1 Ngonian pagkahiling ni Alma na dai nakagirong si Zeezrom, huli ta saiyang namasdan na nadakop ni Amulek an saiyang pagputik asin pagdaya tanganing raoton siya, asin nahiling na siya nagpoon magtakig sa irarom kan saiyang pagkaaram kan saiyang kasalan, binuka an saiyang nguso asin nagpoon na magtaram saiya asin na pakusogon an manga tataramon ni Amulek, asin na magpaliwanag kan manga bagay na orog pa, o na buksan an banal na kasuratan na orog pa kan ginibo ni Amulek.

2 Ngonian an manga tataramon na sinabi ni Alma ki Zeezrom nadangog kan manga tawo sa palibot; huli ta an katiripunan dakula, asin siya nagsabi na siring kaini:

3 Ngonian Zeezrom, ta nahihiling na ika nadakop sa saimong kaputikan asin katusohan, huli ta bako sana sa tawo ika nagputik kundi nagputik man ika sa Dios; huli totoo na saiyang aram an gabos na nasa saimong isip, asin nahiling mo na an nasa saimong isip ipinapaaram samuya kan saiyang Espiritu;

4 Asin ta saimong nahiling na samuyang aram an saimong plano tusong gayo na plano, siring sa katusohan kan demonio, tanganing magputik asin magdaya sa manga tawo na ini na maanggot asin lumaban samuya, tanganing pagtuya-tuyaon kami asin isubol paluwas.

5 Ngonian ini an plano kan saimong kaiwal, asin saiyang ipinangibabaw an saiyang kapangyarihan saimo. Ngonian boot ko na saimong rumdomon na kun ano an sakuyang sinasabi sa saimo sinasabi ko sa gabos.

6 Asin totoo sakuyang sinasabi sa saindo gabos na ini siod kan kaiwal, na itinaon tanganing masilo ining manga tawo na ini, tanganing kamo mapasairarom na maging parasunod niya, na kamo magapos niya kan saiyang manga kadena, tanganing magkagarakodan kamo sa daing-kasagkuran na pagkaraot, sunod sa kapangyarihan kan saiyang pagkabihag.

7 Ngonian kan si Alma makatapos na magsabi kaining manga tataramon, si Zeezrom nagpoon na magtakig nin labi-labi, huli ta orog siyang napatubod sa kapangyarihan kan Dios; asin siya man napatubod na si Alma asin si Amulek igwang pakaaram saiya, huli siya napatubod na naaaraman ninda an manga kaisipan asin manga katuyohan kan saiyang puso; huli ta tinawan sinda nin kapangyarihan na maaraman ninda an manga bagay na ini sunod sa espiritu nin pagpropesia.

8 Asin si Zeezrom nagpoon mag-usisa nin maigot manunungod sa kahadean kan Dios. Asin siya nagsabi ki Alma: Ano an kahulogan kan pinagtataram ni Amulek manunungod kan pagkabuhay-liwat nin manga gadan, na an gabos magbabangon hali sa pagkagadan, maging an masuripot asin an bakong masuripot, asin dadarahon asin patitindugon sa atubangan kan Dios tanganing hatolan sunod sa saindang manga gibo?

9 Asin ngonian si Alma nagpoon magpaliwanag kan manga bagay na ini sa saiya, na an sabi: Itinatao sa kadakolan na maaraman an manga tagong-hilom kan Dios; alagad sinda nakabugtak sa sarong mahigpit na tugon na dai ninda ipagwaras, susog sana sa kabtang kan saiyang tataramon na itinatao sa manga aki nin tawo, sunod sa pagsunod asin pagkamaigot na saindang itinatao sa saiya.

10 Asin kaya, siya na magpapatagas kan saiyang puso, siya makakakua nin diit na kabtang kan tataramon; asin siya na dai magpatagas kan saiyang puso, saiya itatao an orog kadakulang kabtang kan tataramon, sagkod na itao idto saiya na saiyang maaraman an tagong-hilom kan Dios sagkod na maaraman an kabilogan kaidto.

11 Asin sinda na magpapataragas kan saindang manga puso, sainda itatarao an diit na kabtang kan tataramon sagkod na dai sinda makaaram manunungod kan saiyang tagong-hilom, asin dangan sinda dadarahon na bihag kan demonio, asin pasusurunudon sinda sa saiyang kapagbotan sagkod sa pagkarumpag. Ngonian iyo ini an kahulogan kan manga kadena kan impiyerno.

12 Asin si Amulek nagsabi nin yano manunungod sa pagkagadan, asin an pagbangon hali sa pagkamortal na ini pasiring sa kamugtakan na imortal, asin dadarahon sa hukoman kan Dios, tanganing hukoman sunod sa satuyang manga gibo.

