1 Pea ko ʻeni vakai, naʻe hoko ʻo pehē naʻe ʻāsili ʻa e ʻita ʻa e kau Leimana ko iá koeʻuhi ko ʻenau tāmateʻi honau kāingá; ko ia naʻa nau fuakava ke sāuni ki he kau Nīfaí; pea naʻe ʻikai te nau toe feinga ke tāmateʻi ʻa e kakai ʻo ʻAnitai-Nīfai-Līhaí ʻi he taimi ko iá.

2 Ka naʻa nau ʻave ʻenau ngaahi konga taú ʻo nau ʻalu atu ki he ngaahi ngataʻanga ʻo e fonua ko Seilahemalá, ʻo nau ʻohofi ʻa e kakai ʻa ia naʻe ʻi he fonua ko ʻAmonaihaá ʻo fakaʻauha ʻa kinautolu.

3 Pea hili iá, naʻa nau fai ha ngaahi tau lahi mo e kau Nīfaí, ʻa ia naʻe tuli ai mo tāmateʻi ʻa kinautolu.

4 Pea naʻe kau ʻi he kau Leimana naʻe tāmateʻí ʻa e meimei kotoa ʻo e hako ʻo ʻAmulone mo hono kāingá, ʻa ia ko e kau taulaʻeiki ʻa Noá, pea naʻe tāmateʻi ʻa kinautolu ʻi he nima ʻo e kau Nīfaí;

5 Pea ko hono toé, hili haʻanau hola ki he feituʻu maomaonganoa ʻi he hahaké, ʻo nau fokotuʻu ke nau maʻu ʻa e mālohi mo e mafai ki he kau Leimaná, pea naʻa nau tuʻutuʻuni ʻa e tokolahi ʻo e kau Leimana ke nau mate ʻi he afi koeʻuhi ko ʻenau tuí—

6 He naʻe ʻi ai ʻa e tokolahi ʻo kinautolu, ʻi he hili haʻanau fuʻu mole lahi pea mo e ngaahi faingataʻa lahi, naʻe kamata ke langaki hake ʻa e manatu ki he ngaahi lea kuo malanga ʻaki ʻe ʻĒlone mo hono kāingá kiate kinautolu ʻi honau fonuá; ko ia naʻe kamata ke nau taʻetui ki he ngaahi talatukufakaholo ʻa ʻenau ngaahi tamaí, pea tui ki he ʻEikí, pea naʻá ne tuku ʻa e fuʻu mālohi lahi ki he kau Nīfaí; ko ia naʻe fakaului ai hanau tokolahi ʻi he feituʻu maomaonganoá.

7 Pea naʻe hoko ʻo pehē ko e kau pule ʻa ia naʻe toe ʻi he hako ʻo e fānau ʻa ʻAmuloné, naʻa nau tuʻutuʻuni ke tāmateʻi ʻa kinautolu, ʻio, ʻa kinautolu kotoa ʻa ia naʻe tui ki he ngaahi meʻa ko iá.

8 Ko ʻeni naʻe langaki ʻe he fakapō ko ʻení ʻa e ʻita ʻa ha tokolahi ʻo honau kāingá; pea naʻe kamata ha fakakikihi ʻi he feituʻu maomaonganoá; pea naʻe kamata ke haʻao ʻa e hako ʻo ʻAmuloné mo hono kāingá ʻe he kau Leimaná ʻo nau kamata ke tāmateʻi ʻa kinautolu; pea naʻa nau hola ki he feituʻu maomaonganoa ʻi he hahaké.

9 Pea vakai ʻoku haʻao ʻa kinautolu ʻe he kau Leimaná ʻo aʻu mai ki he ʻahó ni. Ko ia kuo fakahoko ʻa e ngaahi lea ʻa ʻApinetaí, ʻa ia naʻá ne lea ʻaki ʻo kau ki he hako ʻo e kau taulaʻeiki ʻa ia naʻa nau fekau ke fakamamahiʻi ia ʻaki ʻa e mate ʻi he afí.

