Alma Binaaltsoos
Alma Biyeʼ

1 Áádóó kʼad éí Alma Diyin God bizaad diné yee neidíníitą́ą́ʼ, Zarahemladóó hahoolzhiizh, dóó áádę́ę́ʼ tʼáá ałtso kédaayahgóó.

2 Dóó tʼáá bí naʼasdzooígíí bikʼehgo éí, díí saad Zarahemladi kin dashijaaʼídi diné sodizin bá hooghan yihidiikaaígíí yee yichʼįʼ hahaasdzííʼ, kóníigo:

3 Shí, Alma, éí shizhéʼé Alma, díí Diyin God bisodizin bá hooghan biHigh Priest nílį́į doo shił níigo shíísį́į́ʼ, bí éí Diyin God bibee adziilii dóó bibee óhólníihii bąąh siláhígíí binahjįʼ díí áálnííł, jó, ánihidishní Nephi bikéyah nineelʼą́ądi sodizin bá hooghan niinílá; aooʼ, díí kéyah éí Mormon bikéyah wolyé; aooʼ, dóó bikʼisóó danilíinii Mormon bitoʼdi tó yee yiyíísį́į́ʼ.

4 Jó áádóó, ánihidishní, díí diné éí aláahdi naatʼáanii Noah bidineʼé biyaa hanááʼnil, Diyin God bibee ajoobaʼ dóó bibee adziilii bee.

5 Jó áádóó, díí bikʼijįʼ, Laman bidineʼé díí diné doo kéédahatʼį́įdi ąąh shijéeʼgo ádayiilaa; aooʼ, ánihidishní, éí dabiʼdisnah, dóó nááná Bóhólníihii bizaad bibee adziilii yee yisdánáhóóʼeezh; dóó nihí díí kéyah bikáaʼjįʼ nihiʼdeetʼeezh, dóó kweʼé éí Diyin God bisodizin bá hooghan díí kéyah bikááʼgóó hadeidiilaa.

6 Jó dóó kʼad, ánihidishní, shikʼis danohłíinii, díí sodizin bá hooghan daʼnoohtahígíí, nihizhéʼé dabiʼdisnahą́ą́sh béédaohłniih? Aooʼ, dóó Bóhólníihii bibee ajoobaʼ dóó bá bichʼįʼ nahwiisnáʼígíísh tʼáá átʼé béédaohłniih? Dóó índa nááná, chʼį́įdiitahdę́ę́ʼ yisdánáyíʼeezhígíísh béédaohłniih?

7 Jó, éí éí bijéí łahgo átʼéego ánáyiidlaa; aooʼ, tsʼídá yéigo daʼałhoshdę́ę́ʼ chʼéénísid, dóó éí Diyin God yichʼįʼ chʼéédaashdzid. Jó, chahałheeł ałníiʼgi hólǫ́ǫ́ ńtʼę́ę́ʼ; ákótʼée ndi, bitsʼíís dóó biyiʼsizíinii éí hoolʼáágóó saad bee adinídíinii bee bitsʼádaʼdeezdíín daazlį́į́ʼ; aooʼ, anoonééł bináztʼiʼ ńtʼę́ę́ʼ, dóó chʼį́įdiitahdi bibéésh daʼahólzhaʼí, dóó hoolʼáágóó tiʼhooʼnííh éí habaʼ ńtʼę́ę́ʼ.

8 Dóó kʼad nanihídíshkid, shikʼisóó, ndaaztseedísh? Jó, ánihidishní, Ndagaʼ, tʼáá dooda.

9 Dóó nááná naʼídíshkid, anoonééł bináztʼiʼę́ę́sh kʼínídláád, dóó daʼ béésh daʼahólzhaʼí bináztʼiʼę́ę́sh náostah? Shí ánihidishní, Aooʼ, éí éí ńdaostah, bitsʼíís dóó biyiʼsizíinii bił dahóózhǫǫd, dóó ayóó óʼóʼní bee yisdánáʼiildéehii yee dahóótáál. Dóó ánihidishní éí éí yisdábiʼdooʼnil.

