1 Kʼad Alma, Amulek bizaad Zeezrom yidiiłheelígíí yiyiiłtsą́ągo, Amulek Zeezrom biyoochʼííd dóó bidiyoołhéełgo binííʼaʼígíí yiyiiłtsą́ągo, dóó asiihígíí yaa ákoniizį́įʼgo bitah hoditsxiz áboolíłígíí yiyiiłtsą́ągo, bizééʼ ąą áyiilaa dóó yichʼįʼ haadzííʼ, dóó Amulek bizaad bił nilį́įgo, dóó bighą́ąʼjįʼ dooleełígíí, éí doodago Diyin God bizaad Amulek yee haadzíʼígíí biláahgo ííshją́ą́ íidoolííł.

2 Kʼad Alma bizaad Zeezrom yee yichʼįʼ haadzíʼígíí diné tʼáá ałtso deidiiztsʼą́ą́ʼ; háálá ląʼída diné hólǫ́, dóó díí saad yee haadzííʼ:

3 Kʼad Zeezrom, niyoochʼííd dóó ninaʼadloʼígíí bee haʼndoolʼį́łígíí yiiltsą́ągo, háálá doo diné tʼéiyá bichʼįʼ niyoochʼíid da ńtʼę́ę́ʼ ákondi Diyin God bichʼįʼ niyoochʼííd ńtʼę́ę́ʼ; jó áko, nintsékees tʼáá ałtso bił bééhózin, dóó nintsékees biiʼSizíinii bee nihił béédahoozingo yiniłtsą́;

4 Dóó yiniłtsą́ ninahatʼaʼ tsʼídá tʼáá íiyisíí naʼadloʼgo nahatʼaʼ átʼéhígíí nihił béédahózin, chʼį́įdii beʼiiníziinii binaʼadloʼígi átʼáo, háálá díí diné bichʼįʼ niyoochʼííd dóó nihikʼijįʼ danilį́į dooleełgo naniloʼ, áko danihódziih dóó chʼídanihidínóołkałgo—

5 Kʼad díí niheʼenaʼí chʼį́įdii binahatʼaʼ átʼéé ńtʼę́ę́ʼ, dóó beʼadziilii niyiʼ choyoosʼįįd. Kʼad díí béénílniih dooleeł bee nił hashneʼígíí éí tʼáá ałtso bee bił hashneʼ.

6 Jó áádóó tʼáá ánółtso ánihidishní díí anaʼí chʼį́įdii bibee ódleeh átʼé, díí diné yidoolohgo yá niiníʼą́, áko nanihiloʼ dooleeł biniiyé, áko bibéésh daʼahólzhaʼí yee nihidaʼaztłʼǫ́, beʼiłnaʼiideeł bidziilígíí bikʼehgo.

7 Kʼad Alma díí saad yee haadzíiʼgo, Zeezrom tʼáá íiyisíí bitah ahodiʼniitłid, Diyin God bibee adziilii hózhǫ́ dóó hózhǫ́ yaa ákoniizį́ʼígíí biniinaa; dóó Alma dóó Amulek shíniʼ bił bééhózin nízingo ałdóʼ yaa ákoniizį́į́ʼ, áko bintsékees dóó bijéí yinízinígíí bił bééhózin nízingo yaa ákoniizį́į́ʼ; háálá adziilii tʼáá áła beilyá bee náásgóó ádahodooníiłiijí adziilii binahjįʼ díí bił bééhodoozįįł biniiyé.

8 Dóó Zeezrom tʼáá íiyisíí naʼídííníłkid, áko Diyin God bił hazʼą́ądi hózhǫ́ baa ákodínéesįįł nízingo. Dóó Alma iiłní: Díí daneeznánígíí nááʼdiijeeh Amulek yaa haadzíʼígíí haʼátʼíísh ááyiłní, éí tʼáá ałtso daneeznáádę́ę́ʼ náádidoojah, tʼáá ákogi dóó doo tʼáá ákogi ádaatʼéii tʼáá áła, dóó Diyin God bidááhdóó nihidookah yindaashnishę́ę bikʼehgo bá ndahodootʼááł?

9 Dóó kʼad Alma díí tʼáadoo leʼé yee yił ahoʼniilneʼ, kóníigo: Diyin God binaʼnitin tʼah doo ííshją́ą́ álnéehii ląʼída bił béédahodoozįįłígíí hólǫ́; ákótʼée ndi tʼáá íiyisíí bizaad bił dahóóneʼ bizaad diné kʼad bá dooleełígíí tʼéiyá bił ííshją́ą́ ádoolnííł, tʼáá íiyisíí dabíistsʼą́ʼígíí bikʼehgo.

