa Espiritu kan Kagurangnan. Asin si Zeezrom nagsabi saiya: Hilinga, ining anom na onties na plata, asin an gabos na ini sakuyang itatao sa saimo, kun indahan mo na igwang sarong Makapangyarihan sa Gabos.

23 Ngonian si Amulek nagsabi: O ika na aki nin impiyerno, ngata ta sinusugotan mo ako? Aram mo baga na an matatanos dai maduko sa ano man na sugot?

24 Nagtutubod ka na dai nin Dios? Sakuyang sinasabi sa saimo, Dai, aram mo na igwang Dios, alagad namomoot ka sa kayamanan na iyan orog pa saiya.

25 Asin ngonian nagpuputik ka sa sakuya sa atubangan kan Dios. Sinabi mo sakuya—Hilinga ining anom na onties, na dakula an halaga, itatao ko saimo—na sa puso mo boot mong sadirihon, asin an saimo sanang pagmawot iyo na indahan ko an totoo asin buhay na Dios, tanganing magkaigwa kang dahilan na raoton ako. Asin ngonian totoo nanggad, sa dakulang kasumbikalan na ini magkakaigwa kang kabayadan.

26 Asin si Zeezrom nagsabi saiya; nagsasabi ka na igwa nin totoo asin buhay na Dios?

27 Asin si Amulek nagsabi: Iyo, igwa nin totoo asin buhay na Dios.

28 Ngonian si Zeezrom nagsabi: Igwa daw na labi pa sa saro na Dios?

29 Asin siya nagsimbag, Dai.

30 Ngonian si Zeezrom nagsabi giraray sa saiya: Paano mong naaaraman an manga bagay na ini?

31 Asin siya nagsabi: Sarong anghel an nagpaaram kan manga ini sakuya.

32 Asin si Zeezrom nagsabi giraray: Siisay siya na maabot? Siya baga an aki kan Dios?

33 Asin siya nagsabi saiya, Iyo.

34 Asin si Zeezrom nagsabi giraray: Ililigtas daw niya an saiyang manga tawo na nasa saindang manga kasalan? Asin si Amulek nagsimbag asin nagsabi saiya; sakuyang sinasabi sa saimo na dai, huli ta dai nanggad niya iindahan an saiyang tataramon.

35 Ngonian si Zeezrom nagsabi sa manga tawo: hinguahon na saindong rumdomon ining manga bagay na ini; huli ta saiyang sinabi na igwa sanang sarong Dios; alagad saiyang sinabi na an aki kan Dios maabot, alagad dai ililigtas an saiyang manga tawo—garo igwa siyang kapangyarihan na pagbotan an Dios.

36 Ngonian si Amulek nagsabi giraray sa saiya; ngonian ika nagpuputik, huli ta sinabi mo na nagsabi ako na garo na igwa akong kapangyarihan na pagbotan an Dios huli ta sinabi ko na dai niya ililigtas an saiyang manga tawo na nasa saindang manga kasalan.

37 Asin sakuyang sinasabi sa saimo giraray na dai niya maililigtas sinda sa saindang manga kasalan; huli ta dai ko maiindahan an saiyang tataramon, asin saiyang sinabi na daing maati na bagay na manununod kan kahadean nin langit; kaya paano kamong makakaligtas, kun dai kamo makapanunod kan kahadean nin langit? Kaya kamo dai maliligtas sa manga kasalan nindo.

38 Ngonian si Zeezrom nagsabi giraray saiya: An aki kan Dios iyo nanggad an daing-kasagkuran na Ama?

39 Asin si Amulek nagsabi saiya: Iyo, siya nanggad an daing-kasagkuran na Ama kan kalangitan asin kan kinaban, asin gabos na bagay na nasa sainda; siya an kapinonan asin katapusan, an enot asin an huri.

40 Asin siya maabot sa mundo sa pagtubos kan saiyang manga tawo; asin siya maako kan manga kalapasan kaidtong nagtutubod sa saiyang pangaran; asin sinda iyo an magkakaigwa nin buhay na daing-kasagkuran, asin an kaligtasan maabot sa dai nang iba pa.

41 Kaya an manga masusumbikal iyo man giraray na siring sa dati na daing magigibong pagtubos apuera kaidtong paghubad kan gapos nin kagadanan huli ta totoo nanggad na an aldaw maabot na an gabos mabarangon hali sa pagkagadan asin matirindog sa atubangan kan Dios, asin haharatolan sunod sa saindang manga gibo.

42 Ngonian, igwang pagkagadan na inaapod na temporal na kagadanan; asin an pagkagadan ni Cristo iyo an mahubad kan manga gapos kaining temporal na kagadanan, tanganing an gabos mabuhay liwat hali sa temporal na kagadanan na ini.

43 An espiritu asin an hawak magkakasaro giraray sa saindang perpekto na kamugtakan; maging an manga tabay asin manga sukmolan makakasulit sa tamang lugar, siring sa satuya ngonian; asin kita dadarahon na magtindog sa atubang kan Dios, na nakakaaram siring sa satuyang pagkaaram ngonian, asin igwang maliwanag na pakarumdom kan gabos na satuyang manga sala.

44 Ngonian, ining pagsulit maabot sa gabos, maging gurang o aki man, maging oripon o tiwasay, maging lalaki o babae, maging masumbikal o banal; asin ni sarong buhok kan saindong payo dai mawawara; alagad gabos na bagay masusulit sa saiyang perpekto na tindog, siring sa ngonian, o sa hawak, asin dadarahon asin hahapoton sa atubangan kan hukoman ni Cristo an Aki, asin an Dios Ama, asin an Banal na Espiritu, na iyo an Daing-Kasagkuran na Dios, tanganing hatolan sunod sa saindang manga giniribo kun idto manga mararahay o kun idto manga mararaot.

45 Ngonian, nanggad nagtaram na ako sa saindo manunungod kan pagkagadan kan mortal na hawak asin man manunungod kan pagkabuhay-liwat kan mortal na hawak. Sakuyang sinasabi sa saindo na ining mortal na hawak mabubuhay liwat sa hawak na imortal, o hali sa pagkagadan, maging hali sa enot na kagadanan, pasiring sa buhay, na sinda dai na magagadan pa; an saindang manga espiritu masasaro sa saindang manga hawak, na dai na nanggad magsisiblag; kaya an kabilogan nagiging espiritual asin imortal, tanganing dai na sinda makahiling pa nin pagkalapa.

46 Ngonian, kan si Amulek makatapos kan saiyang pagtaram an manga tawo nagpoon naman magngaralas asin si Zeezrom nagpoon na magtakig. Asin digdi na natapos an manga tataramon ni Amulek, o iyo na ini gabos an sakuyang sinurat.