13 Dangan kun an satuyang manga puso pinatagas, iyo, kun satuyang pinatagas an satuyang manga puso tumang sa tataramon, sagkod na an manga ini dai na nakua sa satuya, saka na an satuyang kamugtakan magiging makuri, huli ta saka na kita isusumpa.

14 Huli ta an satuyang manga tataramon iyo an maghuhukom sa satuya, iyo, an gabos niatong manga gibo an maghuhukom satuya; dai kita makukua na daing digta; asin an satuyang manga kaisipan maghuhukom man sa satuya; asin digdi sa makuri na kamugtakan na ini dai kita mangangahas na magtingkalag sa satuyang Dios; asin maoogma pa kita kun mapagbotan niato an manga gapo asin manga bulod na humugpa sa satuya tanganing itago kita sa saiyang atubangan.

15 Alagad dai ini mangyayari; kaipuhan nanggad na magluwas kita asin umatubang saiya sa saiyang kamurawayan, asin sa saiyang kapangyarihan, asin sa saiyang kusog, kahalangkawan, asin kahadean, asin akoon sa satuyang daing-kasagkuran na kasusupgan na an gabos na saiyang hatol pantay; na siya pantay sa gabos niyang manga gibo, asin na siya maherakon sa gabos na aki nin tawo, asin na siya igwa nin kapangyarihan na mailigtas an lambang tawo na nagtutubod sa saiyang pangaran asin nagdadara nin bunga sukol sa pagsolsol.

16 Asin ngonian, magdangog, sakuyang sinasabi sa saindo, dangan maabot an sarong kagadanan, maski an ika-duwang kagadanan, na iyo an pagkagadan na espiritual; dangan sarong panahon na an siisay man na magadan sa saiyang kasalan, siring sa pagkagadan na temporal, magagadan man nin espiritual na pagkagadan; iyo, siya magagadan sa manga bagay na manunungod sa katanusan.

17 Dangan na an panahon na an saindang manga pagtios magiging siring sa danaw nin kalayo asin asupre, na an laad nag-iitaas sagkod pa man; asin dangan na an panahon na sinda ikakadena sa daing-kasagkuran na pagkarumpag, sunod sa kapangyarihan asin pagbihag ni Satanas, pagkatapos niyang masakop sinda sunod sa saiyang pagboot.

18 Dangan, sakuyang sinasabi sa saindo na sinda magiging siring na garo dai man sanang nagibo na pagtubos; huli ta dai sinda magkakaturubos sunod sa pagiging pantay kan Dios; asin sinda dai magkakagaradan, huli ta dai na nin pagkalapa.

19 Ngonian uminagi an panahon na kan taposon na ni Alma an pagtaram kan manga tataramon na idto, an manga tawo orog na nagngaralas;

20 Alagad igwang sarong Antionah, na iyo an pinakapamayo ninda, na uminabot asin nagsabi saiya: Ano ining saimong sinabi, na an tawo magbabangon hali sa pagkagadan asin magbabago hali sa pagkamortal pasiring sa pagkaimortal na kamugtakan, na an kalag dai nanggad magagadan?

21 Ano daw an kahulogan kan kasuratan, na nagsasabi na an Dios nagbugtak nin manga kerubin asin sarong naglalaad na espada sa sirangan kan Hardin kan Eden, na tibaad idtong enot niatong manga magurang maglaog asin magkakan kan bunga kan kahoy nin buhay, asin mabuhay sagkod pa man? Asin sa siring satuyang mahihiling na dai na kitang paglaom na mabuhay sagkod pa man.

22 Ngonian sinabi ni Alma sa saiya: Iyo ini an bagay na boot kong ipaliwanag. Ngonian nahihiling niato na si Adan nagkasala sa paagi kan pagkakan kan ipinangangalad na bunga, sunod sa tataramon kan Dios; asin sa siring satuyang nahiling, na sa saiyang pagkasala, gabos na katawohan riwara asin makasalan na manga tawo.

23 Asin ngonian totoo, sakuyang sinasabi sa saimo na kun nangyari ki Adan na nakakakan siya kan bunga kan kahoy nin buhay kan panahon na idto, dai kutana nin kagadanan, asin an tataramon magiging daing kahulogan, magiging putikon an Dios, huli ta sinabi niya: Kun ika magkakan ika magagadan.

24 Asin satuyang nahiling na an kagadanan maabot sa katawohan, iyo, an pagkagadan na pinagsasabi ni Amulek, na temporal na pagkagadan; alagad tinawan pa an tawo nin panahon tanganing siya magsolsol; kaya ining buhay na ini naging sarong pagbalo na kamugtakan; sarong panahon sa paghanda sa pag-atubang sa Dios; sarong panahon sa paghanda para sa daing-katapusan na kamugtakan na samuyang pinagtaram, na iyo an pagkatapos kan pagkabuhay-liwat nin manga gadan.

