1 Anajwan, naq laj Ammon yoo chi jo’kan chixtzolb’aleb’ lix tenamit laj Lamoni rajlal, toosutq’iiq rik’in resilal laj Aaron ut eb’ lix komon; xb’aan naq chirix naq ki’el chaq sa’ li ch’och’ Middoni kib’eresiik xb’aan li Musiq’ej sa’ li ch’och’ Nefi, toj sa’ rochoch li rey li wan sa’ xb’een chixjunil li ch’och’, ka’ajwi’ li ch’och’ Ismael ink’a’; ut a’an lix yuwa’ laj Lamoni.

2 Ut kik’ulman naq ki’ok rik’in a’an sa’ rochoch li rey, rochb’een eb’ lix komon, ut kixkub’si rib’ chiru li rey, ut kixye re: K’e reetal, at rey, laa’o lix komon laj Ammon, li xawisi chaq sa’ tz’alam.

3 Ut anajwan, at rey, wi taakol qayu’am, toowanq choq’ aamoos. Ut li rey kixye reheb’: Waklinqex, xb’aan naq texinkanab’ chi yo’yo, ut ink’a’ tinkanab’ naq texwanq choq’ inmoos; a’b’an tinwelaji naq tineetenq’a; xb’aan naq ch’a’ajkilanb’ilin b’ayaq sa’ ink’a’uxl xb’aan xchaab’ilal xch’ool ut xnimal ru li raatin laa wiitz’in aj Ammon; ut nawaj xnawb’al k’a’ru aj-e naq a’an moko xtaqe’ ta chaq aran Middoni aawochb’een.

4 Ut laj Aaron kixye re li rey: K’e reetal, lix Musiq’ li Qaawa’ kixb’oq sa’ jalan chik b’e; xikenaq sa’ li ch’och’ Ismael, re xtzolb’al lix tenamit laj Lamoni.

5 Anajwan li rey kixye reheb’: K’a’ru a’in li xeye chirix lix Musiq’ li Qaawa’? K’ehomaq reetal, a’in li k’a’ru ch’a’ajkilanb’ilin wi’ sa’ lin k’a’uxl.

6 Ut jo’kan ajwi’, k’a’ru a’in li kixye laj Ammon—Wi taajal aak’a’uxl tatkole’q, ut wi ink’a’ taajal aak’a’uxl, tattz’eqe’q sa’ roso’jik li kutan?

7 Ut laj Aaron kichaq’ok chiru ut kixye re: Ma nakapaab’ naq wan jun li Dios? Ut li rey kixye: Ninnaw naq eb’ laj Amalekita neke’xye naq wan jun li Dios, ut kink’e reheb’ naq te’xkab’laheb’ li santil muheb’aal, re te’xch’utub’ rib’ chixloq’oninkil. Ut wi anajwan nakaye naq wan jun li Dios, k’e reetal, laa’in tinpaab’.

8 Ut anajwan naq kirab’i a’in laj Aaron, ki’ok chi saho’k xch’ool, ut kixye: K’e reetal, jo’ chanru naq ch’olch’o naq yo’yookat, at rey, wan jun li Dios.

9 Ut li rey kixye: Li Dios, ma a’an li Xnimal ru Musiq’ej a’an li kik’amok chaq reheb’ li qayuwa’ sa’ li ch’och’ Jerusalen?

10 Ut laj Aaron kixye re: Yaal, a’an li Xnimal ru Musiq’ej a’an, ut kixyo’ob’tesi chixjunil li k’a’aq re ru wan sa’ choxa jo’ ajwi’ sa’ ch’och’. Ma nakapaab’ a’in?

11 Ut a’an kixye: Yaal, ninpaab’ naq li Xnimal ru Musiq’ej kixyo’ob’tesi chixjunil li k’a’aq re ru, ut nawaj naq teeye we chirix chixjunil li k’a’aq re ru a’in, ut laa’in tinpaab’ laa waatin.

12 Ut naq kiril laj Aaron naq li rey tixpaab’ li raatin, kik’ulman naq kitikla rik’in lix yo’ob’tesinkil laj Adan, ut kiril chiru li rey li tz’iib’anb’il sa’eb’ li loq’laj hu—chan ru naq li Dios kixyo’ob’tesi li winq jo’ chanru xjalam-uuch a’an, ut naq li Dios kixk’e xtaqlahom re, ut naq sa’ xk’ab’a’ li q’etok aatin, kit’ane’ li winq.