10 Dóó éí bąą, bijéí yistłʼisígíí, saad áłtsʼíísígo baa doolyééł; dóó doo bijéí yistłʼisígíí, saad ląʼígo baa doolyééł, wónáásdóó tʼáá ałtso Diyin God binaʼnitin tʼah doo ííshją́ą́ álnéhígíí baa doolyééł.

11 Dóó bijéí deiłtłʼisígíí, Diyin God bizaad tʼáá achʼįʼgo baa doolyééł wónáásdóó Diyin God binaʼnitin tʼah doo ííshją́ą́ álnéehii doo bił béédahózin da dooleeł; dóó chʼį́įdii beʼiiníziinii dabidoosił, dóó yikééʼ deíkáahgo dadínóonééł. Kʼad díí óolyé chʼį́įdiitah bibéésh daʼahólzhaʼii.

12 Dóó Amulek anoonééł doo nanitłʼahgóó yaa hoolneʼ, dóó díí atsʼíís anoonééł bidééłníinii atsʼíís doo anoonééł bidééłníijįʼ hiná ńdadoodleeł, dóó Diyin God dah sidáajįʼ ndahidoodlóós, dóó ndaashnishę́ę bikʼehgo bá ndahidiyootʼááł.

13 Índa nihijéí dáátłʼisgo, aooʼ, saad bikʼijįʼ nihijéí dáátłʼisgo, nihiyiʼdóó siláago hádeilʼį́įʼgo, índa éí tʼóó baaʼihgo nihił hazʼą́ą doo, háálá índa nihá nihodootʼááł.

14 Háálá nihizaad nihá nihodooʼááł, aooʼ, nihinaanish tʼáá ałtso nihá nihodooʼááł; doo chin nihąąh ádin da dooleeł; dóó nihintsékees ałdóʼ nihá nihodooʼááł; dóó kóniitʼéego Diyin God bichʼįʼ dídíitʼįįłgo doo bííníigah da dooleeł; dóó nihił hózhǫ́ǫ dooleeł dził dóó tsé nihikʼiiłdáás bidiiʼníigo nanihiniłʼin dooleeł.

15 Ndi díí éí dooda; beʼayóó átʼéii, dóó beʼadziilii, dóó beʼatsxeʼii, dóó beʼaláahdi átʼéii, dóó bibee bíhólníihii, bee bidááhdóó deidiidzįįł, dóó hoolʼáágóó baa yá niidzin dooleeł tʼáá ałtso yee nahwiiʼaahii tʼáá ákogi ádaatʼéego; dóó tʼáá ałtso binaanish tʼáá ákogi átʼáo ííłʼį́, dóó diné bibaʼáłchíní yaa joobaʼ, dóó diné tʼáá ałtso bízhiʼ dayoodlánígíí dóó beʼiinaʼ łahgo áńdayiidlaago yitʼínígíí yisdéidooniłgo bidziil.

16 Jó dóó kʼad, índa anoonééł bá hooʼaah nihidishní, naakigo anoonééł wolyé, éí iiʼsizį́kʼeh anoonééł; ákohgo háiida tʼáá doo beʼiinaʼ łahgo ánáyiidlaago ádin silį́įʼgo, atsʼíískʼeh anoonééłjígo, éí ałdóʼ iiʼsizį́kʼehgo ádin dooleeł; aooʼ, tʼáá ákogo éʼélʼíinii bikʼehgo ádin dooleeł.

17 Índa ahodoolzhish bichʼįʼ nahwiiʼnánígíí łeetsoii dookʼą́ą́ł bił beʼekʼid nahalin dooleeł, éí kǫʼ ahoolʼá dóó hoolʼáágóó dego dookʼą́ą́ł; dóó índa dah dabiʼdiistłʼǫ́ǫgo hoolʼáágóó ádaadin dooleeł, Satan beʼiiníziinii bibee adziilii dóó beʼasnááh bikʼehgo, háálá íinízinígíí bikʼehgo ndabididloʼgo áyiilaa.

18 Índa, ándishní, tʼáadoo bá nináʼílyáa da nahalin dooleeł; háála doo éí Diyin God bitʼáá ákogi átʼéii bee bá nináʼdooyéeł da; dóó doo dínóonéeł da, háálá didoołdziłígíí ádin silį́į́ʼ.

19 Áádóó kʼad Alma ałtso saad yee haadzíiʼgo, diné tʼáá íiyisíí biyaa dahodeesyiz;

20 Ndi ła Antionah, aláahgo naatʼáanii nilį́įgo, haa níyá dóó áháłní: Díí haʼátʼíísh ááłdiní, diné anoonéełdi náádidoodááł dóó anoonééł ídééłní dóó doo anoonééł ídééłní bił hazʼą́ąjįʼ łahgo ádoonííł, áko atsʼíís dóó iiʼsizíinii doo dadootsaał da?

