1 Dóó kʼad, shiyeʼ, tʼáadoo leʼé nikʼis bee bił hweeshneʼígíí nááná łaʼ bighą́ąʼjįʼ bee nił nááhodeeshnih; Jó áko, daʼ nikʼis niłdzilgo sizínígíísh tʼáá baa ákonínízin, beʼoodląʼígíí, dóó tʼáá íiyisíí Diyin God bibeehazʼáanii yikʼeh hółʼínígíí? Jó, daʼ nizhónígo ná sizínígíí baa ákoninizį́į́ʼ?

2 Háálá kótʼáo doo nikʼisgi átʼáo shizaad bikʼeh honíłʼį́į da ńtʼę́ę́ʼ, Zoram bidineʼé bitahdi. Kʼad díí éí bee nikʼijįʼ nishłį́; hágoshį́į́ shidziil dóó shił ééhózin diníigo ádaa hóʼniihgo naniná.

3 Dóó doo tʼáá díí tʼéiyá da, shiyeʼ. Tʼáá íiyisíí baa yinííł nishłínígíí íinilaa; háálá naʼnitinę́ę bitsʼéíníyá, dóó kéyah Siron Laman bidineʼé bikéyahdi, ałjiłnii Isabel bichʼįʼ yóó íínílwod.

4 Aooʼ, diné bijéí ląʼída yóó iiniizʼáád; ndi díí éí doo bikʼididííʼáał da, shiyeʼ. Tʼáá naʼnítin doo ńtʼę́ę́ʼ, éí éí naa niilyáá ńtʼę́ę́ʼ.

5 Doo hanii nił bééhózin da, shiyeʼ, díí éí Bóhólníihii yijoołá; aooʼ, tsʼídá ałtso bąąhági ádaatʼéii biláahdi joodláii átʼé tʼáá hazhóʼó diné jiiłhéehgo éí doodago Iiʼsizį́ Diyinii da yóó azhdiʼáahgo tʼéiyá bitisgi átʼé?

6 Jó áko, łah Iiʼsizį́ Diyinii nihiiʼ hólǫ́ǫ ńtʼę́ęʼgo áádóó yóó adooʼą́ągo, dóó tʼáá nihił bééhózingo yóó adooʼą́ągo, jó, díí bąąhági átʼéii łaʼ éí éí doo bee ańdiʼdootʼáłígíí átʼé; aooʼ, dóó háíshį́į́ diyinkʼehgo tʼáá aaníinii dóó Diyin God hólóonii bił bééhózinii diné łaʼ yiyiisxį́įgo, jó éí hańdiʼdootʼáłígíí, éí tʼáá íiyisíí nanitłʼah; aooʼ, ándishní shiyeʼ, áko éí hańdiʼdootʼáłígíí éí tʼáá íiyisíí nanitłʼah.

7 Dóó kʼad, shiyeʼ, dooládóʼ Diyin God bichʼįʼ beehazʼáanii ayóó átʼéii doo bił asínísiih da dooleeł ńtʼę́ę́ʼ léiʼ nisin. Dooshį́į́ asínísiihígíí baa yáshtiʼ da dooleeł, dóó nitsʼíís dóó niyiʼsizíinii bee bichʼįʼ nahwiisnááʼ dooleeł ńtʼę́ę́ʼ, doo ná yáʼátʼééhgóó.

8 Jó ndi, naʼayínísiʼígíí tsʼídá doo Diyin God bitsʼąą ńdidííłʼį́įł da, dóó neʼiinaʼ łahgo íinilaago tʼéiyá nihoolzhiizhdi nikʼijįʼ yisdzoh dooleeł.

9 Kʼad shiyeʼ, neʼiinaʼ łahgo áńdíídlíłę́ę dóó nibąąhági ádaatʼéii nahjįʼ kódíílíłę́ę éí ná nisin, dóó tʼáadoo ninááʼ bee ádá nílį́įgo nanináhí, ndi díí tʼáá ałtso nahjįʼ kónílééh; háálá díí tsʼídá biʼiinilaago tʼéiyá, Diyin God bił hazʼą́ądi tsʼídá doo yidííłbįįł da. O, béénílniih, díí éí tsʼídá doo ánáádeeshníił da diníigo, bee nihoníʼaah.