10 Dóó kʼad nanihídíshkid haʼátʼíísh binahjįʼ yisdábiʼdooʼnil? Áko, haʼátʼíísh éí binahjįʼ yisdánáʼiildééh bee hoł chodahooʼį́į́ ńtʼę́ę́? Haʼátʼíísh éí biniinaa anoonééł honááztʼiʼę́ę, aooʼ, dóó ałdóʼ, chʼį́įdiitahdi bibéésh daʼahólzhaʼí ńdaostah?

11 Jó, nihił hodeeshnih—daʼ shizhéʼé Alma Abinadi bizaad bizééʼdę́ę́ʼ yee naʼneeztą́ʼą́ąsh yoosdląąd neʼ? Dóó Diyin God yá halneʼíísh nilį́į́ ńtʼę́ę́ʼ neʼ? Daʼ Diyin God bizaad yee haadzíiʼ neʼ, dóó shizhéʼé Alma yoosdląąd neʼ?

12 Dóó beʼoodląʼígíí bikʼehgo bijéí tsʼídá tʼáá íiyisíí łahgo ádzaa. Jó ánihidishní díí éí tʼáá ałtso tʼáá aaníí.

13 Jó áádóó, éí saad nihizhéʼé yee ninááneineeztą́ą́ʼ, áádóó bijéí ałdóʼ yéigo łahgo ánáádáádzaa, dóó Diyin God tʼáá aaníinii dóó hináanii yichʼįʼ hojoobaʼ ádaʼdiilyaa dóó yaa dajoozliʼ. Jó áádóó, tʼáá daʼoodlą́ągo iiná ádayiilaa; éí bąą yisdábiʼdooʼnil.

14 Dóó jó kʼad, nanihídíshkid, shikʼisóó díí sodizin bá hooghan daʼnoohtahígíí, diyinkʼehgoósh náádanihishchį́? Daʼ nihiniiʼjįʼísh ánoolninígíí bee nihitsʼádaʼdeezdíín? Daʼ díigi átʼáoósh nihijéí tʼáá íiyisíí łahgo ádáádzaa?

15 Daʼ ánihiilaaí binaʼídláii biiʼ niheʼoodląʼásh chodaołʼį́? Daʼ niheʼoodląʼ bee náásgóó dísóoʼį́į́ʼ, dóó nihitsʼíís dadootsaałiísh hoolʼáágóó hináa dooleełgo nółʼį́, dóó díí adííłdzidígíísh doo dííłdzidgóó ńdidooʼnahgo, Diyin God yidááhdóó yidoozįįł dóó atsʼíís dadootsaałgo iʼiilaa yę́ę bikʼehgo bá nahodootʼááł?

16 Shí ánihidishní, baa ntsóhkeesgo Bóhólníihii binééʼ dasidoołtsʼą́ąʼgoshąʼ, áajįʼ ayííłką́ągo, kónihiłníigo: Wóshdę́ę́ʼ shaa hohkááh nihikʼidahojisdliʼii, jó háálá, nahasdzáán bikáaʼgi nihinaanish yáʼátʼéehgo ádaoohłaa?

17 Éí doodago daatsʼí Bóhólníihii áajįʼ ayííłką́ągo bińdaʼdiidloh danohsingo baa ntsídaahkees, dóó kódidoohniił—Bóhólníihii, nihinaanish éí nihookááʼ bikáaʼgi ndaanish yáʼádaatʼééh ńtʼę́ę́ʼ—daʼ áádóósh yisdánánihidoonił?

18 Éí doodago, daʼ Diyin God beʼaadahwiinítʼį́įhii bidááhdę́ę́ʼ nihiʼdoolzį́įʼgo nihitsʼíís dóó nihiyiʼsizíinii bąąhági óohdzaaígíí nihiʼdiiłʼáhígíí dóó baa yínííł nínízinígíí biiʼ hadeezbingoósh baa ntsídoohkos, bąąhági óohdzaago nihiʼdiiłʼáhígíí tsʼídá ałtso bénáhłniihgo, aooʼ, tsʼídá tʼaa ákótʼéego tʼáá átʼé bąąhági óohdzaa yę́ę bénáhłniihgo, aooʼ, Diyin God bibeehazʼáanii doo nihił nilínę́ę bénáhłniihgo?

