1 Ngonian sakuyang aki, ini pa an sakuyang manga sasabihon sa saimo, huli ta naaaninaw ko na an saimong isip nahahadit manunungod sa pagkabuhay-liwat nin manga gadan.

2 Totoo sakuyang sasabihon sa saimo na dai nin pagkabuhay-liwat—o masasabi ko, sa ibang tataramon, na ining mortal dai man masasanglian nin pagkaimortal, an pagkalapa dai man masasanglian nin dai pagkalapa—sagkod sa pagkatapos kan pag-abot ni Cristo.

3 Totoo, na siya an magpapangyari kan pagkabuhay-liwat kan manga gadan. Alagad magdangog, sakuyang aki, an pagkabuhay-liwat dai pa. Ngonian, bubuksan ko saimo an sarong tagong-hilom; alagad kadakol pang manga tagong-hilom na natatago, na daing siisay man na nakakaaram kundi an Dios sana. Alagad sakuyang ipapahiling saimo an sarong bagay na maigot kong inusisa sa Dios na sakuyang maaraman—na iyo an pagkabuhay-liwat.

4 Magdangog, igwang panahon na itinalaga na an gabos mabangon sa pagkagadan. Ngonian kun nuarin an panahon na ini maabot daing nakakaaram; alagad an Dios aram an panahon na itinalaga.

5 Ngonian, kun magkaigwa man nin sarong panahon, o ika-duwang panahon, o ika-tulong panahon, na an manga tawo mabangon sa pagkagadan, bako ini an mahalaga, huli ta an Dios aram an manga bagay na ini; asin tama na sakuya na maaraman na siring an mangyayari—na igwang panahon na itinalaga na gabos mabarangon hali sa pagkagadan.

6 Ngonian kaipuhan na igwang panahon sa pagultanan kan panahon nin pagkagadan asin sa panahon nin pagkabuhay-liwat.

7 Asin ngonian ako mag-uusisa kun ano an mangyayari sa manga kalag kan manga tawo magpoon sa panahon kan pagkagadan na ini sagkod sa itinalagang panahon para sa pagkabuhay-liwat?

8 Ngonian kun igwa man na labi sa sarong panahon na itinalaga para sa tawo na magbangon bako iyan an mahalaga; huli an gabos dai man magagadan na sarabay, asin ini bako man mahalaga; an gabos siring sa sarong aldaw sa Dios, asin an panahon sa tawo sana sinusukol.

9 Kaya, igwang panahon na itinalaga sa tawo na sinda magbarangon hali sa pagkagadan; asin igwang pagultanan sa tahaw poon kan pagkagadan asin kan pagkabuhay-liwat. Asin ngonian, manunungod sa pagultanan na panahon, ano an mangyayari sa manga kalag kan manga tawo, iyo ini an bagay na sakuyang inusisang maigot sa Kagurangnan na maaraman; asin iyo ini an bagay na naaraman ko.

10 Asin kun mag-abot an panahon na an gabos magbarangon, saka ninda maaararaman na an Dios nakakaaram kan gabos na manga panahon na itinalaga para sa tawo.

11 Ngonian, manunungod sa kamugtakan kan kalag sa pagultanan kan pagkagadan asin pagkabuhay-liwat—Totoo, ipinaaram ini sakuya nin sarong anghel, na an manga espiritu kan gabos na manga tawo, sa panahon na sinda humali sa hawak na mortal, iyo, na an espiritu kan gabos na manga tawo, maging marahay o maraot, ipupuli duman sa Dios na nagtao sainda nin buhay.

12 Asin saka na mangyayari na an manga espiritu kaidtong matatanos maarako nin maogmang kamugtakan, na inaapod na paraiso, kamugtakan nin kapahingaloan, kamugtakan nin katuninongan, kun sain sinda mapapahingaloan na kan saindang manga kahaditan asin gabos na iisipon, asin kamundoan.

13 Asin saka maagi an panahon, na an manga espiritu kan manga masusumbikal, iyo, idtong manga mararaot—huli totoo na sinda daing kabtang o kaparte kan Espiritu kan Kagurangnan; huli nanggad, ta pinili ninda an maraot na manga gibo ki sa marahay; kaya an espiritu kan demonio luminaog sa sainda, asin sinadiri an saindang manga harong—asin an manga ini iaarapon sa harayo na kadikloman; asin magkakaigwang pagtarangis, asin inaragrangay, asin pagraragot nin manga ngipon, asin ini huli sa saindang sadiring kasumbikalan, na dara bilang bihag kan kaisipan kan demonio.

