1 Im ālikin men kein m̧ōj in ruo raan im ruo bon̄ raar itōn bōk ānbwinnin im kōbabuiki ilo lōb eo, eo raar kōm̧m̧ane n̄an kalbwin rimej ro aer.

2 Kiiō lerooj eo ke ej ron̄ kōn bun̄bun̄ in Ammōn, kōn menin eaar ijilōkļo̧k im kōņaan bwe en itok n̄an ippān.

3 Im ālikin men kein Ammōn eaar kōm̧m̧an āinwōt kar jiron̄ e, im eaar ilo̧k n̄an ippān lerooj eo, im kar kōņaan jeļā ta eo eaar kōņaan bwe en kōm̧m̧an.

4 Im eaar ba n̄an e: rijerbal ro an ļein ippa raar kōjjeļāik eō bwe kwōj juon rikanaan ekwōjarjar an Anij, im bwe kwe ewōr am̧ kajoor n̄an kōm̧m̧an elōn̄ jerbal ko reļļap ilo Etan;

5 Kōn menin, eļan̄n̄e ej wāween eo in, ikōņaan bwe kwōn deļo̧n̄ļo̧k im loe ļeo pālleō, bwe eaar babu ilo jikin kiki eo an iien eo aetokan ruo raan im ruo bon̄; im jet rej ba bwe ej jab mej, ak jet rej ba bwe e mej im bwe ewōr nemān, im bwe ej aikuj in babu ilo lōb; ak n̄e n̄a, n̄an n̄a ej jab wōr nemān.

6 Kiiō, en̄in men eo Ammōn eaar kōņaan, bwe eaar jeļā bwe kiin̄ Lamonai eaar pād ium̧win kajoor an Anij; eaar jeļā bwe libobo maron̄ in jab tōmak emarok kar itōn jako jān koļmānļo̧kijeņ eo an, im bwe meram eo eaar kōmeram koļmānļo̧kijeņ eo an, eo eaar meram inaiboojoj an Anij, eo eaar meram ekabwilōn̄lōn̄ in an em̧m̧an—aaet, meram in eaar bōktok lan̄lōn̄ in ilo e, kōdo̧ in marok ālikin aer kar jako, im bwe meram in mour indeeo kar kōmerame jetōb eo an, eaar jeļā bwe men in eaar anjo̧ jān ānbwin eo, im eaar weaakļo̧k ilo Anij—

7 Kōn menin, ta eo lerooj eo eaar kōņaan jān e eaar kōm̧m̧an eo wōt an. Kōn menin, eaar deļo̧n̄ļo̧k n̄an lo kiin̄ eo ekkar āinwōt lerooj eo eaar kōņaan n̄an e; im eaar lo kiin̄ eo, im eaar jeļā bwe eaar jab mej.

8 Im eaar ba n̄an lerooj eo: E ej jab mej, ak ej kiki ilo Anij, im ilo raan eo ilju enaaj bar jerkak; kōn menin jab kalbwini e.

9 Im Ammōn eba n̄an lio: Kwōj tōmak ke men in? Im lio eba n̄an e: Ejjeļo̧k aō kam̧ool ijello̧kun wōt am̧ innaan, im naan an rijerbal ro amro; mekarta ij tōmak bwe enaaj āinwōt ekkar n̄an kwaar ba.

10 Im Ammōn eba n̄an lio: Jeraam̧m̧an n̄an kwe kōnke am̧ tōmak eļap otem ļap; ij ba n̄an eok, kōrā, ej jan̄in kar wōr tōmak in eļap ilubwiljin aolep armej in riNipai raņ.

11 Im ālikin men kein eaar lale ioon jikin babu eo an ļeo pāleen, jān iien eo em̧ool m̧ae iien eo ilo raan eo ilju eo Ammōn eaar ba bwe enaaj jerkak.

12 Im ālikin men kein eaar jerkak, ekkar n̄an naan ko an Ammōn; im ke eaar jerkak, eaar erļo̧keļo̧k pein n̄an kōrā eo, im ba: m̧ōņōņō en etan Anij, im kwe kwōn m̧ōņōņō.

13 Bwe āinwōt kwōj mour, lo, iaar lo Ripinmuur; im Enaaj itok, im naaj ļotak jān kōrā eo, im Enaaj pinmuurii aolep armej ro rej tōmak ilo Etan. Kiiō, ke eaar ba naan kein, būruōn eaar ļapļo̧k ilo e, im eaar bar wōtlo̧k kōn lan̄lōn̄; im lerooj eo barāinwōt eaar wōtlo̧k, kōn obrak kōn jetōb.

