1 Asin ngonian uminagi an panahon na pagkatapos na si Alma makapagsabi kan manga tataramon na ini sa sainda nagtukaw siya sa daga, asin si Amulek nagtindog asin nagpoon na magtukdo sainda na nagsasabi:

2 Manga katugangan ko, sakuyang iniisip na kanigoan na dai kamo nakaararam kan manga bagay na sinasabi manunungod sa pag-abot ni Cristo, na itinutukdo niamo na iyo an Aki kan Dios; iyo, aram ko na an manga bagay na ini itinukdo saindo nin labi-labi bago kamo nakipagtusay samuya.

3 Asin siring sa saindong minamawot sa sakuyang tugang na ipaaram sa saindo kun ano an kaipuhan nindong giribohon, huli sa saindong manga pagtirios; asin siya nagsabi na sa saindo na mag-arandam sa saindong isip; iyo, asin sinadol nanggad niya kamo na magkaigwa nin pagtubod asin tiyaga—

4 Iyo, tanganing kamo magkairigwa nin tamang pagtubod na itaranom an tataramon sa saindong manga puso, tanganing kamo magbaralo kan karahayan kaidto.

5 Asin samuyang namasdan na an dakulang kahapotan sa saindong kaisipan iyo an kun an tataramon nasa Aki kan Dios, o kun dai magkakaigwa nin Cristo.

6 Asin saindo man na namasdan na pinatunayan kan sakuyang tugang sa saindo, sa kadakol na manga panahon, na an tataramon yaon ki Cristo pasiring sa kaligtasan.

7 An sakuyang tugang nangapodan sa tataramon ni Zenos, na an pagtubos maabot sa paagi kan Aki kan Dios, asin man sa manga tataramon ni Zenock; asin man siya nakihuron ki Moises, tanganing mapatunayan na an manga bagay na ini totoo.

8 Asin ngonian, magdarangog, ako nagpapatotoo saindo sa sakuyang sadiri na an manga bagay na ini totoo. Nanggad, sakuyang sasabihon saindo, na sakuyang aram na si Cristo maabot sa manga aki nin manga tawo, tanganing saiyang akoon an manga pagkakasala kan saiyang manga tawo, asin saiyang tutuboson an manga kasalan kan mundo; huli ta an Kagurangnan na Dios sinabi idto.

9 Huli ta kaipuhan na sarong pagtubos an gibohon; huli ta sunod sa dakulang plano kan Daing-Kasagkuran na Dios kaipuhan na igwa nin sarong pagtubos na gibohon o kun dai an gabos na katawohan nanggad mapapara; iyo, an gabos nagmatagas; iyo, an gabos nagkasala asin nawara, asin kaipuhan mapara kun bako idto sa paagi kan pagtubos na kaipuhan na gibohon.

10 Huli ta kaipuhan na magkaigwa nin dakula asin huring atang; iyo, bako an atang nin tawo, o hayop, o ano man na hayop na igwang pakpak; huli ta bako man na atang na tawo, kundi kaipuhan na daing-katapusan asin daing-kasagkuran na atang.

11 Ngonian daing siisay man na tawo na maatang kan saiyang sadiring dugo na magtubos kan kasalan kan iba. Ngonian, kun an sarong tawo manggadan, ano kukuahon daw an buhay kan saimong tugang sunod sa satuyang katugonan na pantay? Sasabihon ko saindo, Dai.

12 Alagad hahagadon kan susundon an buhay kan nakagadan; kaya daing ano man na bagay na kulang sa daing katapusan na pagtubos na magkakanigo sa manga kasalan kan mundo.

13 Kaya kaipuhan na magkaigwang sarong dakula asin huring pag-atang, asin dangan magkakaigwa na, o kaipuhan na magkaigwa nin pagpundo sa pagpapabulos nin dugo; dangan an katugonan ni Moises mauutob; iyo, an gabos mauutob, lambang ikinurit asin pangaran, asin ta dai ni saro man na mapapara.

14 Asin totoo, iyo ini an bilog na kahulogan kan susundon, lambang mandiit-diit na kabtang na nagsasabi kan dakula asin huring atang; asin an dakula asin huring atang iyo an Aki kan Dios, iyo, daing katapusan asin daing-kasagkuran.