10 He naʻá ne pehē kiate kinautolu: Ko e meʻa te mou fai kiate aú, ʻe hoko ia ko ha sīpinga ʻo e ngaahi meʻa ʻe hoko.

11 Pea ko ʻeni ko ʻApinetai ko e ʻuluaki ia naʻe mate ʻi he afi koeʻuhi ko ʻene tui ki he ʻOtuá; ko ʻeni ko e ʻuhinga ʻeni ʻo ʻene leá, ʻe mate ʻa e tokolahi ʻi he afi, ʻo hangē ko ʻene mamahiʻiá.

12 Pea naʻá ne pehē ki he kau taulaʻeiki ʻa Noá ʻe hanga ʻe honau hakó ʻo fakatupu hano tāmateʻi ʻo e kakai tokolahi ʻo hangē tofu pē ko ʻene maté, pea ʻe fakamovetevete holo mo tāmateʻi ʻa kinautolu ʻo hangē ʻoku tuli mo tāmateʻi ʻe he fanga manu fekaí ha fanga sipi ʻa ia ʻoku ʻikai hanau tauhí; pea ko ʻeni vakai, naʻe fakamoʻoniʻi ʻa e ngaahi lea ko iá; he naʻe tuli ʻa kinautolu ʻe he kau Leimaná, pea naʻe haʻao mo tāmateʻi ʻa kinautolu.

13 Pea naʻe hoko ʻo pehē ʻi he ʻiloʻi ʻe he kau Leimaná ʻoku ʻikai te nau lava ʻo ikunaʻi ʻa e kau Nīfaí naʻa nau toe foki atu ki honau fonua ʻonautolú; pea naʻe ō mai hanau tokolahi ʻo nofo ʻi he fonua ko ʻIsimelí mo e fonua ko Nīfaí, pea nau ului ki he kakai ʻo e ʻOtuá, ʻa ia ko e kakai ʻo ʻAnitai-Nīfai-Līhaí.

14 Pea naʻa nau tanu foki mo ʻenau ngaahi mahafu taú ʻo hangē ko ia kuo fai ʻe honau kāingá, ʻo nau fakaʻau ke hoko ko ha kakai māʻoniʻoni; ʻo nau ʻaʻeva ʻi he ngaahi hāʻeleʻanga ʻo e ʻEikí, pea naʻa nau tokanga ke tauhi ʻene ngaahi fekaú mo ʻene ngaahi tuʻutuʻuní.

15 ʻIo, pea naʻa nau tauhi ʻa e fono ʻa Mōsesé; he naʻe kei ʻaonga ke nau tauhi ʻa e fono ʻa Mōsesé, koeʻuhi kuo teʻeki ai ke fakamoʻoniʻi hono kotoa. Ka neongo ʻa e fono ʻa Mōsesé, naʻa nau sio pē ki he hāʻele mai ʻa Kalaisí, ʻo lau ʻa e fono ʻa Mōsesé ko ha sīpinga ʻo ʻene hāʻele maí, ʻo nau tui ʻoku totonu ke nau tauhi ʻa e ngaahi ouau fakatuʻasino ko iá kae ʻoua ke hokosia ʻa e taimi ʻe fakahā mai ai ia kiate kinautolu.

16 Ko ʻeni naʻe ʻikai ke nau pehē ʻoku hoko mai ʻa e fakamoʻuí ʻi he fono ʻa Mōsesé; ka ʻoku ʻaonga pē ʻa e fono ʻa Mōsesé ke fakamālohiʻi ʻenau tui kia Kalaisí; pea ko ia naʻa nau tauhi ha ʻamanaki ʻi he tui, ki he fakamoʻui taʻengatá, ʻo falala ki he laumālie ʻo e kikité, ʻa ia naʻe lau ki he ngaahi meʻa ko ia ʻe hokó.

17 Pea ko ʻeni vakai, naʻe fuʻu fiefia lahi ʻaupito ʻa ʻĀmoni, mo ʻĒlone, mo ʻOminea, mo Himinai, mo honau kāingá, koeʻuhi ko e ngaahi ngāue kuo nau lava ʻi he kau Leimaná, ʻi heʻenau vakai kuo foaki kiate kinautolu ʻe he ʻEikí ʻo fakatatau mo ʻenau ngaahi lotú, pea kuó ne fakamoʻoniʻi foki kiate kinautolu ʻene folofolá ʻo aʻu ki hono kihiʻi konga siʻi kotoa pē.