1 Asin ngonian, sakuyang aki, sakuyang naaaninaw na garo igwa pang nagpapahadit sa saimong isip, na dai mo nasasabotan—na manunungod sa kapantayan kan Dios sa kapadusahan kan parakasala; huli ta saimong pinaghuna na bako pantay na an parakasala umabot sa kamugtakan nin kasakitan.

2 Ngonian, sakuyang aki, sakuyang ipapaliwanag an bagay na ini saimo. Huli ta totoo, pagkatapos na an Kagurangnan na Dios pahalion an satuyang enot na manga magurang duman sa hardin kan Eden, na magbungkal kan daga, kun sain sinda kinua—iyo, hinali niya an tawo, asin saiyang ibinugtak sa sirangan na parte kan hardin kan Eden, an kerubin, asin sarong naglalaad na espada na nagtatalibong sa gabos na direksiyon, tanganing bantayan an kahoy nin buhay—

3 Ngonian, satuyang nahiling na an tawo naging arog sa Dios, naaaraman an marahay asin an maraot; asin ta tibaad iunat niya an saiyang kamot duman, asin kumua man sa kahoy nin buhay, asin kumakan asin mabuhay sagkod pa man, an Kagurangnan na Dios ibinugtak an kerubin asin sarong naglalaad na espada, tanganing dai siya makakakan kan bunga—

4 Asin siring satuyang nahiling, na igwa nin panahon na itinugot sa tawo na magsolsol, iyo, sarong panahon nin pagbalo, sarong panahon na magsolsol asin maglingkod sa Dios.

5 Huli ta totoo, na kun inunat tulos ni Adan an saiyang kamot, asin nagkakan kan kahoy nin buhay, siya kutana nabuhay sagkod pa man, sunod sa tataramon kan Dios, na dai na nin panahon para sa pagsolsol; iyo, asin man an tataramon kan Dios nawaraan kutana nin kahulogan, asin an dakulang plano kan kaligtasan dai kutana nalawos.

6 Alagad magdangog, itinalaga na an tawo magadan—kaya siring na sinda irinayo sa kahoy nin buhay sinda kaipuhan man na halion sa ibabaw kan daga—asin an tawo naging lagalag sagkod pa man, iyo, nagi sindang makasalan na tawo.

7 Asin ngonian, saimong nahihiling sa paaging ini na an satuyang enot na manga magurang pinahali maging sa temporal asin espiritual sa atubangan kan Kagurangnan; asin satuyang nahihiling na sinda naging manga parasunod na magsusunod kan saindang sadiring boot.

8 Ngonian totoo, bako idtong angay na an tawo bawion sa temporal na pagkagadan, huli ta ini makakaraot kan dakulang plano nin kaogmahan.

9 Kaya, huli ta an kalag dai nanggad magagadan, asin ta an pagkakasala nagdara sa gabos na manga tawo nin espiritual na kagadanan siring man nin temporal, iyo na an sinda hinali sa atubangan kan Kagurangnan, kinaipuhan na sinda mabawi sa espiritual na kagadanan.

10 Kaya, nin huli ta sinda naging natural na makalaman, makamundo, asin makademonio, ining kamugtakan nin pagbalo naging kamugtakan para sa sainda na maghanda; ini naging kamugtakan nin paghanda.

11 Asin ngonian rumdomon, sakuyang aki, kun idto bako huli sa plano kan pagtubos, (ini iginigilid nguna) sa panahon na sinda nagadan an saindang kalag nagtitirios, huli ta hinali sinda sa atubangan kan Kagurangnan.

12 Asin ngonian, dai nang paagi na mabawi an manga tawo sa kamugtakan nin pagkakasala, na dinara kan tawo sa saiyang sadiri huli sa sadiri niyang pagsuhay;

13 Kaya, susog sa kapantayan, an plano kan pagtubos dai mauutob, kundi sa manga kahagadan nin pagsorolsol nin manga tawo sa pagbalo na kamugtakan na ini, iyo, ining kamugtakan nin paghanda; huli ta kun bako kan kamugtakan na ini, an pagkaherak dai kutanang kahulogan kun bako na raoton an gibo kan kapantayan. Ngonian an gibo kan kapantayan dai na mararaot; kun iyo man, an Dios bako na Dios.

14 Asin sa siring satuyang nahihiling na an gabos na katawohan nagkasala, asin sinda nakapotan kan kapantayan; iyo, an kapantayan kan Dios, na nagtalaga sa sainda na mahali sa atubangan kan Dios sagkod pa man.

15 Asin ngonian, an plano kan pagkaherak dai mauutob sagkod na an pagtubos mautob; kaya tinubos kan Dios an kasalan kan kinaban, tanganing mautob an plano kan pagkaherak, tanganing simbagon an hinahagad kan kapantayan, tanganing an Dios maging daing katuyawan, pantay na Dios, asin maherakon man na Dios.