15 Asin ta siya an magdadara nin kaligtasan sa gabos na magtuturubod sa saiyang pangaran; na iyo an katuyohan kan huring atang, tanganing mapukawan an pagkaherak, na nangingibabaw sa kapantayan, asin magdadara nin paagi sa manga tawo tanganing sinda magkaigwa nin pagtubod sa pagsolsol.

16 Asin sa siring an pagkaherak matutungdan an hinahagad kan kapantayan, asin mapapalibotan sinda nin manga takyag nin kaligtasan, mantang siya na dai nagtutubod sa pagsolsol mag-aatubang sa bilog na susundon kan hinahagad kan kapantayan; kaya sa saiya sana na igwang pagtubod sa pagsolsol maitatao an daing-kasagkuran na plano kan pagtubos.

17 Kaya itao man lugod saindo kan Dios, manga katugangan ko, na magpoon lugod kamong magturubod sa pagsolsol, tanganing magpoon na kamong mag-arapod sa saiyang banal na pangaran, tanganing maherakan kamo;

18 Iyo, magpamibi sa saiya tanganing maherakan; huli ta siya makusog na magligtas.

19 Iyo, magpakurumbaba kamo, asin magpadaragos sa pagpamibi sa saiya.

20 Magpamibi sa saiya kun kamo nasa saindong manga tatamnan, iyo, para sa gabos kan saindong manga hayop.

21 Magpamibi sa saiya sa manga harong nindo, iyo, para sa gabos na kagharong, sa pagkaaga, sa pagkaudto, asin sa pagkabanggi.

22 Iyo, magpamibi sa saiya laban sa kapangyarihan kan saindong manga kaiwal.

23 Iyo, magpamibi sa saiya laban sa demonio, na iyo an kaiwal nin gabos na katanusan.

24 Magpamibi sa saiya para sa manga pananom kan saindong manga tatamnan, tanganing kamo mag-uruswag huli sa sainda.

25 Magpamibi para sa manga hayop kan saindong manga lati, tanganing sinda magdarakol man.

26 Alagad bako ini an gabos; kaipuhan ipabulos nindo an saindong manga kalag sa saindong manga kuwarto, asin sa saindong manga tagong lugar, asin sa saindong manga kadlagan.

27 Iyo, asin kun dai kamo namimibi sa Kagurangnan, pabayaan na an saindong manga puso na mapano, padagos na nagpapamibi sa saiya para sa saindong karahayan, asin man para sa karahayan kan manga nasa saindong palibot.

28 Asin ngonian magdarangog, padangat kong manga katugangan, sasabihon ko sa saindo, dai kamo maghuruna na iyo na ini an gabos; huli pagkatapos na giribohon nindo ining manga bagay na ini, kun saindong isisirikwal an manga nangangaipo, asin an manga daing gubing, asin dai man kamo magdadaralaw sa manga naghihirilang asin nagtitirios, asin warasan kan saindong pagkabuhay, kun kamo igwa, idtong manga nangangaipo—sasabihon ko saindo, kun dai nindo ginigiribo an arin man kan manga bagay na ini, nanggad an saindong manga pamibi magiging daing kamugtakan, asin daing pakinabang, asin siring kamo sa manga parasagin-sagin na pig-iindahan an pagtubod.

29 Kaya kun dai kamo makarumdom na maging maugayon sa kapwa, kamo manga ati na inaapon kan manga platero, (ini dahil ta daing kamugtakan) asin tuturungtongan nin manga bitis nin manga tawo.

30 Asin ngonian, sakuyang manga katugangan, minamawot ko, na pakatapos na kamo makakurua nin kadakol na manga pagpatotoo, nahiling an banal na kasuratan na nagpapatotoo kan manga bagay na ini, kamo dumurulok asin magdarara nin bunga sa pagsolsol.

31 Iyo, minamawot ko na kamo magdurulok asin dai na pagpataragason an saindong manga puso; huli ta totoo, ngonian na an panahon asin aldaw kan saindong kaligtasan; asin huli kaini, kun kamo magsorolsol asin dai pagpataragason an saindong manga puso, tulos-tulos an plano kan pagtubos mapapasaindo.