13 Ut laj Aaron kixch’olob’eb’ li loq’laj hu chiru chalen chaq xyo’ob’tesinkil laj Adan, ut kixk’ut lix t’anik li winq chiru, ut lix wanjikeb’ sa’ li tz’ejwalej, ut jo’kan ajwi’ li k’uub’anb’il na’leb’ re li tojb’al-ix, li kikawresiman chalen chaq sa’ xk’ojlajik li ruchich’och’, sa’ xk’ab’a’ li Kristo, choq’ reheb’ chixjunil li ani te’paab’anq re lix k’ab’a’.

14 Ut sa’ xk’ab’a’ naq t’anenaq li winq, moko xk’ulub’ ta xjunes rib’ naq tixk’ul k’a’ruhaq; a’b’an li rahilal kixk’ul li Kristo ut lix kamik naxtoj rix lix maakeb’, rik’in li paab’aal ut li jalb’a-k’a’uxlej ut xkomon li na’leb’; ut naq a’an naxtoq xb’ak’leb’ li kamk, re naq li muqleb’aal kamenaq moko taawanq ta xq’axom ru, ut re naq lix may li kamk sub’b’ilaq rib’ sa’ xyo’oninkil li loq’alil; ut laj Aaron kixch’olob’ chixjunil li k’a’aq re ru a’in chiru li rey.

15 Ut kik’ulman naq chirix naq laj Aaron kixch’olob’ li k’a’aq re ru a’in chiru, li rey kixye: K’a’ru tinb’aanu re tink’ul li junelik yu’am a’in li kat-aatinak wi’? Relik chi yaal, k’a’ru tinb’aanu re taaruuq tinyo’laaq rik’in li Dios, chi mich’b’il chaq sa’ inch’ool li musiq’ej aj maak a’in, ut tink’ul lix Musiq’ a’an, re naq taaruuq tinnujaq rik’in sahil ch’oolejil, re naq ink’a’ tintz’eqe’q sa’ roso’jik li kutan? K’ehomaq reetal, chan, laa’in tinq’axtesi chixjunil li k’a’ru we, relik chi yaal, tinkanab’ lin awa’b’ejihom, re tinruuq chixk’ulb’al li nimla sahil ch’oolejil a’in.

16 A’b’an laj Aaron kixye re: Wi nakawaj li na’leb’ a’in, wi taakub’si aawib’ chiru li Dios, relik chi yaal, wi taajal aak’a’uxl chirix chixjunil laa maak, ut taakub’si aawib’ chiru li Dios, ut taapatz’ xk’ab’a’ rik’in paab’aal, ut taapaab’ naq tatk’uluq, rik’in a’in taak’ul laa yo’onihom li ajb’il aab’aan.

17 Ut kik’ulman naq chirix naq laj Aaron kixye li aatin a’in, li rey kixkub’si rib’ chiru li Qaawa’, chi wiq’wo; relik chi yaal, toj reetal naq kixhupub’ rib’ chi ch’och’, ut kixjap re chi anchal xmetz’ew chixyeeb’al:

18 At Dios, laj Aaron xye we naq wan jun li Dios; ut wi wan jun li Dios, ut wi laa’at li Dios, ma taak’e taxaq chinnaw aawu, ut laa’in tinq’axtesi chixjunil lin maak re xnawb’al aawu, ut re tinwaklesiiq chaq sa’ xyanqeb’ li kamenaq, ut tinkole’q sa’ roso’jik li kutan. Anajwan ut chirix naq li rey kixye li aatin a’in, kitoch’e’ chanchan naq kamenaq.

19 Ut kik’ulman naq eb’ lix moos xkoheb’ sa’ aanil ut ke’xye re li rixaqil li rey chixjunil li k’a’ru kixk’ul chaq li rey. Ut a’an ki’ok rik’in li rey; ut naq kiril chi huphu chanchan naq kamenaq, ut jo’kan ajwi’ laj Aaron ut eb’ lix komon chi xaqxo chanchan naq xmaakeb’ a’an naq xt’ane’, kichal xjosq’il rik’ineb’, ut kixtaqla naq eb’ lix moos, malaj eb’ lix moos li rey, te’xchapeb’ ut te’xkamsiheb’.