19 Ánihidishní, daʼ áajįʼ ayííłką́ągo daatsʼí Diyin God bichʼįʼ dego dídóohʼįįł nihijéí niłtólí dóó nihílaʼ chin bąąh ádingo? Ánihidishní, Diyin God ánoolninii nihiniiʼjįʼ bee bitsʼádaʼdeezdíingoósh bee dego dídóohʼįįł?

20 Ánihidishní, daʼ yisdáshidiʼdooltééł daatsʼí nohsin chʼį́įdii beʼiiníziinii bikééʼ ninooyáago?

21 Ánihidishní, éí bijį́ nihił bééhodoozįįł doo yisdánihidiʼdooltéłígíí; háálá diné doo yisdádooltéeł da tʼáá hazhóʼó beʼééʼ łigaigo yisgisgo tʼéiyá; aooʼ, beʼééʼ tsʼídá doo bąąh chin da silį́įʼgo índa, nihizhéʼé yaa dahalneʼę́ę bidił bee, éí doogááł dóó bidineʼé bibąąhági ádaatʼéii yá nináʼdoodlééł.

22 Dóó kʼad nihííníshkeed, shikʼisóó danohłíinii, Diyin God bibee ánihwiitʼaahdi dasitánígíí bidááhdę́ę́ʼ, niheʼééʼ dił dóó tʼóó ahayóí tʼáadoo leʼé tʼóó baaʼihígíí bąąhgo, tsʼídá shąʼ haʼátʼíí nohsin dooleeł? Jó, díí éí haʼátʼíí yee nihaa halneʼ dooleeł?

23 Jó ndaʼałtseedii danohłį́įgoósh yaa hodoolnih, aooʼ, dóó bąąhági átʼéii ląʼída baa nisoohkaiígíí ałdóʼ yaa hodoolnih?

24 Jó, shikʼisóó nohłíinii, háiidaísh Diyin God bił hazʼą́ądi, Abraham, dóó Isaac, dóó Jacob, dóó ałdóʼ Diyin God yá dahalneʼii tʼáá ałtso, beʼééʼ daasgis dóó doo daachinii, dóó doo daabąąhii dóó daalgaiígíí, yił dah dínóobįįł danohsin?

25 Ánihidishní, Ndagaʼ; tʼáá hazhóʼó hodeeyáádą́ą́ʼ Ánihiilaaígíí biyoochʼííd ádaahłéehgo tʼéiyá, éí doodago tʼáá hodeeyáádą́ą́ʼ biyoochʼííd danoozį́įʼgo, éí ákódaatʼéii yáʼąąsh bił hazʼą́ądi yah adookahgo baa ntsídadoohkosgo doo bíighah da; ndi ákódaatʼéii éí chʼíidínóołkał háálá éí chʼį́įdii beʼiiníziinii bił hazʼáanii baʼáłchíní danilį́.

26 Jó dóó kʼad, ánihidishní, shikʼis danohłíinii, nihijéí łahgo ádzaaígíí biiʼ nisoohyáádą́ą́ʼ, dóó kʼadę́ę sin ayóó óʼóʼní bee yisdánáʼiildéehii bee dahohtaałgo noozį́įʼgo, nanihídíshkid, daʼ kʼadísh tʼahdii tʼáá ákodanohsin?

27 Daʼ Diyin God binááł doo bíighahí baa naaháago, wohááł ńtʼę́ę́ʼ? Kʼad náánihidiʼdoolyééł, nihiʼdooʼniidgo, daʼ nihiyiʼdi, hojoobaʼ hwiinidzin bíighahgo biiʼ niséyá dadidoohniił? Daʼ Christ bidił biníkááʼ góneʼ niheʼééʼ yisgis dóó łigaigo ályaa, éí éiyá bidineʼé bibąąhági átʼéii yá nináʼdoodlééł?

28 Jó, daʼ ádaa hodzódlí atsʼádasidoohtʼą́? Ánihidishní, doo atsʼádadoohtʼaahgóó díí tʼah doo óhłéehgo Diyin God baa dooháałgo doo bichʼįʼ hashtʼeʼádoołyaa da. Jó áko tsxį́įłgo hashtʼeʼádółnééh; háálá yáʼąąsh bił hazʼą́ądi kʼadę́ę baa hoolzhíísh, dóó háiida doo kótʼéhígíí éí hoolʼáágóó iiná doo baa doolyéeł da.