14 Kiiō Ammōn ke eaar lo Jetōb in Irooj eaar lutōkleplepļo̧k ekkar n̄an jar ko an ioon riLeman ro, ro jein im jatin, ro raar unin eļap būrom̧ōj ilubwiljin riNipai ro, ak ilubwiljin aolep armej an Anij kōnke nana ko aer im m̧anit ko aer, eaar wōtlo̧k ilo bukien, im eaar jino n̄an lutōkleplep aolep an ilo jar im kam̧m̧oolol n̄an Anij kōn ta eaar kōm̧m̧an n̄an ro jein im jatin; im eaar barāinwōt obrak kōn m̧ōņōņō; im āindein erjeel aolep kar wōtlo̧k n̄an laļ.

15 Kiiō, ke rijerbal ro an kiin̄ eo raar lo bwe erjeel ar wōtlo̧k, er barāinwōt raar jino kūr n̄an Anij, bwe mijak an Irooj eaar itok ioer barāinwōt, bwe eaar er ro raar jutak im̧aan kiin̄ eo im kam̧ool n̄an e kōn kajoor eo eļap an Ammōn.

16 Im ālikin men kein raar kūr ioon etan Irooj, ilo aer kajoor, em̧ool m̧ae iien raar aolep wōtlo̧k n̄an laļ, ijello̧kun wōt juon iaan kōrā in riLeman ro, eo etan eaar Abij, im eaar oktak n̄an Irooj elōn̄ iiō ko, kōnke juon visōn eo eaiboojoj an jemān—

17 Āindein, kōn an kar oktak n̄an Irooj, im jan̄in kar kōnnaan kake, kōn menin, ke eaar lo bwe aolep rijerbal ro an Lamonai raar wōtlo̧k n̄an laļ, im barāinwōt kōrā karo eo an, lerooj eo, im kiin̄ eo, im Ammōn raar erļo̧kleplep ioon laļ, eaar jeļā bwe eaar kajoor in Anij; im kōnke eaar ļōmņak bwe en̄in iien eo, jān kwaļo̧k n̄an armej ro ta eaar waļo̧k ilubwiljier, bwe jān aer lo wāween in enaaj kōm̧m̧an bwe ren tōmak ilo kajoor an Anij, kōn menin eaar ettōrļo̧k jān em̧ n̄an em̧, im kabun̄bun̄ļo̧k n̄an armej ro.

18 Im raar jino kuk tok ippān doon n̄an im̧ōn kiin̄ eo. Im eaar itok jarlepju eo, im n̄an bwilōn̄ eo aer, raar lo kiin̄ eo, im lerooj eo, im rijerbal ro aer raar erļo̧kleplep ioon laļ, im raar erļo̧k ijo āinwōt n̄e raar mej; im raar barāinwōt lo Ammōn im lo, eaar riNipai.

19 Im kiiō armej ro raar jino alin̄ūrn̄ūr ilubwiljier make; jet rej ba bwe eaar nana eļap eaar itok ioer, ak ioon kiin̄ eo im m̧weo im̧ōn, kōnke eaar kōtļo̧k bwe riNipai eo en pād wōt ilo āneo.

20 Im ro jet raar kauwe er, im ba: Kiin̄ eo eaar bōktok nana in ioon m̧weo im̧ōn, kōnke eaar m̧an rijerbal ro an im raar kajjeplōklōk bwijin in kidu ko aer ilo dān ko in Sebus.

21 Im raar barāinwōt bōk kauwe jān ļōm̧aro raar jutak ilo dān ko in Sebus im raar kajjeplōklōk bwijin ko raar an kiin̄ eo, bwe raar illu ippān Ammōn kōnke oran eo eaar m̧an er im ro jeir im jatier ilo dān ko in Sebus, ke eaar baare bwijin ko an kiin̄ eo.

22 Kiiō, juon iaer, eo ļeo jein im jatin kar m̧an e kōn jāje eo an Ammōn, kōnke eaar illu otem illu ippān Ammōn, eaar nōōre jāje eo an im wōnm̧aanļo̧k bwe en maron̄ kōtļo̧k bwe en wōtlo̧k ioon Ammōn, n̄an m̧an e, im ke eaar kotak jāje eo n̄an m̧an e, lo, eaar wōtlo̧k im mej.

23 Kiiō jej lo Ammōn rej jamin kar maron̄ m̧an e, bwe Irooj eaar ba n̄an Mosaia, jemān: Inaaj oņaake e, im enaaj waļo̧k n̄an e ekkar n̄an tōmak eo am—kin men in, Mosaia eaar lōke e n̄an Irooj.

