1. Bix bant que nnel baj aj treinta y cuatro abkʼi, bix ax icyx aj treinta y cinco abkʼi; bix lutzan luʼ, ajke txnaʼkʼtzben Jesús otak baj cyxnutxʼan Glesya te Cristo tuj cyakil twitz txʼotxʼ nakaʼyan. Bix nok nicyʼ punkaj aj ncheʼxax tuj, bix naʼja cyiʼn cyanma ax toclen tiʼj twitz cyil, biyaman tuj tbi Jesús; bix ax ncycʼamke aj Xewbaj Sant.

2. Bix banttzan que tuj abkʼi treinta y seis otak chi meltzʼaj tiʼj Kajaw cyakilka xjal, tuj cyakil twitz txʼotxʼ, tzaʼnx ke nefitas bixke lamanitas; bix ntiʼ xcyʼakbil cyxol, bix oc cbantel cybinchben tuj tligaral tuʼn jun tucʼ juntl.

3. Bix mojantak cyuʼn ajke cosas cyakil; cyjaʼtzan jluʼ, ntiʼ tak kʼinan mix meba, mixke pres mixke tzakpiʼn, sino que cyakilka tzakpiʼnka bix a juntak ka tiʼj oyj tuj cyaʼj.

4. Bix bajtzan que tuj abkʼi treinta y siete ax oten tzalajibil twitz txʼotxʼ.

5. Bix ajke txnaʼkʼtzben Jesús ibant matij bix cyeʼyaxke binchben cyuʼn, cyjaʼtzan ibanix yab cyuʼn, ijaw itzʼj cyimna cyuʼn, o bant cybet cox cyuʼn, xiʼ cykʼoʼn cywitz moẍ tuʼn cyqueʼyin bix bant cybin kej xon cyuʼn; bix bantke nim binchben aj nim tipamal cyuʼn cyxol cycʼwaʼl xjal bix ntiʼ ibant binchben nim tipamal, más oʼcx tuj tbi Jesús.

6. Cyjaʼtzan el baj abkʼi treinta y ocho, treinta y nueve, cuarenta, cuarenta y uno, bix cuarenta y dos; icytzanjo, asta tuj abkʼi cuarenta y nueve bix cincuenta, cincuenta y uno bix cincuenta y dos; icyztzanjo, asta tel baj abkʼi cincuenta y nueve.

7. Bix Kajaw onan cyiʼj tuʼn cyjaw jawna tuj akʼuntl twitz txʼotxʼ; icytzanjo, acʼaj jaw cybinchan tnam tuj juʼn ligar jatuma otak chi tzʼeʼy.

8. Icytzanjo, bix jaw cybinchaʼntl juntl el te acʼaj aj tnam te Zarahemla.

9. Per attak nimke tnam otak chaʼj jokpaj, bix noktzan aʼ otak jaw canet te cyxel; cyjaʼtzan jluʼ, ajke tnam j-ajo mitiʼ o bant tuʼn cyjaw binchat juntl el te acʼaj.

10. Bix banttzan que aj tnam te Nefi cyiw iocatl, bix ochʼiy joratx, bix o canan tuʼn toc jun tnam cyeʼyax bix te ajbil wena.

11. Bix kittzan cynajan bix kit cyocx tuj najabil, bix itzajtzan cyʼiwlaʼn ictzan ajke nim tziybil tzaj tkʼoʼn Kajaw.

12. Bix ya ntiʼ ijoʼc lapeʼtl tiʼj ceremonia bix tley Moisés, sinoque txkanx ooc cyqueʼyin cyiʼj mandamyent otak tzaj cycʼamoʼn te cyAjaw bix cyDios, cocʼxix apaʼn weʼyaj cyuʼn bix cynaʼjl Dios, bix kittzan toc cychmon cyib cocʼxix tuʼn cynan Dios bix tuʼn cybin tiʼj tyol Kajaw.

13. Bix banttzan onaj nicyʼca xcyʼakbil cyxol xjal tuj cyakilxa tnam; bix ajke txnaʼkʼsben Jesús ibant ajke matij binchben nim cyipamal cyuʼn.