29 Jó, ádíshní, háísh ił hatsoh tʼah doo nahjįʼ bá kólnéeh da? Ánihidishní kótʼéhígíí éí doo hashtʼeʼádiilyaa da; dóó tsxį́įłgo hashtʼeʼádidoolnííł nisin; háálá áajįʼ aʼdoolkiłígíí kʼadę́ę baa hoolzhíísh, dóó hahgo baa hodoolzhishígíí doo bił bééhózin da; éí éí chin bąąhgo baa ákohodínóozįįł.

30 Dóó ánáánihidishní, daʼ nihitahgoósh łaʼ bikʼis yá nahałtʼiʼ, éí doodago tʼáá íiyisíí yichʼįʼ nahwiiłná?

31 Yíi bił hólǫ́ǫ dooleeł, háálá doo hashtʼeʼádiilyaa da, dóó beʼiinaʼ łahgo ánéidoodlíiłgo baa hoolzhíísh éí doodago éí doo yisdádoogáał da!

32 Aooʼ, tʼáá ánółtso bąąhági átʼéii bindaałnishígíí ndi yíi nihikʼi silá; niheʼiinaʼ łahgo áńdaahdlééh, niheʼiinaʼ łahgo áńdaahdlééh, háálá Bóhólníihii Diyin God éí yee haadzííʼ!

33 Jó, diné tʼáá ałtso hágo yiłní, háálá bibee ajoobaʼ éí yee yichʼįʼ dah dilnííh, dóó ání: Niheʼiinaʼ łahgo áńdaahdlééh, dóó shił dahonohłǫ́.

34 Aooʼ, éí kóní: Shaa hohkááh dóó tsin bee iináanii bineestʼąʼ doohsį́į́ł; aooʼ, bááh dóó tó bee iináanii tʼáadoo baa hochʼįʼígo wohsą́ dóó woohdlą́ą dooleeł.

35 Aooʼ, shaa hohkááh dóó naanish yáʼátʼéehii ádaahłééh, áko doo niʼjįʼ kʼínihidiʼdoolkał da dóó doo kǫʼ biih nihidiʼdooltłʼił da—

36 Jó háálá, kʼadę́ę baa hoolzhíísh tʼáá háiida tʼáadoo neestʼą́ yáʼátʼéehii áyiilaaígíí, éí doodago naanish yáʼátʼéehii doo ííłʼínígíí, éí jicha dóó yínííł jílínígíí biniiyéii hólǫ́.

37 O bąąhági átʼéii bindaałnishii; índa nihí nahasdzáán bikááʼ naadeełii bee nihił dahatsohgo, índa nihí yáʼátʼéehgo iiná nihił béédahózin dadohní ákótʼée ndi bitsʼádanoohkai, dibé baa áhályáanii ádin nahalingo, azhą́ dibé yaa áhályáanii łaʼ nihikééʼdóó tʼahdii nihikééʼ ání, ndi doo binééʼ bikʼeh dahwiinołʼįį da!

38 Jó, ánihidishní, dibé yaa áhályáanii yáʼátʼéehii nihichʼįʼ ání; aooʼ, tʼáá bí bízhiʼ yee nózhí, éí Christ bízhiʼ; dóó dibé yaa áhályáanii yáʼátʼéehii binééʼ doo bikʼeh honołʼį́įgo, ázhiʼ yee nihíízhiʼígíí bee, jó, doo dibé yaa áhályáanii yáʼátʼéehii bidibé danohłį́į da.

39 Dóó kʼad doo dibé yaa áhályą́ yáʼátʼéehii bidibé nohłį́įgo, háíshąʼ bidibé dahikahii bitah dahonohłǫ́? Jó, ánihidishní, chʼį́įdii beʼiiníziinii éí nanihiniłkaad, dóó áájígo dibé dah yikahígíí daʼnoohtah; dóó kʼad háísh éí díí doo ákótʼée da didooniił? Jó, ánihidishní, tʼáá háiida díí doo ákótʼée da nínígíí éí biyoochʼííd dóó chʼį́įdii beʼiiníziinii beʼawééʼ nilį́.