24 Im ālikin men kein ke jarlepju eo eaar lo bwe ļeo eaar wōtlo̧k im mej, eo eaar kotak jāje eo n̄an m̧an Ammōn, lōļn̄o̧n̄ eaar itok ioer aolep, im raar mijak n̄an jab lem̧aanļo̧k peier n̄an jibwe e ak jabdewōt iaan ro raar wōtlo̧k; im raar jino bar bwilōn̄ ilubwiljier ta eo en kar unin kajoor in eļap, ak ta meļeļein aolep men kein.

25 Im ālikin men kein eaar lōn̄ ilubwiljier ro rej ba bwe Ammōn eaar Jetōb Eļap eo, im ro jet rej ba ekar jilkintok jān Jetōb Eļap eo.

26 A ro jet raar kauwe er aolep, im ba bwe eaar juon eakeak, eo kar jilkintok jān riNipai ro n̄an kaammijak er.

27 Im eaar wōr jet raar ba bwe Ammōn kar jilkintok jān Jetōb Eļap eo n̄an kaen̄taan er kōnke nana ko aer; im bwe eaar Jetōb Eļap eo eaar iien otemjej kōjparok riNipai ro, ro kar lo̧mo̧o̧ren er jān peier; im raar ba bwe eaar Jetōb Eļap in eo eaar ko̧kkure elōn̄ iaan ro jeir im jatier, riLeman ro.

28 Im āindein aitwerōk eo eaar jino in kanooj ļap otem ļap ilubwiljier. Im ke raar akwāāl, kōrā karejar eo im eaar kōm̧m̧an bwe jarlepju eo en kuk tok ippān doon eaar itok, im ke eaar lo aitwerōk eo ilubwiljin jarlepju eo lio eaar būrom̧ōj otem būrom̧ōj, em̧ool n̄an jan̄.

29 Im ālikin men kein lio eaar ilo̧k im kabwijer lerooj eo kōn pein, bwe bōlen en maron̄ kōjerkak e jān laļ; im ilo iien eo wōt eaar kabwijer pein eaar jerkak im jutak ioon neen, im kar kūr kōn juon ainikier eļļaaj, im ba: O nebar Jisōs, eo eaar lo̧mo̧o̧ren eō jān hell etōn̄tōn̄ in nana! O nebar Anij, kwōn tūriam̧okake armej rein!

30 Im ke lio eaar ba men in, lio eaar likūt pein ippān doon, kōnke eaar obrak kōn lan̄lōn̄, im eaar kōnono elōn̄ naan ko kar jab meļeļe; im ke lio eaar kōm̧m̧ane men in, lio eaar bōk kiin̄ eo, Lamonai, kōn pein, im lo eaar jerkak im jutak ioon neen.

31 Im ļeo, ejidimkij, ke eaar lo aitwerōk eo ilubwiljin armej ro an, eaar wōnm̧aanļo̧k im jino kauwe er, im n̄an katakin er naan ko eaar ron̄ jān lo̧n̄iin Ammōn; im jon̄an wōt eo eaar ron̄ naan ko an raar tōmak, im kar oktak tok n̄an Irooj.

32 A eaar lōn̄ ilubwiljier ro raar jab ron̄ naan ko an; kōn menin raar ilo̧k ilo iaļ ko aer.

33 Im ālikin men kein ke Ammōn eaar jerkak eaar barāinwōt jerbal n̄an er, im barāinwōt aolep rijipan̄ armej ro an Lamonai; im raar aolep kabun̄bun̄ļo̧k n̄an armej ro ejja men in wōt—bwe burueer raar oktak; bwe ejjeļo̧k aer kōņaan n̄an kōm̧m̧an nana.

34 Im lo, elōn̄ raar kabun̄bun̄ļo̧k n̄an armej ro bwe raar ellolo enjeļ raņ im raar kōm̧m̧ao ippāer; im āindein raar ba n̄an er men ko an Anij, im kōn An weeppān.

35 Im ālikin men kein eaar lōn̄ raar tōmak ilo naan ko aer; im jon̄an wōt eo eaar tōmak raar peptaij; im raar erom juon armej eweeppān, im raar kajutak kabun̄ eo ilubwiljier.

36 Im āindein jerbal eo an Irooj eaar ijjino ilubwiljin riLeman ro; āindein Irooj eaar jino in lutōkleplep Jetōb eo An ioer; im jej lo bwe Pein ej erļo̧k n̄an aolep armej ro renaaj ukeļo̧k im tōmak ioon Etan.