14. Bix banttzan que el baj abkʼi setenta y uno bix setenta y dos; icytzanjo, asta setenta y nueve, icytzanjo, bix asta otak tzʼel baj jun syent abkʼi, bix ajke xjal otak choc tyeʼcʼn Jesús otak txiʼ cycʼuʼn cyib tuj lugar cyeyixix te Dios, paraiso tbiʼ, per miʼnkej ox aj cucx tuʼn cyten; bix xiʼ kʼot cyipamal txkantl xjal te cyxelke; bix ax nimkej tuj ankʼibl ajo otak chi cyim.

15. Bix banttzan que ntiʼ moybil tuj tnam, nok tuʼn tlaj aj tcʼuʼjlabil Dios aj n-ankʼintak tuj cyanma tnam.

16. Bix ntiʼ aj nkʼojl tcʼuʼj tiʼj juntl, mix moybil, mixke pantyon, mix aj tnachal tuʼn tbant tuʼn xinak tucʼ aj miyaʼ tej, mix slaʼj, mix biyenj, mix achbil tiʼj jun xuʼj tuʼn toc binchat tnachal tiʼj; bix axix toc mitiʼ tnam cyeʼyax icytzanke cyxolkej tzaʼnx cytenca otak chi tzaj bant tuʼn tkʼab Dios.

17. Mitiʼtajke alekʼ, mixke biyanel, mixke lamanitas, mix jun wik itas, sino que junxke, tcʼwaʼl Cristo bixke kʼil te erens tkʼukʼbil Dios.

18. ¡Bix nimxax itzaj cyʼiwlaʼn! Tuʼnj itzaj cyʼiwlaʼn tuʼn Kajaw tuj cyakil cybinchben; icytzanjo, itzaj cyʼiwlaʼn bix ionjs tuʼn cyjaw jawna asta tel baj jun syent laj abkʼi. Bix aj tnejal tiyijil ankʼbil yajxa tiʼj Cristo otak chi cyim; bix ntiʼtak moybil tuj cyakil tnam.

19. Bix banttzan que Nefi, cʼuʼntak tuʼn ajke twiʼpan storya, ncyimca (bix kʼiʼntak storya cywitz ke sleʼw cʼuxbil te Nefi); bixj tcʼwaʼl aj Amós atzanjo xiʼ kʼintl te te t-xel; bix ax cywitz sleʼw cʼuxbil te Nefi cubl tuʼn.

20. Bix xiʼ tiʼn ochenta y cuatro, bix cucxtak at tzalajibil twitz txʼotxʼ, per noktzan jun ni piẍ part te tnam otak txiʼ cycoʼlan tuʼn toc cyocslaʼn tiʼj glesya bix otaktzan txiʼ cyiʼn cyibaj aj cybi lamanitas. Cyjaʼtzan nkeʼ juntl el tuʼn cyten lamanitas tuj tnam.

21. Bix bant que ax ncyim Amós (Bix atxax tuj ciento noventa y cuatro abkʼi aj tul-len Cristo), bix aj tcʼwaʼl, aj Amós, nxiʼ tiʼntl storya te t-xel; bix ax cub ttzʼiban cyuj sleʼw cʼuxbil te Nefi, bix ax cub tzʼibat tuj tuʼj Nefi, que aj uʼj luʼ.

22. Bix banttzan que otak tzʼel baj cab syent abkʼi; bix tzaʼnx cytencakej tuj tcaban tiyijil ankʼibil otak chi cyim, banwtla atxtak juʼn ke iteʼx.

23. Bix a kina, Mormón, wajbila tuʼn cybintaya que aj tnam otak jaw tajlal cyjaʼtzan cysipantak cyib tuj cyakil tnam, bix otak choc tmakal kʼinan, nok tuʼnj jawna ijaw tiʼj Cristo.

24. Per tuj abkʼi ajo, tuj cab syent jun, o keʼ tuʼn ten cyxol juʼnke ijaw nim, icytzanj tuʼn toc cykʼoʼn cyxbalan nim twiʼ, bix nicyʼca wik xak uʼxke bix nicycʼa cyeʼyax te twitz txʼotxʼ.