21 Diyin God bizaad haʼátʼíísh ááhiłní, éí Diyin God bá ndaalʼaʼí dóó bééshhał dookʼą́ąłgo dáʼákʼeh Edendi haʼaʼaahjígo niinílá, tsʼídá áłtsé nihimá dóó nihizhéʼé doo dáʼákʼehgi dooʼashii tsin bee iináanii bineestʼąʼ yidooyį́įłgo, dóó hoolʼáágóó hináa dooleeł? Dóó ákótʼáo deiiltsą́ hoolʼáágóó hináa dooleełígíí tsʼídá doo bá bihónéedzą́ą da silį́į́ʼ.

22 Kʼad Alma áháłní: Díí tʼáadoo leʼé kʼad baa ahoʼniishneʼ ńtʼę́ę́ʼ. Kʼad Adam tsin bineestʼąʼ doo dííyį́įł da biʼdooʼniid yę́ę yiyííyą́ąʼgo asiihgo adáátłizh, Diyin God bizaad bikʼehgo; dóó ákótʼáo deiiltsą́, díí asiihgo adáátłizhígíí biniinaa, diné tʼáá ałtso yóó eekai dóó niʼiilzíihjįʼ adaheezhtłizh.

23 Jó dóó kʼad, nił hashneʼ Adam áadi hoolzhishgo tsin bee iiná bineestʼąʼ yidooyį́łígíí bee bá hazʼą́ągo, anoonééł ádin doo ńtʼę́ę́ʼ, dóó Diyin God bizaad éí doo ílį́į da doo ńtʼę́ę́ʼ, Diyin God biyoochʼííd ńtʼę́ę́ʼ, háálá ádííniid: Yinííyą́ągo tʼáá aaníí dadíítsaał.

24 Dóó yiitʼį́ nihookááʼ dineʼé ánoonééł yaa hidookah, aooʼ, ánoonééł Amulek yee haadzííʼ, eii éí atsʼíískʼehgo ánoonééł átʼé; ákótʼée ndi díí iiná łahgo álnéehgo bee hazʼą́ silį́į́ʼ; éí bąą díí iiná bee ndahwíínitaahgo bił hazʼą́ągo silį́į́ʼ; Diyin God baa doodáałgo hashtʼeʼádílnééh bee hazʼą́ hazlį́į́ʼ; hoolʼáágóó iiná bichʼįʼ hashtʼeʼádílnéehgo bee hooʼaʼ éí nihí bee haiidzííʼ, eii éí daneeznáanii náádiijeehígíí bikééʼdę́ę́ʼ bee hwiidooʼaał.

25 Kʼad, nináʼílyáago nahatʼáhígíí, éí nahasdzáán álnéhę́ędą́ą́ʼ niilyáhígíí ádingo, daneeznáanii náádidoojahígíí ádin dooleeł ńtʼę́ę́ʼ; ndi nináʼílyáago nahatʼáhígíí niilyá, éí daneeznáanii yinahjįʼ náádidoojah, éí bee haadzííʼ.

26 Jó dóó kʼad, tsʼídá áłtsé nihimá dóó nihizhéʼé tsin bee iiná bineestʼąʼ yidooyį́łígíí bee bá hazʼą́ągo éí hoolʼáágóó yínííł nilį́į́ ńtʼę́ę́ʼ, hashtʼeʼádílnéehgo bee hazʼánígíí ádin ńtʼę́ę́ʼ; dóó áko nináʼílyáago hootʼáłígíí bikʼehdeesdlį́į́ʼ doo ńtʼę́ę́ʼ, dóó Diyin God bizaad éí doo ílį́į da ńtʼę́ę́ʼ, dóó doo iʼiilaaʼí da ńtʼę́ę́ʼ.

27 Jó ndi, díí doo ákótʼée da, ndi nihookááʼ dineʼé dínóonéełgo bee nihootʼą́; dóó anoonééł bikééʼdę́ę́ʼ, bá ndahodootʼáałjįʼ nihidookah, éí nihootʼaah bee haiidzíʼę́ę átʼé, bee nahoníyáa dooleeł.

28 Dóó Diyin God díí tʼáadoo leʼé diné baa doolyééł dííniidgo, jó, índa díí tʼáadoo leʼé diné ádeidoolííł dííniidgo diné bił bééhózin dooleełgo yiyiiłtsą́.

29 Éí bąą Diyin God bá ndaalʼaʼii yił dahalneʼgo ayiisʼaʼ, áko diné beʼayóó átʼéii łaʼ yaa ákodanízingo áyiilaa.

