1 Asin ta uminagi an panahon na kan si Abinadi makatapos na kan saiyang manga sinabi, an hadi pinagbotan an manga padi na dakopon siya asin ipagadan.

2 Alagad igwang saro duman sa sainda na an pangaran Alma, siya man saro sa manga gikan ki Nephi. Asin siya aki pa, asin nagtubod siya sa manga tataramon na sinabi ni Abinadi, huli ta saiyang aram an karaotan na pinatotoohan ni Abinadi laban sa sainda; kaya siya nakimaherak sa hadi na dai maanggot ki Abinadi, alagad tugotan na siya maghali nin matiwasay.

3 Alagad an hadi orog pang naanggot, asin binoot niya na halion siya sa saindang katiripunan, asin ipinadara an saiyang manga surogoon tanganing gadanon siya.

4 Alagad siya nagdulag sa sainda asin itinago niya an sadiri niya tanganing dai siya nakua. Asin ta siya nakatago nin dakol na manga aldaw, isinurat an gabos na manga tataramon na itinaram ni Abinadi.

5 Asin ta uminagi an panahon na an hadi nagsugo na an saiyang manga bantay parilibotan si Abinadi asin kuahon siya, asin saindang ginapos siya asin inapon siya sa karsel.

6 Asin pagkatapos nin tulong aldaw, matapos na maghuroron na kaibahan an saiyang manga kapadian, siya nagboot na siya darahon giraray sa atubangan niya.

7 Asin siya nagsabi sa saiya; Abinadi, nakakua kami nin sumbong laban saimo, asin ika nababagay na gadanon.

8 Huli ta sinabi mo na an Dios siya nanggad mababa sa manga aki nin tawo; asin ngonian, huli sa dahilan na ini ika gagadanon sagkod na bawion mo an manga tataramon na saimong sinabi na mararaot manunungod sakuya asin sa sakuyang manga tawo.

9 Ngonian si Abinadi nagsabi saiya: Sakuyang sinasabi sa saimo, dai ko babawion an manga tataramon na sakuyang sinabi sa saindo manunungod sa manga tawo na ini, huli ta idto manga totoo; asin tanganing saimong maaraman an katunayan kan manga ini, sakuyang titioson na an sakuyang sadiri na ako mahulog sa saindong manga kamot.

10 Iyo, asin ta titioson ko sagkod sa kagadanan, asin ta dai ko babawion an sakuyang manga tataramon, asin an manga ini magtitindog siring sa sarong patotoo laban saindo. Asin ta kun gagadanon ako nindo, kamo magpapaburulos nin daing salang dugo, asin ini man magtitindog bilang sarong patotoo laban sa saindo sa manga huring aldaw.

11 Asin ngonian si Hading Noah papaluwason na kuta siya, huli ta siya natakot sa saiyang manga tataramon; huli ta siya natakot na an paghukom kan Dios umabot saiya.

12 Alagad an manga kapadian nagtaraas kan saindang manga tingog laban saiya, asin nagpoon na magsaot sa saiya na an sabi: Siya nagpakaraot sa hadi. Kaya an hadi naanggot nin labi-labi laban saiya, asin ta siya nagtugot na siya gadanon.

13 Asin ta uminagi an panahon na siya kinua asin ginapos asin hinampak nin binurugkos na manga sanga nin kahoy, iyo, sagkod sa kagadanon.

14 Asin kan magpoon na siyang masulo kan kalayo, nagkurahaw siya sa sainda na an sabi:

15 Magdarangog kamo, siring sa giniribo nindo sa sakuya, siring man maabot an panahon na an saindong ipapangaraki papangyarihon na dakol saindo an magtitirios nin kulog siring sa sakuyang namamatian, sagkod kan kulog nin kagadanan sa kalayo; asin ini huli ta sinda nagtuturubod sa kaligtasan kan Kagurangnan nindang Dios.

16 Asin ta maagi an panahon na kamo magsasakit nin gabos na palaen-laen na hilang huli sa saindong karaotan.

17 Iyo, asin ta kamo haharampakon sa lambang kamot nindo, asin kamo isusurubol asin iwawaragas digdi asin duman, siring sa manga lumalaw na hayop na inaralaw kan mababangis asin maiisog na manga hayop.

18 Asin sa aldaw na idto kamo haharanapon asin kamo dadararahon kan kamot kan saindong manga kaiwal, asin dangan kamo magtitirios siring kan sakuyang pagtios, kan kagadanan sa kalayo.

19 Siring an Dios naggigibo kan saiyang pagbalos sa manga nanggagadan kan saiyang manga tawo. O Dios, akoa an sakuyang kalag.

20 Asin ngonian, kan maitaram na ni Abinadi an manga tataramon na ini, siya natumba, pagkatapos na magtios nin kagadanan sa kalayo; iyo pagkatapos na gadanon huli ta dai niya inindahan an katugonan kan Dios, pagkatapos na maipahiling an katotoohan kan saiyang manga tataramon sa paagi kan saiyang pagkagadan.