1 Asin ngonian, uminagi an panahon na kan si hading Benjamin makapagtaram nin siring sa saiyang manga tawo, siya nagpadara sa saindang katiripunan, nagmamawot na maaraman an saiyang manga tawo kun nagtuturubod sinda sa manga tataramon na saiyang sinabi sa sainda.

2 Asin sinda gabos nagkurahaw sa sarong tingog, na an sabi: Iyo, nagtuturubod kami sa gabos na manga tataramon na saimong sinabi sa samuya; asin man, samuyang aram an katunayan asin katotoohan huli kan Espiritu kan Kagurangnan na Mapangyari, na guminibo nin mapangyaring pagbabago sa samuya o sa samuyang manga puso, tanganing dai na kami nin pagmawot pa na maggiribo nin mararaot, alagad magpadaragos na maggibo nin katanusan.

3 Asin kami, sa samuyang sadiri, man, sa paagi kan daing-katapusan na karahayan kan Dios, asin sa manga pagpapahayag kan saiyang Espiritu, igwa nin dakulang pananaw kan manga maarabot; asin ta kun kaipuhan, kami makakapagpropesia kan gabos na manga bagay.

4 Asin ining pagtubod na nagkaigwa kami sa manga bagay na sinabi kan samuyang hadi sa samuya an nagdara sa samuya sa darakulang kaaraman na ini, na kun sain nag-orogma kami nin labi-labing kaogmahan.

5 Asin ta kami boot na lumaog sa sarong pakipagtipan sa samuyang Dios na gibohon an saiyang pagboot, asin magsunod sa saiyang manga tugon sa gabos na manga bagay na saiyang ipagboboot sa samuya, sa gabos na natatada kan samuyang manga aldaw, tanganing dai mi madara an samuyang manga sadiri sa daing katapusan na kapadusahan, sunod sa sinabi kan anghel, tanganing dai kami makainom sa kupa kan kaanggotan kan Dios.

6 Asin ngonian, ini an manga tataramon na minawot ni hading Benjamin sa sainda; kaya siya nagsabi sa sainda; saindong sinabi an manga tataramon na sakuyang minawot; asin an tipan na saindong ginibo sarong matanos na tipan.

7 Asin ngonian, huli kan pakipagtipan na saindong giniribo, kamo aarapodon na manga aki ni Cristo, saiyang manga aking lalaki, asin manga aking babae; huli nanggad, ta sa aldaw na ini saiyang iminundag kamo sa espiritu; huli ta saindong sinarabi na an saindong manga puso nagbarago sa paagi kan pagtubod sa saiyang pangaran; kaya kamo nagkamurundag saiya asin ta nagi kamong manga aki niyang lalaki asin manga aki niyang babae.

8 Asin sa irarom kan pamayo na ini kamo naging talingkas, asin ta dai nang ibang pamayo na kamo magiging talingkas. Daing ibang pangaran na itinao na kun sain an kaligtasan maabot; kaya sakuyang minamawot na saindong arakoon an pangaran ni Cristo, gabos kamo na naglaog sa pakipagtipan sa Dios na kamo maging masinurunod sagkod sa katapusan kan saindong manga buhay.

9 Asin ta maabot an panahon na an siisay man na maggibo kaini matukaw sa toong kamot kan Dios, huli ta saiyang maaaraman an pangaran na iaapod saiya; huli ta siya aapodon sa pangaran ni Cristo.

10 Asin ngonian ta maagi an panahon, na an siisay man na dai akoon sa sadiri an pangaran ni Cristo kaipuhan apodon nin ibang pangaran; kaya siya makukua sa walang kamot kan Dios.

11 Asin sakuyang minamawot na marumdoman man nindo na iyo ini an pangaran na sakuyang sinabi na sakuyang itatao sa saindo na dai nanggad mabubura, kun bako sa paagi nin paglapas; kaya magdangog tanganing kamo dai makalapas, tanganing an pangaran dai mabura sa saindong manga puso.

12 Sakuyang sinasabi sa saindo, sakuyang minamawot na saindong marumdoman na rimposon an pangaran na nakasurat sa saindong manga puso, tanganing dai kamo makua sa walang kamot kan Dios, alagad tanganing saindong madangog asin maaraman an tingog na maapod sa saindo, asin man, an pangaran na saiyang iaarapod saindo.

13 Huli paano mamimidbid kan sarong tawo an saiyang amo na dai man niya pinaglingkodan, asin dai niya midbid, asin harayo sa saiyang isip asin katuyohan kan saiyang puso?

14 Asin man, makua daw an sarong tawo kan asno kan saiyang kataed asin sadirihon siya? Sasabihon ko saindo, Dai; ni dai ngani niya papakakanon na kaibahan kan saiyang manga hayop, alagad ta idto saiyang aalawon paluwas, asin papahalion. Sinasabi ko sa saindo, siring man an mangyayari saindo sa saindong katiripunan kun dai nindo aram an pangaran na iaarapod saindo.

15 Kaya, sakuyang minamawot saindo na kamo maging masasarig asin dai nahihiro, dayaday na nagsusupay sa marahay na manga gibo, tanganing si Cristo, an Kagurangnan na Dios na Mapangyari, tandaan kamo na saiya, na kamo madara sa kalangitan; na magkaigwa kamo nin daing-kasagkuran na kaligtasan asin buhay na daing-kasagkuran, sa paagi kan kadunungan, asin kapangyarihan, asin kasuripotan, asin pagkaherak niya na naglalang kan gabos na manga bagay, sa langit asin daga, na Dios sa ibabaw kan gabos. Amen.