25. Bix tuj tyemp ajo ncyaj cykʼoʼn tuʼn ten tbanel bixj etzan cyuʼn aj tuʼn tcuʼb tuj moj.

26. Bix nkeʼtzan tuʼn cyel sputj, bix tuʼn cybant glesya nok tun cyoc kʼinan; bix nkeʼtzan tuʼn tel cyicʼan aj Glesya te Cristo ax toc.

27. Bix banttzan que aj otak tzʼel baj cab syent laj abkʼi, ya attak tuj tnam nim tajlal ke glesya; icytzanjo, attak nim txkan glesya bix xiʼ cymaʼn tuʼn toc cyqueʼyin Cristo, bix jluʼtzan, ncub cyeʼwan tnimal yol tiʼj tbangelyo, atzan tuʼmal cuʼ cyapaʼn nicyʼca wik tnachal, bix nchisipantale cyiʼj cyʼiwlaʼn maja cyekej miyaʼ baʼn tuʼn t-xiʼ kʼot cye tuʼnj miyaʼ tbanalke.

28. Bix aj glesya ajo o tzʼel bichan wena nok tuʼn tnachal, bix tuʼn tipamal Satanás aj otak tzʼel etzan cyanma tuʼn.

29. Bix attak juntl Glesya cuʼ teʼwan Cristo; bix aj ajo ijoʼc lapeʼ biyol cyeke lepẍtak tiʼj Glesya te Cristo ax toc nok tuʼnj aj ncub cybecyʼbiliʼn cywitz bix cyocslabil tiʼj Cristo; bix ijoc kʼojleʼn nok tuʼnj kej nim binchben nim tipamal nbanttak cyuʼn cyxol.

30. Cyjaʼtzan jluʼ, kʼiʼntak cyipamal cyibaj txnaʼkʼtzben Jesús, aj otak chi cyajten cyucʼal, bix i ocx kʼoʼntak pres; per nok tuʼn tipamal tyol Dios aj attak cyibaj, caʼbx ijeʼla ke tjayl tzeʼ, bix kittzan cyetz binchal binchben nim tipamal cyxol tnam.

31. Oʼcxtzan chʼin, bix cyiʼjxatzan tzaʼnx cytenca binchben nim cyipamal, o loʼch cyanma tnam bix oc cyjayoʼn tuʼn cybiyet, icytzankaj Judíos te Jerusalén o bant cyuʼn tuʼn tcub cybiyoʼn Jesús, ictzan tyol.

32. Bix nchocx kʼoʼn cyuj jorna nchi cʼant wena; bix oc cyetztl ntiʼ otak baj mi jun tnachal tiʼj cyxumlal.

33. Bix ax i-ocx kʼoʼn tuj picy ja teʼcx txcup baʼn chi chon xjal bix ischan lonxa icytzanj jun nuʼẍ nschan tucʼ jun tal neʼl; bix i-etz tuj bix ntiʼ tnachal otj baj tiʼj cyxumlal.

34. Oʼcxtzan chʼin, ocyiwax cyanma tnam, tuʼnj attak nimke sacerdote bix profetas tzacaj que ijoc kʼakʼan tiʼj tuʼn cybant nim glesya bix tuʼn cybant nim tnachal. Bix icaban tnam Jesús tuʼnjo; per aj ttanma Jesús ntiʼ aʼjal cymaktzʼuʼn tmoj. Cyjaʼtzan ntiʼ ipon tiʼj tuʼn mi tocx cyocslaʼn tnachal tuj juʼn abkʼi, asta el baj cab syent tucʼ treinta abkʼi.

35. Bix banttzan tuj abkʼi ajo icytzanjo, tuj abkʼi cab syent tucʼ treinta y un abkʼi obant jun matij tuʼmal tuʼn tel caba cʼloj tnam.