14 Ngonian iyo ini an kamugtakan kan manga kalag kan masusumbikal, iyo, nasa kadikloman, asin sa kamugtakan na makuri, makakatakot hilingon huli ta an labi-labing kaanggotan kan Dios yaon sa sainda; kaya sinda nasa siring na kamugtakan, siring man an manga matatanos sa paraiso, sagkod sa panahon kan saindang pagkabuhay-liwat.

15 Ngonian, igwang nagkakapira na nakakasabot kaining kamugtakan na kaogmahan asin ining kamugtakan na pagtios nin manga kalag, bago kan pagkabuhay-liwat, iyo ini an enot na pagkabuhay-liwat. Iyo, inaako ko na maaapod idtong pagkabuhay-liwat, an pagbangon kan espiritu o kan kalag asin an saindang pagkapaduman sa kaogmahan o kasakitan, susog sa tataramon na sinabi na.

16 Asin totoo nanggad, na sa giraray sinabi, na igwang enot na pagkabuhay-liwat, sarong pagkabuhay-liwat kan gabos na nabuhay kaidto, o manga nabubuhay pa, asin an manga mabubuhay pa sagkod sa pagkabuhay-liwat ni Cristo sa manga gadan.

17 Ngonian, dai niato iniisip na ining enot na pagkabuhay-liwat, na sinasambit sa siring na paagi, iyo na an pagkabuhay-liwat kan manga kalag asin an saindang pagkamugtak sa kaogmahan o kasakitan. Dai nindo pag-irisipon na iyo ini an kahulogan kaini.

18 Totoo, sakuyang sasabihon saimo, Bako; alagad an boot sabihon kaini iyo an pagsulit kan kalag sa hawak, kaidtong manga nabuhay magpoon sa manga aldaw ni Adan sagkod sa pagkabuhay-liwat ni Cristo.

19 Ngonian, kun an manga kalag asin an manga hawak kaidtong manga nasabi na magsusurulit tulos, an masusumbikal siring man an matatanos, dai ko sinasabi; tama na na sakuyang sabihon na sinda gabos mabangon; o sa ibang tataramon, an saindang pagkabuhay-liwat mangyayari bago an pagkabuhay-liwat kaidtong manga nagadan pagkatapos kan pagkabuhay-liwat ni Cristo.

20 Ngonian sakuyang aki, dai ko sinasabi na an pagkabuhay-liwat maabot sa pagkabuhay-liwat ni Cristo; alagad magdangog, itinatao ko ini bilang sakuyang kaisipan, na an manga kalag asin an manga hawak kan matatanos magsusulit, sa pagkabuhay-liwat ni Cristo, asin an saiyang pagsakat sa langit.

21 Alagad maging idto sa saiyang pagkabuhay-liwat o sa pagkatapos, dai ko sinasabi; alagad ini sana an sakuyang masasabi, na igwang pagultanan sa tahaw kan pagkagadan asin kan pagkabuhay-liwat kan hawak, asin an kamugtakan kan kalag sa kaogmahan o sa kasakitan sagkod sa panahon na itinalaga kan Dios na an gadan mabangon, asin masulit, an kalag asin an hawak, asin dadarahon sa atubangan kan Dios, asin tanganing hukoman susog sa saindang manga giniribo.

22 Iyo, digdi mangyayari an pagbabalik kan gabos na manga bagay na pinagsabi kan manga nguso kan manga propeta.

23 An kalag ibabalik sa hawak, asin an hawak sa kalag; iyo, asin an lambang kalamias asin pinagsukmolan ibabalik sa saiyang hawak; iyo, maski na sarong buhok sa payo dai mawawara; alagad an gabos na manga bagay ibabalik sa tama asin sa perpektong hawak.

24 Asin ngonian, sakuyang aki, ini an pagsulit na pinagsasabi kan manga nguso kan manga propeta—

25 Asin saka an matatanos magliliwanag sa kahadean kan Dios.

26 Alagad totoo, na sarong makuri na pagkagadan an maabot sa manga masusumbikal; huli ta sinda magagadan sa manga bagay manunungod sa manga bagay nin katanusan; huli ta sinda maati, asin ta daing maati na bagay na makakapanunod sa kahadean kan Dios; alagad sinda isisirikwal, asin ipapamugtak na magkaon kan bunga kan saindang kapagalan o saindang manga gibo, na manga maraot; asin sinda mainom kan lagod nin mapait na kupa.