1 Asin ta uminagi an panahon na sinda nagralakaw, asin nagpoon na magbaralangibog kan tataramon kan Dios sa manga tawo, nagraralaog sa saindang manga sinagoga, asin sa saindang manga kaharongan; iyo, asin sagkod na sinda nagbaralangibog sa manga kalye.

2 Asin ta uminagi an panahon na pagkatapos kan kadakol na kapagalan sa saindang katiripunan, sinda nagpoon na magkaigwa nin pag-uswag sa katiripunan kan dukha na manga tawo; huli nanggad ta sinda isinurubol sa luwas kan manga sinagoga huli kan karaotan kan saindang gubing—

3 Kaya dai sinda tinuturugotan na magralaog sa saindang manga sinagoga na magsaramba sa Dios, huli ta an hiling sainda ati sinda; huli ta sinda dukha, an hiling sainda kan saindang manga katugangan manga daing kamugtakan; huli ta nagtitirios sinda sa manga bagay kan kinaban asin nagtitirios man sinda sa puso.

4 Ngonian, mantang si Alma nagtutukdo asin nagtataram sa manga tawo sa bulod kan Onidah, uminabot an kadakol na pagtiripon nin manga tawo sa saiya, na sinda an samuyang pinagsasabi, na igwang hababang puso, huli sa saindang pagtirios sa manga bagay kan kinaban.

5 Asin sinda nagdurulok ki Alma; asin an saro na iyo an namamayo sa sainda nagsabi sa saiya: Nanggad ano an gigibohon kaining sakuyang manga katugangan, huli ta sinda hinaramak nin gabos na manga tawo huli sa saindang kadaihan, iyo, asin orog pa kan samuyang manga padi; huli ta saindang pinaruluwas kami sa samuyang manga sinagoga na pinagparagalan nin labi-labi kan samuyang manga kamot sa pagpatirindog kaidto; asin kami saindang pinaruluwas huli sa samuyang labi-labi na kadaihan; asin dai na kaming lugar na pagsasarambahan kan samuyang Dios; asin ngonian, ano na an samuyang gigiribohon?

6 Asin ngonian kan madangog ni Alma an manga ini, siya buminirik, asin saiyang inatubang siya, asin hiniling niya na igwang dakulang kaogmahan; huli ta nahiling niya na an saindang pagtirios nakapagpakurumbaba nanggad sa sainda, asin ta nakaharanda na sindang magdarangog kan tataramon.

7 Kaya dai na siya nagtaram pa sa iba pang katiripunan; alagad saiyang inunat an saiyang kamot, asin nagkurahaw sa saiyang manga nahihiling, na manga tunay na nagmumurundo kan saindang manga kasalan asin nagsabi sa sainda:

8 Sakuyang nahiling na kamo nagpapakurumbaba sa puso; asin kun ini totoo, paladan kamo.

9 Magdarangog, an saindong tugang nagsabi, Ano an samuyang gigiribohon?—huli ta kami pinaruluwas sa samuyang manga sinagoga, na dai kami makapagsaramba sa samuyang Dios.

10 Magdarangog, sakuyang sinasabi sa saindo, ano sa saindong paghuna makapagsasaramba kamo sa Dios sa sinagoga sana?

11 Asin saro pa, ako mahapot saindo, hinuhuna daw nindo na magsasaramba kamo sa Dios saro sana sa sarong semana?

12 Sakuyang sinasabi sa saindo, marahay man ngani na kamo pinaruluwas sa manga sinagoga nindo tanganing magi kamong mapakumbaba asin tanganing makanuruod kamo nin kadunungan; huli ta kaipuhan nindo na makanuruod nin kadunungan; huli ta idto an dahilan na kamo pinaruluwas, na kamo hinaramak kan saindong manga katugangan huli sa saindong labi-labing pagtirios, na kamo dinara sa kahababaan nin puso; huli ta kamo kinakaipuhan na magpakurumbaba.

13 Asin ngonian, huli ta kamo napiriritan na maging mapakumbaba manga paladan kamo; huli ta an tawo kun minsan, kun siya napipiritan na magpakumbaba, siya nagmamawot na magsolsol; asin ngonian totoo, na an siisay man na magsolsol makakakua nin pagkaherak; asin siya na nakakua nin pagkaherak asin makatagal sagkod sa katapusan siya an makakaligtas.

14 Asin ngonian, siring sa sinabi ko sa saindo, na huli ta kamo napiriritan na magpakurumbaba manga paladan na kamo, sa paghuna nindo bakong orog na paladan idtong totoong nagpakumbaba huli sa tataramon?