16 Ngonian, dai maabot sa manga tawo an pagsolsol kun daing kapadusahan, na daing-kasagkuran man siring sa buhay kan kalag, na nakakabit na kasalungat sa plano kan kaogmahan, na daing-kasagkuran man siring sa buhay kan kalag.

17 Ngonian, paano an sarong tawo magsolsol kun dai man siya nagkasala? Paano man siyang magkasala kun dai man kan susundon? Paano magkaigwa nin susundon sagkod na dai nin kapadusahan?

18 Ngonian, igwang kapadusahan na ikinabit, asin pantay na susundon na itinao, na nagdara nin pagbasol sa isip nin tawo.

19 Ngonian, kun daing susundon na itinao—kun an sarong tawo manggadan siya gagadanon man—matatakot daw siya na siya magagadan kun siya manggadan?

20 Asin man, kun daing susundon na itinao laban sa kasalan an tawo dai matatakot na magkasala.

21 Asin ta kun daing susundon na itinao, kun an manga tawo magkasala ano an magigibo kan kapantayan, o an pagkaherak man, huli ta dai sindang bagsik na masadiri an linalang?

22 Alagad igwang susundon na itinao, asin kapadusahan na ikinabit, asin sarong pagsolsol na itinugot; pagsolsol na sinadiri nin pagkaherak; kun dai, an kapantayan sasadirihon an linalang asin ipapautob an susundon, asin an susundon itatao an kapadusahan; kun bako ini, an manga gibo kan kapantayan mararaot, asin an Dios maontok na sa pagka Dios.

23 Alagad an Dios dai nag-oontok sa pagka-Dios, asin an pagkaherak sasadirihon an nagsosolsol, asin an pagkaherak maabot huli kan pagtubos; asin an pagtubos pinapangyari an pagkabuhay-liwat kan manga gadan; asin an pagkabuhay-liwat kan manga gadan magdadara kan manga tawo sa atubangan kan Dios; asin sa siring sinda ibinalik sa saiyang atubangan, tanganing hukoman sunod sa saindang manga giniribo, sunod sa susundon asin sa kapantayan.

24 Huli nanggad, an kapantayan ipapagibo an gabos na saiyang manga hinahagad, asin man an pagkaherak hahagadon man an gabos na saiya; asin kun siring, an manga tunay na nagsosorolsol sana an maililigtas.

25 Ano, naghuhuna kamo na an pagkaherak makakaagaw sa kapantayan? Sasabihon ko saindo, Dai; ni sarong kurit. Kun iyo, an Dios bako na Dios.

26 Asin sa siring an Dios pinapangyari an saiyang dakula asin daing-kasagkuran na manga katuyohan, na hinanda poon pa sa kapinonan kan mundo. Asin sa siring uminabot an kaligtasan asin an pagtubos kan manga tawo, asin man an pagkapara asin kasakitan.

27 Kaya, o sakuyang aki, an siisay man na boot magpadigdi dumigdi asin tiwasay na magkinabang kan tubig nin buhay; asin an siisay man na dai pumadigdi siring man dai pinipirit na dumigdi; alagad sa huring aldaw isusulit idto saiya sunod sa saiyang manga ginibo.

28 Kun minawot niya na gumibo nin maraot, asin dai nagsolsol sa manga aldaw niya, totoo nanggad, karaotan an gigibohon sa saiya, sunod sa pagsulit kan Dios.

29 Asin ngonian, sakuyang aki, an sakuyang minamawot iyo na dai na an manga bagay na ini makapahadit saimo, asin bayaan na an saimong manga kasalan sana an paghaditan mo, paghadit na makadara saimo sa pagsolsol.

30 O sakuyang aki, sakuyang minamawot na dai mo na pag-indahan an kapantayan kan Dios. Dai ka na maghinguha pa na ipagrason an sadiri mo sa pinakasadit na bagay, dahil sa saimong manga kasalan, sa paagi nin pag-inda sa kapantayan kan Dios; alagad saimong tugotan na an kapantayan kan Dios, asin an saiyang pagkaherak, asin an saiyang halawig na pagtios na magkaigwa nin dakulang buelo sa saimong puso; asin tugotan na ika madara sa kabokabo sa pagpakumbaba.

31 Asin ngonian, O sakuyang aki, kamo inapod kan Dios na magbalangibog kan tataramon sa saiyang manga tawo. Asin ngonian, sakuyang aki, lakaw, ibalangibog an tataramon na igwang kaibahan na katotoohan asin kapakumbabaan, tanganing makadara kamo nin manga kalag sa pagsorolsol, tanganing an dakulang plano nin pagkaherak magkaigwa nin bagsik sa sainda. Asin itugot man lugod kan Dios sa saindo sunod sa sakuyang manga tataramon. Amen.