25 Ngonian, kun bako sa plano kan pagtubos, na ibinugtak na poon pa kan pagpoon kan mundo, dai kutana nin pagkabuhay-liwat kan manga gadan; alagad igwa nin plano nin pagtubos na ibinugtak, na iyo an magpapangyari kan pagkabuhay-liwat kan manga gadan, na sinabi na.

26 Asin ngonian magdangog, kun nangyari na an satuyang enot na manga magurang nabuyo na nagkakan kan bunga kan kahoy nin buhay sinda kutana nasa makaheherak na kamugtakan sagkod pa man, ta dai sinda nin panahon sa paghanda; asin sa siring an plano kan pagtubos naulang kutana, asin an tataramon kan Dios magiging daing saysay, ta dai nang data.

27 Alagad totoo, na idto bako siring; alagad ta itinalaga na an tawo magagadan; asin pagkatapos kan pagkagadan, sinda maabot sa paghatol, siring kan samuyang pinagsasabi na paghatol, na iyo an katapusan.

28 Asin pagkatapos na italaga kan Dios na an manga bagay na ini umabot sa tawo, totoo, dangan saiyang nahiling na kaipuhan sa tawo na makaaram manunungod sa manga bagay na itinalaga sa sainda;

29 Kaya siya nagpadara nin manga anghel na makihuron sa sainda, na iyo an dahilan na an manga tawo nahiling an saiyang kamurawayan.

30 Asin magpoon kaidto nag-apod na sinda sa saiyang pangaran; kaya an Dios nakipaghuron na sa manga tawo, asin ipinaaram sa sainda an plano kan pagtubos, na hinanda na poon pa kan pagkapoon kan mundo; asin ini ipinaaram sa sainda sunod sa saindang pagturubod asin pagsorolsol asin sa saindang banal na manga gibo.

31 Huli kaini, siya nagtao nin manga katugonan sa manga tawo, sinda na enot na nagralapas kan enot na katugonan manunungod sa manga temporal na bagay, asin naging siring sa manga Dios, nakakaaram kan marahay sa maraot, ibinubugtak an sadiri ninda sa sarong kamugtakan na makapaggiribo, o ibinugtak sa sarong kamugtakan na makapaggiribo sunod sa saindang manga boot asin manga kaogmahan, kun maggigiribo nin marahay o maggigiribo nin maraot—

32 Kaya, tinawan sinda kan Dios nin manga katugonan, pagkatapos na ipaaram an plano kan pagtubos, na dai sinda maggiribong mararaot, na an kapadusahan kaidto iyo an ika-duwang pagkagadan, na iyo an daing-kasagkuran na pagkagadan sa manga bagay na matatanos; huli ta sa sainda an plano kan pagtubos, dai nin kapangyarihan, huli ta an manga gibong kapantayan dai marurumpag, sunod sa kahuruhalangkawan na karahayan kan Dios.

33 Alagad an Dios nangapodan sa manga tawo, sa pangaran kan saiyang Aki, (ini iyo an plano kan pagtubos na itinalaga) na an sabi; Kun kamo magsorolsol asin dai pagpataragason an saindong manga puso, dangan ko kamo maheherakan, sa paagi kan sakuyang Aking Bugtong;

34 Kaya, an siisay man na magsolsol, asin dai magpatagas kan saiyang puso, siya makakakua nin pagkaherak sa paagi kan sakuyang Aking Bugtong, sa kapatawaran kan saiyang manga kasalan; asin an manga ini makakalaog sa sakuyang kapahingaloan.

35 Asin an siisay man na magpatagas kan saiyang puso asin maggibo nin kasumbikalan, totoo, sakuyang isusumpa sa sakuyang kaanggotan na siya dai makakalaog sa sakuyang kapahingaloan.

36 Asin ngonian, sakuyang manga katugangan, magdarangog, sakuyang sinasabi sa saindo, na kun saindong papataragason an saindong manga puso dai kamo makakaralaog sa kapahingaloan nin Kagurangnan; kaya an saindong kasumbikalan nagpapaanggot saiya kaya ipinadara an saiyang kaanggotan saindo, siring kan enot niyang pagkaanggot, iyo, sunod sa saiyang tataramon sa huring pagkaanggot na siring man sa enot, pasiring sa daing-kasagkuran na pagkapara kan saindong manga kalag; kaya, sunod sa saiyang tataramon, sagkod sa huring pagkagadan, siring man sa enot.

37 Asin ngonian, sakuyang manga katugangan, nahihiling na aram niato an manga bagay na ini, asin ta an manga ini totoo, magsorolsol na kita, asin dai na pagpataragason an satuyang manga puso, tanganing dai na niato mapaanggot an Kagurangnan na satuyang Dios na hugpaan kita kan saiyang kaanggotan digdi sa saiyang ika-duwang manga katugonan na itinao niya satuya; alagad magralaog kita sa kapahingaloan kan Dios, na hinanda susog sa saiyang manga tataramon.