15 Iyo, siya na totoong nagpakumbaba sa sadiri, asin nagsolsol kan saiyang manga kasalan asin magtagal sagkod sa katapusan, an siring magiging paladan—iyo, orog pa na paladan ki sa manga napiritan na magpakumbaba dahilan sa saindang labi-labing kadaihan.

16 Kaya manga paladan idtong nagpakumbaba na dai pinirit; o kaya sa sarong tataramon, paladan idtong nagtubod sa manga tataramon kan Dios asin nagpabunyag na bakong sutil an puso, iyo, na dai dinara na makaaram kan tataramon, o pinirit na makaaram bago sinda magtubod.

17 Iyo, igwang kadakol na nagtatararam: Kun papahilingan mo kami nin manga tanda na hali sa langit, diyan samuyang maaraman na tunay; saka na kami maturubod.

18 Ngonian ako mahapot, pagtubod daw ini? Totoo sakuyang sinasabi sa saindo, Bako, huli ta kun aram na kan sarong tawo an sarong bagay dai siya nin dahilan na magtubod, huli ta aram na niya ini.

19 Asin ngonian, gurano kaorog na isusumpa an siisay man na nakakaaram na kan kagustohan kan Dios asin dai niya ini ginigibo, ki kaidtong nagtubod sana, o igwa sana nin dahilan na magtubod, asin nahulog sa paglapas?

20 Ngonian, sa bagay na ini kamo kaipuhan na humatol. Magdarangog, sakuyang sinasabi sa saindo, na ini nasa sarong kamot siring man na ini nasa ibong; asin ini mangyayari sa lambang tawo sunod sa saiyang gibo.

21 Asin ngonian siring sa sinabi ko manunungod sa pagtubod—an pagtubod bako na magkaigwa nin bilog na kaaraman kan manga bagay; kaya kun ika igwa nin pagtubod ika naglalaom kan manga bagay na dai mo nahihiling alagad totoo.

22 Asin ngonian, totoo, sakuyang sasabihon sa saindo, asin boot ko na saindong marumdoman, na an Dios maheherakon sa sainda na nagtuturubod sa saiyang pangaran; kaya saiyang minamawot, sa enot, na kamo magturubod, iyo, maski sa saiyang tataramon.

23 Asin ngonian, saiyang iwinaras an saiyang tataramon sa manga tawo sa paagi nin manga anghel, iyo, bako sana sa manga lalaki alagad sa manga babae man. Ngonian bako pa ini an gabos; sa saradit na manga aki tinatawan man sindang manga tataramon sa dakol na panahon, na nagpalibong sa madunong asin sa igwang inadalan.

24 Asin ngonian, sakuyang manga padangat na katugangan, siring sa saindong manga minamarawot na maaraman sakuya kun ano an saindong gigiribohon huli ta kamo nagkakurulogan asin hinaraboan—ngonian dai ko minamawot na maghuna kamo na boot kong hatolan kamo sunod sana sa kun ano an totoo—

25 Huli ta bako an sakuyang boot sabihon na kamo gabos nagkapiriritan na magpakurumbaba sa sadiri nindo; huli ta ako minatubod nanggad na dakol saindo an magpapakurumbaba, maski sa anong kamugtakan sinda.

26 Ngonian, siring sa sinabi ko manunungod sa pagtubod—na idto bakong bilog na pagkaaram—siring man ini sa sakuyang manga tataramon. Dai mo maaaraman an katunayan kan manga idto sa enot, sagkod sa kabilogan, siring sa an pagtubod bakong bilog na kaaraman.

27 Alagad totoo, kun kamo magmata asin pukawon an saindong manga isip, sa sarong pagbalo kan sakuyang manga tataramon, asin gibohon an kadikit na pagtubod, iyo, maski na dai kamong ibang pagmawot kundi an magtubod, ipadagos ining pagmawot na ini ta makakatabang sa saindo, sagkod na kamo magtubod na sa sarong paagi na matawan nin lugar an diit kan manga tataramon ko.

28 Ngonian, satuyang ibabaing an tataramon sa sarong pisog. Ngonian, kun saindong tatawan nin lugar, na an sarong pisog maitanom sa saindong puso, totoo, na kun ini tunay na pisog, o sarong marahay na pisog, kun dai nindo ini iaapon sa paagi nin dai pagtubod, na saindong sasayumahan an Espiritu kan Kagurangnan, totoo nanggad, na ini magpopoon magdakula sa saindong manga daghan; asin kun mamatian nindo ining pagdakula na ini, kamo magpopoon na magtaram sa saindong manga sadiri—Ini talaga marahay na pisog, o na an tataramon marahay, huli ta nagpoon na idto magpadakula kan sakuyang kalag; iyo, nagpoon na idtong mapalinaw an sakuyang pakasabot, iyo, nagpoon na idtong maging mahamis para sa sakuya.