20 Anajwan eb’ li moos xe’ril chaq k’a’ut naq kit’ane’ li rey, jo’kan naq maak’a’eb’ xch’ool chixk’eeb’aleb’ li ruq’ sa’ xb’een laj Aaron ut eb’ lix komon; ut ke’tz’aaman chiru li rixaqil li rey, ut ke’xye: K’a’ut naq nakataqla naq taqakamsiheb’ li winq a’in, naq k’e reetal, li jun reheb’ q’axal kaw wi’chik xmetz’ew chiqu chiqajunil laa’o? Jo’kan naq toot’ane’q chiruheb’.

21 Anajwan naq kiril li rixaqil li rey lix xiweb’ li moos ki’ok ajwi’ chi xuwak chi numtajenaq, maare anchal taachalq junaq maa’usilal sa’ xb’een. Ut kixtaqlaheb’ lix moos naq te’xik ut te’xb’oqeb’ chaq li tenamit, re naq eb’ a’an te’xkamsi laj Aaron ut eb’ lix komon.

22 Anajwan naq kiril laj Aaron naq k’eek’o xch’ool li rixaqil li rey, a’an, rik’in naq naxnaw ajwi’ ru xkawileb’ raam li tenamit, kixuwak maare anchal taach’utlaaq jun tuub’ chi tenamit, ut taawanq li nimla wech’ok-ib’ ut choqink sa’ xyanqeb’; jo’kan naq kixye’ li ruq’ ut kixwaklesi chaq chi ch’och’ li rey, ut kixye re: Xaqlin. Ut a’an qixaqli chiroq, ut kixk’ul xmetz’ew.

23 Ut a’in kib’aanuman chiru li rixaqil li rey ut naab’aleb’ li moos. Ut naq ke’ril, k’a’jo’ naq ke’sach xch’ooleb’, ut ke’ok chi xuwak. Ut kixxaqab’ rib’ li rey chi uub’ej, ut ki’ok chi k’anjelak chiruheb’. Ut kik’anjelak chiruheb’, jo’kan naq chixjunil lix junkab’al ke’jale’ xch’ool choq’ re li Qaawa’.

24 Anajwan kiwan jun tuub’ li tenamit chi ch’utch’u xb’aan xtaqlahom li rixaqil li rey, ut kitikla li nimla wech’ink sa’ xyanqeb’ sa’ xk’ab’a’ laj Aaron ut eb’ lix komon.

25 A’b’an li rey kixxaqab’ rib’ sa’ xyanqeb’ ut kik’anjelak chiruheb’. Ut ke’tuqub’aak xch’ooleb’ chirix laj Aaron ut eb’ li wankeb’ rochb’een.

26 Ut naq kiril li rey naq ke’tuqla xch’ool li tenamit, kik’ulman naq kixk’e naq laj Aaron ut eb’ lix komon te’xxaqab’ rib’ sa’ xyiheb’ li ch’utch’uukil tenamit, ut naq te’xjultika li aatin chiruheb’.

27 Ut kik’ulman naq li rey kixtaqla xjek’inkil jun li aatin chiru chixjunil li ch’och’, sa’ xyanqeb’ chixjunil li tenamit li wankeb’ sa’ chixjunil lix ch’och’, li wankeb’ sa’ chixjunileb’ li na’ajej sa’ xsutam, ut nawulak xnub’aal toj sa’ palaw, sa’ releb’ saq’e ut sa’ rokeb’, ut jachjo ru rik’in li ch’och’ Tzarahemla xb’aan jun ch’ina siir li yamyookil ch’och’, li naxik chire palaw sa’ releb’ saq’e toj chire ajwi’ palaw sa’ rokeb’ saq’e, ut hirho chire li palaw, ut lix nub’aal li yamyookil ch’och’ li wan chixk’atq li ch’och’ Tzarahemla sa’ xnim li saq’e, chiru lix nub’aal Manti, chixk’atq xyo’leb’aal li nima’ Sidon, ut nachal sa’ releb’ saq’e ut naxik sa’ rokeb’ saq’e—ut chi jo’kan jachjookeb’ ru laj Lamanita rik’ineb’ laj Nefita.

28 Anajwan li jun raqal reheb’ laj Lamanita li q’axal aj q’emeb’ neke’wan sa’ li yamyookil ch’och’, ut neke’wan sa’ muheb’aal t’ikr, ut jek’inb’ileb’ chiru li yamyookil ch’och’ sa’ rokeb’ saq’e, sa’ li ch’och’ Nefi; relik chi yaal, ut jo’kan ajwi’ sa’ rokeb’ saq’e sa’ li ch’och’ Tzarahemla, sa’eb’ li nub’aal chire li palaw, ut sa’ rokeb’ saq’e sa’ li ch’och’ Nefi, sa’ xna’aj li xb’een reechanihom lix yuwa’eb’, ut chi jo’kan hirhookeb’ xnub’aal chire li palaw.