40 Háálá ánihidishní haʼátʼííshį́į́ yáʼátʼéhígíí éí Diyin God bitsʼą́ą́dę́ę́ʼ, dóó haʼátʼííshį́į́ doo yáʼátʼéhígíí éí chʼį́įdii beʼiiníziinii bitsʼą́ą́dę́ę́ʼ.

41 Éí bąą, diné naanish yáʼátʼéhígíí ííłʼį́įgo éí naʼniłkaadii yáʼátʼéehii binééʼ yidiitsʼaʼ, dóó yikééʼ yigááł; áko háíshį́į́ bąąhági átʼéii binaanish ííłʼínígíí, éí chʼį́įdii beʼiiníziinii beʼawééʼ silį́į́ʼ dooleeł, háálá éí binééʼ yiyíistsʼą́ą́ʼ, dóó yikééʼ yigááł.

42 Dóó háíshį́į́ kódzaaígíí éí hachʼįʼ nʼdoolyééł; éí bąą, anoonééł éí hachʼįʼ bee nʼdoolyééł, yáʼátʼéehii bitsʼą́ą́jí jílį́įgo, tʼáá ałtso naanish yáʼátʼéehii bichʼįʼ ájídin dooleeł.

43 Dóó kʼad, shikʼisóó danohłíinii, dashíídóołtsʼįįł, háálá shitsʼíís dóó shiyiʼsizíinii beʼadziil bee nihichʼįʼ yáshtiʼ; jó háálá, tsʼídá tʼáá bééhózínígo nihichʼįʼ haasdzííʼ áko doo adoohsiihgóó, éí doodago Diyin God bibeehazʼáanii bikʼehgo haasdzííʼ.

44 Háálá kótʼéego hadeesdzih biniiyé shiʼdoolʼaad, Diyin God bibee oʼoolʼįįł bikʼehgo, éí Christ Jesus biyiʼ; aooʼ, diné bidááhdę́ę́ʼ ndíínaał dóó danihizhéʼé yę́ę náasdi baa dahodoolzhish daanínę́ę baa hodíílnih shiʼdooʼniid.

45 Dóó doo éí díí tʼéiyá da. Tʼáá shí shił bééhózinísh danohsin? Jó, díí bee nihichʼįʼ haasdzíʼígíí éí tʼáá aaníí ádaatʼéego shił bééhózin. Dóó haitʼáo éí díí tʼáá aaníí ádaatʼéhígíí shił bééhózin danohsin?

46 Jó, ánihidishní, Diyin God biʼIiʼsizį́ Diyinii shił ííshją́ą́ áyiilaa. Jó, tʼáá shí shił bééhodoozįįł nisingo tʼáadoo ashání dóó tʼóó sodiszingo tʼóó ahayóí yiską́. Dóó kʼad éí díí tʼáá aaníí ádaatʼéego tʼáá shí shił bééhózin silį́į́ʼ; háálá Bóhólníihii Diyin God biʼIiʼsizį́ Diyinii yee shił ííshjání áyiilaa; dóó díí iiʼsizį́ ííshją́ą́ éʼéłʼíinii shiiʼ hólǫ́ǫgo átʼé.

47 Dóó ałdóʼ nááná, ánihidishní díí éí shił ííshjání ályaa, nihizhéʼé saad yee hadahaasdzíʼę́ę éí tʼáá aaníí ádaatʼé, azhą́ iiʼsizį́ ííshją́ą́ éʼéłʼíinii shiiʼ hólónígíí bikʼehgo ndi, jó éídóʼ Diyin God biiʼSizíinii bee átʼé.

48 Ánihidishní, áko náásgóó ádahodoonííł, bee nihichʼįʼ hadeesdzihígíí, éí tʼáá shí tʼáá aaníí átʼéego shił bééhózin, dóó ánihidishní, Jesus Christ doogáłígíí éí shił bééhózin, aooʼ, aYeʼ, aTaaʼ Tʼáá éí Tʼéiyá Bá Yizhchíinii, diyingo joobaʼ, dóó ajoobaʼ, dóó tʼáá aaníinii biiʼ hólóonii. Jó áádóó, eii éí nihookááʼ dineʼé bibąąhági átʼéii nahjįʼ kwíidoolííł biniiyé yighááh, aooʼ, diné tʼáá ałtso bibąąhági ádaatʼéii bidziilgo bízhiʼ binahjįʼ daʼoodlą́ągo yikééʼ naazínígíí.