10 Dóó ándishní tʼáá ní díí baa nanináhígíí nínaaí bee bił hólneʼ; jó háálá, tʼah ániid naniná, dóó nínaaí iiʼsizį́kʼehgo níká adoojah. Dóó binahatʼaʼ bikʼeh honíłʼį́į doo.

11 Tʼáadoo leʼé tʼáadoo biniiyéhígíí dóó binaa doo bíniʼ áháyáanii yóó anóóʼááh lágo; chʼį́įdii beʼiiníziinii nijéí ałjiłnii bikééʼ yóó anáánóóʼááh lágo. Jó, O shiyeʼ, tʼáá íiyisíí bąąhági átʼéii Zoram bidineʼé bitah yínílá; háálá baa nisíníyáhígíí dayiiłtsą́ągo shizaad doo dayoodlą́ą da daazlį́į́ʼ.

12 Dóó kʼad Bóhólníihii BiiʼSizíinii áshiłní: Naʼáłchíní yáʼátʼéehii baa naahkai bidiní, áko doo diné ląʼída dabijéi doochxǫǫłjigo yóó adeidooʼish da; éí bąą, ándishní, shiyeʼ, Diyin God báhádzidígíí binahjįʼ, bąąhági átʼéii baa nanináhígíí niʼ ánílééh,

13 Áko nintsékees, dóó neʼadziil, dóó neʼatsxeʼígíí tʼáá átʼé bee Bóhólníihii bichʼįʼ naniná; áko doo łaʼ bąąhági átʼéii biih náádííʼish da; ákondi bichʼįʼ ńdídááh, dóó asínísiihígíí dóó bąąhági átʼéii baa nisíníyáhígíí bee bił náhólneʼ.

14 Nihookááʼ bikááʼgóó naadeełí dóó tʼáadoo biniiyéhígíí tʼáadoo bíká áńtʼíní; jó háálá, díí ádaatʼéí yíjihgo doo bíighah da.

15 Dóó kʼad, shiyeʼ, łah tʼah bee nił hodeeshnih nisin díí éí Christ yigháhígíí. Jó, ándishní, bí éí tʼáá aaníí nihookááʼ dineʼé bibąąhági ádaatʼéii nahjįʼ kwíidoolííł; aooʼ, haneʼ yáʼátʼéehii diné yee yisdádookahii yaa halneʼgo doogááł.

16 Dóó kʼad, shiyeʼ, díí bee naʼnítin doo biniiyé nikʼihodiiniiʼ, díí haneʼ yáʼátʼéehii diné bee bił hólneʼ, doo bintsékees bíniʼ hashtʼedeidoolííł biniiyé; éí doodago yisdáʼiildééh yaa hidookah, áko baʼáłchíní bintsékees hashtʼedeidoolííł áko níyáago saad deididootsʼį́į́ł biniiyé.

17 Dóó kʼad haadaníłtsogo níniʼ ndiniishtłóóh díí bee nił hashneʼígíí. Jó, haalá yitʼéego díí ádahodooníłígíí tʼáá bítséedi bééhózin lá nínízingo baa ntsíníkees. Jó, ándishní, daʼ kʼad iiná Diyin God bił nílínígíísh tʼáá ákótʼéego bił nílį́į doo níyáago?

18 Daʼ díísh tʼáá íiyisíí á nináʼílyáajįʼ nahatʼá díí diné bił ííshją́ą́ ádoolnííł dóó náásgóó badaʼáłchíní danilį́į dooleełígíí ałdóʼ bił ííshją́ą́ ádoolnííł nínízin?

19 Daʼ Bóhólníihii yá naalʼaʼii haneʼ yáʼádaatʼéehii doo nanitłʼahgo kʼad yee nihił halneʼígi átʼéhígíísh nahaʼáłchínídóʼ yee yił hodoolnih, éí doodago níyáádóó yíwohjįʼ?