30 Dóó wónáásdóó yichʼįʼ sodadilzingo yaa ńdiikai; éí bąą Diyin God diné yił halneʼ silį́į́ʼ, dóó nináʼílyáago nahatʼáhígíí yił ííshją́ą́ áyiilaa, éí nahasdzáán álnééhdą́ą́ʼ hashtʼeelyaa; dóó díí éí bedaʼoodląʼ dóó beʼiinaʼ łahgo áńdayiidlaa dóó binaanish diyingo yindaashnishígíí bikʼehgo yił ííshją́ą́ áyiilaa.

31 Ákohgo, diné beehazʼáanii yaa yiizlá, éí áłtsé beehazʼáanii atsʼíískʼehjí bídéétʼiʼígíí kʼídayiiztiʼí, dóó Diyin God nahalin daazlį́į́ʼ, yáʼátʼéehii dóó doo yáʼáshóonii bił béédahózingo, éʼélʼį́ bee hazʼą́ góneʼ dahólǫ́ǫgo ádaʼdiilyaa, éí doodago éʼélʼį́ bee hazʼą́ góneʼ dahólǫ́ǫgo ádaalyaa yáʼátʼéehii dóó doo yáʼáshóonii, bił danilínígíí dóó deinízinígíí bikʼehgo—

32 Éí bąą Diyin God beehazʼáanii baa yiizlá, nináʼílyáago hootʼáłígíí yił ííshją́ą́ áyiilaago índa, áko doo yáʼáshóonii doo ádeidoolíił da, naaki góneʼ anoonééł bą́ą́h ílínígíí biniinaa, éí éí hoolʼáágóó anoonééł átʼé tʼáá ákogo átʼéii bídéétʼiʼígíí biniinaa; háálá éí diné éí nináʼílyáago hootʼáłíjí adziilii bá ádin, háálá tʼáá ákogi átʼáo naʼanishii éí doo doolchxǫǫł da, Diyin God tsʼídá aláahdi biyáʼátʼéhígíí bikʼehgo.

33 Ndi Diyin God diné yichʼįʼ haadzííʼ, biYeʼ bízhiʼ bee, (díí éí nináʼílyáago hootʼáałii áyiilaa yę́ę átʼé) kóníigo: Niheʼiinaʼ łahgo áńdaahdléehgo dóó tʼáadoo nihijéí dantłʼizí, índa nihaa jiinishbaʼ dooleeł, shiYeʼ Tʼáá éí Tʼéiyá Yizhchíinii binahjįʼ;

34 Éí bąą, háiida beʼiinaʼ łahgo áyiilaaígíí, dóó doo bijéí daastłʼisígíí, éí ajoobaʼ baa doolyééł shiYeʼ Tʼáá éí Tʼéiyá Yizhchíinii binahjįʼ, éí éí bibąąhági ádaatʼéii bee baa ńdidootʼááł; dóó díí éí yáʼąąsh góneʼ yah adoogáałgo háádoolyįh.

35 Dóó háiida bijéí daastłʼisígíí dóó bąąhági átʼéii yaa naagháago, jó, tʼáá aaníí ádíshníigo shá háchįʼgo doo yáʼąąsh góneʼ yah adoogáałgo háádoolyįh da.

36 Dóó kʼad, shikʼisóó, jó ánihidishní, nihijéí dasootłʼisgo doo Bóhólníihii bił hazʼą́ góneʼ yah adoogáał da; áko nihibąąhági ádaatʼéii biniinaa bá háchįʼ nihichʼįʼ kóyiilaa áłtsé ályaahą́ągi átʼáo, aooʼ, bizaad akéeʼdi dóó alą́ąjįʼ yee nihoníʼánę́ę bikʼehgo, éí nihitsʼíís dóó nihiyiʼsizíinii hoolʼáágóó ádin dooleeł; éí bąą, akéeʼdi anoonééł nínée áhodoonííł ní, dóó áłtsé anoonééł nínée ałdóʼ áhodoonííł ní.

37 Dóó kʼad, shikʼisóó, háálá díí tʼáadoo leʼé nihił béédahózingo biniinaa, dóó tʼáá aaníí ádaatʼéego, niheʼiinaʼ łahgo ádadiilnííł, dóó tʼáadoo nihijéí dantłʼizí, áko Bóhólníihii nihiDiyin God bá háchįʼ doo nihikʼijįʼ kwíidoolííł da naaki góneʼ bibeehazʼáanii nihainíláhígíí doo bikʼeh honiilʼį́į́góó biniinaa; ndi yáʼąąsh góneʼ yah adiikah, éí éí hashtʼehoolyaago yee nihoníʼánígíí bikʼehgo.