49 Dóó kʼad ánihidishní díí beehazʼáanii bikʼehgo shinaanish ályaa, aooʼ, shikʼisóó ayóí ánihííníshʼníinii nanishtin doo biniiyé, aooʼ, dóó tʼáá ałtso ákǫ́ǫ́ kéyah yikááʼgóó kéédahatʼíinii; aooʼ, tsʼídá tʼáá ałtso nanishtin doo, hadaastihii dóó ániid ndaakaiígíí tʼáá áłaʼ, dóó naalteʼé danilíinii dóó tʼáá bíniikʼehgo naaldeehii; aooʼ, ánihidishní náás dasoolį́įʼii, dóó tʼáá bitaʼígíí ndanohseʼígíí, dóó ániid hanáánoohtʼáanii; aooʼ, bichʼįʼ ádideeshniił niheʼiinaʼ łahgo ádaahłééh dóó nináádanihiʼdiichííh.

50 Aooʼ, Iiʼsizíinii éí kóní: Niheʼiinaʼ łahgo ádaahłééh, tsʼídá tʼáá ánółtso nahasdzáán bikáaʼgi kéédahohtʼíinii, háálá yáʼąąshdi bił hazʼáanii éí kʼadę́ę nihichʼįʼ kólnééh; aooʼ, Diyin God biYeʼ beʼayóó átʼéii, bibee achiin, bibee ádílzinii, bibee adziilii, dóó bibee óhólníihii, yee nihaa yighááh. Aooʼ, shikʼisóó ayóí ánihííníshʼníinii, ánihidishní, Iiʼsizíinii ání: Jó nahasdzáán tʼáá átʼé nineesʼą́ąjįʼ biNaatʼáanii bibee ayóó átʼéii; dóó ałdóʼ yáʼąąshdi Naatʼáanii nilíinii hodíinaʼgo bílaʼashdlaʼii baʼáłchíní tʼáá ałtso bitahgóó bee adinídíín dooleeł.

51 Dóó Iiʼsizíinii ałdóʼ áshiłní, aooʼ, binééʼ bidziilgo yee shichʼįʼ hadoolghaazh, kóníigo: Diné bitahgóó dínááh dóó kóbidiní—Niheʼiinaʼ łahgo ádaahłééh, háálá tsʼídá bąąhági átʼéii niheʼiinaʼ łahgo ádaoohłaago tʼéiyá yáʼąąshdiígíí deidoołbįįł.

52 Dóó ánáánihidishní, Iiʼsizíinii ání: Jó, tsénił éí tsin bikétłʼóolgi niitʼą́; éí bąą tsin bineestʼąʼ tʼáá ałtso doo yáʼátʼéehgo éí kʼídahidoolniił dóó kǫʼ biyiʼ góneʼ ahidooltłʼił, aooʼ, kǫʼ doo nitséesii, índa kǫʼ doo dínóoltsisii átʼé. Jó, dóó béédaohłniih, Ayóó Átʼéii yee haadzííʼ.

53 Dóó kʼad shikʼisóó ayóí ánihííníshʼníinii, ánihidishní, díí saadígíísh bídanółdzil doo; aooʼ, daʼ díísh nahjįʼ kódadoohłííł, dóó Ayóó Átʼéiísh tʼóó bikʼindoohkah; aooʼ, daʼ nihijéí biyiʼdę́ę́ʼ ádaa hodzódlí bee ádaa dahohniih dooleeł, aooʼ, daʼ ééʼ daʼílíinii tʼah biiʼ nishoojééʼ dooleeł dóó nihookááʼ bikáaʼgi tsʼídá aláahdi nidzinígíí nihijéí yíká ádáátʼį́, éí nihinaadeełii daʼílíinii átʼé?