32 Huli totoo nanggad, an buhay na ini iyo an panahon para sa tawo na mag-andam sa paghampang sa Dios; iyo, totoo nanggad an aldaw kan buhay na ini iyo an aldaw para sa tawo na maggibo kan saindang manga gigibohon.

33 Asin ngonian, siring sa sinabi ko saindo kaidto, na igwa na kamo nin kadakol na manga pagpatotoo, kaya, ako nakikimaherak sa saindo na dai na nindo pagpataraod-taodon pa an aldaw kan saindong pagsorolsol sagkod sa katapusan; huli ta pagkatapos kaining aldaw nin buhay, na itinao satuya sa pag-andam para sa daing-kasagkuran, totoo nanggad, na kun dai niato papakarahayon an satuyang panahon mantang nasa buhay na ini, dangan maabot an banggi nin kadikloman na kun sain dai na nin ano man na magigibo pa.

34 Dai kamo makapagsasabi, kun kamo madara na sa makuri na pagtios, na ako magsosolsol na, na ako mabalik na sa sakuyang Dios. Dai, kamo dai makapagsasarabi kaini; huli ta an espiritu na nagsasadiri kan saindong manga hawak kan panahon na nagruluwas kamo sa buhay na ini, iyo man an espiritu na igwang kapangyarihan na sadirihon an saindong manga hawak duman sa daing-kasagkuran na mundo na idto.

35 Huli ta totoo nanggad, na kun saindong pagpataraod-taodon pa an aldaw kan saindong pagsorolsol sagkod sa pagkagadan, saka nanggad, kamo magiging sakop kan espiritu kan demonio, asin buburugtakan kamo kan tanda niya; kaya an Espiritu kan Kagurangnan mahali sa saindo, asin dai na nin lugar sa saindo, asin an demonio igwa nin gabos na kapangyarihan sa saindo; asin iyo na ini an katapusan na kamugtakan kan masusumbikal.

36 Asin ta aram ko ini, huli ta sinabi ini kan Kagurangnan na dai siya nag-eerok sa bakong banal na manga templo, alagad sa manga puso kan manga matatanos siya nag-eerok; iyo, asin sinabi man niya na an manga matatanos magtutukaw sa saiyang kahadean, tanganing dai na nanggad magluwas pa; alagad an saindang manga gubing papupurution sa paagi kan dugo kan Kordero.

37 Asin ngonian, padangat kong manga katugangan, minamawot ko na saindong rumdomon ining manga bagay na ini, asin na kamo maghiringuha kan saindong kaligtasan na igwang pagkatakot sa atubangan kan Dios, asin na dai na nindo pag-irindahan an pag-abot ni Cristo;

38 Na dai na kamo magturumang pa sa Espiritu Santo, alagad na arakoon siya nindo, asin arakoon an pangaran ni Cristo; tanganing magpakurumbaba kamo sagkod sa kabokabo, asin magsaramba sa Dios, sain man na lugar kamo namumugtak, sa espiritu asin sa katotoohan; asin na mabuhay kamo sa pagpapasalamat sa aroaldaw, huli sa kadakol na pagkaherak asin manga balaog na itinatao saindo.

39 Iyo, asin sisadol ko kamo, sakuyang manga katugangan, na magmarangno kamo sa padagos na pagpamibi, tanganing dai kamo madara kan manga sugot kan demonio, tanganing dai kamo niya madaog, tanganing dai kamo maging sakop niya sa huring aldaw; huli ta totoo, siya mabalos saindo nin bakong marahay na bagay.

40 Asin ngonian sakuyang padangat na manga katugangan sisadol ko kamo na magkaigwa kamo nin tiyaga, asin tanganing makaya nindo an palaen-laen na pasakit; tanganing dai nindo paglibakon an manga nagsubol saindo huli sa saindong labi-labing pagtios, ta tibaad maging parakasala man kamo siring sa sainda;

41 Alagad na kamo magkaigwa nin tiyaga, asin makaya an manga kasakitan na kaibahan an dai natatanyog na paglaom na sarong aldaw magpapahingalo kamo sa saindong manga kasakitan.