36. Bix banttzan que tuj abkʼi ajo njaw weʼ jun cʼloj que oc cykʼoʼn cybi te nefitas, que akajo aj ax toc ocslaʼn cyuʼn tiʼj Cristo; bix akatzan aj jacobitas, josefitas bix zoramitas cybi cyuʼn lamanitas;

37. Cyjaʼtzan jluʼ ajke ax toc ocslaʼn cyuʼn tiʼj Cristo bixkej ax toc nchi nan Dios twitz Cristo (bix cyxol ajo atak teʼ aj ox txnaʼkʼtzben Jesús ajke otak chi ten) atzan cybi nefitas, jacobitas, josefitas bix zoramitas;

38. Bix banttzan que alcyekaj cyicʼan bangelyo, atzan cybi lamanitas, lemuelitas bix ismaelitas bixkej ajo ntiʼ icub tzʼak tuj aj mitiʼ ocslaʼn, sinoque ax cyuʼnx cyib iaʼjal maktzʼaj tucʼ tnachal tiʼj bangelyo te Cristo; bix cub cyyecʼan te cycʼwaʼl tuʼn mi tocx cyocslaʼn, icyxtzanj cyman, atxax ttzaj keʼ.

39. Bix nok tuʼn tnachal bixke twitz il jun majx nachka te cyman, icytzanj ttzajlen keʼ. Bix icub xnakʼtzaʼn tuʼn cykʼojan cyiʼj tcʼwaʼl Dios, tzanx ax tuʼmal icub xnakʼtzet lamanitas tuʼn cykʼojl cyiʼj cycʼwaʼl Nefi atxax ttzajlen keʼ.

40. Bix banttzan que otak tzʼel baj cab syent tucʼ cuarenta y cuatro abkʼi, bix cyjaʼtza taʼtak ke tumal tuj tnam. Bix aj tuʼmal junmajx nach nimca oten tipan, bix oc más nimtl twitz aj ttanma Dios.

41. Bix cucx ibinchan cyiʼj glesya, baj cypitxan tiʼj tucʼ nicyʼca wikal cosas cyeʼyax. Cyjaʼtzan el baj cab syent tucʼ cincuenta abkʼi, bix ax icyx tjapan cab syent tucʼ sesenta abkʼi.

42. Bix bant que aj tnachal tej tnam o keʼ juntl el te acʼaj ajke tziybil tuj ewj bix aj samobil te Gadiantón.

43. Bix ax nkeʼ tuʼn ten nimbil tuj cyanma aj tnam a tbi, tnam te Nefi, nok tuʼn tlaj cykʼinamabl, bix nok gana ijoc icytzankej cyermana lamanitas.

44. Bix atxaxtzanjo nkeʼtzan tuʼn ten cybis ke txnakʼtzben Jesús cyiʼj twitz il te twitz txʼotx.

45. Bix banttzan que, otakxa tzʼel baj ox syent abkʼi, tzanxke nefitas bixke lamanitas otak chi meltzʼaj jun majx txuʼj xjalke, tzaʼnxke txkan icyxka icytzan txkantl.

46. Bix banttzan que ajke alekʼ te Gadiantón i-chmetxix tuj cyakil tnam: bix cyjunalxke txnaʼkʼtzben Jesús tbanalke ateʼtak. Bix aj tnam otxiʼ tcʼuʼn nim oro bix plata: bix icʼayan tiʼj nicyʼca wikal cʼaẍjel.

47. Bix banttzan que otakxa tzʼel baj ox syent jweʼ abkʼi (bix tnam cucx iten tuj cynachal), ncyim Amós; bix aj titzʼan Ammarón atzanjo cyaj te t-xel cʼulta-ke.

48. Bix otakxa tzʼel baj ox syent tucʼ veinta abkʼi, bant que Ammarón, lamoʼntak tuʼn Xewbaj Sant, ncheʼx teʼwan ajke storya cyʼiwlaʼn, icytzanjo, cyakilkaj storya sant aj otak chi bant tuj juʼn tiyijil ankʼbil, ax tenjo tuj ox syent tucʼ veinta abkʼi tulenxa Cristo.

49. Bix ijeʼx teʼwan según aj tnabil Kajaw, tuʼntzan tajtz maktzʼaj juntl el te cye ttxʼaban ja te Jacob, ictzan aj jun tyemp nkʼunj bix aj ttziybil Kajaw. Cyjaʼtzan njapan baj storya te Ammarón.