54 Aooʼ, índa daʼ tʼahdii nááná łaʼ diné biláahgo áníshtʼé tʼah danohsin, aooʼ, daʼ tʼah ndiísh nihikʼisóó atídaałʼį́į dooleeł, hojoobaʼ ádaʼdiilyaa dóó Diyin God ayóó átʼáo bibee oʼoolʼįįł yikééʼ deíkááh; binahjįʼ díí sodizin bá hooghan biyiʼjįʼ yah ábiʼdiishtʼeezh, Iiʼsizį́ Diyinii hadaałtʼé ádabiilaa, dóó iiná łahgo álnééh binaʼanishígíí ndeiyiijááh—

55 Aooʼ, dóó daʼ diné baa dahojoobáʼí, dóó bichʼįʼ ańdahaztʼiʼígíí, dóó doo baa daʼnohłéego, dóó nihinaalyeʼé bichʼįʼ baa danohchįʼ?

56 Dóó akéeʼdi, tʼáá ánółtso bąąhági átʼéii doo niʼkódaałéehii, ánihidishní díí kódaatʼéí éí kʼíhidoolniił dóó tsídzáhídóótłʼił tʼáá hazhóʼó tsxį́įłgo beʼiinaʼ łahgo ádayiilaago tʼéiyá.

57 Dóó kʼad ánihidishní, tʼáá ánółtso naʼniłkaad yáʼátʼéehii binééʼ bikééʼ yiikah dooleeł danohsinígíí, doo yáʼátʼéehii bitahdę́ę́ʼ chʼíhóhkááh, dóó tʼáá sahdii danohłį́, dóó binichxǫ́ǫ́ʼí tʼáadoo bídadołnihí; jó áádóó, bízhiʼ éí nahjįʼ kódadoolnííł, áko diné doo yáʼádaatʼéehii éí diné yáʼádaatʼéehii doo bízhiʼ bił daʼóltaʼ da dooleeł, áko Diyin God bizaad biʼdoolnííł, éí kóní: Diné doo yáʼádaashóonii dabízhiʼ éí shidineʼé dabízhiʼígíí doo bił daʼatah da dooleeł.

58 Háálá diné yáʼádaatʼéehii éí iináájí naaltsoos bízhiʼ bikááʼ ádadoolnííł, áádóó éí shinishʼnáájí bee aa hidishʼaahii bichʼįʼ kódeeshłííł. Dóó kʼad, shikʼisóó danohłíinii, haash yitʼéego éí díí bikʼijįʼ hadoohdzih? Shí ánihidishní, bikʼijįʼ haahdziihgo, éí éí bíniʼdii, háálá Diyin God yee haadzíʼígíí éí biʼdoolnííł.

59 Háálá háíshąʼ nihitahdóó naʼniłkaadii bilį́į́ʼ tʼóó ahayóígíí doo yaa áhályą́ą da dooleeł, áko doo mąʼiitsoh bilį́į́ʼ yitah yílyeed da dóó doo bitsʼą́ą́ʼ adoolghał da? Jó áádóó, mąʼiitsoh bilį́į́ʼ yitah yilwogo daʼ doósh nahjįʼ baa adoolwoł da? Aooʼ, dóó índa akéeʼdi, yíighahgo da, yidiyoołhééł.

60 Dóó kʼad ánihidishní naʼniłkaadii yáʼátʼéehii éí nihichʼįʼ ání; dóó binééʼ yísínóołtsʼą́ąʼgo atah doohááł, dóó bidibé nohłį́į dooleeł; dóó ánihiłní mąʼiitsoh tʼáá íiyisíí dichin nilíinii éí doo łaʼ nihitah doolwoł da, áko doo nihidiyoołhéeł da.

61 Dóó kʼad shí, Alma, díí kóshidííniidígíí bizaad bee kónihidishní, díí saad bee nihichʼįʼ haasdzíʼígíí hazhóʼó bidaʼdoohłííł.

62 Díí éí beehazʼáanii bikʼehgo nihí sodizin bá hooghan atah danohłínígíí bee nihichʼįʼ yáshtiʼ; dóó doo sodizin bá hooghan atah danohłínígíí éí ałdóʼ wóshdę́ę́ʼ nihidishníigo yáshtiʼ, kódishníigo: Hágo dóó iiná łahgo álnééhjí tó bee danihiʼdilzį́į́h, ákohgo nihídóʼ tsin bee iináanii bineestʼąʼ atah dadoohsį́į́ł.