1 Pea naʻe hoko ʻo pehē ʻi hono hongofulu mā taha ʻo e taʻu ʻo e pule ʻa e kau fakamāú ki he kau Nīfaí, ʻi hono nima ʻo e ʻaho ʻo e māhina hono uá, hili ha fuʻu melino lahi ʻi he fonua ko Seilahemalá, pea kuo ʻikai ke ʻi ai ha tau pe ko ha fakakikihi ʻi he taʻu ʻe niʻihi, ʻo fai mai ki he ʻaho hono nima ʻo e māhina hono ua ʻo hono hongofulu mā taha ʻo e taʻú, naʻe ongona ʻi hono kotoa ʻo e fonuá ʻa e kaila ki he tau.

2 He vakai, kuo hū mai ʻa e ngaahi kau tau ʻo e kau Leimaná mei he feituʻu maomaonganoá, ki he ngaahi ngataʻanga ʻo e fonuá, ʻio ʻo aʻu mai ki he kolo ko ʻAmonaihaá, ʻo nau kamata ke tā ʻa e kakaí mo fakaʻauha ʻa e koló.

3 Pea ko ʻeni naʻe hoko ʻo pehē, ʻi he teʻeki ai lava ʻe he kau Nīfaí ʻo tānaki ha kau tau tokolahi feʻunga ke tekeʻi ʻa kinautolu mei he fonuá, kuo nau fakaʻauha ʻa e kakai naʻe ʻi he kolo ko ʻAmonaihaá, pea mo ha niʻihi foki ʻi he ngaahi ngataʻanga fonua ʻo Noá, mo nau ʻave pōpula ʻa e niʻihi kehe ki he feituʻu maomaonganoá.

4 Pea naʻe hoko ʻo pehē naʻe fakaʻamu ʻe he kau Nīfaí ke fakahaofi ʻa kinautolu kuo ʻave pōpula ki he feituʻu maomaonganoá.

5 Ko ia, ko ia ia kuo fakanofo ko e ʻeikitau ki he tau ʻo e kau Nīfaí, (pea ko hono hingoá ko Sōlami, pea naʻe toko ua hono ongo fohá, ko Līhai mo ʻEiha)—ʻi he ʻiloʻi ʻe Sōlami foki mo hono ongo fohá, ko e taulaʻeiki lahi ʻa ʻAlamā ki he siasí, pea ʻi heʻenau fanongo kuo ʻiate ia ʻa e laumālie ʻo e kikité, ko ia naʻa nau ʻalu atu ai kiate ia, ʻo nau fehuʻi ke ʻilo meiate ia pe ʻoku finangalo ʻa e ʻEikí ke nau ō ki he feituʻu maomaonganoá ʻo kumi ki honau kāinga, ʻa ia kuo ʻave pōpula ʻe he kau Leimaná.

6 Pea naʻe hoko ʻo pehē naʻe fehuʻi ʻe ʻAlamā ki he ʻEikí ʻi he meʻá ni. Pea naʻe foki mai ʻa ʻAlamā ʻo ne pehē ange kiate kinautolu: Vakai, ʻe aʻa ʻa e kau Leimaná ʻi he vaitafe ko Saitoné ʻi he feituʻu maomaonganoa ki he tongá, ʻo mamaʻo atu ki tuʻa mei he ngataʻanga ʻo e fonua ko Manataí. Pea vakai te mou fetaulaki ai mo kinautolu, ʻi he fakahahake ʻo e vaitafe ko Saitoné, pea ʻe tuku kiate kimoutolu ʻi ai ʻe he ʻEikí ʻa homou kāinga kuo ʻave pōpula ʻe he kau Leimaná.

7 Pea naʻe hoko ʻo pehē naʻe aʻa atu ʻa Sōlami mo hono ongo fohá ʻi he vaitafe ko Saitoné mo ʻenau ngaahi kau taú, ʻo nau laka mamaʻo atu ki tuʻa mei he ngataʻanga ʻo e fonua ko Manataí ki he feituʻu maomaonganoa ʻi he tongá, ʻa ia naʻe tuʻu ʻi he tafaʻaki fakahahake ʻo e vaitafe ko Saitoné.

8 Pea naʻa nau fetaulaki ai mo e kau tau ʻa e kau Leimaná, pea naʻe fakamoveteveteʻi mo tuli ʻa e kau Leimaná ki he loto feituʻu maomaonganoá; pea naʻa nau maʻu honau kāinga kuo ʻave pōpula ʻe he kau Leimaná, pea kuo ʻikai tāmateʻi ha toko taha ʻo kinautolu kuo ʻave pōpulá. Pea naʻe ʻomai ʻa kinautolu ʻe honau kāingá ke maʻu honau ngaahi potu fonua ʻonautolú.

9 Pea naʻe ʻosi pehē hono hongofulu mā taha ʻo e taʻu ʻo e kau fakamāú, pea kuo tekeʻi ʻa e kau Leimaná mei he fonuá, pea kuo fakaʻauha ʻa e kakai ʻo ʻAmonaihaá; ʻio, kuo fakaʻauha ʻa e kakai moʻui kātoa ʻo e kau ʻAmonaihaá, kae ʻumaʻā foki honau fuʻu koló, ʻa ia naʻa nau pehē ʻoku ʻikai lava ʻe he ʻOtuá ʻo fakaʻauha, ko e meʻa ʻi hono fuʻu lahí.

10 Kae vakai, naʻe fakalala ia ʻi he ʻaho pē ʻe taha; pea naʻe haehae ʻa e ngaahi ʻangaʻangá ʻe he fanga kulī pea mo e fanga manu fekai ʻo e feituʻu maomaonganoá.