29 Ngonian magdarangog, dai daw ini makapagpadarakula sa saindong pagtubod? Sasabihon ko sa saindo, Iyo; alagad dai ini nagtalubo na maging kaaraman na bilog.

30 Alagad totoo, mantang an pisog nagdadakula, asin naggigiring, asin nagpopoon na magtalubo, saka sasabihon mo na an pisog marahay; huli ta nagdakula, asin naggiring, asin nagpoon na magtalubo. Asin ngonian, hilinga, dai daw ini makapakusog kan saindong pagtubod? Iyo, ini magpapakusog kan saindong pagtubod: huli ta mataram kamo aram ko na ini marahay na pisog; huli ta hilinga ini naggiring asin nagpoon na magtalubo.

31 Asin ngonian, totoo, na nagtutubod kamo na an pisog marahay? Sasabihon ko saindo, Iyo; huli ta lambang pisog magbubunga nin siring sa saiya.

32 Kaya kun an pisog nagtalubo marahay ini, alagad kun ini dai magtalubo, totoo na ini bako marahay, kaya inaapon ini.

33 Asin ngonian, masdan, huli ta saindong binalo, asin itinanom an pisog, asin idto nagdakula asin naggiring, asin nagpoon magtalubo, kaipuhan maaraman nindo na an pisog marahay.

34 Asin ngonian, hilinga, ano an saindong kaaraman bilog na daw? Iyo, an saindong kaaraman bilog sa bagay na iyan, asin an saindong pagtubod turog; asin ini huli ta aram nindo, huli ta aram nindo na an tataramon nagpadakula sa saindong manga kalag, asin aram man nindo na idto naggiring, tanganing an saindong pakasabot magpoon na maglinaw, asin an saindong isip magpoon na magdakula.

35 O saka, bako daw ini tunay? Sasabihon ko saindo, Iyo, huli ta ini liwanag; asin an ano man na maliwanag iyan marahay, huli ta ini malinaw, kaya aram mo nanggad na iyan marahay; asin ngonian, hilinga pagkatapos na mabatid mo na an liwanag na ini, bilog na daw an saimong pakaaram?

36 Totoo sasabihon ko saindo, Bako, dai nanggad nindo pagpabayaan an saindong pagtubod, huli ta ginamit sana nindo an saindong pagtubod sa pagtanom kan pisog tanganing kamo magbalo na maaraman kun an pisog marahay.

37 Asin masdan, mantang an kahoy nagpoon na magtalubo, kamo masabi: Satuyang atamanon ini nin marahay, tanganing ini magkaigwa nin gamot, tanganing ini magtalubo, asin tanganing magtao nin bunga sa satuya. Asin ngonian totoo nanggad, kun saindong atamanon ini nin marahay ini magkakaigwa nin gamot, asin magtatalubo asin magtatao nin bunga.

38 Alagad kun pababayaan nindo an kahoy, asin dai isipon an pag-ataman kaidto, totoo dai idto magkakaigwang gamot; asin pagsinag kan init kan aldaw asin nabalad idto, huli ta daing gamot idto maaalang, asin gagaboton idto asin iaapon.

39 Ngonian, idto bako ta an pisog bako marahay, bako ta an bunga dai magugustohan, kundi idto huli ta an daga tigang, asin dai nindo inataman an kahoy, kaya dai kamo magkakaigwa kan bunga kaini.

40 Asin kun siring, kun dai nindo aatamanon an tataramon, na nakapuntok an mata sa pagtubod sa bunga kaidto, dai nanggad kamo makakapudo kan bunga kan kahoy nin buhay.

41 Alagad kun saindong aatamanon an tataramon, iyo, atamanon an kahoy mantang nagpopoon idto magtalubo, sa paagi kan saindong maigot asin maimbod na pagtubod, naglalaom kan bunga kaidto, idto magkakaigwa nin gamot; asin totoo na idto magiging kahoy na magtutubo sagkod sa buhay na daing katapusan.

42 Asin huli sa saindong pagkamaigot asin sa saindong pagtubod asin sa saindong tiyaga sa pag-aataman sa tataramon na idto, tanganing magkaigwa nin gamot saindo, totoo, dai mahaloy magpupudo kamo kan bunga kaidto, na pinakamahalaga, na mahamis orog pa sa gabos na mahamis, asin maputi orog pa sa gabos na maputi, iyo, asin dalisay orog pa sa gabos na dalisay; asin pagpipiristahan nindo an bunga na ini sagkod na kamo magkabarasog, na dai na kamo magugutom pa, o mapapaha.

43 Dangan manga katugangan, aaranihon nindo an balaog kan saindong pagtubod, asin an saindong pagkamaigot, asin tiyaga, asin halawig na pagtios, naghahalat sa kahoy na magtao nin bunga sa saindo.