29 Ut jo’kan ajwi’ ke’wan naab’al aj Lamanita sa’ releb’ saq’e chire li palaw, b’ar tiikisinb’ileb’ wi’ chaq xb’aaneb’ laj Nefita. Ut chi jo’kan ka’ch’in chik ma sutsuukeb’ laj Nefita xb’aaneb’ laj Lamanita; a’ut eb’ laj Nefita ke’reechani chaq chixjunil li raqal chi ch’och’ sa’ xnim li saq’e li wan xnub’aal chire li yamyookil ch’och’, sa’ xyo’leb’aal li nima’ Sidon, chalen sa’ releb’ saq’e toj sa’ rokeb’, chixsutam sa’ xjayal li yamyookil ch’och’; sa’ xnim li saq’e, toj reetal neke’wulak sa’ li ch’och’ Naab’alil neke’xye re.

30 Ut wan xnub’aal rik’in li ch’och’ Sachenaqil neke’xye re, li q’axal wan sa’ xjayal lix nim li saq’e jo’kan naq nawulak sa’ li ch’och’ li ke’wan wi’ chaq tenamit ut kisache’ chaq, li ak xoo’aatinak wi’ chirix lix b’aqeleb’ a’an, li ke’tawe’ xb’aan xtenamit laj Tzarahemla, a’an li na’ajej ke’wulak wi’ chaq xb’een wa.

31 Ut chalen chaq aran ke’wulak taqe’q sa’ li yamyookil ch’och’ sa’ xtz’e li saq’e. Chi jo’kan li ch’och’ sa’ xjayal lix nim li saq’e Sachenaqil yeeb’il re, ut li ch’och’ sa’ xjayal lix tz’e, li saq’e Naab’alil yeeb’il re, a’an li yamyookil ch’och’ li nujenaq rik’in li k’iila paay chi k’iche’ xul, li jar raqal wan, ut jun siir reheb’ ke’chal chaq sa’ li ch’och’ sa’ xnim li saq’e re xsik’b’al xtzakemq.

32 Ut anajwan, jun kutan rik’in jun wa’leb’ li b’eek choq’ re jun aj Nefita, sa’ xnub’aal Naab’alil rik’in li ch’och’ Sachenaqil, chalen chaq sa’ palaw sa’ releb’ saq’e toj sa’ rokeb’ saq’e; ut chi jo’kan li ch’och’ Nefi ut li ch’och’ Tzarahemla ka’ch’in chik ma sutsu rik’in ha’, yal jun ch’ina ru’uj chi ch’och’ naxjunaji li ch’och’ sa’ xjayal lix nim li saq’e rik’in li ch’och’ sa’ xjayal lix tz’e.

33 Ut kik’ulman naq eb’ laj Nefita ke’ok chaq chi wank sa’ li ch’och’ Naab’alil, chalen chaq li palaw sa’ releb’ saq’e toj sa’ rokeb’, ut chi jo’kan eb’ laj Nefita rik’in xchaab’ilaleb’ xna’leb’, rik’ineb’ lix k’aak’aleneleb’ ut lix teepeb’ aj pleet, ke’xrameb’ chaq laj Lamanita sa’ xtz’e li saq’e, re naq chi jo’kan maak’a’aq chik reechanihomeb’ sa’ xnim li saq’e, re naq ink’a’ te’numtaaq sa’ li ch’och’ sa’ xjayal lix nim li saq’e.

34 Chi jo’kan eb’ laj Lamanita moko te’ruuq ta chik chi wank reechanihomeb’, ka’ajwi’ sa’ li ch’och’ Nefi, ut sa’ li yamyookil ch’och’ chixsutam. Anajwan a’in xchaab’ilal xna’leb’eb’ laj Nefita—rik’in naq eb’ laj Lamanita wankeb’ choq’ aj xik’ ilonel reheb’, ink’a’ te’ch’a’ajkilaaq xb’aaneb’ chi ka’pak’al, ut jo’kan ajwi’ re naq taawanq junaq ch’och’ b’ar wi’ te’ruuq chi eelelik, jo’ chanru li neke’raj.

35 Ut anajwan laa’in, chirix xyeeb’al a’in, ninsutq’i sa’ resilal laj Ammon ut laj Aaron, laj Omner ut laj Himni, ut eb’ lix komoneb’.