11 Ka neongo iá, naʻe hili ha ngaahi ʻaho lahi naʻe fokotuʻutuʻu honau ngaahi ʻangaʻangá ʻi he funga ʻo e fonuá, pea naʻe tanu ʻaki ha kelekele siʻi pē. Pea ko ʻeni naʻe pehē fau hono hulu ʻo hono namukuú ko ia naʻe lau taʻu lahi ʻa e ʻikai ke faʻa ʻalu ʻa e kakaí ki he fonua ko ʻAmonaihaá ʻo nofo ai. Pea naʻe fakahingoa ia ko e ʻAuhaʻanga ʻo e kau Nēhoá; he naʻa nau kau ki he kautaha ʻo Nēhoá, ʻa ia naʻe tāmateʻí; pea naʻe lala ai pē honau ngaahi potu fonuá.

12 Pea naʻe ʻikai toe haʻu ʻa e kau Leimaná ke tauʻi ʻa e kau Nīfaí ʻo aʻu mai ki hono hongofulu mā fā ʻo e taʻu ʻo e pule ʻa e kau fakamāú ki he kau Nīfaí. Pea ko ia naʻe taʻu ʻe tolu ʻa e ʻi he kau Nīfaí maʻu ai pē ʻa e melinó ʻi hono kotoa ʻo e fonuá.

13 Pea naʻe ʻalu atu ʻa ʻAlamā mo ʻAmuleki ʻo malanga ʻaki ʻa e fakatomalá ki he kakaí ʻi honau ngaahi temipalé, pea ʻi honau ngaahi potu tapú, pea ʻi honau ngaahi fale lotú foki, ʻa ia kuo langa ʻo fakatatau ki he ākenga ʻo e kau Siú.

14 Pea ʻilonga ʻa kinautolu naʻe fie fanongo ki heʻena ngaahi leá, naʻá na fakahā ki ai ʻa e folofola ʻa e ʻOtuá, taʻe ʻi ai ha filifilimānako, maʻu pē.

15 Pea naʻe pehē ʻa e ʻalu atu ʻa ʻAlamā mo ʻAmuleki, kae ʻumaʻā foki ha tokolahi kehe kuo fili ki he ngāue, ke malanga ʻaki ʻa e folofolá ʻi he tukui feituʻu kotoa pē ʻo e fonuá. Pea naʻe mafola hono fokotuʻu ʻo e siasí ʻi hono kotoa ʻo e fonuá, ʻi he ngaahi potu takatakai kotoa pē, ʻi he kakai kotoa ʻo e kau Nīfaí.

16 Pea naʻe ʻikai ke ʻi ai ha tuʻunga taʻetatau ʻiate kinautolu; naʻe lilingi hifo ʻe he ʻEikí ʻa hono Laumālié ki hono kotoa ʻo e funga fonuá ke teuteuʻi ʻa e fakakaukau ʻa e fānau ʻa e tangatá, pe ke teuteuʻi honau lotó ke tali ʻa e folofola ʻa ia ʻe akonaki ʻaki kiate kinautolu ʻi he taimi ʻo ʻene hāʻele maí—

17 Koeʻuhi ke ʻoua naʻa nau fakafefeka honau lotó ki he folofolá, ke ʻoua naʻa nau taʻetui, ʻo fai atu ʻo aʻu ki he fakaʻauhá, ka ke nau tali ʻa e folofolá ʻi he fiefia, pea hangē ha vaʻa ʻoku fakahoko ki he vaine moʻoní, koeʻuhi ke nau lava ʻo hū ki he mālōlōʻanga ʻo e ʻEiki ko honau ʻOtuá.

18 Pea ko ʻeni ko e kau taulaʻeiki naʻe ʻalu atu ʻi he lotolotonga ʻo e kakaí naʻa nau malanga ʻaki foki ʻa hono kovi ʻo e loí, mo e ngaahi kākaá, mo e ngaahi meheká, mo e ngaahi vākoví, mo e fakafāsifasí, mo e ngaahi lea koví, mo e kaihaʻá, faʻao meʻá, veté, mo e fakapoó, mo e tonó, pea mo e faʻahinga ʻo e anga-taʻemaʻa kotoa pē, ʻo nau kalanga ʻoku ʻikai totonu ke nau fai ʻa e ngaahi meʻá ni—

19 ʻO nau fakahā ʻa e ngaahi meʻa kuo pau ke vave ʻene hoko; ʻio, naʻa nau fakahā ʻa e hāʻele mai ʻa e ʻAlo ʻo e ʻOtuá, mo ʻene ngaahi faingataʻaʻiá mo ʻene pekiá, kae ʻumaʻā foki mo e toetuʻu ʻo e maté.

20 Pea naʻe fehuʻi ʻe he kakai tokolahi ki he potu ʻe hāʻele mai ki ai ʻa e ʻAlo ʻo e ʻOtuá; pea naʻe ako kiate kinautolu te ne hā mai kiate kinautolu ʻi he hili ʻene toetuʻú; pea naʻe fanongo ʻa e kakaí ki he meʻá ni ʻi he fiefia mo e nēkeneka lahi.

21 Pea ko ʻeni ʻi he hili hono fokotuʻu ʻo e siasí ʻi he fonuá kotoa—kuo ikunaʻi ʻa e tēvoló, pea kuo malanga ʻaki ʻa e folofola ʻa e ʻOtuá ʻi hono haohaoá ʻi he fonuá kotoa, pea naʻe lilingi hifo ʻe he ʻEikí ʻa ʻene ngaahi tāpuakí ki he kakaí—naʻe ʻosi pehē hono hongofulu mā fā ʻo e taʻu ʻo e pule ʻa e kau fakamāú ki he kakai ʻo Nīfaí.