1 Asin ngonian, sakuyang aki, igwa akong itataram manunungod sa pagsulit na nasambit na; huli nanggad, ta dakol an nagliwat kan banal na kasuratan, asin ta nariwara nin paharayo huli sa bagay na ini. Asin nahihiling ko na an saimong isip naghahadit man manunungod sa bagay na ini. Alagad totoo sakuyang ipapaliwanag ini saimo.

2 Sinasabi ko saimo, sakuyang aki, na an plano kan pagsulit kaipuhan sa kapantayan kan Dios; huli ta kaipuhan na an gabos na manga bagay maisulit sa saindang tamang kamugtakan. Totoo, ini kaipuhan asin pantay, sunod sa kapangyarihan asin pagkabuhay-liwat ni Cristo, na an kalag kan tawo kaipuhan maisulit sa saiyang hawak, asin ta an lambang kabtang kan hawak kaipuhan maisulit sa sadiri.

3 Asin ta kaipuhan ini sa kapantayan kan Dios na an tawo kaipuhan na hukoman sunod sa saindang manga giniribo; asin kun an saindang manga gibo sa buhay na ini, asin an kamawotan kan saindang manga puso mararahay, tanganing sinda man sa huring aldaw, maisulit sa kun ano an marahay.

4 Asin kun an saindang manga gibo maraot an manga idto ibabalik sa sainda para sa maraot. Kaya, an gabos na bagay maisusulit sa tamang kamugtakan, an gabos na bagay sa saindang tama na pagkahaman—an pagkamortal mabangon sa pagkaimortal, an pagkalapa sa daing pagkalapa—mabangon sa daing katapusan na kaogmahan na manununod kan kahadean kan Dios, o sa daing katapusan na kasakitan na manununod kan kahadean kan demonio, an saro digdi, asin an saro duman—

5 An saro mabangon sa kaogmahan sunod sa saiyang minamawot na kaogmahan, o karahayan sunod sa saiyang minamawot na karahayan; asin an iba sa maraot sunod sa minawot niyang karaotan; huli ta minawot niya na maggibo nin karaotan sa gabos niyang manga aldaw siring man magkakaigwa nin kabalosan na maraot sa pag-abot kan banggi.

6 Asin siring man sa ibong na kabtang. Kun siya nagsolsol kan saiyang manga kasalan, asin minawot an katanusan sagkod sa katapusan kan saiyang manga aldaw, kun siring, siya mababalosan nin karahayan.

7 Sinda iyo an manga tinubos kan Kagurangnan; iyo, sinda iyo idtong manga kinukua, na iliniligtas hali sa daing katapusan na banggi nin kadikloman; asin kaya sinda matindog o matumba; huli totoo, na sinda an sadiri nindang hukom, kun maggibo nin marahay o maggibo nin maraot.

8 Ngonian, an manga pagboot kan Dios dai nababago; kaya, an dalan hinanda na, na an siisay man na boot maglakaw duman tinutugotan asin siya maliligtas.

9 Asin ngonian magdangog, sakuyang aki, dai ka na magtaya nin saro pang pagkakasala laban sa saimong Dios sa manga temang idto nin doktrina, na saimo nang itinaya sagkod ngonian.

10 Dai mo ipamugtak, na huli ta sinabi na an manunungod sa pagsulit, na ika isusulit hali sa kasalan pasiring sa kaogmahan. Totoo, sakuyang sasabihon saimo, an kasumbikalan bako nanggad nuarin man kaogmahan.

11 Asin ngonian, sakuyang aki, an gabos na tawo na nasa kamugtakan nin kamundohan, o an boot kong sabihon, na nasa kinabanon na kamugtakan, nasa kapaitan asin nasa gapos nin magabat na pagkakasala; sinda daing Dios sa mundo, asin sinda suminalungat sa natural na kamugtakan kan Dios; kaya sinda nasa kamugtakan na salungat sa natural na kamugtakan nin kaogmahan.

12 Asin ngonian, an kahulogan daw kan tataramon na pagsulit iyo an paghali kan sarong bagay sa natural na kamugtakan, asin ibugtak ini sa bakong natural na kamugtakan o ibugtak ini sa kamugtakan na kabaliktadan kan natural na kamugtakan kaini?

13 O, sakuyang aki, bako ini siring; alagad an kahulogan kan tataramon na pagsulit iyo an isulit giraray an maraot sa maraot, o an kamundohan sa kamundohan, o an makademonio sa makademonio—an marahay para sa marahay; an matanos para sa matanos; an pantay para sa pantay; an pagkamaherakon para sa maherakon.

14 Kaya, sakuyang aki, saimong hinguahon na ika maging maherakon sa saimong manga katugangan; maging pantay sa pakikiiba, maghatol nin igwang katanusan, asin padagos na maggibo nin marahay; asin ta kun saimong gigibohon an manga bagay na ini saka na ika makakakua nin balos; iyo, an pagkaherak isusulit saimo giraray; an kapantayan isusulit saimo giraray; an matanos na paghatol isusulit saimo giraray; asin an mararahay ibabalos saimo giraray.

15 Huli ta kun ano an saimong ipinaluwas mabalik giraray saimo, asin isusulit; kaya, an tataramon na pagsulit orog na minasumpa sa makasalan, asin ta dai naghahatol na maninigo siya sa kaligtasan.